Read Ngemba Alukasɨ 12 Bible Online

Alukasɨ 12 - Ngemba bible

Alukasɨ 12

¹Adzaŋ za ɨnɔ ɨnɔ ɨbɛn, nkuʼ nchwuʼ ɨchi a bɨ kɨ́nə́ nyɔ́nə́, bə tse nyəŋtɨnə mɨku mɨ bə mɔʼɔ a njwíʼtə́ a mbó Yeso lá, wɛrə a byígɨ́ mbyi ɨ soŋ a mbó bɨyɛʼ ɨbyi ngə́, “Nɨ lə atú a nye mbɛgə bə Farisao za — ma sóŋə́ lá ɨtsi ɨwa wa.[76]

²Azúm atsum za bɨ bɔmtɨnɨ bɨ ghɨ shwirə, á mɨnaŋ tsum a kyɛ́ʼnə́.[77]

³Lá be ngə́, anu atsum za o ghamnɨ a ndzumnɨ, bɨ ghɨ zúʼ nəzhwɨgɨnɨ, á anu atsum za o tsumtɨnɨ a ndzum nkubə a mu ndá zɨ ngvuʼnɨnɨ, bɨ ghɨ tíʼ tɛm be a ɨsamnɨ mɨtan ɨ tɔ́nkɨ́nə a zɛrə ɨwu ə.”

⁴“Ma sóŋə́ awən tsɛʼ nkənu ə, a bɨson ɨban, nɨ keʼ mbɔ́gɨ́ ɨbɛn ba bɨ zhwítɨ́nɨ́ mbəmnye lá nchi keʼ ghɛn nɨ mbyi ngɨ a za a bɨ́gɨ́nɨ́ ntsa a məza ə.

⁵Ma mɨ mɨtɨ a ŋwɔn wa nɨ mɨ bɔgɨ a mbó bɨŋ ə: nɨ bɔgɨ a Ŋwi, wa, a mɛtɨ a njwítə́, a tsi nɨ mɨtən a maʼə a mu ɨmugɨ nɨnkoŋ ə. Tsɛʼ nkənu ə, a nɨ wɛrə wa nɨ tsinɨ nɨ mbɔgə ghe!

⁶Be bɨ fǐŋ nchwaŋə tsi tə̧̂ lá nɨ ɨníní tsi bá le? Lá tsɛʼ táʼ anchwaŋə ka Ŋwi a ndɨ́gɨ́nə́ ayi ɛ.

⁷Tsɛʼ ɨnyɔŋ atú tsa tsɨ tsinɨ atú gho bɨ kwaʼnə a tsɛrə ɨtsum ə. Ma lan, á nɨ keʼ mbɔ́gə́ ghe; ndvuŋ ɨwɨŋ tsi atɨ́ ntsa wu ɨnɔ nchwaŋə ghe!”

⁸“Ma sóŋə́ awən tsɛʼ nkənu ngə́ ŋwɔn tsum wa a soŋnɨ asaŋəsaŋ ngə́ zɨə tsi a bagɨ me, Mɔn Ŋwɔn a ghɨ kɨ́ ghɨ tsɛʼ adzaŋ məwa a ɨshi bɨtsen bɨ ndá ba a nɨ bə Ŋwi ə.

⁹Lá ŋwɔn tsum wa a tonɨ aghan asaŋəsaŋ, Mɔn Ŋwɔn a ghɨ kɨ́ tón a wɛrə a ɨshi bɨtsen bɨ ndá ba a nɨ bə Ŋwi ə.

¹⁰Ŋwɔn tsum wa a ghamnɨ anu nkwənkɨ a Mɔn Ŋwɔn ɨwu, bɨ chi lɨgɨnɨ ɨbvu ɨyi ɛ; lá ŋwɔn tsum wa a ghamnɨ ɨbvu nkwənkɨ a Azhwi zə Fɛmnɨ ɨwu, bɨ chi láʼ keʼ ɨbvu ɨyi lɨgɨnə.[78]

¹¹Be bɨ ghɨ́ ndɔgɨ awən a ɨshi abyɛn a mu ndáŋwi bə Yuda kə a ɨshi gobɨna kə a ɨshi bɨta bɨ ɨlaʼ, nɨ keʼ nchíʼnə́ ngə́ nɨ mɨ kwarɨ atuəmbəm azən ɨ nə́ kə ɨ soŋ ngə́ ke le.[79]

¹²Mbɨ́ʼ ngə́ Azhwi zə Fɛmnɨ a ghɨ diʼ awən a nyom məwa nɨ anu za nɨ tsinɨ nɨ ɨ soŋə ghe.”

