Read Ngemba Matyo 27 Bible Online

Matyo 27 - Ngemba bible

Matyo 27

¹Njwi ghɨnə ndán, bɨntumshe bə wi bɨtsum abɔʼnɨ bɨkum bɨ alaʼ kəmnɨ ngɨ akyaŋtɨ a njwítɨ́ Yeso ghe.

²Bo kórɨ́ ayi nɨ mɨnkɨ mɨ atɨŋə, ndɔgɨ ayi ngɛn nga a mbó Branto wa Ɨfɔ bə Roma a lɛ́nɨ́ a sáʼ Mbuʼ Yudiya lá.

³Mbáʼ Yudasɨ, ŋwɔn wa a kórɨ́nɨ́ a mɨnaŋ atú Yeso, a zɛ́nɨ́ ngə́ bɨ chɛ́rɨ́ ɨsáʼ Yeso ngə́ a mɨ kfo lá, a bə́ŋ ntəm ɨyi mbə ngɛn nɨ ɨbagɨ tsə́ŋtsə́ŋ tsa mɨghúm mɨntárə́ a mbó bɨntumshe bə wi abɔʼnɨ bɨkum bɨ alaʼ,

⁴ɨ soŋ ngə́, “Ma ghɨ ɨbvu a nkórɨ́ mɨnaŋ, á alɛm a mbuʼ a chwinə!” Bo chwɨ́gɨ́ ngə́, “A nɨ ake aza a mbó bɨgɨ ə? Məza a tiʼ azo ə!”

⁵Wɛrə a wáŋ nkáb atɨŋə tsa a mu Ndáŋwi zɨ Ngwi, ɨ nyɛʼtɨ; ntiʼ fu ngɛn ntɨŋnɨ alə́ŋ ə.

⁶Bɨntumshe bə wi byɛ́n nkáb atɨŋə tsa ɨ soŋ ngə́, “Nə nɨ nkáb alɛm ɨ zɛnə ghe. Ka a kuʼnɨ ayi a nɨ́ŋ zɛrə a mu nɨlɛnɨ nɨ ndáŋwi zɨ ngwi ə.”

⁷Bo tíʼ nkə́mnɨ́, ndzon adiʼ a ɨshe a mbó mbɔm bənto, a ntwə́ŋ ɨkfú bɨghən ɨwu ə.

⁸Ɨ lɔgɨnɨ njwi məwa, bɨ tíʼ nchwi abɨŋ a ɨshe za nɨ Ɨshe Alɛm ɨ yen kuʼ ɨ sɨŋə ghe.

⁹A tíʼ nkɔ́ʼ mbomnkɨ bo anu za ntom Ŋwi za bɨ kɨ́nə́ ntɔ́ŋə́ ngə́ Wemɨyɛrə ɨ sóŋnɨ́ ngə́, “Bɨ tíʼ ndɔgɨ ɨbagɨ tsə́ŋtsə́ŋ tsa mɨghúm mi mɨntárə́, ndvuŋ wa ɨbɛn bɨ Izrai bémnɨ́nɨ́ a ntfúə atú zɨ,

¹⁰ndzuŋ abɨŋ a ɨshe a mbɔm bənto ɨwu, adzaŋ za Maʼmbyí a tɨ́gɨ́tɨ́nɨ́ aghə.”

¹¹Yeso a tɛ́m a ɨshi Branto wa a kɨ́nə́ sáʼə Mbuʼ Yudiya lá. Gobɨna wa a bítɨ́ ayi ngə́, “O lá Ɨfɔ bə Yuda le?” Yeso a chwɨ́gɨ́ ngə́, “A soŋ gho ghe.”

¹²Lá a nkfu za bɨntumshe bə wi abɔʼnɨ bɨkum bɨ alaʼ káŋnɨ́ ayi lá, a sé anu zə tse chwɨgə.

¹³Ma lan, Branto a tíʼ mbítɨ́ ayi ngə́, “O so ndzǔʼ ndvuŋ ɨnu tsa bo kaŋnə agho mbɨ́ʼ a tsɛrə le?”

¹⁴Lá Yeso a sé tsɛʼ táʼ achwɨgə wəmbo gha, kə́ tsɛʼ táʼ achwɨgə ghe. Adzaŋ məwen, a tíʼ nkɨʼnɨ a gobɨna wa be tɨsɨŋə.

