Read Ngemba Marɨkusɨ 10 Bible Online

Marɨkusɨ 10 - Ngemba bible

Marɨkusɨ 10

¹Yeso a tíʼ ndo adiʼ wa ngɛn a mu mbuʼ Yudiya, ndaŋ a Mɨzam Yorɨdan ə. Ɨnɔ ɨbɛn kwíʼ nkɨ́ ngótɨ́ ngyén wəmbo; mbáʼ a bénɨ́ mbɔm ɨzhi lá, a díʼ awa ghe.

²Bə Farisao bə tse kɔ́ʼ ngyen wəmbo njwəŋtɨ a mbentɨ zɨə. Bo bítɨ́ ayi ngə́, “Soŋ awɨgɨ ə, a kuʼnɨ a mu Nyɔngɔŋ ɨwɨgɨnə ngə́ á ŋwɔn mbáŋnɨ́ a kəntɨ a ngwe ɨyi le?”

³Yeso a chwɨ́gɨ́ awa nɨ abítɨ ngə́, “Mǒse a ghá lá a wɨŋə nyɔngɔŋ a mbó bən le?”

⁴Bo chwɨ́gɨ́ ngə́, “Mǒse a bém ngə́ á ŋwɔn mbáŋnɨ́ a ŋwaʼnɨ aŋwaʼnɨ a shwɛtɨ nɨzɔ́ʼ nga a mbó ngwe ɨyi ntiʼ nkəntɨ ayi ɛ.”

⁵Yeso a sóŋ a mbó bo ngə́, “Mǒse a ŋwáʼnɨ́ a nyɔngɔŋ məwen a mbó bən lá mbɨ́ʼ ngə́ mɨntəm ɨmɨŋ chigɨrɨ be tɨsɨŋə.

⁶Lá a mbiʼnə, mbáʼ Ŋwi a kɨ́nə́ nkáʼə a ŋwɔn mɨsɔŋ a ntsu lá, ‹wɛrə a ghɨ́ awa mbáŋnɨ́ bo mangye›, adzaŋ za aŋwaʼnɨ a Ŋwi a soŋnə.

⁷‹Mbɨ́ʼ a məzen, ŋwɔn mbáŋnɨ́ a mɨ nyɛʼtɨ a ta ɨyi bo nɨmi ɨyi ɨ bosɨ bo ngwe ɨyi,

⁸á bo bi bɨbá tiʼ mbe táʼ azúm ə.› Ma lan, ka bo bə́ mbé awa bi bɨbá, lá mbe be táʼ ghe.

⁹Anu za Ŋwi a bosɨnɨ, á ŋwɔn tsɛrə a keʼ zagɨ saʼnə.”

¹⁰Bo ghɨnə ntsí a mu ndá, bɨyɛʼ ɨbyi bitɨ ayi mbɨ́ʼ anu məziŋ ə.

¹¹Wɛrə a chwɨ́gɨ́ a mbó bo ngə́, “Ŋwɔn tsum wa a kəntɨnɨ a ngwe ɨyi ndzɔ́ʼ a wə daŋ a achwurɨ a nye ngwe ɨyi ɛ.

¹²Ndəŋndəŋ, be mangye a kɨ sám nɨzɔ́ʼ ngɛn ndzɔ́ʼ a ŋwɔn adaŋ, a kɨ nchwurə.”

¹³Ɨbɛn bə tse yén nɨ ɨbɔ bə bɔrɨ ngə́ á Yeso nyɔŋ mbó ɨmyi a nye bo ghe; lá bɨyɛʼ ɨbyi ghámtɨ́ ɨbɛn ba.

¹⁴Yeso a ghɨnə ndzɛ́n a məzen lá, ntɔŋ ɨyi lwi tsɛʼ a nkə. A tíʼ sóŋ a mbó bɨyɛʼ ɨbyi ngə́, “A nɨ nyɛʼtɨ á ɨbɔ ba yen ɨ wɨŋ ə, á nɨ keʼ awa a nkɨ́ŋə́ mbɨ́ʼ ngə́ nɨfɔ nɨ Ŋwi tsi lá a mbó ɨdzaŋ tso mətsiŋ ə.

¹⁵Tsɛʼ a nkənu, ma sóŋə́ awɨŋ ə, ŋwɔn tsum wa a mɨ keʼ kwarɨ nɨfɔ nɨ Ŋwi tso mánkɨ́ə, a mɨ keʼ a mu nɛrə kuŋə.”