¹³Táʼ ŋwɔn tse wa a tsínɨ́ a mu ɨnɔ wa a sóŋ a mbó Yeso ngə́, “Ndiʼ aŋwaʼnɨ, soŋ a mbó mɨma ɨghan wu mbáŋnɨ́ ngə́ á bɨgɨ zɨ yɛbtɨ ɨdzúm tsa ta ɨwɨgɨ zɨ a nyɛ́ʼtɨ́nɨ́ a mbó bɨgɨ zɨə.”

¹⁴Yeso a chwɨ́gɨ́ wəmbo ngə́, “Ɨson ɨghan, ka a be ayi adiʼ azan a sáʼ bən kə a ngyɛbtɨ ɨdzúm ta ɨwən a tɨtərɨ bən bɨbá ghe.”

¹⁵Yeso a tíʼ ngɛn nɨ mbyi ɨ soŋ a mbó bo bɨtsum ngə́, “Ŋaʼnɨ ɨmɨgɨ ɨmən nkɨ nkyɛm ɨtumbəm ɨtsən a mbó mbúŋ amyiɛnɨngám ɨtsum; mbɨ́ʼ ngə́ ntsi mbyi ŋwɔn ka ɨ be ayi ɨdzúm tsa a tsinɨ nɨ tsɛrə, kə a tsi nɨ ɨdzúm be lə ghe.”

¹⁶Yeso a tíʼ ná nɨgham nen a mbó bo ngə́: “Nkfu tsɛrə ŋwɔn nkáb tse a tsí ɨwu wa mɨdzɨ dzə́nkɨ́nɨ́ a mu mɨshwom ɨmyi tsɛʼ adaŋədaŋə ghe.

¹⁷A bíʼnɨ́ ngwíʼə ayi ngə́, ‹Ka ma tsi aghan nɨ adiʼ za ma mɨ saŋ mɨdzɨ ɨman mɛnə ɨwu ə. Ma mɨ ghɨ lá ɨ nə́ le?›

¹⁸A sóŋ a mbó atuəmbəm azhi ngə́, ‹Ma zhinə anu zə ghɨnə; ma mɨ kum mɨntaŋ mɨ mɨdzɨ ɨmə, ɨ bə korɨ a mə wi ə, ɨ tiʼ saŋ nchwi ɨzan ɨwu abɔʼnɨ mɨdzɨ ɨman mɨtsum ə.›

¹⁹A nyom məwa ma mɨ tiʼ soŋ a mbó atuəmbəm azan ngə́, ‹Ŋwɔn abɔŋətú! O tsi nɨ ɨdzúm tsɨ shiʼnɨ ɨtsum tsa o lɔnə atú ɨlom tsɨ ghaʼtɨnə. Lɔgɨ ntsi mbyi abɔbɔ, dzɨə, no nkɨ ndorɨ agho!›

²⁰Lá Ŋwi a sóŋ wəmbo ngə́, ‹Adzɨŋtɨ! Tsɛʼ nɨ ɨtfúʼ wɛnə ma mɨ kwarɨ a gharɨ ɨgho; a nyom məwa a mɨ tiʼ tsi ɨwa nɨ ɨdzúm tsiŋ ɨtsum tsa o lɛnɨ a mbó atuəmbəm azo lá le?›”

²¹Yeso a tíʼ ndwɨgɨnɨ ngə́, “Lə nɨ adzaŋ za a bénə́ a mbó ɨbɛn ba bɨ kwɛ́ʼnɨ́ ɨdzúm a ɨnɔ a mbó ɨtumbəm ɨtsa, lá mbe ɨfúm a ɨshi ɨmɨgɨ Ŋwi ə.”

²²Yeso a tíʼ sóŋ a mbó bɨyɛʼ ɨbyi ngə́, “Ma lan, ma tiʼ nkwiʼtɨ ɨ soŋ a mbó bən ngə́ á nɨ keʼ mbǔʼ ɨnye ɨtsən mbɨ́ʼ ntsi mbyi; nɨ keʼ mbǔʼ ɨnye mbɨ́ʼ mɨdzɨ kə mbɨ́ʼ ɨtsɛʼ tsa nɨ mɨ wəgɨ a ɨnye bɨŋ ə.

²³Ntsi mbyi ɨ tsi nɨ ɨlɨŋ ntsa mɨdzɨ, ɨ kwiʼtɨ, mbəmnye ɨ tsi nɨ ɨlɨŋ ngɛn nɨ mbyi ntsa ɨtsɛʼ ə.

