Read Ngemba Matyo 28 Bible Online

Matyo 28 - Ngemba bible

Matyo 28

¹Njwi Alaʼ Ŋwi ghɨnə ntsá, mbáʼ ntsambyi njwi a mu ngabɨ ɨ kɨ́nə́ ntíʼə ndə̌, Mɛrɨ Matarɨna bo wu mɔʼɔ Mɛrɨ wa ghɛ́n a ndzé atú a nɨshe za.

²Ɨshe dúm nɛ́m be a nji adaŋ; ntsendá Ŋwi zɨ Maʼmbyí ɨ shiʼ a fɔməbvurə, ngyen mbɨŋsɨ ngɔʼ za ndo nɨ zɛrə, ɨ shiʼtɨ ntsi ayi wu atú ə.

³Nkyerɨ ɨzhi ɨ bé tso azhwibtɨ a mbəŋ, ɨtsɛʼ ɨchi fúgɨnə tso fɨwɛ ə.

⁴Bɨgwe bɨ ntsǐŋ ɨdiʼ ba tsí nɨ nɨbɔgɨ be tɨ́sə́n a nye ndóm wa bo kɨ́nə́ ntíʼə mbɨ́ŋnə́, ntiʼ mbe tso ɨkfú ɨbɛn ə.

⁵Ntsendá Ŋwi za ɨ ghám a mbó bəngye ba ɨ soŋ ngə́, “Njimbɨʼ nɨ tsi nɨ nɨbɔgɨ ə; ma zhi ngə́ nɨ lǒ lá a Yeso wa bɨ kɨ kwemtɨnɨ atɨ abaŋnɨ-baŋnɨ lá.

⁶Ka a tsi ayi ɨghə; bɨ zhwemnɨ ayi a mbó nɨvwo tsɛʼ adzaŋ za a sóŋnɨ́ lá. Yenə, zɛnə adiʼ za a kɨ nɔŋnɨ ɨwu ə.

⁷Nɨ waŋnɨ ngɛn tɨtsɔŋnɨ ɨ soŋ a mbó bɨyɛʼ ɨbyi ngə́, ‹Bɨ zhwemnɨ a Yeso a mbó nɨvwo, a ghěn a mbyi bən tɨtsɔŋnɨ a Galili; ɨwu nɨ mɨ zɛn ayi ɛ!› Ngə́ mba le, a nɨ nkən wa ma soŋnɨ a mbó bɨŋ ə.”

⁸Ma lan, bo tíʼ ngwaŋnɨ ndo atú a nɨshe wa nɨ nɨbɔgɨ abɔʼnɨ nɨdorɨ nə wi, ntiʼə nkɨə ngěn ɨ ghɛn kərɨ bɨyɛʼ ɨbyi ɛ.

⁹Yeso a vúkɨ́ mbom awa, ɨ soŋ ngə́, “Ma tɔ́ŋtə́ awɨŋ ə!” Bo kɔ́ʼ ngɛn ɨ fatɨ ayi, ngvo a mɨku zɨ, nguʼsɨ ayi ɛ.

¹⁰Yeso a sóŋ a mbó bo ngə́, “Nɨ keʼ bɔgə; ghɛnə ngɛn soŋ a mbó ɨbɔmbɨma ɨban ngə́ á bo ghɛn a Galili, ɨwu bo mɨ zɛn aghə.”

¹¹Mbáʼ bəngye ba kɨ́nə́ ngěn awa lá, bɨgwe bɨ ntsǐŋ ɨdiʼ ba bə mɔʼɔ ba bɨ kɨ́nə́ ntsǐŋ atú a nɨshe za ghɛ́n a mu ntáʼmbagə wu wi wa, nkərɨ bɨntumshe bə wi nɨ ɨnu ɨtsum tsa tsɨ fúnə́.

¹²Bɨntumshe bə wi bómnkɨ́ bo bɨ bɨkum bɨ alaʼ nkəmnɨ; nga nkáb zɨ ngwi a mbó bɨgwe ba

¹³ntiʼ soŋ ngə́, “Nɨ mɨ soŋ a mbó ɨbɛn ngə́ bɨyɛʼ ɨbyi yén nɨ ɨtfúʼ ndze akfú azhi mbáʼ nɨ kɨ́nə́ ndyě ghe.

¹⁴Be məzen a ghɨ́ ngɛn fu a ntsu gobɨna, bɨgɨ mɨ zhi ɨnu tsa bɨgɨ mɨ soŋ, á anu zə tse a keʼ awən ghɨə.”

¹⁵Bɨgwe bɨ ntsǐŋ ɨdiʼ ba kwárɨ́ nkáb za nkɨ ngɨ tsɛʼ adzaŋ za bɨ tɨ́gɨ́tɨ́nɨ́ awa ghe. Ma lan, nə nɨ njalaʼ za bə Yuda tiʼnə nkərə a mbó ɨbɛn ɨ kɔʼ kuʼ ntsu sɨŋə ghe.

¹⁶Bɨyɛʼ ba nɨghúm ntsɔb mɔ́ʼɔ́ ghɛ́n a Galili, atú ntáʼ wa Yeso a tɨ́gɨ́tɨ́nɨ́ ngə́ á bo ghɛn ɨwu lá.

¹⁷Bo ghɨnə ndzɛ́n a Yeso, nguʼsɨ ayi; lá bo bə tsɛrə mə́ŋnɨ́ ngə́ a nɨ Yeso ghe.

¹⁸Yeso a tíʼ nkɔ́ʼtɨ́ ngɛn a mbyɛn bo ɨ soŋ ngə́, “Bɨ ghanə mɨtən mɨtsum a fɔməbvurə bo atuəshe a mbó me ghe.

¹⁹Tiʼ ngɛnə lá, a mbó ɨbɛn bɨtsum ɨdiʼ ɨtsum, ngɨ awa a nye bɨyɛʼ ɨban: ngǎ nkyi a mbó bo nɨ ɨkum Tarɨ, nɨ wu Mɔn, nɨ wu Azhwi zə Fɛmnɨ,

²⁰nkə́ ndiʼnə awa ngə́ á bo ndzúʼnɨ́ ɨnu ɨtsum tsa ma tɨ́gɨ́tɨ́nɨ́ awən ɨwu ə. Ma mɨ tsi bɨgɨnə nkfu ɨtsum ɨ kɔʼ kuʼ a ndwitɨ mbyi ɛ.”