¹⁶Wɛrə a tíʼ nkwárɨ́ ɨbɔ ba a mu mbó zɨ, ɨ nyɔŋ mbó ɨmyi a nye bo, ɨ fɔgɨ awa ghe.

¹⁷Yeso a ghɨnə nkwiʼ mbə fu a ndómnji ntiʼə ngěn ayi, ŋwɔn tsɛrə a kɨə ngyen nkwem mɨkwiʼtɨ ɨmyi wə ɨshi, mbitɨ ayi ngə́, “Ndiʼ aŋwaʼnɨ wu shiʼnɨ, ma mɨ zagɨ ghɨ lá ɨ nə́ taŋ ɨ tsi nɨ ntsi ntən nɨnkoŋ za le?”

¹⁸Yeso a bítɨ́ ayi ngə́, “O tɔŋ aghan ngə́ wu shiʼnɨ lá mbɨ́ʼ ake le? Ka ŋwɔn tsɛrə a bɔŋ ayi ntsatɨ a Ŋwi zɨzɨ ə.

¹⁹O zhi ntɨgə tsa: ‹Koʼ zhwitɨ, Koʼ chwurɨ, Koʼ ze, Koʼ kaŋ a ŋwɔn adaŋədaŋə, Koʼ kwarɨ ɨdzúm ɨbɛn adaŋədaŋə, Diʼ mbɔm zɨ shiʼnɨ a mbó ta ɨgho bo nɨmi ɨgho ghe.›”

²⁰Ŋwɔn wa a tíʼ sóŋ a mbó Yeso ngə́, “Ndiʼ aŋwaʼnɨ, nchwuʼnɨ mbáʼ ma bénɨ́ mánkɨ́ə ma zúʼnɨ́ ntɨgə tsen tsɛʼ ɨtsum ə.”

²¹Yeso a kyérɨ́ ayi nɨ akɔŋnɨ ɨ soŋ wəmbo ngə́, “O bvurɨ mboŋ a táʼ anu ə; ghɛn fiŋ ɨdzúm ɨtso ɨtsum, nga nkáb zɨ wu a mbó ngaŋ afúm, o mɨ tsi nɨ afuʼ zə wi a fɔməbvurə; ntiʼ ngyen ndzɔŋ aghə.”

²²Mbáʼ ŋwɔn wa a zúʼnɨ́ a məzen lá, ɨghagɨ ɨchi shíʼ ngə́ jwəg, a tiʼ ndo ngɛn nɨ adzə́ŋnɨ, mbɨ́ʼ ngə́ a tsí nɨ afuʼ zə wi ə.

²³Yeso a tíʼ ndyiŋ bɨyɛʼ ɨbyi nkarɨsɨ, ɨ soŋ a mbó bo ngə́, “A ghɨ lánɨ́ tən be tɨ́sə́n a mbó ɨbɛn ba bɨ tsinɨ nɨ afuʼ zə wi a nkúŋə́ a mu nɨfɔ nɨ Ŋwi ə!”

²⁴A tíʼ nkɨʼnɨ bɨyɛʼ ɨbyi a nye mɨgham məmiŋ ə. Lá Yeso a bə́ nkwátɨ́ ɨ soŋ a mbó bo ngə́, “Ɨbɔ, a tən be tɨ́sə́n a nkúŋə́ a mu nɨfɔ nɨ Ŋwi ə!

²⁵A yaŋnɨ a mbó aŋaŋuʼə ɨ tosɨ tsa a mu ngvo ɨsáʼ ntsa adzaŋ za be ŋwɔn afuʼ zə wi a kon a mu nɨfɔ nɨ Ŋwi ə.”

²⁶A kɨ́ʼnɨ́ bɨyɛʼ ɨbyi ɨ fəŋ ɨfɨʼ, bo tiʼ mbitɨ awa bo nɨbo ngə́, “Ma lan, ɨloŋ lá a ghɨ tíʼ dzɨ́ ɨwa le?”

²⁷Yeso a kyérɨ́ awa ɨ soŋ ngə́, “A mbó ŋwɔn mɨsɔŋ a ntsu, a nɨ atsanɨ anu, lá ka a tsanɨ ayi a mbó Ŋwi ə.”

²⁸Bita a sóŋ ngə́, “Ze, bɨgɨ nyɛʼtɨ ɨnu ɨtsum ndzɔŋ agho ə.”