¹⁵A yén mbé mbɔm ngə́ a nkfu Nɨdorɨ nɨ Tsa-yɛʼnɨ, Branto a kə́ fɨ́gə́ a ŋwɔn atsáŋ wa nángyérə́ a kɨ́nə́ ndǒ, ngǎ a mbó bo ghe.

¹⁶A kə́ mbé a nkfu məwa lá, ŋwɔn atsáŋ wu tse wa bɨ zhínɨ́nɨ́ ayi a tsí ɨwu, ɨkum ɨyi be Barabasɨ ə.

¹⁷Ma lan, nángyérə́ wa a ghɨnə ngótɨ́ táʼ adiʼ, Branto a bitɨ awa ngə́, “Nɨ lǒ ngə́ á ma nyɛʼtɨ a wɨŋə a mbó bɨŋ ə? A Yeso Barabasɨ kə a Yeso, zɨ wa bɨ tɔ́ŋnə́ ngə́ Wa bɨ Zɔ́ʼnɨ́ lá le?”

¹⁸Wɛrə a zhí ɨ shiʼnɨ ngə́ bo yén ngá a Yeso a mbó zɨ lá mbɨ́ʼ aghɨʼnɨ ə.

¹⁹Mbáʼ Branto a shíʼtɨ́nɨ́ ntsi atú abyɛn lá, ngwe ɨyi a tságɨ́ nkən wəmbo, ɨ soŋ ngə́, “Tsɔʼ mbó ɨmo a nye ŋwɔn wa ɨnu ɨchi chinɨnɨ lá, mbɨ́ʼ ngə́ ma zɔgɨ a mu ndzɛm nɨ ɨtfúʼ sɨŋə mbɨ́ʼ atú azhi be tɨsɨŋə.”

²⁰Bɨntumshe bə wi abɔʼnɨ bɨkum bɨ alaʼ lɛ́tɨ́ mɨntəm mɨ ɨbɛn ngə́ á bɨ gha a Barabasɨ a mbó bo, mbaŋnɨ njwitɨ a Yeso ghe.

²¹Lá Branto a kwíʼ mbítɨ́ ɨnɔ ɨbɛn wa ngə́, “A tɨtərɨ bo wen bɨbá, nɨ lǒ ngə́ á ma nyɛʼtɨ a wɨŋə a mbó bən le?” Bo chwɨ́gɨ́ ngə́, “A Barabasɨ ə.”

²²Branto a bítɨ́ awa ngə́, “Ma tiʼ mbú ɨ lə nɨ Yeso, zɨ wa bɨ tɔ́ŋnə́ ngə́ Wa bɨ Zɔ́ʼnɨ́ lá le?” Bo bɨtsum chwɨ́gɨ́ ngə́, “Kwemtɨ ayi atɨ abaŋnɨ-baŋnɨ ə!”

²³Lá Branto a bítɨ́ awa ngə́, “A fan lá a zɨŋ anu le?” Bo tíʼ mbiʼnɨ ntɔ́nkə́ nɨ nji tsɨ tən ngə́, “Kwemtɨ ayi atɨ abaŋnɨ-baŋnɨ ə!”

²⁴Branto a ghɨnə ndzɛ́n ngə́ zɨə kɨ chi keʼ anu aza kwebtɨ, ndum chi baŋnɨ bvugɨnɨ, ndɔgɨ nkyi ɨ sugɨ mbó ɨmyi ɨwu a ɨshi nángyérə́ wa, ɨ soŋ ngə́, “Ka abó azə a tsi ayi a nye nɨvwo nɨ ŋwɔn wiŋ ə! Məzen a ghɨ bɨŋ ə!”

²⁵Nángyérə́ wa tsum a chwɨ́gɨ́ ngə́, “A alɛm azhi a chwinɨ atú bɨgɨ abɔʼnɨ tsɨ ɨbɔ ɨbɨgɨ ə!”

²⁶Branto a tíʼ fɨ́gɨ́ a Barabasɨ atsáŋ nga a mbó bo ghe. A ghɨnə ndə́ŋ a Yeso nɨ ngwan, ntiʼ nga ayi a mbó bo ngə́ á bo ghɛn nkwemtɨ atɨ abaŋnɨ-baŋnɨ ə.

