Read Ngemba Alukasɨ 23 Bible Online

Alukasɨ 23 - Ngemba bible

Alukasɨ 23

¹Aku aza bɨtsum a tíʼ ndo ndɔgɨ ayi ngɛn nɨ zɨ a ɨshi Branto ghe.

²Bo tíʼ mbiʼnɨ nkaŋə wɛrə ɨ sóŋə́ ngə́, “Bɨgɨ zɛ́n a ŋwɔn wɛnə a twɛfɨnə nkə́ ngvúgɨ́ ndum a tɨtərɨ ɨbɛn ɨbɨgɨ, ntsúʼnə́ awɨgɨ ngə́ á bɨgɨ keʼ ashɛbɨ a mbó Kaisa kwiʼ ntfu nkə́ sóŋə́ ngə́ zɨmboŋ zɨə nɨ Wa bɨ Zɔ́ʼnɨ́ wa, mbe ɨfɔ ghe.”

³Branto a tíʼ mbítɨ́ a wɛrə ngə́, “A nɨ gho mbe ɨfɔ bə Yuda le?” Yeso a chwɨ́gɨ́ ngə́, “A soŋ gho adzaŋ məwa.”

⁴Branto a tíʼ sóŋ a mbó bɨntumshe bə wi bo ɨnɔ ɨbɛn wa ngə́, “Ka ma ze aghə afənu zə tse za ŋwɔn wen a ghɨnə.”

⁵Lá bo kə́ mbubtə tsɛʼ bubtɨnɨ ɨ sóŋə́ ngə́, “Nɨ ɨnu tsa wɛrə a diʼnə, wɛrə a twɛfɨ ɨbɛn, ngvúgɨ́ ndum a tɨtərɨ bo a mu Yudiya tsum, ɨ lɔgɨnɨ a Galili ɨ yen kuʼ ɨghə.”

⁶Mbáʼ Branto a zúʼnɨ́ a məzen lá, mbitɨ ngə́ ŋwɔn wen a lá ŋwɔn bə Galili le?

⁷Mbáʼ wɛrə a zúʼnɨ́ ngə́ wɛrə a fú a mu mbuʼ za Ɛrɔd a kɨ́nə́ sáʼə lá, wɛrə a tságɨ́ ayi wəmbo ə. Ɛrɔd zɨmboŋ a tsí a Yerosalɛm a nkfu məwa.

⁸Mbáʼ Ɛrɔd a zɛ́nɨ́ a Yeso lá, wɛrə a dórɨ́ tsɛʼ nkan mbɨ́ʼ ngə́ wɛrə kə́ nkwɛ̌ ndǒ ndze zɨə. A kə́ nkwɛ̌ ndǒ ndze zɨ mbɨ́ʼ ngə́ a zúʼnə mbɨ́ʼ ayi, ntíʼə ntsíŋə́ nɨ ntəm ɨyi ɨtsum ngə́ á ghɨ anu zə yerɨnɨ-yerɨnɨ zə tse ghe.

⁹Ma lan, Ɛrɔd a bítɨ́ a Yeso nɨ ɨbítɨ tsə ghaʼnɨ, lá Yeso a keʼ chwɨgə.

¹⁰Bɨntumshe bə wi abɔʼnɨ bɨdiʼ bɨ Nyɔngɔŋ tsá ntɛ́m a ɨshi nkaŋ a Yeso a nye ndóm wu tɨŋə.

¹¹Ɛrɔd bo bɨ bɨgwe ɨbyi tíʼə ngwerə nkə́ ngyígə́ ayi ɛ. Bo tíʼ ngwə́gɨ́ a tɔgɨ wu shiʼnɨ a nye wɛrə mbə́ mbyigɨ ayi a mbó Branto ghe.

¹²Branto bo Ɛrɔd tíʼ mbé bɨson nchwuʼnɨ a njwi məwa mbɨ́ʼ ngə́ nkfuʼ kwɛ́ ntsí a tɨtərɨ bo ghe.

¹³Branto a tíʼ ntɔ́ŋ ngǒtə bɨntumshe bə wi, bɨsáʼ bɨ alaʼ ndzɔŋ nchintɨ ɨbɛn bɨ alaʼ,

¹⁴ntiʼ soŋ a mbó bo ngə́, “Nɨ yén nɨ ŋwɔn wen a mbó me ɨ soŋ ngə́ a twɛfə nkə́ ngvúgɨ́ ndum a tɨtərɨ ɨbɛn ə. Ma sáʼ ayi a ɨshi bən, nkaʼ ze a vwonu a nye ɨnu tsa nɨ káŋnɨ́ ayi ɨwu lá.

¹⁵Ɛrɔd a sé kɨ ndzɛ́n a vwonu ɨyi, mbɨ́ʼ ngə́ a bə́ ntsagɨ ayi a mbó bɨgɨnə ghe. Ka ŋwɔn wɛnə a fə ayi anu zə tse mbáʼ be bɨ zhwitɨ ayi ɛ.

¹⁶Ma lan, ma mɨ shwom ayi, ɨ nyɛʼtɨ ayi ɛ.”

