Read Ngemba Marɨkusɨ 3 Bible Online

Marɨkusɨ 3 - Ngemba bible

Marɨkusɨ 3

¹Yeso a bə́ mbən ngɛn a mu ndáŋwi bə Yuda ghe. Ŋwɔn tse a tsí ɨwu nɨ akfo abó ə.

²Bə Farisao tíʼə ndyiŋə ayi, a ndzé ngə́ a mɨ tsuʼ ayi a Njwi Alaʼ Ŋwi, taŋ á bo tiʼ ntsi nɨ abárɨ́ ɨ kaŋ ayi ɛ.

³A tíʼ sóŋ a mbó ŋwɔn akfo abó wa ngə́, “Yen ɨghə”.

⁴Ntiʼ mbəŋ mbitɨ awa ngə́, “A nɨ Nyɔngɔŋ a Njwi Alaʼ Ŋwi a ngɨ ɨbɔŋ kə a ngɨ ɨbvu, a fɨ́gɨ́ ŋwɔn a mu ngɨ́ʼ kə a njwítə́ le?” Lá bo náʼ ayi ɛ.

⁵A lə́ŋtɨ́ awa nkárɨ́sɨ́, nɨ mɨlwi, ndzəŋnɨ adzaŋ za mɨntəm ɨma tə́nɨ́nɨ́ tso ngɔʼ, ntiʼ soŋ a mbó ŋwɔn wa ngə́, “Shiŋ abó azo ə.” A shíŋ a zɛrə, abó azhi a shwetɨ wədiʼ ə.

⁶Bə Farisao fú abyɛn mbyi ntiʼ nchwá ngǒtə́ mbɨ́ʼ a Yeso bo bɨ ɨbɛn ba bɨ kɨ́nə́ ndzɔŋə Ɛrɔd ndǒ ndóm wa bɨ mɨ zhwitɨ ayi ɛ.

⁷Yeso bo bɨ bɨyɛʼ ɨbyi tíʼ ndo ngɛn awa a ngə́rɨ́ Sagɨrə Galili, ɨnɔ ɨbɛn ɨ zɔŋ ayi ɛ. Bo ló a mbuʼ Galili, mbuʼ Yudiya

⁸ntáʼmbagə wu wi Yerosalɛm bo mbuʼ Idumeya, nkɨ ndo a nye ɨdiʼ tsa tsɨ ghɛ́nɨ́ ntsa fəŋ a Yorɨdan abɔʼnɨ kárɨ́kɨ́ Taya bo Saidɔn ə. Ɨnɔ ɨbɛn wa yén wəmbo lá mbɨ́ʼ ngə́ bo zúʼnɨ́ ɨnu ɨtsum tsa a kɨ́nə́ ngɨə ghe.

⁹Ɨnɔ ɨbɛn wa ɨ gháʼ be tɨ́sə́n a nye ndóm wa wɛrə a tíʼnɨ́ sóŋ a mbó bɨyɛʼ ɨbyi ngə́ á bo kyaŋtɨ abáŋ a nkyi a mbó zɨ mbɨ́ʼ ɨnɔ ɨbɛn wa ɨ tinɨ ngyen fágɨ́tɨ́ ɨ nyəŋtɨ ayi ɛ.

¹⁰Mbɨ́ʼ ngə́ a tsúʼnə a bə ghaʼnɨ, ŋwɔn tsum wa a tsínɨ́ nɨ nɨghɔ a tíʼə nyɔ́nə́ a mɔmtɨ wɛrə ghe.

¹¹Nkfu tsum za ɨzhwi tsɨ tɔmnɨnɨ tsa tsɨ tsínɨ́ a mu ɨnye ɨbɛn zɛ́nɨ́ ayi, bo vwókɨ́ wə ɨshi, ntɔ́nkɨ́ ngə́, “O lá Mɔn Ŋwi ə!”

¹²A tíʼ nkwantɨ awa ngə́ njimbɨʼ bo lo soŋ a mbó ŋwɔn tsɛrə a ŋwɔn wa zɨə nɨ wɛrə ghe.

¹³Yeso a tíʼ nkɔ́ʼ ngɛ́n atú mbám ndzarɨ, ntɔŋ ɨbɛn ba zɨə kɨ́nə́ ndǒ; bɨ tiʼ ngyen wəmbo ə.

¹⁴A tíʼ ntsɔ́ʼ awa nɨghúm ntsɔb bá, ba a chwínɨ́ ngə́ ntóm Yeso, ngə́ á bɨ ghɔŋ bo bo, taŋ á wɛrə a ghɨ ntyígɨ́ awa á bo núm nkárɨ́ soŋ anu a Ŋwi,

¹⁵ɨ kɨ gha mɨtən mɨ fɨ́gɨ́ bɨdzɨŋ a mbó bo ghe.

