Read Ngemba Marɨkusɨ 8 Bible Online

Marɨkusɨ 8 - Ngemba bible

Marɨkusɨ 8

¹Abaŋ a bənə mbe ɨwu, ɨnɔ ɨbɛn wu wi kwiʼ ngǒtɨ lá nkeʼ nɨ azúm zə dzɨnɨ chyɛ. Yeso a tɔ́ŋ bɨyɛʼ ɨbyi ɨ soŋ a mbó bo ngə́,

²“Ma kǒ a mɨlɨŋnɨ a nye ɨnɔ wen, mbɨ́ʼ ngə́ ma tsinə bɨgɨ bo atú njwi tsi tárə́ lá bo keʼ nɨ azúm zə dzɨnɨ chyɛ.

³Be ma soŋ ngə́ á bo ghɛn nɨ njwuʼ ɨtsa nɨ nji muŋ bo mɨ tsúmnkɨ́ a ndómnji mbɨ́ʼ ngə́ bo bə mɔʼɔ tsi ɨwu ba bɨ lonɨ nəghagɨ ə.”

⁴Bɨyɛʼ ɨbyi bítɨ́ ayi ngə́, “Ŋwɔn mɨ lɔgɨ abán za a kuʼnɨ a ndzɨ́gɨ́ ɨbɛn ben ɨwu lá ɨ ghé a mu mɨkɨghonɨ men le?”

⁵Yeso a bítɨ́ awa ngə́ “Nɨ tsi nɨ mbɛʼ abán tsi sɛʼ le?” Bo chwɨ́gɨ́ ngə́, “Tsi samba ghe.”

⁶Wɛrə a tíʼ sóŋ ngə́ á ɨnɔ wa ɨ shiʼtɨ ntsi a tɨshe ə. Wɛrə a tíʼ ndɔgɨ mbɛʼ abán tsa tsi samba, ntsaʼtɨ a Ŋwi, mbatɨ a tsɛrə nga a mbó bɨyɛʼ ɨbyi ngə́ á bɨ yɛbtɨ a mbó ɨbɛn ba; bo tíʼ nkɨ́ ngyɛ́btɨ́ a mbó ɨnɔ wa.

⁷Bo tsí nɨ mbum ɨbɔ bɨ ɨshwú ə; wɛrə a ghɨnə ntsáʼtɨ́ a Ŋwi ɨ fɔ́gɨ́ a tsɛrə, ɨ soŋ ngə́ á bɨ kɨ ngyɛbtɨ a tsɛrə a mbó bo ghe.

⁸Bo dzɨ́ nzhwúrɨ́; bɨ sɛʼ ɨbagɨ ɨbvuʼ mɨdzɨ tsa, tsɨ bə nduŋ nkye tsi samba ghe.

⁹Ɨbɛn ba bɨ tsínɨ́ ɨwu bɨ bé tso nchwuʼ tsi nɨkwa ghe.

¹⁰Yeso a tíʼ ngɨ bo kwɛn awa; a tiʼ mbyi nkon a mu abáŋ a nkyi bo bɨ bɨyɛʼ ɨbyi tiʼ ngɛn a Mbuʼ Dalɨmanuta[4] ghe.

¹¹Bə Farisao yén mbiʼnɨ mɨgham, nkwə́nkə́ bo bɨ Yeso ghe. Bo kə́ ndǒ mbentɨ zɨ, ntiʼ soŋ ngə́ á ghɨ anu zə yerɨnɨ-yerɨnɨ a ndiʼə ngə́ ayi a tságɨ́ Ŋwi ə.

¹²A tsám achwɛrɨ tsɛʼ nkan ɨmu ɨmu, ntiʼ mbitɨ ngə́, “Nɨwə nɨ sɨŋə lǒ anu zə yerɨnɨ-yerɨnɨ lá ngə́ ke le? Tsɛʼ a nkənu, ma soŋ a mbó bɨŋ ə, bɨ ghɨ keʼ diʼ anu zə tse a mbó nɨwə nɨ sɨŋə ghe.”

¹³A tíʼ nyɛʼtɨ awa, mbə nkón a mu abáŋ a nkyi za ntom ngɛn a ndáŋ ndzɨŋə sagɨrə wa zɨ mɔʼɔ ghe.

