Read Ngemba Marɨkusɨ 5 Bible Online

Marɨkusɨ 5 - Ngemba bible

Marɨkusɨ 5

¹Yeso bo bɨ bɨyɛʼ ɨbyi dáŋ a sagɨrə wa, nkón a bagɨ alaʼ bə Gɛrasa ghe.

²Tsɛʼ mbáʼ Yeso a byínɨ́ fú a mu abáŋ a nkyi za, ŋwɔn tse wa a lónɨ́ a nye ɨtú mɨshe, ntsi nɨ azhwi zə tɔmnɨnɨ a yén nkwátɨ́ ayi ɛ.

³Ŋwɔn wen a kə́ nchyɛ̌ lá a nye ɨtú mɨshe ghe. Ŋwɔn tse a kɨ chi keʼ ayi korɨ mbáʼ be a kwɛ ntsi be nɨ nkɨ atɨŋə;

⁴mbɨ́ʼ ngə́ bɨ kə́ ngáʼə nkórə́ ayi lá nɨ bɨkɨbuʼ abɔʼnɨ mɨnkɨ mɨ atɨŋə, lá a tə́ntɨ́nə́ mɨnkɨ mɨ atɨŋə ma, mbátɨ́ bɨkɨbuʼ ba a bagɨ bagɨ; ŋwɔn tse a sé ɨwu tsi wa a chínɨ́ bɔ́rɨ́sɨ́ ayi zɨzɨ ə.

⁵Nɨ ɨtfúʼ nɨ njwi a mu ɨtú mɨshe abɔʼnɨ ɨtú mbám, a kə́ númə́ nkárə́ ntɔ́nkə́, ndɛ́mtə́ atuəmbəm azhi nɨ mɨngɔʼ ə.

⁶A ghɨnə ndzɛ́n a Yeso nəghagɨ, nkɨə ngyen nguʼsɨ ayi;

⁷ntiʼ mbugɨ tsɛʼ nɨ nji zɨ ntən, ɨ sóŋə́ ngə́, “Yeso, Mɔn Ŋwi Akɔ́ʼɔ́ntsɨrə o tsi nɨ anu zə tse a ngɨə bɔgə le? Ma buʼ mbó a mbó gho nɨ ɨkum Ŋwi, koʼ ngɨ́ʼ a mbó me ghaə.”

⁸A ghám mə lan lá mbɨ́ʼ ngə́ Yeso a sóŋ a mbó zɨ ngə́, “Azhwi zə tɔmnɨnɨ, fu a mu ɨnye ŋwɔn wa!”

⁹Yeso a bítɨ́ ayi ngə́, “Ɨkum ɨgho nɨ ɨwa?” A chwɨ́gɨ́ ngə́, “Ɨkum ɨghə nɨ ‹Akarɨ›; mbɨ́ʼ ngə́ bɨgɨ ghaʼə.”

¹⁰A tíʼ mbúʼ mbó a mbó Yeso ngə́ á keʼ awa a mbuʼ wa fɨgə.

¹¹Təkɔʼ akarɨ a bɨkəkfunyam a kɨ chyɛ́ ndzɨ́ə a mbəm ntáʼə a kɨʼ wa.

¹²Ɨzhwi tɨbɔŋ tsa tíʼ mbúʼtɨ́ mbó a mbó Yeso ngə́, “Tsagɨ awɨgɨ a ɨnye bɨkəkfunyam byirɨ, á bɨgɨ kon a mu ɨnye bo ghe.”

¹³Wɛrə a tíʼ mbémtɨ́ anu aza ghe. Ɨzhwi tɨbɔŋ tsa tiʼ fu a ɨnye ŋwɔn wa nkon a ɨnye bɨkəkfunyam ba. Akarɨ a bɨkəkfunyam za a bénɨ́ tso nchwuʼ tsi bá lá, a tíʼ nzhwuʼ ɨ shiʼ mbəm abaŋ za, ɨ sɔ́ʼ awa a mu sagɨrə wu ngwi wa ɨ shwímkə́.

¹⁴Bɨntsǐŋ bəkfunyam ba tíʼ nkɨənɨ ngɛn a mu ntáʼmbagə wu wi abɔʼnɨ ɨtóm tsa tsɨ tsínɨ́ a kárɨ́kɨ́ ntiʼ nkərɨ anu za a fúnɨ́ a nye ɨnyam tsa. Ɨbɛn tíʼ ngyen a ndzé anu za a fúnə́.

