Read Ngemba Alukasɨ 20 Bible Online

Alukasɨ 20 - Ngemba bible

Alukasɨ 20

¹A bé a njwi tse Yeso a tsi a mu Ndáŋwi zɨ Ngwi a Yerosalɛm ndǐʼ ɨbɛn nkə́ sǒŋ Nkən wu Shiʼnɨ, bɨntumshe bə wi, bɨdiʼ bɨ Nyɔngɔŋ abɔʼnɨ bɨkum bɨ bə Yuda, bɨ bosɨ ngyen a mbó Yeso,

²mbitɨ ayi ngə́, “Soŋ awɨgɨ nɨ adiʼ za o lɔgɨnɨ mɨtən ɨwu ngɨ̌ ɨnu tsiŋ ɨtsum ə. Mɨtən a mbó gho a gha ɨwa le?”

³Yeso a chwɨ́gɨ́ a mbó bo ngə́, “Tɛmnə á ma bitɨ awən nɨ anu zə tse ghe. Nɨ soŋ aghə,

⁴mɨtən mɨ Yoane Ngaŋ Nga Nkyi, mɨ ló lá a mbó Ŋwi kə a mbó ɨbɛn le?”

⁵Bo chwúʼ ntíʼə nkwə́nkə́ bo nɨbo ngə́, “Bɨgɨnə mɨ soŋ lá ngə́ ke le? Be bɨgɨnə soŋ ngə́, ‹Mɨ ló a mbó Ŋwi ə,› a mɨ soŋ ngə́, ‹A tiʼ ngɨ ake nɨ keʼ nɨŋ mɨntəm ɨmən a nye Yoane le?›

⁶Lá be bɨgɨnə soŋ ngə́, ‹Mɨ ló a mbó ɨbɛn,› muŋ ɨnɔ ɨbɛn wɛnə mɨ tumtɨ awɨgɨnə nɨ mɨngɔʼ ɨ zhwitɨ, mbɨ́ʼ ngə́ bo zhi tsɛʼ a nkənu ngə́ Yoane a bé ntom Ŋwi ə.”

⁷Ma lan, bo chwɨ́gɨ́ ngə́, “Bɨgɨ se adiʼ za mɨ lónɨ́ ɨwu zhyɛ.”

⁸Yeso a tíʼ nchwɨ́gɨ́ a mbó bo ngə́, “Ma mɨ kaʼ kɨ soŋ adiʼ za mɨtən ɨmə lonɨ ɨwu ə.”

⁹Yeso a tíʼ ná nɨgham nen a mbó bo ngə́, “Ŋwɔn tse a tsí ɨwu mbi ɨshwom mɨntam mɨ atɨ ɨyi, nga a wɛrə a mbó ɨbɛn ba bɨ mɨ faʼ, ɨ ka mɨntam ma ɨ gha ɨmyi ɨ kɨ lɔgɨ ɨma, ntiʼ ngɛn a nɨghan ntsi ɨwu a nye nkfu zɨ sa ghe.[109]

¹⁰Nkfu ɨ kuʼnə a nká mɨntam mɨ atɨ ma, a tsagɨ a ŋwɔn afaʼ ngə́ á ghɛn nkwarɨ ɨmyi mɨntam mɨ atɨ ə. Lá ngaŋ afaʼ tsa shwóm ayi nkəntɨ, a kwɛn mbômbô ə.

¹¹A kwíʼ ntsagɨ a ŋwɔn afaʼ wə daŋ; lá ngaŋ afaʼ tsa kwíʼ nkɨ́ shwóm ayi, ɨ shwɨgɨ ayi, ntsagɨ a kwɛn mbômbô ə.

¹²Mboŋ ɨshwom wa kwíʼ ntsagɨ a ŋwɔn wa a kúʼnɨ́ bi bɨtárə́; ngaŋ afaʼ tsa lɛmtɨ ayi, nkəntɨ ayi ɛ.