²⁴A nɨ liŋ ɨkaŋa; ka bo mbiə awa mɨdzɨ nkeʼ nkə́ fuʼə ghe; ka bo nchyɛ̌ awa nɨ mɨntaŋ a saŋ mɨdzɨ ə; lá Ŋwi a dzɨgɨnə awa ghe! Lá nɨ tsa bɨsɨ́ŋ tsɛʼ nkə!

²⁵Ntsi mbyi ɨzɨŋ chi satɨ[80] mbáʼ be nɨ mbǔʼ ɨnye mbɨ́ʼ a zɛrə le?

²⁶Be nɨ ghuʼ ngɨ tsɛʼ mɨnyi mɨ anu tso məzen kɨ́káŋ, nɨ tiʼə mbɨ́ŋə́ mbǔʼ ɨnye ɨtsən mbɨ́ʼ a tsə mɔʼɔ tsa lá ngə́ ke le?

²⁷Nɨ ze bɨbaŋbaŋ ba bɨ kwínə́ a mu mɨbaʼ lá le: bɨ se faʼə nkeʼ ɨtsɛʼ a ngɨə ngwə́gə́ a ɨnye bo ghe. Lá ma sóŋə́ a mbó bən ngə́ tsɛʼ Ɨfɔ Sanɨmɔ nɨ afuʼ azhi atsum; a sé nɨ ɨtsɛʼ tsi tsa tsɨ bɔŋnɨ nkuʼ a táʼ baŋbaŋ wɛnə ghe.[81]

²⁸A wə́gə́ Ŋwi ngwəgɨ ɨtsɛʼ a nye ngyɛn mɨbaʼ — ngyɛn za mbáʼ o zɛ́nə́ sɨŋə ndó ndo ɨzo kɨ́káŋ, mbɨ́ʼ ngə́ bɨ tɔn nɨ ɨmugɨ ə. Be Ŋwi a boŋ lá abə́ŋ atsɛʼ ake a ngwə́gə́ a ɨnye bən le? Abeməntəm azən a kɨ́gɨ́ be tɨsɨŋə.

²⁹Ma lan, á nɨ keʼ ɨnye ɨtsɨŋ a mbúʼə mbɨ́ʼ ɨdzúm tsiŋ ɨtsum, ngwiʼə awən nkfu tsum mbɨ́ʼ azúm za nɨ mɨ dzɨ ɨ kɨ noə.

³⁰(Mbɨ́ʼ ngə́ ɨbɛn bɨ atuəshe bɨ wiʼə awa nkfu tsum mbɨ́ʼ ɨdzúm mətsiŋ ə.) Ta ɨwən a zhi ngə́ nɨ lǒ ɨdzúm tsiŋ ɨtsum ə.

³¹Nɨ baŋnɨ nɨŋ mɨntəm ɨmən be a nye anu a nɨfɔ a wɛrə, wɛrə a mɨ tiʼ gha ɨdzúm tsiŋ ɨtsum a mbó bɨŋ ə.”

³²“Nɨ lá tsɛʼ ɨbɛn a nɨ́sháŋnɨ́ ə, nɨ keʼ bɔgə, mbɨ́ʼ ngə́ nɨdorɨ tsi a ntəm Ta ɨwən a ngá nɨfɔ ɨni a mbó bɨŋ ə.

³³Fenɨ ɨdzúm ɨtsɨŋ ɨtsum nga nkáb a mbó ngaŋ afúm ə. Nɨ lo ɨbɔ bɨ aban bə nɨŋ nkáb bɨ tə́ ndvúŋə́, ɨ nɨŋ afuʼ azən ɨwu ndɛn a fɔməbvurə, adiʼ wa bɨ chinɨ keʼ shwɛʼtɨ mbɨ́ʼ ngə́ ka ndzɛrə a ngěn nkuʼə ayi ɨwu, ndzɛm chi keʼ kɨ ntsənkə.

³⁴Mbɨ́ʼ ngə́ ntəm ɨgho chyɛ̌ lá tsɛʼ adiʼ wa afuʼ azo atsum a tsinɨ ɨwu ə.”

³⁵“Kyaŋtɨnə ɨnye ɨtsən a nkwárɨ́ atsum za a yenə, ngwə́gɨ́ mbáŋnɨ́ ɨtsən nkɨ nchwuʼ mɨnkaʼ ɨmən,[82]

³⁶tso ngaŋ afaʼ tsa tsɨ tsenə a tafaʼ ɨwa ngə́ á lo adiʼ a nɨzɔ́ʼ nkwe. A bé ngə́ a kwɛnə, nkɨ mbuʼtɨ ntsundá, bɨ waŋnɨ ŋaʼ wəmbo ə.

