Read Ngemba Matyo 9 Bible Online

Matyo 9 - Ngemba bible

Matyo 9

¹Yeso a bə́ nkón a mu akanuʼ zə wi za mbə́ ndaŋ a sagɨrə wa ntom ngɛn a ntáʼmbagə zɨ ngwi bo ghe.

²Ɨwu ɨbɛn bə tsɛrə yén nɨ chɛbɨŋ wu tse wa a nɔ́ŋnɨ́ atú abaʼ azhi ɛ. Mbáʼ Yeso a zɛ́nɨ́ abeməntəm zə wi za bo tsínɨ́ nɨ zɛrə lá, ɨ soŋ a mbó chɛbɨŋ wa ngə́, “Mɔn ɨghan korɨ ntəm ə! Awa bɨ lɨgɨnɨnə mɨbvu ɨmo ə.”

³Bɨdiʼ bɨ Nyɔngɔŋ bə tsɛrə bɨ sóŋ a mbó ɨtumbəm ɨtsa ngə́, “Ŋwɔn wɛnə a ghǎm nɨgham nɨ ndzɔm Ŋwi ə!”

⁴Lá Yeso a zhí ɨnu tsa bo kɨ́nə́ nkwaʼtə, ntiʼ mbitɨ ngə́, “Nɨ wíʼtɨ́ ɨnu tsə tɔmnɨnɨ a mu mɨntəm ɨmən lá ngə́ ke le?

⁵A nə ngyaŋnɨ be a sóŋə́ ngə́, ‹Bɨ lɨgɨnɨ mɨbvu ɨmo,› kə ngə́, ‹Lo atɨ́ a ntɛ́mə́ ngěn le›?

⁶Ma mɨ diʼ a mbó bən ngə́ Mɔn Ŋwɔn a tsi nɨ mɨtən atuəshe a ndɨgɨnɨ mɨbvu ə.” Ma lan, wɛrə a tíʼ sóŋ a mbó chɛbɨŋ wa ngə́, “Lo atɨ́, mbye abaʼ azo, nkwɛn agho!”

⁷Ŋwɔn wa a ló atɨ́ nkwɛn ayi ɛ.

⁸Mbáʼ ɨnɔ wa zɛ́nɨ́ anu za a fúnɨ́ lá, ntsi nɨ nɨbɔgɨ, ntiʼ mbontɨ a Ŋwi mbɨ́ʼ ngə́ wɛrə a gha abə́ŋ a mɨtən məzen a mbó ŋwɔn mɨsɔŋ a ntsu ə.

⁹Mbáʼ Yeso a nyɛ́ʼtɨ́nɨ́ adiʼ məza, ntiʼə ntɛ́mə́ ngěn ayi, ndzɛn a nkwárɨ́ ashɛbɨ wu tse wa ɨkum ɨyi bénɨ́ Matyo a shiʼtɨ ntsi a ntsu ndá afaʼ zɨə. A sóŋ wəmbo ngə́, “Zɔŋ aghə.” Matyo a ló atɨ́ ndzɔ́ŋ ayi ɛ.

¹⁰Mbáʼ Yeso a shíʼtɨ́nɨ́ ntsí atú atɛkɨ a ndá Matyo ndzɨə lá, bɨkwárɨ́ bɨ ashɛbɨ abɔʼnɨ ngaŋ ngɨ mɨbvu bə mɔʼɔ yén nkɨ ntsi atú atɛkɨ məza za Yeso bo bɨ bɨyɛʼ ɨbyi tsínɨ́ ɨwu lá nkə́ ndzɨə ghe.

¹¹Bə Farisao bə tse zɛ́n a məzen mbitɨ bɨyɛʼ bɨ Yeso ngə́, “Ndiʼ aŋwaʼnɨ ɨwən a dzɨə bo bɨ bɨkwárɨ́ bɨ ashɛbɨ abɔʼnɨ ngaŋ ngɨ mɨbvu lá mbɨ́ʼ ake le?”

¹²Yeso a zúʼə, ntiʼ nchwɨ́gɨ́ awa ngə́, “Ɨbɛn ba bɨ tsinɨ ɨ shiʼnɨ ka bɨ ndǒ awa a ŋwɔn ngaŋ ə, lá a lǒ ba bɨ ghɔnə ghe.

