Read Ngemba Marɨkusɨ 4 Bible Online

Marɨkusɨ 4 - Ngemba bible

Marɨkusɨ 4

¹Yeso a bə́ mbiʼnɨ ndiʼə a ngə́rɨ́ Sagɨrə Galili ə. Ɨnɔ ɨbɛn wa ɨ gháʼnɨ́ ntsá mbó ɨ kárɨ́sɨ́ ayi a nye ndóm wa a tsínɨ́ nɨ nkuŋə a mu abáŋ a nkyi, ɨ shiʼtɨ tsi ɨwu a mu sagɨrə wa; ɨnɔ ɨbɛn wa ɨtsum ɨ tɛm a ngə́rɨ́ sagɨrə wa.

²A tíʼ ndiʼ awa nɨ ɨnu tsɨ ghaʼtɨnɨ a mu mɨgham mə nanɨ ə. A mu ndiʼ ɨzhi məzen, a sóŋ a mbó bo ngə́:

³“Zuʼnə le! Ndyiʼ mɨshwom wu tse a ghɛ́n a mbi mɨdzɨ ə.

⁴Mbáʼ a kɨ́nə́ ngwarə lá, mbum tsə tse vwókɨ́ abɔʼ ndómnji, bɨsɨ́ŋ yen sɛʼtɨ nkfurə.

⁵Mbum tsə mɔʼɔ vwókɨ́ atú aláŋsə́ ngɔʼ mbáʼ ɨshe sé ɨwu gháʼtə. Tsɨ byí ntóm, mbáʼ ɨshe sé ɨwu shwitɨ lá.

⁶A nkfu za nɨnyom a tánɨ́ ntsɛgɨ, a tɔ́n a mɛrə mbáʼ mɨngaŋ ɨma sé bé lá. Mɨ tíʼ ndzómnkə́.

⁷Tsə mɔʼɔ mbum vwókɨ́ a tɨtərɨ kyɛrə-kyɛrə, kyɛrə-kyɛrə wa a kwi njiʼ nchwi za mbyigɨ a ɨshe, ɨ keʼ bə̂.

⁸Mbum tsə mɔʼɔ vwókɨ́ atú ɨshe nɨkomə; ntom, nkwi, nkɨ mban nga nchwi ɛ. Nchwi za fɨ́gɨ́ nchwi nkfu mɨghúm mɨntárə́, mɨghúm mi ntugə, táʼ nkɨ ntsa adzaŋ za bɨ wárɨ́nə́.”

⁹Yeso a lwɨ́gɨ́nɨ́ ɨ soŋ ngə́, “Ŋwɔn wa a tsinɨ nɨ ɨtoŋnɨ a ndzúʼə á zuʼə!”

¹⁰Yeso a ghɨnə ntsí zɨzɨ, ɨbɛn ba bɨ tsínɨ́ nkárɨ́sɨ́ ayi abɔʼnɨ ba nɨghúm ntsɔb bá bitɨ ayi ngə́ mɨgham mə nanɨ ma diʼ lá ngə́ ke le?

¹¹A tíʼ sóŋ a mbó bo ngə́, “Bɨ ghanə ɨnu nkubə tsə nɨfɔ nɨ Ŋwi a mbó bɨŋ ə, lá a mbó bɨ abyɛn, bɨ sǒŋ anu atsum a mbó bo lá a mu mɨgham mə nanɨ;

¹²taŋ, ‹Bo chi len ɨ kwiʼ len, lá ɨ keʼ ze; ɨ kɨ zhwiʼtɨ ɨ kwiʼ zhwiʼtɨ, lá ɨ keʼ zuʼ nkɨ njiɛ. Mbɨ́ʼ ngə́ bo bé ghɨ mə lá, muŋ bo mɨ bəŋ mɨntəm ɨ tiʼ tsi a bagɨ Ŋwi, á wɛrə tiʼ ndɨgɨnɨ mɨbvu ɨma ghe.›”

¹³Yeso a tíʼ mbítɨ́ awa ngə́, “Njingə nɨ se zuʼ nkɨ nji anu za nɨgham nə nanɨ nen nɨ soŋnɨ le? Nɨ ghɨ tíʼ tsa lá ɨ nə́ ɨ zuʼ kɨ zhi mɨgham mə nanɨ mɨtsum le?