³⁷Nɨdorɨ nə wi tsi a mbó ngaŋ afaʼ tsa tafaʼ ɨwa a kwɛ́nə́ nkwatɨ awa a nɨkyerə ghe! Ma sóŋə́ a mbó bən ngə́ a mɨ tsɔʼ a tɔgɨ ɨyi, ɨ soŋ a mbó bo ngə́ á bo tsi a ɨshe, ɨ tiʼ gha mɨdzɨ á bo dzɨə.

³⁸Nɨdorɨ nə wi tsi a mbó bo mbáʼ be a kwatɨ awa bɨ nkyérə́ kə a kwɛn be a ntɨŋ ɨtfúʼ, kə ntɨʼ ntsa lá!

³⁹Nɨ zhi ɨ shiʼnɨ ngə́ mboŋndá a be zhi a nyom wa ndzɛrə a mɨ yen, muŋ a mɨ keʼ nyɛʼtɨ á ndzɛrə wa a bɛʼ ndá ɨzhi ɛ.[83]

⁴⁰A mbó bən, wəbɔʼ, nɨ tsi nɨ nchyɛ a nɨkyerə mbɨ́ʼ ngə́ Mɔn Ŋwɔn a ghɨ yen a nyom wa ka nɨ ntsiŋə awən ayi ɛ.”

⁴¹Bita a bítɨ́ ngə́, “Maʼmbyí nɨgham nə nanɨ nen nɨ kɨ nkwiʼtɨ awɨgɨ wəbɔʼ, kə o sóŋə́ lá ngə́ o nɨŋ a ŋwɔn tsum wə mu le?”

⁴²Maʼmbyí a chwɨ́gɨ́ ngə́, “Ŋwɔn afaʼ wa a faʼnə nɨ ntəm ɨyi ɨtsum abɔʼnɨ zóŋ a lanɨ ntiʼ mbe lá wɨŋə le? A lá ŋwɔn wa mbáʼ mboŋnjwuʼ a lɛnɨ ngə́ á ndə́ŋtɨ́ njwuʼ ɨzhi, a ghanə mɨdzɨ a mbó ŋwɔn tsum tsɛʼ a nye nyom, tə́ fəŋ ɨfɨʼ ə.

⁴³Nɨdorɨ nə wi tsi a mbó ŋwɔn afaʼ mbáʼ be mboŋnjwuʼ a tɨ kwě a njwuʼ zɨ nkwatɨ ayi a faʼnə tsɛʼ adzaŋ məwiŋ ə!

⁴⁴Tsɛʼ a nkənu, ma sóŋə́ awɨŋ ə, mboŋnjwuʼ wen a mɨ tiʼ nɨŋ ayi ngə́ á ndə́ŋtɨ́ ɨdzúm ɨchi tsɛʼ ɨtsum ə.

⁴⁵Lá be ŋwɔn afaʼ wa a soŋ a mbó atuəmbəm azhi ngə́ mboŋnjwuʼ a mɨ tsi abyɛn atú nkfu zɨ sa bɔŋ ɨ kwɛn, nkɨ ntiʼ mbiʼnɨ a shwóm ngaŋ afaʼ tsɨ mɔʼɔ, mbáŋnɨ́ nkwiʼtɨ bəngye, ntíʼə ndzɨ́ə nkə́ nǒ mbánə́,

⁴⁶mboŋnjwuʼ wa a ghɨ kwɛ́n a nye njwi za ka a ntsiŋə ayi a wɛrə, nkeʼ kɨ nji a nyom wa a ghɨnɨ kwe. Mboŋnjwuʼ a ghɨ ghɨ á zɔ́gɨ́ ɨmugɨ a mu mbó zɨ, ɨ tiʼ kɨ tsagɨ ayi á tsi bo bɨ ɨbɛn ba ka bo faʼə awa nɨ táʼ ntəm ə.

⁴⁷Ŋwɔn afaʼ wa a zhinɨ anu za tafaʼ ɨyi a lɔnə ngə́ á zɨə ghɨ, lá nkeʼ kyaŋtɨ ɨnye ɨzhi a ngɨ zɛrə, bɨ mɨ ləŋ ayi nɨ ngwan zɨ ndɨtɨnɨ ə.