¹⁵Bo yén nkuʼ a mbyɛn Yeso, ndzɛn a ŋwɔn wa a kwɛ́nɨ́ ntsí nɨ akarɨ a bɨdzɨŋ za lá a shiʼtɨ ntsi ɨwu, ngwəgɨ ɨtsɛʼ nkɨ shwetɨ; bo tiʼ ntsi nɨ nɨbɔgɨ ə.

¹⁶Ɨbɛn ba bɨ zɛ́nɨ́ anu za a fúnɨ́, tíʼ fɨʼtɨ a mbó bo anu za a fúnɨ́ a nye ŋwɔn wa a tsínɨ́ nɨ bɨdzɨŋ ba abɔʼnɨ bəkfunyam ba.

¹⁷Bo tíʼ mbiʼnɨ mbǔʼ mbó a mbó Yeso ngə́ á fu ayi a mu kárɨ́kɨ́ bo ghe.

¹⁸Adzaŋ za Yeso a kɨ́nə́ nkúŋə́ a mu abáŋ a nkyi za lá, ŋwɔn wa a tsínɨ́ nɨ bɨdzɨŋ ba lá a búʼtɨ́ mbó a mbó Yeso ngə́ zɨə mɨ zɔŋ ayi ɛ.

¹⁹Lá wɛrə a tón ayi, mbaŋnɨ soŋ wəmbo ngə́, “Kwɛn ngɛn a mbó bɨson ɨbo, ɨ fɨʼtɨ a mbó bo a təkɔʼ bɨ anu wa Maʼmbyí a ghɨnɨ a mbó gho, abɔʼnɨ adzaŋ za a konɨ a mɨlɨŋnɨ a nye gho ghe.”

²⁰Wɛrə a tíʼ ngɛn a mu ɨdiʼ tsa bɨ kɨ́nə́ ntɔ́ŋə́ ngə́ Dekabolisɨ[2] lá, ntíʼə fɨ́ʼtə́ a təkɔʼ bɨ anu wa Yeso a ghɨ́nɨ́ a nye zɨə. A kɨ́ʼnɨ́ a ŋwɔn tsum wa a zúʼnə́.

²¹Yeso a ghɨnə mbə́ ndaŋ a mu abáŋ a nkyi za, mbə́n a ndzɨŋə zɨ mɔʼɔ, ɨnɔ ɨbɛn wu wi ɨ ghótɨ́ nkárɨ́sɨ́ ayi, a ngə́rɨ́ sagɨrə wu ngwi wa.

²²Atú a ndáŋwi bə Yuda wa ɨkum ɨyi bénɨ́ Yaro; a zɛ́n a Yeso, ngyen ngvo wə mɨku,

²³mbuʼ mbó wəmbo ɨ sóŋə́ ngə́, “Mɨmu ɨghan wu mangye a tiʼ tsɛʼ a ntsu nɨvwo ə. Yen nyɔŋ mbó ɨmo wə ɨnye taŋ á shwetɨ ntsi ntɨŋ ə.”

²⁴Yeso a tíʼ ndzɔŋ ayi ɛ. Ɨnɔ ɨbɛn kə́ ndzɔŋə fágɨ́tə́ nkárɨ́sə́ ayi ɛ.

²⁵Mangye wu tse a tsí ɨwu wa alɛm a kɨ́nə́ fúə wə ɨnye atú ɨlom nɨghúm ntsɔb bá ghe.

²⁶A zɛ́nɨ́ ngɨ́ʼ be tɨ́sə́n a mbó ngaŋ ngaŋ tsə ghaʼnɨ ə. A tsə́ŋnə nkáb ɨzhi tsum, lá nɨghɔ ɨni bɨŋə ngěn be nɨ mbyi ɛ.

²⁷A yenə ndzúʼ nkərɨ mbɨ́ʼ a Yeso, ngyen a mu ɨnɔ wa, a ndzum Yeso ɨ mɔmtɨ atsɛʼ azhi ɛ.

²⁸Mbɨ́ʼ ngə́ a kwáʼtɨ́ ngə́, “Be ma mɔmtɨ tsɛʼ atsɛʼ azhi, muŋ ma mɨ shwetə.”

