Read Ngemba Alukasɨ 16 Bible Online

Alukasɨ 16 - Ngemba bible

Alukasɨ 16

¹Yeso a sóŋ a mbó bɨyɛʼ ɨbyi ngə́, “Ŋwɔn nkáb tse a tsí ɨwu ntsi nɨ ndə̌tú ngaŋ afaʼ ɨchi wa a kɨ́nə́ ndə́ŋtɨ́ ɨdzúm ɨchi ɛ. Ɨbɛn yén ɨ soŋ a mbó ŋwɔn nkáb wa ngə́ ndə̌tú ngaŋ afaʼ ɨchi wa a tsənkɨ ɨdzúm ɨchi adaŋədaŋə,

²ma lan a tíʼ ntɔ́ŋ ayi a yen a mbyi zɨ, a soŋ ngə́, ‹Ma lanə ndzúʼə lá anu ake mbɨ́ʼ agho le? Gha atyetɨ abó afaʼ azo atsum adzaŋ za o lə́ŋtɨ́nɨ́ ɨdzúm ɨtsə, mbɨ́ʼ ngə́ o mɨ koʼ ndəŋtɨ ɨdzúm ɨtsan bə nkwiʼ mbe.›

³Ŋwɔn afaʼ wa a sóŋ a mbó atuəmbəm azhi ngə́, ‹Tafaʼ ɨghan a mɨ fɨgɨ aghan afaʼ ə. Ma mɨ tiʼ ghɨ lá ɨ nə́ le? Ka ma tsi aghan nɨ adaʼ a ntóŋ ɨkə́n, nkə́ ndɨ́rə́ atú a ndɔ́ntɨ́ ɨdzúm ə.

⁴Tɨtsɔŋnɨ ma zhi anu za ma mɨ ghɨ taŋ bɨ ghɨ́ fɨ́gɨ́ aghan afaʼ ma tsi nɨ bɨson ba ma chinɨ ghántɨ́nə awa ghe.›

⁵Ma lan, a tíʼ ntɔ́ŋ ngaŋ mɨká tafaʼ ɨyi ɨ mɔ́ʼɔ́ mɔ́ʼɔ́ ghe. A bítɨ́ a wu ntsambyi ngə́, ‹O chwǎ a tafaʼ ɨghan lá nɨ ake?›

⁶A chwɨ́gɨ́ ngə́, ‹Nkagɨ mɨvwurɨ nkɨ wu fɨgɨnə.› Ndə̌tú a nye ɨdzúm tafaʼ wa a chwɨ́gɨ́ wəmbo ngə́, ‹Tsi a ɨshe ngwaŋnɨ ŋwaʼnɨ ngə́ atyetɨ a nɨká azo a nɨ nkagɨ mɨghúm mi mɨntə̧̂ ghe.›

⁷A zɔ́ŋtɨ́ mbítɨ́ a wu mɔʼɔ ngə́, ‹Ɨzo nkfu, o chwǎ lá ake le?› A chwɨ́gɨ́ ngə́, ‹Ɨban nchwi táʼ nchwuʼ ə.› Ndə̌tú a nye ɨdzúm tafaʼ wa a sóŋ ngə́, ‹Ŋwaʼnɨ ngə́ atyetɨ a nɨká azo a nɨ ɨban nchwi nkɨ tsi nɨfə̧ ghe.›

⁸A nye anu za a lwɨ́gɨ́nɨ́nɨ́ fu ɨwu a nɨ ngə́, tafaʼ wa a bóntɨ́ a ndə̌tú ŋwɔn ɨchwenu a nye ɨdzúm tafaʼ ɨyi wa ngə́ a ghɨ́ anu zə shiʼnɨ ə; mbɨ́ʼ ngə́ ɨbɛn bɨ atuəshe bɨ yigɨnɨ tsɛʼ nkan a ndə̌tú a nye ɨnu ɨtsa ntsa ɨbɛn ba bɨ tsinɨ a mu nkaʼ ə.”

⁹Yeso a tíʼ ngɛn nɨ mbyi ɨ soŋ ngə́, “Ɨ kwiʼtɨ, ma sóŋə́ awɨŋ ə: lɔgɨnə afuʼ azən atuəshe ngɨ bɨson ɨwu, taŋ afuʼ məzen a ghɨ́ mi ayi, bɨ chi kwarɨ awən a mu njwuʼ za ɨ ghɨ ghɔ́ŋ nɨnkoŋ lá.

