Read Ngemba Alukasɨ 21 Bible Online

Alukasɨ 21 - Ngemba bible

Alukasɨ 21

¹Yeso a lén nkárɨ́sɨ́ ndzɛ́n adzaŋ za ngaŋ nkáb kɨ́nə́ nɨ̌ŋ nkáb a mu nɨlɛnɨ a mu Ndáŋwi zɨ Ngwi,

²nkɨ ndzɔŋ ndzɛn a nkfugɨ tse wa a fúmnɨ́ tsɛʼ nkan, a nɨŋənɨ ɨníní ɨchi tsi bá ghe.

³Yeso a sóŋ ngə́, “Ma sóŋə́ awɨŋ ə, nkfugɨ mangye afúm wen a nɨŋ azúm za a tsanɨ a za ɨbɛn bɨtsum nɨŋnə.

⁴Mbɨ́ʼ ngə́ bə mɔʼɔ gha lá za a funɨ a mu zə ghaʼnɨ za bo tsinɨ nɨ zɛrə, lá nkfugɨ mangye yirɨ, mbáʼ a fumnɨ tsɛʼ nkan lá, a gha lá azúm atsum za a tsinɨ nɨ zɛrə ghe.”

⁵Bɨyɛʼ bɨ Yeso bə tse kə́ ntǎŋ ngam mbɨ́ʼ Ndáŋwi zɨ Ngwi, adzaŋ za a bɔ́ŋnɨ́ a ndzé ngɔʼ ɨchi tsa bɨ ŋwáʼsɨ́nə́. Bo kɨ́ ngam mbɨ́ʼ ɨdzúm tsɨ ghanɨ tsa bɨ ghánɨ́ a mbó Ŋwi ə. Yeso a sóŋ ngə́,

⁶“Ɨdzúm tsiŋ ɨtsum tsa nɨ zɛ́nə́ lá — nkfu ghɨ yen mbáʼ tsɛʼ táʼ ngɔʼ wɛnə wu tse a ghɨ keʼ bə ntsi adiʼ wa nɨ zɛ́nə́ ɨwu ə; bɨ ghɨ wáŋ a tsɛrə ɨtsum a tɨshe ə.”

⁷Bo bítɨ́ ngə́, “Ndiʼ aŋwaʼnɨ, anu məzen a ghɨ fú lá nkfu ake le? Ake ghɨ diʼ ngə́ nkfu ɨ kuʼnə á anu məzen a fu le?”

⁸Yeso a chwɨ́gɨ́ ngə́, “Nɨ nkyérə́ ghe; á bɨ keʼ awən tamtə. Ɨbɛn bə ghaʼnɨ ghɨ yen ɨ soŋ ngə́ bo ghamə a ɨkum me, ɨ soŋənə ngə́, ‹Ma nɨ wɛrə ghe!› ɨ kwiʼtɨ ngə́, ‹Nkfu ɨ yenə ghe!› Lá njimbɨʼ nɨ zɔŋ awa ghe.

⁹Njimbɨʼ nɨ bɔgɨ mbáʼ be nɨ zuʼ mbɨ́ʼ mɨntso abɔʼnɨ mbvuŋ ɨdiʼ; ɨbə́ŋ ɨnu mətsa tsi nɨ ɨ zagɨ tsa mbyi ɨ fu, lá nkeʼ ndiʼə ngə́ ndwitə ɨ tiʼ abó ə.”

¹⁰Wɛrə a kwíʼ ngɛn nɨ mbyi ɨ soŋ ngə́, “Ɨlaʼ nɨ ɨlaʼ ghɨ tókɨ́nə́ bo nɨbo; á ɨlaʼ tsa bɨfɔ sáʼnə́ njíntə́ a tsə mɔʼɔ ghe.

¹¹Ɨshe ghɨ nɛmnə be a nji adaŋ, á mɨchwinɨ a tsi, á mbúŋ mɨghɔ a ɨnɔ ɨnɔ dzagɨ ɨdiʼ; ɨnu tsa nɨ se zhi bo bɨ tsɨ nchiʼtɨ ndzɔʼ ɨbɛn ghɨ fuənə a nɨkaŋ ə.

