Read Ngemba Matyo 4 Bible Online

Matyo 4 - Ngemba bible

Matyo 4

¹Azhwi a tíʼ ngɨ Yeso a ghɛn a mu mɨkɨghonɨ ngə́ á Dəbɨrɨ a kwaʼnɨ ayi ɛ.

²Wɛrə a tíʼ nchigɨ nji tsə ntsaʼtɨ Ŋwi atú njwi mɨghúm mi nɨkwa abɔʼnɨ mɨtfúʼ mɨghúm mi nɨkwa ghe. A mɛtɨnə nji tiʼə ndzaŋə ayi ɛ.

³Dəbɨrɨ a tíʼ ngyen soŋ wəmbo ngə́, “Be o be mɔn Ŋwi, ghɨ á ngɔʼ tsiŋ bəŋ mbɛʼ abán ə.”

⁴Lá Yeso a chwɨ́gɨ́ ngə́, “Aŋwaʼnɨ a Ŋwi a soŋ ngə́, ‹Ŋwɔn mɨsɔŋ a ntsu a chi keʼ nchyɛ̌ tsɛʼ mbɨ́ʼ nkfúrɨ́ abán zɛrə zɛrə, lá a lǒ ayi nɨ anu atsum za Ŋwi a sóŋnə́ ghe.› ”

⁵Dəbɨrɨ a tíʼ ngɨ Yeso a ghɛn a Yerosalɛm, Ntáʼmbagə wu Wi wu Fɛmnɨ wa. A tíʼ nkɔ́ʼ ngɛ́n nɨ zɨ atú a təntsánɨ́ Ndáŋwi zɨ Ngwi,

⁶ntiʼ soŋ wəmbo ngə́, “Be o be Mɔn Ŋwi, tsɔʼnɨ adiʼ wen nkanɨ a tɨshe; mbɨ́ʼ ngə́ aŋwaʼnɨ a Ŋwi a soŋ ngə́: ‹Ŋwi a mɨ ghɨ á bɨtsen bɨ ndá bɨ Ŋwi lyɛrɨsɨ agho; ngya agho atɨ́ nɨ mbó ɨma, mbɨ́ʼ o tum aku azo a nye ngɔʼ ə.› ”

⁷Yeso a chwɨ́gɨ́ ngə́, “Aŋwaʼnɨ a Ŋwi a kɨ soŋ ngə́, ‹Njimbɨʼ o kwaʼnɨ a Maʼmbyí Ŋwi ɨgho ghe.› ”

⁸Dəbɨrɨ a kwíʼ ngɨ Yeso a kɔʼ ngɛn atú mbám zɨ tse za ɨ ságɨ́nɨ́ tsɛʼ nkan, ntiʼ ndiʼ ɨlaʼ ɨtsum a mu mbyi abɔʼnɨ nɨfáŋ ɨna;

⁹ntiʼ soŋ a mbó Yeso ngə́, “Kwem mɨkwiʼtɨ ɨmo a tɨshe nguʼsɨ aghə á ma gha ɨdzúm tsiŋ ɨtsum a mbó gho ghe.”

¹⁰Yeso a tíʼ nchwɨ́gɨ́ ngə́, “Lotɨ a ɨshi me a Satan! Aŋwaʼnɨ a Ŋwi a soŋ ngə́, ‹O mɨ ghuʼsɨ tsɛʼ a Maʼmbyí Ŋwi ɨgho ɨ kə́ faʼnə tsɛʼ wəmbo ə!› ”

¹¹Dəbɨrɨ a tíʼ nyɛʼtɨ a Yeso, bɨtsen bɨ ndá bɨ Ŋwi tíʼ ngyen ndə̌tú nɨ zɨə.

¹²Yeso a ghɨnə ndzúʼ ngə́ bɨ kó a Yoane Ngaŋ Nga Nkyi ɨ nɨŋ atsáŋ, ngɛ́n ayi a Galili ɛ.