²⁹Yeso a sóŋ ngə́, “Tsɛʼ a nkənu, ma sóŋə́ awɨŋ ə, ka táʼ ŋwɔn tse a tsi ayi ɨwu wa a nyɛʼtɨnɨ njwuʼ ɨzhi, kə ɨbɔmbɨma ɨbyi bə mbáŋnɨ́ kə bə bəngye, kə a nɨmi ɨyi kə a ta ɨyi kə ɨbɔ ɨbyi kə ɨdiʼ ɨshe ɨchi, mbɨ́ʼ nkfu ɨzan abɔʼnɨ nkən wu shiʼnɨ,

³⁰wa mbáʼ a ghɨnɨ keʼ kwárɨ́ nkfu nkɨ wu fɨgɨnɨ a nye nkfu zen, ndá abɔʼnɨ ɨbɔmbɨma bə mbáŋnɨ́ abɔʼnɨ bə bəngye, bɨmá bo ɨbɔ abɔʼnɨ ɨbɨŋ ɨshe, abɔʼnɨ adzaŋ za bɨ dɨ́gɨ́nə́ agho, o ghɨ kɨ́ kwárɨ́ ntsi ntən nɨnkoŋ a nye nkfu za ɨ ghɨnɨ zɔŋə.

³¹Lá bə ghaʼnɨ ba bɨ benɨ bɨtsabɨmbyi bɨ ghɨ tsɨrɨ ndzum, á ba bɨ tsɨrɨnɨ ndzum tiʼ bɨtsabɨmbyi ɛ.”

³²Yeso bo bɨ bɨyɛʼ ɨbyi tsí a ndómnji nkɔ́ʼə ngěn a Yerosalɛm ə. Yeso a kə́ ntɛ́mə́ ngěn a mbyi bo; a kɨ́ʼnɨ́ awa, ɨbɛn ba bɨ kɨ́nə́ ndzɔŋə awa bɨ tsí nɨ nɨbɔgɨ ə. A bə́ nkwiʼ ndɔ́gɨ́ a ba nɨghúm ntsɔb bá bo bo ghɛntɨ a ngɔbə, a tiʼ mbiʼnɨ sǒŋ ɨnu tsa tsɨ mɨ fu a nye zɨə.

³³Wɛrə a sóŋ a mbó bo ngə́, “Zɛnə azɨŋ ə, bɨgɨnə kɔ́ʼə ngěn a Yerosalɛm; adiʼ wa bɨ mɨ gha a Mɔn Ŋwɔn a mbó bɨntumshe bə wi abɔʼnɨ bɨdiʼ bɨ Nyɔngɔŋ ə. Bo mɨ soŋ ngə́ a vwo ɨsáʼ, ntiʼ ntsi nɨ nkfo, ɨ tiʼ mbyigɨ ayi ɨ gha a mbó ba a se bə Yuda be;

³⁴á bo tiʼ ngwerɨ ayi, ntsərɨ mɨtwe wə ɨnye, ndəŋ ayi nɨ ngwan, ntiʼ njwitɨ ayi; á bə nzhwemnɨ a ndzum njwi tsi tárə́ ghe.”

³⁵Jemsɨ bo Yoane, ɨbɔ bɨ Zebɛdi tíʼ nkɔ́ʼtɨ́ a ɨshi Yeso, ɨ soŋ wəmbo ngə́, “Ndiʼ aŋwaʼnɨ, bɨgɨ lǒ ngə́ o ghɨ anu zə tsɛrə a mbó bɨgɨ ə.”

³⁶Yeso a tíʼ mbítɨ́ awa ngə́, “Nɨ lǒ ngə́ á ma ghɨ ake a mbó bɨŋ ə?”

³⁷Bo tíʼ sóŋ wəmbo ngə́, “Ghɨ ngə́ á bɨgɨ shiʼtɨ ntsi, táʼ a bagɨ abó gho zə maʼə, wu mɔʼɔ a bagɨ abó ntəŋ, a nkfu za o ghɨnɨ tsí a mu nɨfɔ ɨno nə nɨfáŋ na.”

³⁸Lá Yeso a sóŋ a mbó bo ngə́, “Ka nɨ zhi awən anu za nɨ bítɨ́nə́ ghe. Nɨ chi no a mu ndɔ́ŋ za ma ghɨnɨ nó ɨwu kə chi kwarɨ nkyi ndzě ngɨ́ʼ wa ma ghɨnɨ kwárɨ́ lá le?”