¹³Mboŋ ɨshwom wa a bítɨ́ atuəmbəm azhi ngə́, ‹Ma mɨ ghɨ lá ɨ nə́ le? Ma mɨ tsagɨ a mɔn ɨghan wa ma kɔŋnɨ tsɛʼ nkə; tsɛʼ a nkənu, bo mɨ diʼ mbɔm zɨ shiʼnɨ wəmbo ə!›

¹⁴Lá ngaŋ afaʼ tsa zɛnə a mɔn wa, mbemnɨ a tɨtərɨ bo ngə́, ‹A nɨ mɔn mboŋ ɨshwom wa a wiŋ ə. Bɨgɨnə zhwitɨ ayi, taŋ á ɨdzúm ɨchi tiʼ mbe ɨtsɨgɨnə ghe!›

¹⁵Bo tíʼ ndɔgɨ ayi, ntsa nɨ zɨ abyɛn, njwitə. Yeso a tíʼ mbítɨ́ ngə́, Mboŋ ɨshwom wa a mɨ tiʼ lanɨ ghɨ lá ɨ nə́ nɨ ngaŋ afaʼ tsa le?”

¹⁶“A mɨ yen zhwitɨ ɨbɛn ba ɨ tiʼ gha ɨshwom wa a mbó ngaŋ afaʼ tsə daŋ ə.” Ɨbɛn ba zuʼnə a məzen lá ɨ soŋ ngə́, “A Ŋwi a keʼ nyɛʼtɨ adzaŋ anu zen á fuə!”

¹⁷Yeso a lə́ŋtɨ́ awa mbitɨ ngə́, “Nɨgham nɨ Ŋwi nen lanɨ ntiʼ ndiʼ lá ngə́ ke le?[110] ‹Ngɔʼ za ngaŋ mbɔm ndá nyɛ́ʼnɨ́ ntɔŋ nɨ azúm adaŋədaŋə lá ɨ yén ntíʼ mbé ngɔʼ nɨbú nɨ ndá ə.›

¹⁸Ŋwɔn tsum wa a vwonɨ atú ngɔʼ za, ɨ mɨ botɨ ayi ɨlám ɨlám; ngɔʼ za bə́ ntíʼ ngvo atú ŋwɔn tse, ɨ ghɔʼ ayi a tiʼ mbəŋ abvu ə.”

¹⁹Bɨdiʼ bɨ Nyɔngɔŋ abɔʼnɨ bɨntumshe bə wi lɔ́btɨ́ nko Yeso tsɛʼ adiʼ məwa, mbɨ́ʼ ngə́ bo zhí ngə́ a ná nɨgham nen ɨ sɨʼə lá awa; lá bo bɔ́gɨ́ ɨmɨgɨ mɨ ɨbɛn ə.

²⁰Bo tíʼə ndǒ a nyom wu shiʼnɨ ə. Bo ghá nkáb abó a ndzum a mbó ɨbɛn bə tse ngə́ á bo ghɨ ɨtsi ngə́ bo nɨ ɨbɛn bə shiʼnɨ, ntiʼ ntsagɨ awa ngə́ á bo bentɨ a Yeso nɨ ɨbítɨ mɨgham, taŋ ɨ tiʼ tsa ɨwu ɨ ko ayi ɨ gha a mbó Gobɨna á tiʼ ntsi a shwúrɨ́ mɨtən mɨ bə Roma ghe.

²¹Bɨchwerɨ məbiŋ sóŋ a mbó Yeso ngə́, “Ndiʼ aŋwaʼnɨ, bɨgɨ zhi ngə́ anu za o sóŋnə́ nkə́ ndíʼə a kuʼnə. Bɨgɨ zhi ngə́ o tɨ tɛgɨnɨ ɨbɛn lá, o koʼ ndyǐ ɨshi ŋwɔn tse, lá ndǐʼ nkənu mbɨ́ʼ anu za Ŋwi a lɔnə a mbó ɨbɛn ɨbyi ɛ.

