Read Ngemba Marɨkusɨ 13 Bible Online

Marɨkusɨ 13 - Ngemba bible

Marɨkusɨ 13

¹Mbáʼ Yeso a kɨ́nə́ fúə a mu Ndáŋwi zɨ Ngwi lá, táʼ ngyɛʼ ɨyi a sóŋ wəmbo ngə́, “Ndiʼ aŋwaʼnɨ, ze azo, ngɔʼ tsa abɔʼnɨ ndá tsa bɔnkɨ be tɨsɨŋə!”

²Yeso a chwɨ́gɨ́ wəmbo ngə́, “O zě ndá tsə wiə-wi tsen le? Bɨ ghɨ kum a tsɛrə, á táʼ ngɔʼ a keʼ adiʼ zɨ bə nchyɛ.”

³Mbáʼ Yeso a shíʼtɨ́nɨ́ ntsí atú Mbám Olif za lá, mbáʼ ɨ kɨ́nə́ ndyǐŋ Ndáŋwi zɨ Ngwi lá, Bita, Jemsɨ, Yoane abɔʼnɨ Andɨrɨya bítɨ́ ayi mbáʼ bo tsínɨ́ tsɛʼ bo bo ngə́,

⁴“Soŋ awɨgɨ ə, ɨnu tsiŋ ɨtsum ghɨ fú lá a nkfu ake le? Zɨŋ alɨgɨ a ghɨ fú a ndiʼə ngə́ nkfu ɨ kuʼnə á ɨnu tsiŋ ɨtsum fu le?”

⁵Yeso a sóŋ a mbó bo ngə́, “A nɨ lə ɨtú ɨtsən á ŋwɔn tse a keʼ awən tamtə.

⁶Ɨbɛn bə ghaʼnɨ ghɨ yen, ɨ kaŋnə ngə́ bo ghamə nɨ ɨkum ɨghan, ɨ soŋnə ngə́, ‹Ma lá Wa Bɨ Zɔ́ʼnɨ́ ə!› A ntsǎ a ndzum ɨdzaŋ mɨgham mətsen, bo ghɨ támtɨ́ ɨbɛn bə ghaʼnɨ ə.

⁷Be nɨ zuʼ mbɨ́ʼ mɨntso abɔʼnɨ mɨnkən mbɨ́ʼ mɨntso, á keʼ ngɨ́ʼ a mbó bən ghaə; məzen a mɨ zagɨ lɔgɨ adiʼ lá ɨ keʼ diʼ ngə́ ndwitə ɨ yenə ghe.

⁸Ɨlaʼ ghɨ tókɨ́nə a tsɨ mɔʼɔ, á nɨfɔ ntǒkə́ a nə mɔʼɔ ghe. Ɨshe ghɨ nɛ́mnə ɨdiʼ ɨtsum, á mɨchwinɨ a kɨ nchyɛ. Ɨnu tsiŋ be lá tso ntsambyi ndzaŋə mbáʼ mangye a chiʼnə.

⁹A bɨŋ mboŋ lə ɨtú ɨtsɨŋ ə. Bɨ ghɨ kótɨ́nə awən, ɨ kə́ tɔ́ŋtɨ́nə abyɛn a nye bɨŋ ə. Bɨ ghɨ shwomnə awən a mu ndáŋwi bə Yuda; á tiʼ mbe abárɨ́ a mbó bən ɨ tɛm a ɨshi bɨta bɨ ɨlaʼ abɔʼnɨ bɨfɔ mbɨ́ʼ atú azan, ɨ soŋ Nkən wu Shiʼnɨ a mbó bo ghe.

¹⁰Lá bɔŋ á ndwitə za yen, bɨ tsi nɨ ɨ zagɨ soŋ nkən wu shiʼnɨ a mbó ɨlaʼ ɨtsum ə.

¹¹A nkfu za bɨ konɨ awən ngɛn nɨ bən a ɨshi abyɛn, á nɨ keʼ ngwíʼə awən anu za nɨ mɨ soŋ bɔŋ á nyom abyɛn a kuʼə; nkfu za yen nkuʼ nɨ soŋ anu za bɨ ghanɨ a mbó bən mbɨ́ʼ ngə́ ka a ngámə́ ayi bɨŋ ə, a ghamə Azhwi zə Fɛmnɨ ə.