¹⁴Bɨyɛʼ bɨ Yeso sé tiʼtɨ abán á ghaʼtə; bo lɨ́gɨ́nɨ́ ntiʼtɨ abán á ghaʼtɨ, adzaŋ məwen, ntsi tsɛʼ nɨ táʼ mbɛʼ abán a mu abáŋ a nkyi za.

¹⁵A tíʼ nkwantɨ awa ɨ soŋ ngə́, “A nɨ lə ɨtú ɨtsən a nye mbɛgə bə Farisao abɔʼnɨ mbɛgə Ɛrɔd ə.”[5]

¹⁶Bo ghámnɨ́ bo nɨbo ɨ sóŋə́ ngə́, “A chya ngámə́ lan lá mbɨ́ʼ ngə́ ka bɨgɨnə tsi awɨgɨnə nɨ abán ə.”

¹⁷Mbáʼ Yeso a zhínɨ́ anu za bo kɨ́nə́ sóŋə́ lá, mbitɨ a mbó bo ngə́, “Nɨ ghamnə ngə́ nɨ se nɨ abán tsi lá ngə́ ke le? Nɨ bvurɨ tɨ a ndzě kə ndzúʼə nkə́ njíɛ le? Nə nɨ adzaŋ za mɨntəm ɨmɨŋ tɨnkɨnɨ le?

¹⁸Nɨ tsi nɨ ɨmɨgɨ lá nkeʼ ndzě, ntsi nɨ ɨtoŋnɨ nkeʼ ndzúʼə le? Nɨ sě nkə́ ngwáʼtə́ le?

¹⁹Mbáʼ ma bátɨ́nɨ́ mbɛʼ abán tsa tsi tə̧̂ a mbó ɨbɛn nchwuʼ tə̧̂, nɨ sɛ́ʼ lá ɨbagɨ abán a mu nkye tsɨ lonɨ tsi sɛʼ le?” Bo chwɨ́gɨ́ wəmbo ngə́, “Nɨghúm ntsɔb bá ghe.”

²⁰Yeso a bə́ nkwiʼtɨ ngə́, “Mbáʼ ma kɨ́nɨ́ mbátɨ́ a tsa tsi samba a mbó ɨbɛn ba nchwuʼ nɨkwa, nɨ sɛ́ʼ lá ɨbagɨ abán a mu nkye tsɨ lonɨ tsi sɛʼ le?” Bo chwɨ́gɨ́ ngə́, “Tsi samba ghe.”

²¹A tíʼ mbítɨ́ a mbó bo ngə́, “Nɨ kɨ mbvurɨ tsɛʼ tɨ zuʼ nkɨ nji le?”

²²Mbáʼ Yeso bo bɨ bɨyɛʼ ɨbyi yénɨ́ nkón a Bɛtɨsaida, ɨbɛn bə tse yén nɨ ɨfɨgɨ zɨ tse a mbó Yeso, mbuʼ mbó ngə́ á mɔmtɨ ayi ɛ.

²³Wɛrə a tságɨ́ abó azhi nchwa a zə ɨfɨgɨ za ɨwu; ndɔgɨ ayi ɨ fu nɨ zɨ a mu atom za. A ghɨnə ntfugɨ mɨtwe wə ɨmɨgɨ, ɨ nyɔŋ mbó ɨmyi wə ɨnye, ntiʼ mbitɨ ayi ngə́, “O zě azúm zə tse le?”

²⁴Ɨfɨgɨ za tíʼ nden atɨ́, ɨ soŋ ngə́, “Ma zě ɨbɛn; lá bo fi ɨtɨ, ntɛ́mə́ ngěn ghe.”

²⁵Yeso a bə́ nkwiʼ nyɔ́ŋ mbó ɨmyi a nye ɨmɨgɨ mɨ ŋwɔn wa. A nkfu məwen, ɨfɨgɨ za tíʼ nkyerɨ ɨdiʼ a nye nkfu zɨ tse, ɨmɨgɨ ɨmyi bə nkyɛnɨ, a tiʼ ndzɛn azúm atsum ɨ shiʼnɨ ə.

²⁶Yeso a tíʼ sóŋ ngə́ á kwɛn ngɛn ayi a njwuʼ zɨ, nɨ ntɨgə zen ngə́, “Koʼ a mu atom za byi mbə́ nkúŋə́.”