¹³Wɛrə a sé ghɔ́ŋ a Nazarɛ ghe, lá wɛrə a ghɛ́n ntíʼə nchyɛ̌ a Kabɛrɨnaum, ntáʼmbagə wa ɨ tsínɨ́ a ngə́rɨ́ Sagɨrə Galili, a mu mbuʼ Zebulɔn abɔʼnɨ Naftali,

¹⁴taŋ á kɔʼ bomnkɨ bo anu za ntom Ŋwi Asaya kwɛ́nə sóŋ ngə́:

¹⁵“Ɨshe Zebulɔn abɔʼnɨ zɨ Naftali, za ɨ tsinɨ a ndómnji a ngěn a sagɨrə wu ngwi, a ndaŋ ndzɨŋə Mɨzam Yorɨdan zɨ mɔʼɔ, Galili ɨshe ba a sé bə Yuda be!

¹⁶Ɨbɛn ba bɨ tsinɨ a ndzumnɨ bɨ mɨ ze nkaʼ wu wi ə. Ɨbɛn ba bɨ kɨ́nə́ nchyɛ̌ a mu ndzumnɨ mɨbvu, bo zɛnə nkaʼ ɨloŋ Ŋwi ə.”

¹⁷Ɨ tiʼ biʼnɨ a nkfu məwa, Yeso a tíʼə sóŋə́ anu a Ŋwi ngə́: “Nɨ bəŋ mɨntəm ɨmən a nye mɨbvu ɨmən mbɨ́ʼ ngə́ Nɨfɔ nɨ fɔməbvurə tiʼ tsɛʼ abó ə!”

¹⁸Mbáʼ Yeso a kɨ́nə́ ngántə́ a ngə́rɨ́ Sagɨrə Galili, wɛrə a zé ɨbɔmbɨma bi bɨbá ba bɨ bénɨ́ ngaŋ achwiʼ, Samɔn (wa bɨ tɔ́ŋnə́ ngə́ Bita) abɔʼnɨ mɨma ɨyi Andɨrɨya bɨ tamnə nɨghoŋ a mu sagɨrə wa.

¹⁹Yeso a sóŋ a mbó bo ngə́, “Zɔŋnə aghə, ma mɨ tiʼ diʼ awən nɨ adzaŋ za nɨ mɨ ghɨnə á ɨbɛn ngyiŋə a mbó me ghe.”

²⁰Bo byí nyɛʼtɨ mɨghoŋ ɨma ndzɔŋ ayi ɛ.

²¹Ndo ɨwu, ɨ tɨ ghěn, ndzɛn ɨbɔmbɨma bɨbá bə daŋ, Jemsɨ abɔʼnɨ Yoane ɨbɔ bɨ Zebɨdi, bo tsi a mu akanuʼ zə wi bo bɨ ta ɨwa Zebɨdi ɨ ntátə́ nɨghoŋ ɨna ghe. Yeso a tɔ́ŋ awa ghe.

²²Bo byí nkɨ́ ndó ɨ nyɛʼtɨ abáŋ a nkyi za bo bɨ ta ɨwa, ndzɔŋ ayi ɛ.

²³Yeso a kə́ númə́ nkárə́ a mu Galili tsum ndiʼə anu a Ŋwi a mu ndáŋwi bə Yuda, ɨ sǒŋ nkən wu shiʼnɨ mbɨ́ʼ Nɨfɔ nɨ Ŋwi nkə́ ntsǔʼ ɨbɛn a nye mbúŋ mɨghɔ mɨtsum ə.

²⁴Nkərɨ mbɨ́ʼ ayi ɨ dzágɨ́nɨ́ a mu alaʼ a Sirɨya atsum; ɨbɛn tiʼə ngyiŋə nɨ ɨbɛn ba bɨ kɨ́nə́ ngǒ nɨ mbúŋ mɨghɔ mɨtsum abɔʼnɨ ndzaŋə; ɨbɛn ba bɨ tsínɨ́ nɨ bɨdzɨŋ a mu ɨnye ɨtsa, ɨkɨbvurɨ abɔʼnɨ bɨmbyinkɨnɨ — Yeso a tsúʼ awa bɨtsum ə.

²⁵Ɨnɔ ɨbɛn kə́ ndzɔŋə ayi ndo a Galili abɔʼnɨ Ntáʼmbagə tsa Nɨghúm, abɔʼnɨ Yerosalɛm, Yudiya nkwiʼtɨ abɨŋ a ɨshe za a tsínɨ́ a ndaŋ ndzɨŋə Yorɨdan lá.