²⁷Bɨgwe bɨ Branto tíʼ ndɔgɨ a Yeso ngɛn nɨ zɨ a mu bagɨ ntɔ́ʼ wu mɔʼɔ, aku aza bɨtsum a tiʼ ngyen nkarɨsɨ a Yeso ghe.

²⁸Bo sɔ́tɨ́ ɨtsɛʼ ɨchi ɨtsum, ntiʼ so atsɛʼ zə mbaŋnɨ wə ɨnye za a ghɨ́nɨ́ ayi a fi a ɨfɔ ghe.

²⁹Bo tíʼ ntúm ɨsáʼfɔ nɨ mɨndyíʼ mɨ ndzɔŋ ndzɔŋ ɨ so wu atú, ɨ nɨŋ mbaŋ a mu abó azhi zə maʼə ghe. Bo tíʼ nkwem mɨkwiʼtɨ ɨma wə ɨshi ɨ nɨŋnɨ ayi, ɨ soŋ ngə́, “Aghuʼsɨ a mbó Ɨfɔ bə Yuda ghe!”

³⁰Bo tsə́rɨ́ mɨtwe wə ɨnye, nkwarɨ mbaŋ za ɨ shwom wu atú ə.

³¹Bɨ ghɨnə nɨ́ŋnɨ́ ayi ɨ mɛtɨ, ndvuŋ atsɛʼ zə mbaŋnɨ za wə ɨnye, ntiʼ mbə ngwəgɨ ɨchi ɨtsɛʼ wə ɨnye, ntiʼ ntintɨ ngɛn nɨ zɨ ɨ ghɛn kwemtɨ atɨ abaŋnɨ-baŋnɨ ə.

³²Bɨ tíʼ fú abyɛn, ntɨ ghěn nkwatɨ a ŋwɔn Sirin wa ɨkum ɨyi bénɨ́ Samɔn, ɨ nyəm ayi a byɛʼ abaŋnɨ-baŋnɨ Yeso ghe.

³³Bo ghɨnə ngyén nkón adiʼ zə tse za bɨ kɨ́nə́ ntɔ́ŋə́ ngə́ Gɔlgɔta, ndiʼ ngə́, “Adiʼ aghɔʼrɨ atú ə.”

³⁴Ɨwu bo ghá mɨluʼ a mbó Yeso ma bɨ nyámnɨ́ nɨ azúm zə tse za a kɨ́nə́ ndwiə ngə́ á no; a ghɨnə njwíʼtɨ́ a mɛrə, nton ayi a nó mɛrə ghe.

³⁵Bo kwémtɨ́ ayi atɨ abaŋnɨ-baŋnɨ, ɨ maʼ ndzɔʼ a njí adzaŋ za bo mɨ yɛbtɨ ɨtsɛʼ ɨchi a tɨtərɨ bo ghe.

³⁶Bo ghɨnə mɛ́tɨ́ a məza, ɨ shiʼtɨ ntsi a ɨshe ntiʼə ndyɛmə ayi ɛ.

³⁷Wu atú, atɨ́, bɨ ŋwáʼnɨ́ ɨnu tsa bɨ káŋnɨ́ ayi ɨwu ntiʼ njwitɨ, mbán ngə́, “Lə nɨ Yeso Ɨfɔ bə Yuda a wɛnə ghe.”

³⁸Bɨ tíʼ nkɨ́ nkwemtɨ ɨtɨtɨ́ŋ mɨzɛrə tsi bá bo bɨ Yeso, táʼ abó zɨ zə maʼə, wu mɔʼɔ abó ntə́ŋ ə.

³⁹Ɨbɛn ba bɨ kɨ́nə́ ntsǎ bɨ kə́ ngwerə ayi, nchǐʼ ɨtú ɨtsa

⁴⁰ɨ sóŋə́ ngə́, “O sóŋ ngə́ o mɨ kum Ndáŋwi zɨ Ngwi ɨ bə korɨ a zɛrə atú njwi tsi tárə́ ghe! Loŋ atuəmbəm azo mbáʼ be o be Mɔn Ŋwi ə! Shiʼ atú atɨ abaŋnɨ-baŋnɨ za!”