²²Soŋ awɨgɨ ə, Nyɔngɔŋ ɨwɨgɨnə a diʼ ngə́ á bɨgɨ tfu ashɛbɨ a mbó Kaisa kə ngáŋ le?”

²³Lá Yeso a zé ndab ɨza, ɨ soŋ a mbó bo ngə́,

²⁴“Diʼnə nkáb atɨŋə zɨ tsə́ŋtsə́ŋ á ma ze. A tsi ɨshi ɨwa ɨwu bo ɨkum le?” Bo chwɨ́gɨ́ ngə́, “Wu Kaisa ghe.”

²⁵Yeso a tíʼ nchwɨ́gɨ́ ngə́, “Gha azúm za a nɨ zə Kaisa a mbó Kaisa, nga a za a nɨ zə Ŋwi a mbó Ŋwi ə.”

²⁶Ɨwu, a ɨshi ɨbɛn ba, bɨ kɨ chi keʼ a wɛrə ko mbɨ́ʼ anu zə tse, ntiʼ nchwubtɨ mɨntsu ɨma, mbɨ́ʼ ngə́ achwɨgə za a kɨ́ʼnɨ́ awa ghe.

²⁷Bə Sadukai bə tse, bɨtɨbem ngə́ ŋwɔn a kfǒ mbɨ́ŋə́ nzhwémnə́, bɨ yén a mbó Yeso ɨ soŋ ngə́,[111]

²⁸“Ndiʼ aŋwaʼnɨ, Mǒse a ŋwáʼnɨ́ a nyɔngɔŋ wen a mbó bɨgɨnə ngə́: ‹Be ŋwɔn a kfo ɨ nyɛʼtɨ a ngwe ɨyi tɨgha bo zɨ jwi ɨbɔ, mɨma ɨyi wu mbáŋnɨ́ a tsi nɨ ndzɔʼ nkfugɨ wa taŋ á bo zɨ chi jwi ɨbɔ ba bɨ mɨ lɔgɨ ngə́ a nɨ ɨbɔ bɨ mɨma ɨyi wu mbáŋnɨ́ wa a kfonə lá.›[112]

²⁹Ɨbɔmbɨma bə mbáŋnɨ́ bi samba yén ntsí ɨwu; wu ntsambyi a zɔ́ʼ nkfo tə atú ə.

³⁰Wa a zɔ́ŋtɨ́nɨ́ a nye ɨdiʼ tsi bá a zɔ́ʼ a nkfugɨ wa,

³¹wa a zɔ́ʼŋtɨ́nɨ́ a nye ɨdiʼ tsi tárə́ a kɨ́ ndzɔ́ʼ a nkfugɨ məwa. A fú a nye bo ndəŋndəŋ ɨ kɔʼ kuʼ a nye wa a zɔ́ŋtɨ́nɨ́ a nye ɨdiʼ tsi samba ghe — bɨtsum kfó tə atú ə.

³²Mangye wa a kɨ́ ndwɨgɨnɨ nkfoə.

³³Mangye wa ghɨ bé wu ɨwa a njwi za ɨbɛn zhwemnɨnɨ a mbó nɨvwo le? Bo wa bi samba zɔ́ʼ a táʼ mangye wa.”

³⁴Yeso a chwɨ́gɨ́ a mbó bo ngə́, “Mbáŋnɨ́ bo bɨ bəngye zɔ́ʼnə́ tɨtsɔŋnɨ ə,

³⁵lá mbáŋnɨ́ bo bɨ bəngye ba bɨ kuʼnɨnɨ a nzhwémnə́ a mbó nɨvwo ɨ bə kɨ tsi a nye nkfu za ghɨ yen lá, nɨzɔ́ʼ ghɨ keʼ ɨwu chyɛ.