²⁹Tsɛʼ a nyom məwa, alɛm za a kɨ́nə́ fúə wə ɨnye lá a chwánɨ́; wɛrə a byi ndzuʼ a mu ɨnye ɨzhi ngə́ nɨghɔ ɨni na nɨ shwétə́.

³⁰Yeso a zúʼ a mu ɨnye zɨ ngə́ mɨtən fú ɨwu, mbyi mbənkɨ ayi a mu ɨnɔ ɨbɛn wa mbitɨ ngə́, “Atsɛʼ azan a mɔmtɨ ɨwa le?”

³¹Bɨyɛʼ ɨbyi sóŋ wəmbo ngə́, “O zě ɨnɔ ɨbɛn ɨ tinɨnə nkɔ́ʼɔ́nə́ a nye gho, lá o bɨŋə mbítə́ ngə́, ‹Aghan lá a mɔmtɨ ɨwa le?›”

³²Wɛrə a tíʼ nden nkarɨsɨ taŋ ɨ zɛn a ŋwɔn wa a ghɨ́nɨ́ anu məza ə.

³³Lá, mbáʼ mangye wa a zhínɨ́ anu za a fúnɨ́ a nye zɨ lá, wɛrə a fú ngyen nɨ nɨbɔgɨ nkə́ mbɨ́ŋnə́, ngvo a ɨshi Yeso ntiʼ fɨʼtɨ tsɛʼ nkənu mbɨ́ʼ anu za a fúnə́.

³⁴Yeso a tíʼ sóŋ wəmbo ngə́, “Mɔn ɨghan wu mangye, abeməntəm azo a ghɨ o shwetə; ghɛn nɨ mbɔnɨ, nkɨ ntiʼ shwetɨ a mbó nɨghɔ ɨno ə.”

³⁵Mbáʼ a kɨ́nə́ mbvúrə́ ngámə́, ntóm tsɨ tse ló a ndá Yaro ngyen soŋ ngə́, “Awa mɔn ɨgho wu mangye wa a kfonə ghe. O bɨŋə ngǎ ngɨ́ʼ a mbó Ndiʼ aŋwaʼnɨ ngə́ ke le?”

³⁶Yeso a wágɨ́nɨ́ anu za bo sóŋnɨ́ lá, mbaŋnɨ soŋ a mbó atú a ndáŋwi bə Yuda za ngə́, “Koʼ bɔgə, tsi tsɛʼ nɨ abeməntəm ə.”

³⁷Wɛrə a sé bém á ŋwɔn adaŋ a zɔŋ ayi ntsa a Bita, Jemsɨ abɔʼnɨ Yoane mɨma Jemsɨ wu mbáŋnɨ́ ə.

³⁸Bo ghɨnə ngyén nkón a ndá atú a ndáŋwi bə Yuda za ndzɛn adzaŋ za ɨdiʼ kɨ́nə́ ndumnə, ɨbɛn bugɨnə ntɔ́nkə́ nɨ nji tsɨ tɨŋə.

³⁹Yeso a kón ngɛn mbitɨ awa ngə́, “Nɨ bvugɨ ndum nkə́ mbúgə́ lá ake le? Mɔn wen ka a kfo ayi ɛ; a lyě ɨ lyenə.”

⁴⁰Bo wé ayi ɛ. Lá, Yeso a tságɨ́ awa bɨtsum abyɛn, ntiʼ ndɔgɨ a ta bɨ mɔn wa nɨ nɨmi ɨyi abɔʼnɨ ɨbɛn ba bo bo yénɨ́, bo kon ngɛn adiʼ wa mɔn wa a nɔ́ŋnə́.

⁴¹Wɛrə a wɛ́m abó a mɔn mangye wa ɨ soŋ wəmbo ngə́, “Talita kumi” mbáʼ a diʼnɨ lá ngə́, “Mɨmu mangye, ma soŋ a mbó gho, lo atɨ́ ə.”

⁴²Mɔn mangye wa a byí ndo atɨ́, ntiʼə ntɛ́mə́ ghe. (Wɛrə a bé ɨlom nɨghúm ntsɔb bá ghe). A kɨ́ʼnɨ́ awa be tɨsɨŋə.

⁴³Yeso a tíʼ ndánɨ́ nkwántɨ́ awa ngə́ á bo keʼ ghɨ á ŋwɔn tsɛrə a zhi anu məzen nkɨ ntiʼ soŋ ngə́ á bɨ gha azúm a mɨdzɨ á mɔn wa a dzɨə.