¹²Bɔŋ á ɨnu tsiŋ ɨtsum fuə, le buŋ, bɨ mɨ kǒtɨ awən ɨ dɨgɨ awɨŋ ə; bɨ mɨ gha awən nɨ ndáŋwi bə Yuda ngə́ á bɨ sáʼ awən ɨ nɨŋ atsáŋ; bɨ mɨ gha awən a mbó bɨfɔ abɔʼnɨ bɨsáʼ bɨ ɨlaʼ mbɨ́ʼ atú azə.

¹³Nə ghɨ bé abárɨ́ azən a sóŋ Nkən wu Shiʼnɨ ə.

¹⁴Nɨ kyaŋtɨ mɨntəm ɨmən bɔŋ á nkfu nkúʼə adzaŋ za nɨ ghɨ keʼ ngágɨ́ ɨtumbəm ɨtsən ngə́ nɨ ghɨ chwɨgɨ lá ngə́ ke,[114]

¹⁵mbɨ́ʼ ngə́ ma ghɨ ghá nɨgham abɔʼnɨ zóŋ a mbó bən adzaŋ za tsɛʼ táʼ ŋwɔn kɨban ɨwən a chinɨ keʼ ton kə nkwənkɨ anu za nɨ sóŋnə́ ghe.

¹⁶Bɨ mɨ gha awən a mbó bɨta ɨbən abɔʼnɨ bɨmá ɨbən, ɨbɔmbɨma ɨbən, ngaŋ ngwəgɨ ɨtsən abɔʼnɨ bɨson ɨbən; á bɨ kɨ njwitɨ awən bə tse ghe.

¹⁷Ŋwɔn tsum a mɨ bə̌ awən mbɨ́ʼ aghə.

¹⁸Lá tsɛʼ táʼ ɨnyɔŋ atú a chi keʼ atú bən byé.

¹⁹Nɨ tɛm ntɨŋə ngə́ kɔ́ŋ, nɨ mɨ loŋ ɨtumbəm ɨtsɨŋ ə.”

²⁰“Be nɨ zɛn bɨmandzɔŋ bɨ bɨgwe ba ka bɨ mbémnə́ awa bɨ karɨsɨ a Yerosalɛm mbə mbom ngə́ ghɨ́t, nɨ tiʼ nji ngə́ mɨmboŋnɨ bɨ mɨ nyuʼ a wɛrə tsagɨ a ɨshe ə.

²¹Ɨbɛn ba bɨ tsinɨ a Yudiya mɨ zagɨ tiʼ chwɔgɨ kɨə ghɛn kon nɨ mɨntáʼ; bə mu ntáʼmbagə zɨ ngwi tsi nɨ zagɨ ɨ fu, ba bɨ tsinɨ nɨ ɨfɔn mɨ zagɨ keʼ bə ngyen a mu ntáʼmbagə wu wi ə.

²²Mbɨ́ʼ ngə́ nkfu məza ghɨ bé lá zɨ ‹Ntfútɨ Mbɔʼ›, taŋ á be ngə́ ɨnu tsa bɨ ŋwáʼnɨ́nɨ́ a mu aŋwaʼnɨ a Ŋwi lá, tsɨ funə a nkənu ə.

²³A ghɨ bɨ́gɨ́ be tɨ́sə́n a nkfu məwa a mbó bɨmabvu ba bɨ tsinɨ nɨ ɨbɔ a mɨto abɔʼnɨ ba ɨbɔ ɨba bvurɨnɨ nkə́kə́ ə! Ngɨ́ʼ zɨ ngwi ghɨ kón atuəshe wen, mbɨ́ʼ ngə́ Ŋwi a ghɨ diʼ alwɛntɔŋ azhi a nye ɨbɛn məbiŋ ə.

²⁴Bɨ ghɨ zhwítɨ́ a bə tse nɨ bɨlumban, ɨ lɔgɨ a bə mɔʼɔ a nye ngaŋ atsáŋ ɨ ghɛn nɨ bo nɨ ɨlaʼ tsə daŋ; á ba a se bə Yuda be nyəŋtɨ a Yerosalɛm nɨ mɨku nkuʼnɨ njwi za Ŋwi a lɛnɨ ngə́ nkfu ɨza mɨ miə.”

