Read Ngemba Alukasɨ 17 Bible Online

Alukasɨ 17 - Ngemba bible

Alukasɨ 17

¹Yeso a sóŋ a mbó bɨyɛʼ ɨbyi ngə́, “Ɨnu tsa tsɨ tíntɨ́nɨ́ ɨbɛn ntságə́ ngə́ á bɨ ngɨ̌ mɨbvu tsi mɨ fuənə ghe, lá a bɨ́gɨ́ be tɨ́sə́n a mbó ŋwɔn wa a ghɨnə ngə́ á tsɨ fuə ghe!

²A kwɛ be bɔŋ be ngə́ á bɨ lɔgɨ a təkɔʼ bɨ ngɔʼ abán nkorɨ wə ntɔŋ ntɔʼ ɨ maʼ a mu sagɨrə wu ngwi, ntsa ngə́ á tsi ntíntə́ a bə kɨʼnɨ ben á bɨ tsi ngɨ̌ mɨbvu ə.

³Ma lan, nɨ lə atú nɨ ɨdzaŋ ɨnu tsa nɨ ghɨnə ghe![97] Be mɨma ɨgho a ghɨ ɨbvu, ghamtɨ ayi ɛ, a be ngə́ a kwebtɨ ntəm ɨyi, lɨgɨnɨ ɨbvu ɨyi ɛ.

⁴Be a be ngə́ a ghɨ ɨbvu a nye gho nkfu tsi samba atú njwi, nkfu ɨtsum a kɨ́ ngyén a mbó gho ɨ sóŋə́ ngə́, ‹Ma fə,› o tsi nɨ ndɨgɨnɨ ɨbvu ɨyi ɛ.”

⁵Ntóm Yeso sóŋ a mbó Maʼmbyí ngə́, “Ghɨ á abeməntəm azɨgɨ a faŋtə.”

⁶Maʼmbyí a chwɨ́gɨ́ ngə́, “Be abeməntəm azən a faŋtɨ mbe tso ndzaŋ ɨsa, o chi soŋ a mbó təzɨgɨ atɨ ngə́, ‹Dvuŋ atuəmbəm azo abɔʼnɨ mɨngaŋ ngɛn mbi agho a mu sagɨrə wu ngwi ə!› Atɨ za a mɨ zuʼnɨ agho ə.”

⁷“Lɔgɨnə ngə́ táʼ ŋwɔn nɨ bən a tsi nɨ ŋwɔn afaʼ wa a líʼnɨ́ ɨshwom ɨyi kə ndə́ŋtɨ́ mbyindzɨ ɨchi ɛ. A kwɛn afɔn lá o soŋ wəmbo ngə́ á waŋnɨ ndzɨ mɨdzɨ ɨmyi le?

⁸Tsɛʼ nkə, ngáŋ ə! Nɨ baŋnə sóŋə́ wəmbo ngə́, ‹Kyaŋtɨ mɨdzɨ ɨman mə nkwɛfɔ, ngwəgɨ ɨtsɛʼ afaʼ ɨtso ntsagɨnɨ mɨdzɨ ɨman á ma dzɨ nkɨ no; ma mɛtɨ o chi tiʼ ghɛn dzɨə.›

⁹Ŋwɔn afaʼ ka a ntsiŋə ayi a mɨya mbáʼ a faʼnə anu za a tsinɨ nɨ ɨ faʼə a mbó gho ghe, kə ndé?

¹⁰A nɨ ndəŋndəŋ a mbó bɨŋ ə; be a be ngə́ nɨ faʼnə a tsa bɨ soŋnɨ ngə́ á nɨ faʼ, soŋnə ngə́, ‹Bɨgɨ kɨ mbe awɨgɨ tsɛʼ ngaŋ afaʼ ə; bɨgɨ kɨ nyaʼ faʼ lá tsɛʼ ɨfaʼ ɨwɨgɨ ə.›”

¹¹Mbáʼ Yeso a kɨ́nə́ ngěn a Yerosalɛm, a kə́ ndzɔŋə a təndenə a tɨtərɨ mbuʼ Samaria bo mbuʼ Galili ə.

¹²A ghɨnə tɨ kón a mu atom zə tse, mbom ɨtɨchwen tsi nɨghúm ə. Tsɨ tɛ́m nəghagɨ

¹³ntɔ́nkə́ ngə́, “Yeso! Tafaʼ! Ko a mɨlɨŋnɨ ɨwɨgɨ ə!”

¹⁴Yeso a zɛ́n awa ɨ soŋ a mbó bo ngə́, “Ghɛnə á bɨntumshe chɛʼrɨ awɨŋ ə.”[98] Bɨ tɨnə tɨ ghěn ndzɛn ngə́ bo byí shwétɨ́ awa ghe.

¹⁵Táʼ ŋwɔn nɨ bo a zɛnə ngə́ zɨə shwetɨ, mbə́ mbən nɨ ndzum ɨ sákə́ mbóntə́ a Ŋwi ə.

¹⁶Ngvo ɨ nɔŋ a tɨshe a mɨku Yeso nga a mɨya ɨyi ɛ. A bé ŋwɔn bə Samaria ghe.

¹⁷Yeso a bítɨ́ ayi ngə́, “A lo mbé bən nɨghúm mbáʼ nɨ shwetɨnə; bə bi nɨbvuʼə mé le?