¹⁰Ŋwɔn tsum wa a tiʼtɨnɨ a mɨnya mɨ azúm nɨ táʼ ntəm a ghɨ kɨ́ tíʼtɨ́ ɨdzúm tsɨ wi nɨ táʼ ntəm ə; ŋwɔn tsum wa a chwɛnɨ ɨnu a nye mɨnya mɨ anu a ghɨ kɨ́ chwé ɨnu a nye ɨnu tsɨ wi ə.

¹¹Ɨ tiʼ ghɛn ɨwu, be a be ngə́ o so ntíʼtɨ́ afuʼ atuəshe nɨ táʼ ntəm, bɨ ghɨ tíʼ gha ngótɨ́ afuʼ a mbó gho ngə́ o tiʼtɨ lá ɨ nə́ le?

¹²Be a be ngə́ o so ntíʼtɨ́ azúm a ŋwɔn adaŋ nɨ táʼ ntəm, lá ghɨ ghá ɨwa a mbó gho azúm za a nɨ azo le?

¹³Ka ŋwɔn tse a chi faʼ ayi a mbó bɨtafaʼ bi bɨbá ghe; a mɨ bə̌ a táʼ, ɨ baŋnɨ kɔŋ a wu mɔʼɔ kə ɨ faʼnə a mbó táʼ nɨ táʼ ntəm, ɨ baŋnə tságɨ́nə a wu mɔʼɔ ghe. O chi koʼ be abuʼ a mbó Ŋwi nkɨ mbe abuʼ a mbó nkáb ndəŋndəŋ ə.”[93]

¹⁴Mbáʼ bə Farisao zúʼnɨ́ ɨnu tsiŋ ɨtsum lá, ntaŋsɨ mɨshi ɨma a nye Yeso, mbɨ́ʼ ngə́ bo kɔ́ŋ nkáb be tɨsɨŋə.

¹⁵Yeso a sóŋ a mbó bo ngə́, “A ghɨə bən ngə́ á ɨbɛn bə mɔʼɔ zɛn ngə́ ɨnu tsa nɨ ghɨnə tsɨ kuʼnə, lá Ŋwi a zhi mɨntəm ɨmɨŋ ə. Mbɨ́ʼ ngə́ ɨdzúm tsa ŋwɔn mɨsɔŋ a ntsu a lónkɨ́nə́ lá, tsɨ nɨ ɨdzúm adaŋədaŋə a ɨshi ɨmɨgɨ Ŋwi ə.

¹⁶Nyɔngɔŋ Mǒse abɔʼnɨ ɨŋwaʼnɨ ntóm Ŋwi tsí nɨ ɨlɨŋ ɨ kɔʼ kuʼ nkfu Yoane Ngaŋ Nga Nkyi ɛ; ɨ chwuʼnɨ nkfu məwa, nkərɨ ɨ tiʼə ngěn nɨ mbyi lá mbɨ́ʼ Nkən wu Shiʼnɨ mbɨ́ʼ anu a Nɨfɔ nɨ Ŋwi, ŋwɔn tsum a tokɨnə a nkúŋə́ wə mu ə.[94]

¹⁷Lá a yaŋnɨ a mbyɛ́gɨ́ fɔməbvurə abɔʼnɨ atuəshe; a ghɨ tiʼ tsa lá ɨ nə́ ngə́ bɨ byɛgɨ tsɛʼ atsə́bɨ́ a Nyɔngɔŋ Ŋwi le?[95]

¹⁸Ŋwɔn mbáŋnɨ́ tsum wa a kəntɨnɨ a ngwe ɨyi ndzɔʼ a wə daŋ a chwurə; ŋwɔn mbáŋnɨ́ wa a zɔʼnɨ a mangye wa a funɨ a ndá nɨzɔ́ʼ a kɨ nchwurə.”[96]

¹⁹“Ŋwɔn nkáb tse a tsí ɨwu ngwə́gə́ tsɛʼ ɨtsɛʼ ɨtɨŋndvuŋ, nkə́ ndzɨ́ə tsɛʼ mɨdzɨ mə shiʼnɨ njwi tsum ə.