¹²Mɨma ŋwɔn wu mbáŋnɨ́ a mɨ tintɨ a wu mɔʼɔ ɨ gha a ntsu nɨvwo, á tarɨ a gha a mɔn ɨyi ɛ. Ɨbɔ mɨ kwənkɨnə bo bɨ bɨta ɨba, ɨ kɨ ghɨ á bɨ zhwitɨ awa ghe.

¹³Ɨbɛn bɨtsum ghɨ tiʼ ɨ bə̌nə awən mbɨ́ʼ aghə. Lá ŋwɔn tsum wa a korɨnɨ ntəm ngɛn fu a ndwitə, bɨ ghɨ loŋ ayi ɛ.”

¹⁴“Nɨ ghɨ́ zɛ́n ‹Azúm a Tɨbɔŋ za a Tsənkɨnə nkə́ ngyíŋə́ nɨ adɨrətú› á tɛm adiʼ wa ka a tsi ayi nɨ nchyɛ ghe, (á ŋwɔn wa a tɔ́ŋnə́ a zuʼ nkɨ nji a məziŋ ə). Nɨ ghɨ ndzɛ́n a zɛrə á ɨbɛn ba bɨ tsinɨ a Yudiya kɨə ngɛn nɨ ɨtú mɨntáʼ ə.

¹⁵Ŋwɔn wa a tsinɨ atú a ndá zɨ a mɨ zagɨ keʼ bə ntsəŋ nkfu a shíʼə ɨ kon ghɛn a mu ndá zɨ a ndɔgɨ azúm zə tsɛrə ɨ ghɛn nɨ zɛrə ghe.

¹⁶Ŋwɔn wa a tsinɨ afɔn a mɨ zagɨ ɨ keʼ bə nkwɛn ngɛn a ndá zɨ a ndɔgɨ atsɛʼ azhi ɛ.

¹⁷A ghɨ bɨ́gɨ́ be tɨ́sə́n a nye njwi mətsa a mbó bɨmabvu abɔʼnɨ bəngye ba bɨ kúgɨ́nɨ́ ɨbɔ bə bɔrɨ ə!

¹⁸A nɨ tsaʼtɨ a Ŋwi ngə́ á keʼ fu a nkfu ɨfɛgɨ wu tən wa!

¹⁹Mbɨ́ʼ ngə́ a nye njwi mətsa, ngɨ́ʼ za ɨ ghɨ tsí, ɨ ghɨ gháʼ ɨ tsa mbó ɨ tsa a za atuəshe a láʼnə ndzɛ́n nchwuʼnɨ mbáʼ Ŋwi a káʼnɨ́ mbyi zen ɨ yen gha tɨtsɔŋnɨ ə. Azúm zə tsɛrə tso zɛrə a láʼ keʼ bə nkwiʼ nchyɛ.

²⁰Maʼmbyí a bé tú ghɨ á njwi mətsa ɨ vutɨ, muŋ bɨ ghɨ keʼ loŋ a ŋwɔn mɨsɔŋ a ntsu tsɛrə ghe. Lá mbɨ́ʼ atú a ɨbɛn ɨbyi ba wɛrə a tsɔ́ʼnɨ́, wɛrə a ghɨ́ njwi mətsa vutə.

²¹Ma lan, be ŋwɔn tse a soŋ a mbó bən ngə́, ‹Ze, Wa bɨ Zɔ́ʼnɨ́ a wɛnə!› kə ‹Ze, a yirɨ!› á nɨ keʼ nɨŋ mɨntəm ɨmən ɨwu ə.

²²Bɨ Wa bɨ Zɔ́ʼnɨ́ bɨ ɨchwenu abɔʼnɨ ntóm Ŋwi ɨchwenu ghɨ fú a ɨshe ə. Bo ghɨ ghɨ ɨnu tsɨ yerɨnɨ-yerɨnɨ abɔʼnɨ ɨnu tsɨ tsanɨnɨ a ntámtɨ́ ɨbɛn, ɨ ghɛn kuʼ a nye ɨbɛn ba Ŋwi a tsɔ́ʼnɨ́ mbáʼ be a chi be mə lá.

