Read Ngemba Matyo 3 Bible Online

Matyo 3 - Ngemba bible

Matyo 3

¹A bé a nkfu məwa lá, Yoane Ngaŋ Nga Nkyi, a yén a mu mɨkɨghonɨ mɨ Yudiya ntiʼ mbiʼnɨ ɨ sóŋə́ anu a Ŋwi ɨwu ə.

²Wɛrə a sóŋ ngə́, “A nɨ bəŋ mɨntəm ɨmən a nye mɨbvu ɨmən mbɨ́ʼ ngə́ Nɨfɔ nɨ Ŋwi tiʼ tsɛʼ abó ə.”

³Ntom Ŋwi Asaya kə́ ngamə lá mbɨ́ʼ a Yoane a nkfu za ɨ sóŋnɨ́ ngə́: “Ŋwɔn tse a tɔ́nkə́ a mu mɨkɨghonɨ ngə́, ‹Kyaŋtɨnə ndómnji a mbó Maʼmbyí ɛ; ngɨ abɔʼ zə tɛmnɨnɨ á wɛrə a tsa ɨwu ə!› ”

⁴Yoane a wə́gɨ́ ɨtsɛʼ tsa bɨ ghɨ́nɨ́ nɨ ɨnyɔŋ aŋaŋuʼə, nkɨ nkorɨ ɨkɔbɨ ngobɨnyam atɨŋnɨ zɨə. Mɨdzɨ ɨmyi bé ngwemnɨ abɔʼnɨ ɨnwu ɨfúʼ afɔn ə.

⁵Ɨbɛn ló a Yerosalɛm abɔʼnɨ mbuʼ Yudiya tsum nkwiʼtɨ ɨtóm tsa tsɨ tsínɨ́ a kárɨ́kɨ́ Mɨzam Yorɨdan ngɛn wəmbo ə.

⁶Bo fɨ́ʼtɨ́ mɨbvu ɨma nɨ mɨntsu ɨma ntiʼ nkwarɨ nkyi wəmbo a Mɨzam Yorɨdan ə.

⁷Mbáʼ Yoane a zɛ́nɨ́ ɨnɔ bə Farisao abɔʼnɨ bə Sadukai yiŋənə a mbó zɨ a nkwarɨ nkyi lá, wɛrə a sóŋ a mbó bo ngə́, “Bɨŋ mɨnyo! A kwantɨ ɨwa nkwantɨ awən ngə́ á nɨ lɛʼ ɨnɨŋ ngɨ́ʼ za Ŋwi a mɨ tsagɨ lá le?

⁸A nɨ ngɨ̌ ɨnu tsa tsɨ diʼnɨ ngə́ nɨ bəŋnə mɨntəm ɨmən a nye mɨbvu ɨmɨŋ ə.

⁹A nɨ keʼ kɨ ngwiʼtɨ ngə́ nɨ chi lɛʼ ɨnɨŋ ngɨ́ʼ Ŋwi a ntsǎ a ndzum adzaŋ za nɨ sóŋnə́ ngə́ Abraʼm a nɨ ta ɨwən wu kɔ́ʼɔ́nguʼ ə. Mbɨ́ʼ ngə́ Ŋwi a chi lɔgɨ ngɔʼ tsenə ɨ bənkɨ a nye ɨbɔ bɨ Abraʼm ə!

¹⁰Ndzam ɨ tsinə abó a ngwarɨ atɨ atsum a nye mɨngaŋ ɨmyi ɛ; atɨ atsum za ka a nkónə́ ayi mɨntam mə shiʼnɨ, bɨ mɨ warɨ ɨ maʼ a mu ɨmugɨ ə.

¹¹Ma ghǎ nkyi a mbó bən lá nɨ nkyi ngəŋ a ndiʼə ngə́ nɨ bəŋnə mɨntəm ɨmən a nye mɨbvu ɨmɨŋ ə, lá ŋwɔn wa a yenə a ndzum me a mɨ ghanɨ nkyi a mbó bən nɨ Azhwi zə Fɛmnɨ abɔʼnɨ ɨmugɨ ə. A tsa aghan be tɨsɨŋə; ka ma byi nyam nkuʼnɨ aghan a ntiʼtɨ ngobɨ ɨchi ɛ.

¹²Wɛrə a tsi nɨ asəŋ a fɛgɨ ɨdzúm azhi, a fɛ́gɨ́ nchwi ɨzhi tsum ɨwu ə. Wɛrə a ghɨ́ ma lan, a mɨ tiʼ ghotɨ nchwi ɨzhi a mu ntaŋ mɨdzɨ ɨyi, lá ɨ tɔn ntsaʼ tsa a mu ɨmugɨ nɨnkoŋ ə.”

¹³A bé a nkfu məwa lá, Yeso a ló a Galili ngyen a mbó Yoane a Yorɨdan ngə́ á Yoane a gha nkyi a mbó zɨə.

¹⁴Lá Yoane a kə́ ndɔ́btɨ́ ngɨə á Yeso a kwebtɨ ntəm ɨyi, ntiʼ soŋ ngə́, “Ma be kwarɨ nkyi be a mbó gho lá o bə mbaŋnɨ ngyén be a mbó me le?”

¹⁵Lá Yeso a chwɨ́gɨ́ wəmbo ngə́, “Nyɛʼtɨ á be adzaŋ məwa tɨtsɔŋnɨ ə. Mbɨ́ʼ ngə́ a ndóm məwen, tɨ mɨ ghɨ atsum za Ŋwi a lɔnə ghe.” Ma lan, Yoane a tíʼ mbémtɨ́ a ngá nkyi wəmbo ə.

¹⁶Tsɛʼ mbáʼ Yeso a bínɨ́ nkwárɨ́ nkyi lá, ɨ fu a mu nkyi wa. Fɔməbvurə tíʼ ŋáʼnɨ́ wəmbo, a ze azhwi a Ŋwi a shiʼə ngyíŋə́ tso bvugɨrə-fɨkon ɨ shiʼ ntɛm wə ɨnye ə.

¹⁷Nji zɨ tse tíʼ ndo a fɔməbvurə, ɨ soŋ ngə́, “Mɔn wen a nɨ mɔn ɨghan wa ma kɔŋnɨ tsɛʼ nkə, a ghɨə ɨnye ɨzə bɔŋənə ghe.”