²⁵“Ɨnu tsa nɨ se zhi ghɨ fuənə a nye nɨnyom, saŋ bo mɨdzɔŋ ə. A mu atuəshe, ɨlaʼ tsɨ fɨgɨnɨ ghɨ tsi a mu nɨwiʼ mbɨ́ʼ ngə́ ɨbɛn ghɨ tsí a mu nɨbɔgɨ mbɨ́ʼ adzaŋ za sagɨrə wu ngwi a zɔrɨnə abɔʼnɨ adzaŋ za nkyiɛ yiŋənɛmə ghɛnə nkə́ ndzɔ́rə́ ghe.[115]

²⁶Ɨbɛn ghɨ tsúmkɨ́nə a mbó nɨbɔgɨ mbɨ́ʼ ɨnu tsa tsɨ fúnə́ a mu atuəshe zen atsum mbɨ́ʼ ngə́ ɨdzúm adaʼ tsə nɨkaŋ ghɨ keʼ adiʼ bo bən nchyɛ.

²⁷Mɔn Ŋwɔn a ghɨ tíʼ fú a ɨshe, ɨ yiŋənə a mu mbaʼ nɨ mɨtən mə wi abɔʼnɨ nɨfáŋ ə.[116]

²⁸Be ɨnu mətsiŋ biʼnɨ ɨ fuə, nɨ lo ntɛm atɨ́ mbiʼ ɨtú ɨtsən, mbɨ́ʼ ngə́ ndzuŋ atú ɨzən ɨ tiʼ abó ə.”

²⁹Yeso a tíʼ ná nɨgham nen a mbó bo ngə́: “Kwaʼtɨ mbɨ́ʼ atɨ a figɨ abɔʼnɨ ɨtɨ ɨtsum tsɨ mɔʼɔ ghe.

³⁰Be o ze ɨzəŋ ɨtsa chwuʼ ntíʼə nkɔ́ʼə, zhi ngə́ nkfu ɨdiʼ tsɨ lomnɨ ɨ tiʼ abó ə.

³¹Ndəŋndəŋ, be o ze ɨnu tsiŋ tɨ fuə, o zhi ngə́ Nɨfɔ nɨ Ŋwi tsi a ndóm ə.

³²Tsɛʼ a nkənu, ma soŋə awən ngə́ ɨnu tsenə ɨtsum mɨ fu bɔŋ á ɨbɛn ben bɨtsum ba bɨ tsinɨ atuəshe tɨtsɔŋnɨ á bɨ kfokə.

³³Fɔməbvurə bo atuəshe ghɨ lwitə, lá nɨgham nɨ Ŋwi láʼ nkeʼ lwitə.”

³⁴“A nɨ lə atú azɨŋ ə! Njimbɨʼ nɨ lɔgɨ anu a nǒ ɨ kɨ dorɨkɨ tso atú afaʼ bo bɨ mbǔʼ ɨnye ɨzən mbɨ́ʼ ɨnu atuəshe mbɨ́ʼ njwi za ghɨ ngyen ndumnɨ nko awən,

³⁵tso makyɛn ə. Mbɨ́ʼ ngə́ ɨ ghɨ yen a mbó ŋwɔn tsum adiʼ atsum atuəshe.

³⁶A nɨ lə atú a zɨŋ ə, ntsáʼtə́ a Ŋwi nkfu tsum ngə́ nɨ chi tsi nɨ adaʼ ɨ tsa shiʼnɨ a mu ɨnu tsiŋ ɨtsum tsa tsɨ ghɨnɨ fú lá ɨ tiʼ tɛm a ɨshi Mɔn Ŋwɔn ə.”

³⁷Yeso a lɔ́gɨ́ njwi mətsa ndiʼə anu a Ŋwi a mu Ndáŋwi zɨ Ngwi, nkwɛfɔ ghɨnə nkúʼ, wɛrə a ghɛn ndye atú Ntáʼ Olif wa.[117]

³⁸A tənjwi nɨ mbvugɨrɨ ɨbɛn bɨtsum ghɛ́n a njwiʼtɨ anu a Ŋwi wəmbo ə.