²⁰Ŋwɔn afúm wu tse a kɨ́ ndzɔŋ ntsi ɨwu ɨkum ɨyi be Lǎtsorə, wa ntsɔʼ mádɨ́ŋ gháʼnɨ́ wə ɨnye tsɛʼ adaŋədaŋə ghe. Bɨ kə́ ngyiŋə ndě ayi a ntsundá ŋwɔn nkáb wa,

²¹Lǎtsorə a kwaʼtɨnə ngə́ zɨə chi byɛntɨ tsɛʼ ɨbvuʼ mɨdzɨ tsa tsɨ kɨ́nə́ ndǒ atú atɛkɨ azhi ngvókə́ a tɨshe, ɨ dzɨə. Tsɛʼ ngvo ɨchi kə́ ngyiŋə ndwǎ ntsɔʼ mádɨ́ŋ ɨchi tsa.

²²Lǎtsorə a kfó, bɨtsen bɨ ndá bɨ Ŋwi lɔgɨ a wɛrə ngɛn nchwem a mbyɛn Abraʼm a mu nɨdorɨ a fɔməbvurə ghe. Ŋwɔn nkáb wa a kɨ́ nkfó bɨ twəŋə,

²³a ghɛ́n a mu ɨmugɨ nɨnkoŋ ə, adiʼ wa a kɨ́nə́ ndzǔʼ ndzaŋə zɨ ntɨŋ ə. A líŋ atɨ́ ndzɛn Abraʼm atɨ́ atɨ́ nɨ Lǎtsorə a mbyɛn zɨə.

²⁴A tíʼ ntɔ́ŋ ngə́, ‹Ta ɨghan Abraʼm! Ko a mɨlɨŋnɨ ɨghan, ntsagɨ a Lǎtsorə ngə́ á tsubtɨ a shwi abó ɨyi a mu nkyi ngyen shwétɨ́ alɛm azan ɨwu, mbɨ́ʼ ngə́ ma tsi a mu ndzaŋə zɨ ntən a mu ɨmugɨ wiŋ ə!›

²⁵Lá, Abraʼm a chwɨ́gɨ́ ngə́, ‹Mɔn ɨghan, waʼtɨ ngə́ a mu ntsi mbyi ɨzo, bɨ ghá ɨdzúm tsɨ shiʼnɨ ɨtsum a mbó gho, Lǎtsorə baŋnɨ ntsi nɨ tsɨ tɨbɔŋ ɨtsum ə. Lá, a tsi ɨ shiʼnɨ ɨghan o baŋnə ndzǔʼ ndzaŋə ghe.

²⁶A nyɛʼtɨ tsa ɨtsum, təshwi akə́n tse a yɛbtɨ awɨgɨnə, taŋ á ɨbɛn ba bɨ lɔnɨ ndǒ ɨghan ɨ daŋ ɨ yen a mbó gho chi keʼ zhwəŋtɨ kə ŋwɔn nɨ bən a chi daŋ ɨ yen kwatɨ awɨgɨ ə.›

²⁷Ŋwɔn nkáb wa a sóŋ ngə́, ‹A be lá ma lan nə Ta ɨghan Abraʼm, ma buʼ mbó tsagɨ a Lǎtsorə a njwuʼ ta ɨghan,

²⁸adiʼ wa ɨbɔmbɨma ɨban bə mbáŋnɨ́ bi bɨtə̧̂ tsinɨ ɨwu ə. A ghɛn nkwantɨ awa taŋ, á bo ghɨ nkeʼ yen adiʼ a ndzúʼ ndzaŋə wiŋ ə.›

²⁹Abraʼm a sóŋ ngə́, ‹Mǒse bo ntóm Ŋwi tsi ɨwu a nkwantɨ ɨbɔmbɨma ɨbo bə mbáŋnɨ́; á ɨbɔmbɨma bo bə mbáŋnɨ́ zhwiʼtɨ anu za bo sóŋnə́ ghe.›

³⁰Ŋwɔn nkáb wa a chwɨ́gɨ́ ngə́, ‹Ka a kuʼnɨnə ayi ɛ, a Ta ɨghan Abraʼm! Lá be ŋwɔn tse chi zhwemnɨ a mbó nɨvwo ɨ ghɛn a mbó bo, a nyom məwa bo chi bəŋ mɨntəm ɨma a nye mɨbvu ɨma ɨ tsi a bagɨ Ŋwi ə.›

³¹Lá, Abraʼm a sóŋ ngə́, ‹Be bo tú zhwiʼtɨnə anu za Mǒse bo bɨ ntóm Ŋwi sóŋnə́, bo mɨ bvurɨ keʼ kɨ njwiʼtɨ mbáʼ be ŋwɔn a zhwemnɨ a mbó nɨvwo ə.›”