³⁶Bo mɨ tsi tsɛʼ tso bɨtsen bɨ ndá bɨ Ŋwi ɨ chi keʼ bə nkfoə. Bo nɨ ɨbɔ bɨ Ŋwi mbɨ́ʼ ngə́ bo zhwemnɨ a mbó nɨvwo ə.

³⁷Mǒse a diʼ asaŋəsaŋ ngə́ bɨkfú zhwémnə́ nkúŋə́ a mu ntsi ntən nɨnkoŋ ə. A mu adiʼ aŋwaʼnɨ a Ŋwi za mɨjwutɨ atɨ wa a kɨ́nə́ nkɨ́ə lá Mǒse a sóŋ ngə́, ‹Maʼmbyí a nɨ Ŋwi wu Abraʼm, Ŋwi wu Isak bo Ŋwi wu Yakɔb ə.›[113]

³⁸Wɛrə nɨ Ŋwi bə ntsi ntɨŋ ə, nkeʼ wu ɨkfú ɨbɛn be, mbɨ́ʼ ngə́ a mbó wɛrə ŋwɔn tsum a tsi ntɨŋ ə.”

³⁹Bɨdiʼ bɨ Nyɔngɔŋ ba bə tse chwɨ́gɨ́ ngə́, “Achwɨgə zə shiʼnɨ ə, a Ndiʼ aŋwaʼnɨ!”

⁴⁰Mbɨ́ʼ ngə́ bo kɨ chi keʼ bə njwəŋtɨ a mbítɨ́ zɨ nɨ anu zə daŋ ə.

⁴¹Yeso a bítɨ́ awa ngə́, “Bɨ tsa lá ɨ nə́ a sóŋə́ ngə́ Wa bɨ Zɔ́ʼnɨ́ lá a ghɨ bé mɔn ɨlə̌ Devidɨ le?

⁴²Mbɨ́ʼ ngə́ Devidɨ zɨmboŋ a sóŋ a mu aŋwaʼnɨ a bɨsalms ngə́, ‹Maʼmbyí a sóŋ a mbó Maʼmbyí ɨghan ngə́: tsi adiʼ wen abó me zə maʼə

⁴³nkuʼnɨ nkfu za ma mɨ nyɔŋ ngaŋ kɨban ɨtso a nye atɛkɨ a mɨku azo ə.›

⁴⁴Devidɨ a tɔ́ŋ a wɛrə ngə́ ‹Maʼmbyí›; bɨ tiʼ tsa lá ɨ nə́ ntɔ́ŋə́ a Wa bɨ Zɔ́ʼnɨ́ nɨ ŋwɔn ɨlə̌ Devidɨ le?”

⁴⁵Mbáʼ ŋwɔn tsum a kɨ́nə́ njwíʼtə́ wəmbo lá, Yeso a sóŋ a mbó bɨyɛʼ ɨbyi ngə́,

⁴⁶“A nɨ lə atú nɨ bɨdiʼ bɨ Nyɔngɔŋ, ba bɨ kɔŋnɨ ɨ shwugɨ bɨtɔgɨ ɨ núm karɨ, nkɨ nkɔŋ be tɨ́sə́n ngə́ á bɨ ntsáʼtə́ awa ngvótə́ a ɨshi bo a samnɨ mɨtan lá. Bo kɨ nkɔŋ a nchyɛ́ atú ɨlaŋ ɨbɛn bə wi a mu ndáŋwi bə Yuda abɔʼnɨ ɨlaŋ ɨbɛn bə wi a nye ɨdiʼ nɨdorɨ ə.

⁴⁷Bo kə́ nyɔ̌ʼ mɨntɔŋ mɨ bɨkfugɨ nkwarɨ njwuʼ ɨtsa, ngɨ̌ ɨtsi nɨ ɨtsaʼtɨ Ŋwi tsɨ sa ghe! Ɨnɨŋ ngɨ́ʼ ɨza ghɨ tən be tɨsɨŋə!”