⁴¹Ndəŋndəŋ, bɨntumshe bə wi, bɨdiʼ bɨ Nyɔngɔŋ abɔʼnɨ bɨkum bɨ alaʼ kɨ́ ngwerɨ ayi, ɨ sóŋə́ ngə́,

⁴²“A lóŋ a bə daŋ ə; a wen nchi keʼ atuəmbəm azhi loŋ lan! A se Ɨfɔ bə Izrai be le? Be a chi shiʼ atú atɨ abaŋnɨ-baŋnɨ zhirɨ ɨ shiʼ a ɨshe, muŋ bɨgɨ mɨ tiʼ nɨŋ mɨntəm ɨmɨgɨ ɨwu ngə́ a nɨ Wa bɨ Zɔ́ʼnɨ́ ə!

⁴³A nɨŋ ntəm ɨyi a nye Ŋwi, nkə́ sóŋə́ ngə́ zɨə nɨ Mɔn Ŋwi ə. Bɨgɨnə tiʼə njwíʼtə́ lá ndzɛn ngə́ Ŋwi a lǒ ndoŋ zɨ tɨtsɔŋnɨ ə!”

⁴⁴Ɨtɨtɨ́ŋ bɨzɛrə tsa bɨ kwémtɨ́nɨ́ awa bo bɨ Yeso lá, bɨ kɨ́ ndzɔŋ ndzɔm ayi a nye ndəŋndəŋ ndóm ə.

⁴⁵A ghɨnə mbé a ntənɨ nyom, ndzumnɨ ɨ kubɨnɨ alaʼ za atsum ɨ kɔʼ kuʼ a nye bɨnyom bɨtárə́ ghe.

⁴⁶A ghɨnə mbé tso bɨnyom bɨtárə́, Yeso a bugɨ nɨ nji zɨ ntən ngə́, “Eli, Eli, lama sabaktani?” ndiʼ lá ngə́, “Ŋwi ɨghan, Ŋwi ɨghan, o nyɛʼ aghan mbɨ́ʼ ake le?”

⁴⁷Ɨbɛn bə tse ba bɨ tɛ́mnɨ́ a ngɔbə zúʼ anu za a sóŋnɨ́ ntiʼ soŋ ngə́, “Ŋwɔn wen a tɔŋə Alaja ghe!”

⁴⁸Táʼ ŋwɔn nɨbo a líʼ ndo ngɛn ndɔgɨ a kuncha, ntsubɨ a mu tɨntsɛgɨ mɨluʼ ntoŋ atú atɨ ntiʼ nga wəmbo ngə́ á noə.

⁴⁹Lá bə mɔʼɔ sóŋ ngə́, “Nɨ zhwiʼtɨ á bɨgɨnə zɛn ngə́ Alaja a mɨ yen loŋ ayi ɛ!”

⁵⁰Yeso a kwíʼ mbúgɨ́ nɨ nji zɨ ntən, ntiʼ ntsəmə.

⁵¹Abagɨ atsɛʼ zə nkwasə za a bánɨ́nɨ́ a mu Ndáŋwi zɨ Ngwi a wánɨ́ ɨbagɨ tsi bá, ndɔgɨnɨ atú ɨ shiʼ kuʼ a ntɨŋ ə. Atuəshe a nɛ́m, ɨláŋsə́ ngɔʼ sənkɨ;

⁵²mɨshe wanɨ ntɛm ɨ dzɨ́gɨ́, ɨbɛn bɨ Ŋwi bə ghaʼnɨ ba bɨ kwɛ́nə nkfokɨ zhwemnə.

⁵³Bo fúkɨ́ a mu mɨshe ɨma, Yeso a ghɨnə nzhwémnɨ́ a mbó nɨvwo, bo ghɛn a mu Ntáʼmbagə wu Wi wu Fɛmnɨ wa, adiʼ wa ɨbɛn bə ghaʼnɨ zɛ́nɨ́ awa ghe.