¹⁶Ba nɨghúm ntsɔb bá ba wɛrə a tsɔ́ʼnɨ́ lá bɨ benə: Samɔn wa wɛrə a chwínɨ́ ngə́ Bita;

¹⁷Jemsɨ bo mɨma ɨyi wu mbáŋnɨ́ Yoane ba bɨ bénɨ́ ɨbɔ bɨ Zebɛdi ba wɛrə a chwínɨ́ ngə́ Boanajɛsɨ ndiʼ ngə́, “Ɨbɔ bɨ mbəŋ ə”;

¹⁸Andɨrɨya, Firɨbɔ, Batəloma, Matyo, Tɔmashi, Jemsɨ mɔn Afasɨ, Tadyo, Samɔn Nkɔŋəlaʼ,

¹⁹abɔʼnɨ Yudasɨ Iskario wa a ghɨ́nɨ́ fen ayi ɛ. Wɛrə a tíʼ nkwɛ́n ngɛ́n ayi a ntsundá ə.

²⁰Ɨnɔ ɨbɛn kwíʼ ngótɨ́ ngyen, adzaŋ za Yeso bo bɨ bɨyɛʼ ɨbyi sé byi ntsi nɨ abárɨ́ a ndzɨə ghe.

²¹Ngwəgɨ Yeso ghɨnə ndzúʼ, ɨ fú ngɛn ɨ ghɛn ko ayi ɨ kwɛn nɨ zɨ, mbɨ́ʼ ngə́ ɨbɛn kə́ sóŋə́ ngə́, “A banɨ ə!”

²²Bɨdiʼ bɨ Nyɔngɔŋ ba bɨ lónɨ́ a Yerosalɛm ɨ shiʼ ngyen, bɨ sóŋ ngə́, “Bɛlzɛbu a kon wə ɨnye! A nɨ ɨfɔ bɨdzɨŋ wen wa a ghánə́ mɨtən wəmbo a fɨ́gɨ́ bɨdzɨŋ ə.”

²³A tíʼ ntɔ́ŋ awa ɨ ná mɨgham a mbó bo ngə́, “Be Satan a fɨgɨ a Satan lá ɨ nə́ le?

²⁴Be a be ngə́ alaʼ a yɛbtɨ atuəmbəm azhi a nye bɨbagɨ ba bɨ tǒkɨ́nɨ́ ɨtumbəm ɨtsa, alaʼ məza a mɨ kumnə.

²⁵Nkɨ mbə mbe ngə́ be njwuʼ yɛbtɨ atuəmbəm azhi a nye bɨbagɨ ba bɨ tǒkɨ́nɨ́ ɨtumbəm ɨtsa, njwuʼ məza mɨ keʼ tɛmə.

²⁶Be Satan a lo atɨ́ nkwənkɨ nɨ atuəmbəm azhi ntiʼ ngyɛbtɨ ayi, a chi keʼ tɛmə, ntiʼə ngěn lá a ndwitə ghe.

²⁷Lá ka ŋwɔn tse a chi kon ayi a ndá ntɨŋ ŋwɔn ɨ fúʼ ɨdzúm ɨchi, tɨkə a byigɨ mbyi nkorɨ a ntɨŋ ŋwɔn wa; a nyom məwa a chi tiʼ fúʼ ndá wɛrə ghe.

²⁸Tsɛʼ a nkənu, ma soŋ a mbó bɨŋ ə, bɨ ghɨ lɨgɨnɨ mɨbvu mɨ ŋwɔn mɨsɔŋ a ntsu mɨtsum abɔʼnɨ nɨgham nɨ tɨbɔŋ mbɨ́ʼ a Ŋwi na bɨ fɨgɨnɨ ngam;

²⁹lá ŋwɔn tsum wa mbáʼ a ghamnɨ nɨgham nə tɨbɔŋ mbɨ́ʼ a Azhwi zə Fɛmnɨ, bɨ chi láʼ keʼ ɨbvu ɨyi lɨgɨnɨ mbɨ́ʼ ngə́ a vwo anu a ngɨ ɨbvu nɨnkoŋ ə.”

³⁰(Yeso a sóŋ a məzen lá mbɨ́ʼ ngə́ ɨbɛn be tse kə́ sóŋə́ ngə́, “A tsi nɨ azhwi zə tɔmnɨnɨ ə.”)

³¹Nɨmi bɨ Yeso bo bɨ ɨbɔmbɨma ɨbyi bə mbáŋnɨ́ tíʼ ngyen; ntɨ tɛm a ntsundá, ntsagɨ nkən ntɔŋ ayi ɛ.

³²Ɨnɔ wa ɨ shíʼtɨ́nɨ́ ntsí nkárɨ́sɨ́ ayi sóŋ wəmbo ngə́, “Nɨmo ɨgho bo bɨ ɨbɔmbɨma ɨbo tɛm abyɛn ndǒ agho ə.”

³³Yeso a tíʼ nchwɨ́gɨ́ ngə́, “Nɨmi ɨghan bo bɨ ɨbɔmbɨma ɨbə nɨ bɨwa le?”

³⁴A lenə ndzɛn ɨbɛn ba bɨ tsínɨ́ nkárɨ́sɨ́ ayi lá, ɨ soŋ ngə́, “Nɨmi ɨghan bo bɨ ɨbɔmbɨma ɨbə benə!

³⁵Ŋwɔn tsum wa a ghɨnə anu za Ŋwi a lɔnə, a nɨ mɨma ɨghan wu mbáŋnɨ́, wu mangye abɔʼnɨ nɨmi ɨghə.”