³⁹Bo chwɨ́gɨ́ ngə́, “Bɨgɨ chi ghɨə.” Yeso a tíʼ sóŋ a mbó bo ngə́, “Ndɔ́ŋ za ma nónə́ ɨwu lá, nɨ ghɨ no; nkyi wa ma kwárɨ́nɨ́ lá, nɨ mɨ kɨ kwarɨ;

⁴⁰lá ɨ shiʼtɨ tsi a bagɨ abó me zə maʼə kə zə ntə́ŋ, ka a be ayi adiʼ azan a ntə́gɨ́nə́ ghe, lá a tsi be a mbó ɨbɛn ba bɨ kwɛ́nə nkyaŋtɨ a mbó bo ghe.”

⁴¹Abvuʼ aza za nɨghúm ghɨnə ndzúʼ mbɨ́ʼ anu za bo bítɨ́nɨ́ a mbó Yeso lá, ntiʼə ndwǐ ntɔŋ a nye Jemsɨ bo Yoane ghe.

⁴²Ma lan, Yeso a tíʼ ntɔ́ŋ awa bɨtsum ɨ soŋ a mbó bo ngə́, “Nɨ zhi ngə́ bɨta bɨ ɨlaʼ bɨ ba a se bə Yuda be kɔ́ʼə atú bo tso mɨnyam, bɨkum kɨ ntsi nɨ mɨtən ngɛn mɛtə.

⁴³Lá a ghɨ keʼ mə lá be a tɨtərɨ bɨŋ ə; ŋwɔn tsum wa a ghɨnɨ be ŋwɔn wu ngwi a tɨtərɨ bən, a mɨ zagɨ be ŋwɔn afaʼ a mbó bən,

⁴⁴ŋwɔn tsum wa a lɔnɨ mbe ntsambyi a tɨtərɨ bən, a mɨ zagɨ be abuʼ a ŋwɔn tsum ə.

⁴⁵Mbɨ́ʼ ngə́ Mɔn Ŋwɔn a sé yen ngə́ á bɨ faʼ a mbó zɨ, a yén be a faʼə a mbó bə daŋ ə, ɨ kɨ gha ntsi mbyi ɨzhi a ndzúŋ atú a ɨbɛn a ɨnɔ ghe.”

⁴⁶Yeso bo bɨ bɨyɛʼ ɨbyi yén nkón a Yeriko; a ghɨnə tɨ lǒ a Yeriko bo bɨ bɨyɛʼ ɨbyi abɔʼnɨ ɨnɔ ɨbɛn wu wi, ɨfɨgɨ zɨ tse za ɨ bénɨ́ ndɔŋ za ɨkum ɨyi bénɨ́ Barɨtɨmeyi mɔn Tɨmeyo a shiʼtɨ ntsi a ngɔbɨ ndómnji ɛ.

⁴⁷Mbáʼ a zúʼnɨ́ ngə́ a nɨ Yeso Ŋwɔn Nazarɛ, a bíʼnɨ́ ntɔ́nkə́ sóŋə́ ngə́, “Yeso, Mɔn Devidɨ, ko a mɨlɨŋnɨ ɨghə!”

⁴⁸Ɨbɛn bə ghaʼnɨ ghámtɨ́ ayi, ɨ soŋ ngə́ á láŋə́; lá a kwíʼ ntɔ́nkɨ́ ngɛn be nɨ mbyi ngə́, “Mɔn Devidɨ, ko a mɨlɨŋnɨ ɨghə!”

⁴⁹Yeso a zhwíʼnɨ́ ɨ sóŋ ngə́, “Tɔŋ ayi ɛ.” Bɨ tíʼ ntɔ́ŋ ɨfɨgɨ za ɨ soŋ wəmbo ngə́, “Korɨ ntəm ɨgho; ndo atɨ́, a tɔ́ŋə́ agho ə.”

⁵⁰Wɛrə a byí ngwáŋ atsɛʼ za a wábtɨ́nɨ́ a ɨbəm zɨ, ndyiʼ ndo atɨ́, ngɛn a mbó Yeso ghe.

⁵¹Yeso a bítɨ́ ayi ngə́, “O lǒ ngə́ á ma ghɨ ɨ lə a mbó gho ghe?” Ɨfɨgɨ za ɨ sóŋ wəmbo ngə́, “Ndiʼ aŋwaʼnɨ, ghɨ á ma bən ndzɛn ɨdiʼ ə.”

⁵²Yeso a chwɨ́gɨ́ wəmbo ngə́, “Ghɛn agho; abeməntəm azo a tsuʼ agho ə.” A byí nkɨ́ ndzé ɨdiʼ ntiʼ ndzɔŋ a Yeso bo zɨ ghen.