¹⁸A bə ngyen tsɛʼ ankyenɨ zɛnə a ngá mɨya a mbó Ŋwi lá ngə́ ke le?”

¹⁹Yeso a tíʼ sóŋ wəmbo ngə́, “Lo atɨ́ ngɛn agho ə; abeməntəm azo a tsuʼ agho ə.”

²⁰Bə Farisao bítɨ́ a Yeso ngə́ Nɨfɔ nɨ Ŋwi ghɨ yen lá nkfu ake le? A chwɨ́gɨ́ ngə́, “Ka Nɨfɔ nɨ Ŋwi ngyiŋə ayi a nye ndómnji wa bɨ zɛ́nə́ ghe.

²¹Ŋwɔn tse ghɨ keʼ soŋ ngə́, ‹Ze, nɨ nɛnə!› kə, ‹Nɨ nirɨ!› mbɨ́ʼ ngə́ Nɨfɔ nɨ Ŋwi tsi a mu mɨntəm ɨmɨŋ ə.”

²²Yeso a tíʼ sóŋ a mbó bɨyɛʼ ɨbyi ngə́, “Nkfu ghɨ yen za nɨ ghɨnɨ lǒnɨ ndze táʼ njwi Mɔn Ŋwɔn wu mɔʼɔ, lá ɨ keʼ a zɛrə ze.

²³Ɨbɛn bə tse ghɨ sóŋ a mbó bən ngə́, ‹A yirɨ!› kə, ‹A wɛnə!› Lá nɨ keʼ zɔŋ awa ghe.

²⁴Adzaŋ za azhwibtɨ a mbəŋ a zhwibtɨnə nkɨə ntsǎ, ndǒ a nye táʼ bagɨ nɨkaŋ ngěn a nye bagɨ wu mɔʼɔ lá, nə nɨ adzaŋ za njwi ngyiŋ Mɔn Ŋwɔn ghɨnɨ be.

²⁵Lá ntsambyi anu a nɨ ngə́, wɛrə a tsi nɨ zagɨ ze ngɨ́ʼ tɨ́sə́n, á ɨbɛn bɨ tɨtsɔŋnɨ ton a wɛrə ghe.

²⁶Tsɛʼ tso mbáʼ a bénɨ́ a nkfu Nua lá, a ghɨ kɨ́ bé tsɛʼ adzaŋ məwa a njwi Mɔn Ŋwɔn ə.[99]

²⁷A nkfu Nua, ŋwɔn tsum a kə́ ndzɨ́ə nkə́ nǒ, mbáŋnɨ́ bo bɨ bəngye zɔ́ʼkɨnə, ɨ kɔʼ kuʼ njwi za Nua a ghɛ́nɨ́ nkón a mu abáŋ a nkyi za, nkyi dzɔrɨsɨ ɨdiʼ, nkwəŋ abvuʼ aza bɨtsum, njwitə.

²⁸A ghɨ bé tsɛʼ tso mbáʼ a bénɨ́ a njwi Lɔtərə ghe. Ŋwɔn tsum a kə́ ndzɨ́ə nkə́ nǒ, ntáŋə́ a mɨtan, mbíə mɨdzɨ nkə́ nkórɨ́ ndá ə.[100]

²⁹A njwi wa Lɔtərə a nyɛ́ʼtɨ́nɨ́ a Sodom, ɨmugɨ abɔʼnɨ ngɔʼ tsɨ lomnɨ ló tso mbəŋ ndo a fɔməbvurə ɨ shiʼ njwitɨ awa bɨtsum ə.

³⁰Nə nɨ adzaŋ za a ghɨnɨ bé a njwi wa bɨ ghɨnɨ kyɛʼ a Mɔn Ŋwɔn ə.

³¹A njwi məwa, ŋwɔn wa a tsinɨ atú a ndá zɨ á keʼ shiʼ ngə́ zɨə ghɛn lɔgɨ ɨdzúm ɨchi a mu ndá; ndəŋndəŋ, ŋwɔn wa a tsinɨ afɔn á keʼ bə nkwɛn ngɛn a njwuʼ zɨə.[101]

³²Waʼtɨ anu za a fúnɨ́ a nye ngwe Lɔtərə ghe![102]

³³Ŋwɔn tsum wa a lɔnɨ ntsuʼ ntsi mbyi ɨzhi, a mɨ kfo; ŋwɔn tsum wa a samnɨ ntsi mbyi ɨzhi a mɨ tsuʼ a zɛrə ghe.[103]

³⁴Ma sóŋə́ awɨŋ ə, a nkfu məwa, ɨbɛn bi bɨbá ghɨ nɔŋ táʼ ɨkon nɨ ɨtfúʼ: á bɨ yen ntsɔʼ a táʼ ngɛn nɨ wɛrə, á táʼ a ghɔŋ a ndzum ə.

³⁵Bəngye bi bɨbá ghɨ ghɔʼnə abán; á bɨ yen ntsɔʼ a táʼ ngɛn nɨ wɛrə, á táʼ a ghɔŋ a ndzum ə.”

³⁷Bɨyɛʼ ɨbyi bítɨ́ ayi ngə́, “A ghɨ bé lá ɨ ghé le, a Maʼmbyí?” Yeso a chwɨ́gɨ́ ngə́, “Adiʼ atsum za akfú azúm a nɔŋnɨ ɨwu, ɨzám mɨ bomnkɨ ɨwu ə.”