²³A nɨ lə ɨtú ɨtsɨŋ ə! Ma fɨʼtɨnə ɨnu ɨtsum bɔŋ á nkfu ntiʼə ngyíŋə́ ghe.”

²⁴“A nye njwi mətsa, mbáʼ nkfu ngɨ́ʼ za ɨ minə, nɨnyom a ghɨ bəŋ ɨ tiʼ bə fɨ́ŋ ɨ fɨ́ŋnɨ́, á saŋ a keʼ bə ntá,

²⁵á mɨndzɔŋ tsɔʼkɨ a fɔməbvurə ngvokɨ a tɨshe, á mɨdaʼ[10] ma mɨ tsinɨ a fɔməbvurə á mɨ nɛm nkeʼ adiʼ bo bə nchyɛ.

²⁶Mɔn Ŋwɔn a mɨ tiʼ fu a ɨshe, ɨ yiŋnə a mu mbaʼ nɨ adaʼ zə wi abɔʼnɨ nɨfáŋ ə.

²⁷Wɛrə a ghɨ tsagɨ bɨtsen bɨ ndá bɨ Ŋwi a nye bɨbagɨ bɨ mbyi ben bi nɨkwa ngə́ á bo ghotɨ ɨbɛn ba Ŋwi a tsɔ́ʼnɨ́, ɨ lɔgɨnɨ a nye táʼ nɨbú nɨ atuəshe ɨ ghɛn kuʼ a nye nə mɔʼɔ ghe.”

²⁸“Nɨ yɛʼ anu a nye atɨ a figɨ ə. Tsɛʼ mbáʼ mbó ɨmyi biʼnɨnɨ ntótə́, ɨzəŋ tsə fi chwuʼ ɨ fuə lá, nɨ tsi nɨ njiɛ ngə́ mɨgham a tiʼ tsɛʼ abó ə.

²⁹Ndəŋndəŋ, be nɨ ze ɨnu mətsen tsɨ tɨ fuə, nɨ mɨ zhi ngə́ wɛrə a yenə ntiʼə nkúŋə́, ntiʼ tsɛʼ a nkom ntsundá ə.

³⁰Tsɛʼ a nkənu, ma sóŋə́ awən ngə́ nɨwə niŋ ghɨ keʼ tsa tɨgha ɨnu tsiŋ ɨtsum fuə.

³¹Fɔməbvurə bo atuəshe ghɨ keʼ ghɔ́ŋ nɨnkoŋ ə, lá nɨgham ɨnə ghɨ ghɔ́ŋ nɨnkoŋ ə.”

³²“Ka ŋwɔn tse a zhi ayi njwi zɨ wu kə a nyom wu wu ə — kə́ be bɨtsen bɨ ndá bɨ Ŋwi ba bɨ tsinɨ a fɔməbvurə kə Mɔn Mbáŋnɨ́; a zhi tsɛʼ Tarɨ ə.

³³A nɨ lə ɨtú tsɨŋ ə, á nkyérɨ́nə, mbɨ́ʼ ngə́ ka nɨ zhi awən nkfu za nkfu zɨ wu ghɨ kuʼə.

³⁴A ghɨ bé lá tso ngə́ ŋwɔn a nyɛʼtɨ njwuʼ ɨzhi ngɛn a nɨghan ə. A tɨnə tɨ fuə lá, ɨ nyɛʼtɨ ɨnu ɨtsum a mbó ngaŋ afaʼ ɨchi, ŋwɔn tsum a tsi nɨ azhi atú afaʼ, a tiʼ nkɨ soŋ a mbó ntsiŋ ntsundá ngə́ á nkyérə tsɛʼ kyerɨnə.

³⁵A nɨ tíʼ lá nkyérə́, mbɨ́ʼ ngə́ ka nɨ zhi awən nkfu za mboŋnjwuʼ a ghɨnɨ kwe — a chi be a nkwɛfɔ kə nɨ ntɨŋtfúʼ kə a ntɔ́ŋ ankɨʼə kə a tənjwi ɛ.

³⁶Be a vwukɨ kwɛn, a mɨ keʼ zagɨ nkwatɨ awən a fɨlye ə.

³⁷Anu za ma sóŋnə́ a mbó bən lá, ma kə́ sóŋə́ a zɛrə a mbó ŋwɔn tsum ə: a nkyérɨ́nə!”