¹³Nɨgham nɨ Ŋwi na nɨ soŋnɨ ngə́, ‹Ma lǒ lá a mɨlɨŋnɨ keʼ be mɨtsuʼnɨ mɨ atú be,› lá, á nɨ ghɛn ntsɔʼ aku anu za a nɨ diʼnə. Ka ma yen aghan lá a ntɔ́ŋ ɨbɛn ba bɨ chinɨnə, ma yen be a ntɔ́ŋ ngaŋ ngɨ mɨbvu ə.”

¹⁴Bɨyɛʼ bɨ Yoane Ngaŋ Nga Nkyi yén a mbó Yeso mbitɨ ayi ngə́, “Bɨgɨ abɔʼnɨ bə Farisao, chigɨ nji tsə ntsaʼtɨ Ŋwi, lá bɨyɛʼ ɨbo keʼ nchígɨ́ nji tsə ntsaʼtɨ Ŋwi lá ngə́ ke le?”

¹⁵Yeso a chwɨ́gɨ́ ngə́, “Bɨghən bɨ nɨzɔ́ʼ chi dzə́ŋnɨ́nə mbáʼ ndóm mɨngən a bvurɨnɨ ntsi bo bo le? Njwi ghɨ yen za bɨ ghɨnɨ yen kwárɨ́ a ndóm mɨngən a mbó bo, á bo ntiʼə nchigɨ nji tsə ntsaʼtɨ Ŋwi ə.

¹⁶Ka ŋwɔn tse a ndɔ́gə́ ayi abagɨ atsɛʼ zə fi ntátə́ atsɛʼ zə lvuŋ ɨwu ə, mbɨ́ʼ ngə́ abagɨ atsɛʼ zə fi za a mɨ wɛm atsɛʼ zə lvuŋ za ɨ sarɨ, ɨ nɨŋ ngvo wa ɨ bənɨ faŋ ntsa a wa ɨ kwɛnɨ fom ntsi ɨwu ə.

¹⁷Kə nkə́ ndɔ́gɨ́ mɨluʼ mə fi ɨ nɨ́ŋə́ a mu ngobɨ mɨluʼ tsɨ lvuŋ, mbɨ́ʼ ngə́ ngobɨ mɨluʼ tsa mɨ bebɨkɨ, á mɨluʼ ma chwinɨ, á ngobɨ mɨluʼ tsa kɨ mbɨ́gə́. Bɨ baŋnə nɨ̌ŋ mɨluʼ mə fi lá a mu ngobɨ mɨluʼ tsɨ fi, taŋ á tsɛrə ɨtsum tsi ɨ shiʼnɨ ə.”

¹⁸Mbáʼ Yeso a kɨ́nə́ mbvúrə́ sǒŋ ɨnu tsen a mbó bo, nkum bə Yuda zɨ tse yén nkwem mɨkwiʼtɨ ɨmyi a ɨshi zɨ ɨ soŋ ngə́, “Mɔn ɨghan wu mangye a kfo tsɛʼ tɨtsɔŋnɨ ə; lá yen nyɔŋ abó azo wə ɨnye, a mɨ zhwemnə.”

¹⁹Ma lan, Yeso a ló ndzɔŋ ayi, bo bɨ bɨyɛʼ ɨbyi ɛ.

²⁰Tsɛʼ a nyom məwa, mangye wu tse wa alɛm a kɨ́nə́ fúə wə ɨnye tə nchwánə́ atú ɨlom nɨghúm ntsɔb bá a zɔ́ŋ a ndzum ɨ mɔmtɨ atsə́ŋ atsɛʼ a Yeso ghe.

²¹Wɛrə a sóŋ a mbó atuəmbəm azhi ngə́, “Be ma mɔmtɨ tsɛʼ atsɛʼ azhi, muŋ ma mɨ shwetə.”

²²Yeso a bə́ŋ, ndzɛ́n ayi, ɨ soŋ ngə́, “Korɨ ntəm ə, a mɔn ɨghan wu mangye, abeməntəm azo a ghɨ o shwetə.” Tsɛʼ a nyom məwa mangye wa a shwétə́.

²³Yeso a tíʼ nkón a mu ndá nkum bə Yuda za. Mbáʼ wɛrə a zɛ́nɨ́ ɨbɛn ba bɨ kɨ́nə́ mbǔʼ mɨkom mɨ nɨvwo abɔʼnɨ adzaŋ za bə mɔʼɔ kɨ́nə́ maʼ nɨvwo mbémə́, bə mɔʼɔ tsɔʼnə wa nkɨ́ʼə a tɨshe lá,

²⁴Yeso a sóŋ ngə́, “Fukɨnə! Mɔn mangye wen ka a kfo ayi ɛ — a lyě ɨ lyenə!” Bo tíʼ ngwe ayi ɛ.