¹⁴Ngwarɨ mɨdzɨ wa a warɨ lá nkən Ŋwi ə.

¹⁵Ɨbɛn bə mɔʼɔ be lá tso mbum nchwi tsa tsɨ vwókɨ́nɨ́ abɔʼ ndómnji lá. Tsɛʼ mbáʼ bo zuʼnɨ, Satan a byi ntiʼ ngyen, ndɔgɨ nɨgham na bɨ warɨnɨ a mu ntəm bo lá ndo nɨ nɛrə ghe.

¹⁶Ɨbɛn bə mɔʼɔ be lá mbum nchwi tsa bɨ warɨnɨ atú aláŋsə́ ngɔʼ ə. Tsɛʼ mbáʼ bo zuʼnɨ nɨgham na, mbyi nkwárɨ́ a nɛrə nɨ nɨdorɨ ə;

¹⁷lá nɨgham na keʼ nɨ mɨngaŋ a ntəm bo tsi, bo chwa ntiʼtɨ a nye məkum a nkfu; ngɨ́ʼ ghɨ́ ntíʼ ngyen kə bɨ dɨgɨ awa mbɨ́ʼ nɨgham na, bo byi nkɨ nyɛʼ anu za.

¹⁸Bə mɔʼɔ lá tsa tsɨ vwókɨ́nɨ́ a tɨtərɨ kyɛrə-kyɛrə; bo lá ɨbɛn ba bɨ zuʼnɨ nkən wa,

¹⁹lá ɨnu atuəshe bo bɨ akɔŋnɨ aza a nye afuʼ, abɔʼnɨ ntɛgɨ ntɔŋ a nye ɨbə́ŋ ɨdzúm tsa bo lɔnə, ɨ kon njiʼ nkən wa, nkən wa keʼ mɨntam konə.

²⁰Lá mbum tsa bɨ warɨnɨ atú ɨshe zɨ shiʼnɨ lá, tsɨ nɨ ɨbɛn ba bɨ zuʼnɨ nkən wa, mbem a wɛrə, nkonɨ mɨntam, ɨ fɨgɨ nchwi nkfu mɨghúm mɨntárə́, mɨghúm mi ntugə, táʼ nkɨ ntsa adzaŋ za bɨ bínə́.”

²¹Yeso a ghɛ́n nɨ mbyi mbitɨ a mbó bo ngə́, “Ŋwɔn tsɛrə a chi kon a ndá nɨ nkaʼ ɨ tɛgɨ a shwúrɨ́ akəbɨ kə ɨ tsagɨ ɨ tɛgɨ a ntɨnkon nkeʼ be atú atɛkɨ a nkaʼ tɛgɨ le?

²²Mbɨ́ʼ ngə́ azúm atsum za bɨ lwɛʼnɨ bɨ ghɨ fu nɨ zɛrə asaŋəsaŋ; azúm atsum za bɨ bɔmtɨnɨ, bɨ ghɨ shwirə.

²³Ŋwɔn tsum wa a tsinɨ nɨ ɨtoŋnɨ, á zuʼə.”

²⁴A kwíʼ sóŋ a mbó bo ngə́, “A nɨ tɛgɨ atú a nye ɨnu tsa nɨ zúʼnə́ ghe; ɨfɨʼ za o ghanɨ abyɛn, a nɨ za bɨ ghɨ gha ɨ wa, ɨ bə kɨ bvurɨ kwiʼtə.

²⁵Mbɨ́ʼ ngə́ a mbó ŋwɔn wa a tsinɨ nɨ zɛrə bɨ ghɨ kwiʼtɨ; a mbó ŋwɔn wa ka a tsi ayi nɨ azúm, tsɛʼ za a tsinɨ nɨ zɛrə lá, bɨ ghɨ kwárə́.”

²⁶Yeso a ghɛ́n nɨ mbyi a sóŋə́ ngə́, “Nɨfɔ nɨ Ŋwi be lá tsɛʼ tso ngə́ ŋwɔn a bi mɨdzɨ a ɨshwom,

²⁷ɨ nɔŋ ngvwúkə́ nɨ ɨtfúʼ bo nəzhwɨgɨnɨ, mɨdzɨ ma tom nkwi, a keʼ zhi adzaŋ za a tsanə.