⁵⁴Tantso bɨgwe nkɨ wu fɨgɨnɨ wa abɔʼnɨ bɨgwe ba bo bo tsínɨ́ ndyɛ́mə́ a Yeso ghɨnə ndzɛ́n adzaŋ za ɨshe nɛ́mnɨ́ abɔʼnɨ ɨnu ɨtsum tsa tsɨ fúnɨ́, a kɨʼnɨ awa tsɛʼ nkan bo tiʼ soŋ ngə́, “Tsɛʼ a nkənu, ŋwɔn wen a bé Mɔn Ŋwi ə!”

⁵⁵Bəngye bə ghaʼnɨ kɨ́ ntsí ɨwu, ntɛm nəghagɨ ndyiŋə anu za a kɨ́nə́ fúə ghe. A bé ba bɨ zɔ́ŋnɨ́ a Yeso ndɔgɨnɨ a Galili, nkwátə́ ayi ɛ.

⁵⁶A tɨtərɨ bo Mɛrɨ Matarɨna a tsí ɨwu, Mɛrɨ nɨmo bɨ Jemsɨ bo Yosɛb abɔʼnɨ ngwe Zebɛdi ə.

⁵⁷A ghɨnə mbé a nkwɛfɔ, ŋwɔn nkáb wu tse bɨ tɔŋə nɨ Yosɛb wa a kɨ́nɨ́ nkɨ́ mbé ngyɛʼ Yeso wu mɔʼɔ, a lo Arimatia ngyiŋə.

⁵⁸A ghɛ́n a mbó Branto ɨ soŋ ngə́ á gha akfú a Yeso a mbó zɨə. Branto a tíʼ ngá ntɨgə ngə́ á bɨ gha akfú za wəmbo ə.

⁵⁹Yosɛb a tíʼ ndɔgɨ akfú za ndwɛrɨ a mu atsɛʼ atɨŋndvuŋ zə fú,

⁶⁰ntiʼ ngɛn nyɔŋ a mu ɨni nɨshe na wɛrə a kwɛ́nɨ́ ntóŋ a mu aláŋsə́ ngɔʼ ə. Wɛrə a tíʼ mbɨ́ŋsɨ́ a təkɨŋ ngɔʼ ngyen nkɨŋ ntsu nɨshe na ɨwu, ntiʼ ndo ayi ɛ.

⁶¹Mɛrɨ Matarɨna abɔʼnɨ Mɛrɨ wu mɔʼɔ wa shíʼtɨ́ ntsí ɨwu, a mbyi nɨshe na.

⁶²Njwi zɨ mɔʼɔ ɨ lanə, mbáʼ ɨ bénɨ́ lá Njwi Alaʼ Ŋwi, bɨntumshe bə wi abɔʼnɨ bə Farisao bomnkɨ bo bɨ Branto ntiʼ

⁶³soŋ ngə́, “Tə̧, bɨgɨ waʼtɨ ngə́ mbáʼ ngaŋ ɨchwenu wa a bvúrɨ́nɨ́ atú ntən a sóŋ ngə́, ‹A ndzum njwi tsi tárə́ bɨ mɨ zhwemnɨ aghan a mbó nɨvwo ə.›

⁶⁴Tiʼ lá nga ntɨgə á bɨ ndyɛ̌m atú a nɨshe azhi ɨ kɔʼ kuʼ njwi tsi tárə́, mbɨ́ʼ bɨyɛʼ ɨbyi ghɨ ngɛn ndze akfú azhi ndo nɨ zɛrə ntiʼ soŋ a mbó ɨbɛn ngə́ bɨ zhwemnɨ ayi a mbó nɨvwo ə. Ɨchwenu wu ntsɨrɨndzum wiŋ mɨ bɨ́gɨ́ ɨ ghɛn nɨ mbyi ɨ tsa a wu ntsambyi wa.”

⁶⁵Branto a sóŋ a mbó bo ngə́, “Nɨ lɔgɨ a gwe ntsǐŋ ɨdiʼ, ngɛn ndzɛnə ngə́ nɨ lyɛm atú a nɨshe za adzaŋ za nɨ chinɨ lyɛmə.”

⁶⁶Ma lan, bo tíʼ ngɛn nyɔʼ fɛnwu atú ngɔʼ za, taŋ bɨ mɔmtɨ bɨ zhi, ntiʼ nkɨ́ ndɛ́n a gwe ntsǐŋ ɨdiʼ a lyɛmnə a nɛrə ghe.