²⁵Mbáʼ ɨbɛn ba tsánɨ́ abyɛn lá, Yeso a kón ngɛn a mu kwasɨ ndá mɔn wa, nchwa abó a mɔn mangye wa, a lo atɨ́ ə.

²⁶Nkərɨ məziŋ tíʼ nkárɨ́ a bagɨ alaʼ məwa tsum ə.

²⁷Yeso a nyɛ́ʼtɨ́ adiʼ za. Adzaŋ za wɛrə a kɨ́nə́ ntɛ́mə́ ngěn lá, ɨfɨgɨ tsi bá zɔŋnə ayi, ntɔ́nkə́ ngə́, “Mɔn Devidɨ, ko a mɨlɨŋnɨ ɨwɨgɨ ə!”

²⁸Yeso a ghɨnə nkón ngɛ́n a mu ndá, ɨfɨgɨ tsa tsi bá zɔŋ ayi ɛ. Yeso a tíʼ mbítɨ́ awa ngə́, “Nɨ nɨŋ mɨntəm ɨmən ɨwu ngə́ ma chi tsuʼ awən le?” Bo chwɨ́gɨ́ wəmbo ngə́, “Eŋə a Tə̧!”

²⁹A tíʼ mɔmtɨ ɨmɨgɨ ɨma ɨ soŋ ngə́, “Ndzɔŋə abeməntəm azən, á fu adzaŋ za nɨ lɔnə lá.”

³⁰Ɨmɨgɨ ɨma tíʼ ŋáʼnə́. Yeso a shə́gɨ́ nkwántɨ́ awa ngə́, “Njimbɨʼ nɨ soŋ anu məzen a mbó ŋwɔn tsɛrə ghe.”

³¹Lá bo ghɛ́n ndzagɨ nkərɨ mbɨ́ʼ a Yeso a mu bagɨ alaʼ wa tsum ə.

³²Adzaŋ za ɨfɨgɨ tsa kɨ́nə́ ngěn awa lá, ɨbɛn bə tsɛrə yén nɨ akəkúgɨ́ zə tsɛrə a mbó Yeso za a bénɨ́ akəkúgɨ́ mbɨ́ʼ ngə́ a tsí nɨ dzɨŋ a mu ɨnye zɨə.

³³Bɨ ghɨnə fɨ́gɨ́ a dzɨŋ wa, ŋwɔn wa a ghamə. A kɨ́ʼnɨ́ ɨnɔ ɨbɛn wa ɨ tsínɨ́ ɨwu, bo tiʼə sóŋə́ ngə́, “Bɨgɨ láʼnə nkeʼ anu tso məzen zɛn a mu Izrai ghe.”

³⁴Lá bə Farisao sóŋ ngə́, “A ghǎ ɨfɔ bɨdzɨŋ ngǎ mɨtən a mbó Yeso a fɨ́gɨ́ bɨdzɨŋ ə.”

³⁵Yeso kə́ númə́ nkárə́ a mu ntáʼmbagə tsɨ wi ɨtsum abɔʼnɨ ɨtóm, ndiʼə anu a Ŋwi a mu ndáŋwi bə Yuda nkə́ sǒŋ Nkən Wu Shiʼnɨ mbɨ́ʼ Nɨfɔ na, ntsúʼə mɨghɔ abɔʼnɨ azaŋnɨ atsum ə.

³⁶Mbáʼ wɛrə a zɛ́nɨ́ ɨnɔ wa lá, a kó a mɨlɨŋnɨ ɨwa mbɨ́ʼ ngə́ bo tsí a mu nɨwiʼ, nkɨ ntsi tɨ akwatɨ, tso mbyindzɨ tsa tsɨ se nɨ ntsiŋ mɨnyam chyɛ.

³⁷A tíʼ sóŋ a mbó bɨyɛʼ ɨbyi ngə́, “Mɨdzɨ mə fuʼnɨ ghaʼ, lá ngaŋ afaʼ kɨ́gə.

³⁸Tsaʼtɨnə a Ŋwi a mbó Ŋwi, zɨ wa a nɨ mboŋ ɨshwom ngə́ á tsagɨ ngaŋ afaʼ á bɨ fuʼ nkwɛn nɨ mɛrə ghe.”