²⁷Yeso a tíʼ ngɛn bo bɨ bɨyɛʼ ɨbyi, a mu ɨtóm a Seseria Filibi; a ndómnji a bítɨ́ bɨyɛʼ ɨbyi ngə́, “Ɨbɛn sóŋə́ ngə́ ma lá ɨwa le?”

²⁸Bo chwɨ́gɨ́ wəmbo ngə́, “Bə tse sóŋə́ ngə́ o nɨ Yoane Ngaŋ Nga Nkyi ɛ; bə mɔʼɔ sóŋə́ ngə́ o nɨ Alaja; bə mɔʼɔ ghə, o nɨ táʼ abɔʼnɨ ntóm Ŋwi ə.”

²⁹A tíʼ mbítɨ́ awa ngə́, “Ɨzɨŋ nkfu nɨ soŋ ngə́ ke le? Nɨ sóŋə́ ngə́ ma nɨ ɨwa le?” Bita a chwɨ́gɨ́ wəmbo ngə́, “O nɨ Wa bɨ Zɔ́ʼnɨ́ ə.”

³⁰A tíʼ ngá ntɨgə a mbó bo ngə́, “Njimbɨʼ nɨ gham mbɨ́ʼ aghan a mbó ŋwɔn tsɛrə ghe.”

³¹Yeso a tíʼ mbiʼnɨ a ndíʼ bɨyɛʼ ɨbyi ngə́: “Mɔn Ŋwɔn a mɨ zagɨ ze ngɨ́ʼ a mu ɨnu tsɨ ghaʼtɨnə. A bɨkum, bɨntumshe bə wi abɔʼnɨ bɨdiʼ bɨ Nyɔngɔŋ tiʼ nton ayi ɛ. Bɨ mɨ zhwitɨ ayi, a ndzum njwi tsi tárə́ á zɨə zhwemnɨ a mbó nɨvwo ə.”

³²A fɨ́ʼtɨ́ a məzen a lanɨ ndán a mbó bo ghe. Ma lan, Bita a shwúŋtɨ́ ayi bo zɨ ghɛntɨ a ngɔbə, a tiʼ mbiʼnɨ nkágə́ ayi ɛ.

³³Lá Yeso a bə́ŋ ayi ndyiŋ bɨyɛʼ ɨbyi, ngamtɨ a Bita, ɨ soŋ ngə́, “Lotɨ agho a mbyɛn me, a Satan! Ka ɨkwaʼtɨ ɨtso lo ayi a mbó Ŋwi ə, tsɨ lo be a mbó mbe ŋwɔn mɨsɔŋ a ntsu ə!”

³⁴Yeso a tíʼ ntɔ́ŋ ɨnɔ ɨbɛn wa abɔʼnɨ bɨyɛʼ ɨbyi ɨ soŋ a mbó bo ngə́, “Be ŋwɔn a tsi nɨ ndzɔŋə a ndzum me a nyɛʼ ɨnu tsa mbáʼ ntəm ɨyi lɔnə lá mbyɛʼ abaŋnɨ-baŋnɨ azhi ndzɔŋ aghə.

³⁵Mbɨ́ʼ ngə́ Ŋwɔn tsum wa mbáʼ a lɔnɨ ndoŋ ntsi mbyi ɨzhi a mɨ sam a zɛrə; lá ŋwɔn tsum wa a samnɨ ntsi mbyi ɨzhi mbɨ́ʼ aghan abɔʼnɨ nkən wu shiʼnɨ, a mɨ loŋ a zɛrə ghe.

³⁶Ɨbɛn chyɛ̌ nɨ abi mbáʼ be bɨ tsi nɨ mbyi tsum lá ɨ sam ntsi mbyi ɨza le? Kə́ kə́!

³⁷Ŋwɔn chi lanɨ gha lá ake ɨ kwebtɨ ntsi mbyi ɨzhi ɨwu le?

³⁸Be ŋwɔn a dɨrɨ atú mbɨ́ʼ aghan abɔʼnɨ ɨnu tsa ma diʼnə a nye nɨwə nɨ tɨbeməŋwi abɔʼnɨ nə abɨgəntəm nen, muŋ Mɔn Ŋwɔn a ghɨ kɨ dɨrɨ atú mbɨ́ʼ ayi a nkfu za a yenɨ a mu nɨfáŋ nɨ ta ɨyi bo bɨ bɨtsen bɨ ndá bɨ Ŋwi bə fɛmnɨ ə.”