⁴⁸Lá ŋwɔn afaʼ wa a se zhi anu za tafaʼ ɨyi a lɔnə ngə́ á zɨə ghɨ, lá ngɨ anu za a lɔnə ngə́ á bɨ shwom ayi, bɨ mɨ mɔmtɨ ayi nɨ ngwan tsɛʼ mɔmtɨnə. Ŋwɔn wa bɨ ghanɨ a zə ghaʼtɨnɨ wəmbo, bɨ tsiŋə ayi nɨ zə ghaʼtɨnə; ŋwɔn wa bɨ ghanɨ a za a ghaʼtɨnɨ ngɛn nɨ mbyi wəmbo bɨ kə́ ntsíŋə́ ayi nɨ za a ghaʼtɨnɨ ngɛn a mbyi ɛ.”

⁴⁹“Ma yén a maʼ ɨmugɨ atuəshe, a ghɨ́ ake á be ngə́ ɨ kwɛnə ntiʼə ndwǎ le!

⁵⁰Ma tsi nɨ ɨ ghɨ kwarɨ nkyi lá ngwiʼə aghan be tɨ́sə́n mbɔŋə anu məza a ghɨ ngyen ntsa![84]

⁵¹Nɨ kwɛ ndanɨ nkwaʼtɨ ngə́ ma yén lá a ngá mbɔnɨ atuəshe le? Ngáŋ, keʼ mbɔnɨ be lá mbe be ayɛbtɨ ə.

⁵²Ɨ lɔgɨnɨ tɨtsɔŋnɨ ɨ ghɛn nɨ mbyi, ngwəgɨ za ɨbɛn tsinɨ ɨwu bi bɨtə̧̂ mɨ yɛbtə, á ɨbɛn bi bɨtárə́ keʼ ndǒ ndzě ɨbɛn bi bɨbá, á ɨbɛn bi bɨbá keʼ ndǒ ndzě ɨbɛn bɨtárə́ ghe.

⁵³Bɨtarɨ ghɨ keʼ ndǒ ndzě ɨbɔ mbáŋnɨ́ ɨba, á ɨbɔ mbáŋnɨ́ keʼ ndǒ ndzě bɨta ɨba; bɨmá ghɨ keʼ ndǒ ndzě ɨbɔ ɨba bə bəngye, á ɨbɔ bəngye keʼ ndǒ ndzě bɨmá ɨba; bɨmabɨŋ ghɨ keʼ ndǒ ndzě bəngye bɨ ɨbɔ ɨba, á bəngye keʼ ndǒ ndzě bɨmabɨŋ ɨba ghe.”

⁵⁴Yeso a kwíʼtɨ́ ɨ sóŋ a mbó ɨbɛn ba ngə́, “Be nɨ ghɨ ndzɛ́n mbaʼ ɨ lo a ntsonyom ntyínə́ ngyíŋə́ lá, nɨ byíɛ sóŋə́ ngə́ mbəŋ mɨ lo — ɨ kɨ ndo.

⁵⁵Nɨ ghɨ ndzúʼ kɨfɛrɨ a tɨ tsǎ a bagɨ ntɨŋ lá, nɨ sóŋə́ ngə́ ɨdiʼ mɨ lomə — ɨ kɨ ndomə.

⁵⁶Ngaŋ ngɨ ɨtsi! Nɨ chi liŋ ɨshe, ɨ liŋ nɨkaŋ ɨ byigɨ mbyi ɨ soŋ adzaŋ za njwi mɨ be; a tiʼ ngɨ ake nɨ chi keʼ zhi a yentəzɔʼ ɨnu tsa tsɨ fúnə́ tɨtsɔŋnɨ lá le?”

⁵⁷“Nɨ chi keʼ kwab ɨtú ɨtsən ntsɔʼ anu zə shiʼnɨ a ngɨə le?

⁵⁸Be ŋwɔn tse a tɔŋtɨ abyɛn a nye gho, kɨ́rɨ́ mɨtən ɨmo ndzɛn ngə́ bɨŋ zɨ tɛgɨnɨ anu za bɔŋ ɨ tiʼə ghěnə a ngɔʼ abyɛn ə. Be o tú ma lan ghɨ, a mɨ shwuŋ agho, ɨ ghɛn nɨ gho a ɨshi tabyɛn, wa a mɨ kyaŋtɨ agho ɨ gha a mbó ɨbɛn ba bɨ mɨ lɔgɨ agho ɨ ghɛn nɨŋ atsáŋ ə.

⁵⁹Ma sóŋə́ agho, o mɨ ghɔŋ ɨwu ɨ kuʼnɨ njwi za o ghɨnɨ tfú ndwɨgɨnɨ ndzum aníní a vwonu ɨgho ghe.”