²⁸A nɨ tsɛʼ ɨshe za ɨ ghɨnə mɨdzɨ tomnə, nkwi, nkonɨ mɨntam; a ntsambyi akɔʼtɨ, mbán, nchwi ntiʼ ndon a nye atsuʼ ə.

²⁹Nchwi za ghɨ́ ntən, mboŋ ɨshwom a tiʼ nchwan nɨ ɨŋwi ɨzhi, mbɨ́ʼ ngə́ nkfu mbɛʼ nchwi ɨ kuʼə.”

³⁰Yeso a bítɨ́ ngə́, “Be bɨgɨnə fɨʼnɨ nɨfɔ nɨ Ŋwi lá a nye ake kə ɨ ná a nɨŋə nɨgham mbɨ́ʼ a nɛrə le?

³¹Nɨ be lá tso ndzaŋ ɨsa, mbáʼ be bɨ bi, ɨ nɨ táʼ a tɨtərɨ ndzaŋ tsa tsɨ lánɨ́ nkɨ́gɨ́;

³²lá bɨ ghɨ́ mbi, ɨ kwi ndzám, ɨ sə mbó adzaŋ za bɨsɨ́ŋ tíʼnə́ ngyíŋə́ nkórɨ́ nkə ɨtsa ɨwu ə.”

³³Wɛrə a lɔ́gɨ́ ɨbə́ŋ mɨgham mə nanɨ men mə ghaʼnɨ ɨ soŋ anu a Ŋwi ɨwu a mbó bo, ɨ kɔʼ kuʼ a nye ɨfɨʼ za bo chínɨ́ zuʼ ɨ kɨ zhyɛ.

³⁴A sé gham a mbó bo tɨ ná nɨgham ə, lá a ghɨ ntsí a ndzum bo bɨ bɨyɛʼ ɨbyi, a fɨʼtɨ anu atsum a mbó bo ghe.

³⁵Nkwɛfɔ ghɨnə ngyén, a njwi məwa, wɛrə a soŋ a mbó bɨyɛʼ ɨbyi ngə́, “Bɨgɨnə daŋ a sagɨrə wen ntom ngɛn a ndzɨŋə wu mɔʼɔ ghe.”

³⁶Bo tíʼ nyɛʼtɨ ɨnɔ wa a ndzum nkon a mu abáŋ a nkyi za Yeso a fómnɨ́ ntsi wə mu, bo tiʼ ndɔgɨ ayi bo bo ghen. Ɨbáŋ nkyi tsɨ mɔʼɔ tsí bo bo ghe.

³⁷Kɨfɛrə wu ntən a bíʼnɨ́ ɨ kum tsa, nkyiɛ yiŋənɛmə tiʼə ngyíŋə́ ntúmə́ abáŋ a nkyi za nkúŋə́ wə mu, adzaŋ za a kɨ́nə́ ntíʼə ndúŋə́ ghe.

³⁸Lá wɛrə a tsí ayi a ndzum, a mu abáŋ a nkyi za, ndzɛʼtɨ atú azhi a nye lɨʼtɨ atú ndyě ghe. Bo tíʼ ndzɛm ayi mbitɨ ngə́, “Ndiʼ aŋwaʼnɨ, njingə ka a be ayi anu zə tse a mbó gho mbáʼ be bɨgɨ kfokɨ le?”

³⁹A ló atɨ́ ngámtɨ́ a kɨfɛrə wa, ntiʼ sóŋ a mbó nkyiɛ yiŋənɛmə wa ngə́, “Nyaʼ nchyɛ!” Kɨfɛrə wa tíʼ nkyɛ́ntɨ́, ɨdiʼ tiʼ mbɔnɨ ngə́ tum ə.

⁴⁰A tíʼ sóŋ a mbó bɨyɛʼ ɨbyi ngə́, “Nɨ bɔ́gə́ lá ake le? Nɨ bvurɨ nɨ abeməntəm tɨ tsi le?”

⁴¹Bo tíʼ ntsí nɨ abɔgɨtɨ ntiʼə mbítə́ awa bo nɨbo ngə́, “A lanɨ mbe ɨwa a wɛnə mbáʼ ɨ ghɛn kuʼ a nye kɨfɛrə bo sagɨrə wu ngwi zúʼnɨ́nə́ ayi lá le?”