¹⁷[126]

¹⁸Lá ɨnɔ ɨbɛn wa ɨtsum ɨ búgɨ́ ngə́, “Lwɛʼtɨ a ŋwɔn wiŋ ə! Nga a Barabasɨ a mbó bɨgɨ ə!”

¹⁹(Barabasɨ wen a bé ŋwɔn wa a bvúgɨ́nɨ́ ndum a mu alaʼ nkɨ njwitɨ ɨbɛn, bɨ nɨŋ ayi atsáŋ ə.)

²⁰Branto a kə́ ndǒ nyɛʼtɨ Yeso ghe. Ma lan, wɛrə a kwíʼ ndɛ́gɨ́ ɨnɔ ɨbɛn wa.

²¹Lá bo sákɨ́ ngə́, “Kwemtɨ ayi ɛ! Kwemtɨ ayi ɛ!”

²²Wɛrə a kwíʼ mbítɨ́ a mbó bo a nye nkfu tsa tsɨ kúʼnɨ́ tsi tárə́ ngə́, “Ngə́ ke le? Anu zə tɔmnɨnɨ za a ghɨnɨ a nɨ zɨŋə le? Ka ma ze aghan anu zə tse za a fanɨ mbáʼ bɨ chinɨ zhwitɨ ayi ɛ; ma lan, ma mɨ shwom ayi, ɨ nyɛʼtɨ ayi ɛ.”

²³Lá bo kə́ nyəmə tsɛʼ nyəmnɨ nɨ nji tsɨ tən ngə́ kwemtɨ ayi ɛ. Anu za bɛrə kɨ́nə́ ndǒ lá a fúə.

²⁴Adzaŋ məwen, Branto a tíʼ nchɛrɨ ngə́ á bɛrə ghɛn ngɨ adzaŋ za bo kɨ́nə́ ndǒ lá.

²⁵Wɛrə a tíʼ fɨ́gɨ́ a ŋwɔn atsáŋ wa bo kɨ́nə́ ndǒ ngə́ á nyɛʼtɨ lá, wa a bvúgɨ́nɨ́ ndum nkɨ njwitɨ ɨbɛn lá, ntiʼ nga a Yeso a mbó bo adzaŋ za bo kɨ́nə́ ndǒ lá.

²⁶Bɨgwe ba lɔ́gɨ́ a Yeso ntiʼə ntíntə́ ngěn nɨ zɨə. Mbáʼ bo kɨ́nə́ ngěn lá, mbom a Samɔn, mbe ŋwɔn bə Sirin, mbáʼ a lónɨ́ afɔn nkwě ngěn a ntáʼmbagə wu wi ə. Bɨ fé ayi, njiʼ ayi nɨ abaŋnɨ-baŋnɨ za, wɛrə byɛʼ ntiʼə ndzɔŋə a Yeso ghe.

²⁷Ɨnɔ ɨbɛn kə́ nkumə ndzɔŋə ayi; a tɨtərɨ bo, bəngye bə tse tsí ɨwu, ndánə́ ndzɛʼə nkə́ mbúgə́ sákə́ mbɨ́ʼ atú a Yeso ghe.

²⁸Yeso a bə́ŋ ayi ɨ soŋ a mbó bo ngə́, “Bəngye bɨ Yerosalɛm, á nɨ keʼ mbúgə́ be mbɨ́ʼ atú azə, á nɨ mbúgə́ be mbɨ́ʼ ɨtumbəm ɨtsən nɨ ɨbɔ ɨbɨŋ ə.

²⁹Mbɨ́ʼ ngə́, njwi yiŋə tsa mbáʼ ɨbɛn ghɨ sóŋ ngə́, ‹Abɔŋətú zə wi a nɨ zə afərɨ a mangye, zə mangye wa a sé jwi a mɔn abɔʼnɨ mangye wa a sé nyɔŋtə!›

³⁰Lə mɨ be nkfu za mbáʼ ɨbɛn mɨ tíʼə soŋənə ngə́, ‹Mbám kumnɨ njiʼ awɨgɨ ə!› abɔʼnɨ ngə́, ‹Mɨntáʼ, lwɛʼ awɨgɨ ə!›

³¹Mbɨ́ʼ ngə́ be ɨdzaŋ ɨnu tso tsenə ɨ tɨ fuə mbáʼ atɨ a bvurɨnɨ zə shwe, anu a ghɨ tíʼ bé lə mbáʼ be atɨ məza a zom le?”

³²Bɨ kɨ́ fɨ́gɨ́ bɨbuʼbənu bə tse bi bɨbá atsáŋ, ntsi nɨ njwitɨ bo, bo bɨ Yeso ghe.

³³Bo ghɨnə ngɛ́n nkuʼ adiʼ zə tse, bɨ tɔŋə nɨ “Aghɔʼrə atú ə” ntiʼ nkwemtɨ a Yeso ɨwu, bo bɨ bɨbuʼbənu ba bi bɨbá, táʼ a bagɨ abó zə maʼə, táʼ wu mɔʼɔ a bagɨ abó zə ntə́ŋ ə.

³⁴Yeso a sóŋ ngə́, “Tarɨ lɨgɨnɨ mɨbvu ɨma ghe! Ka bo zhi awa anu za bo ghɨnə ghe.”[127] Bo máʼ ndzɔʼ, a njí adzaŋ za bo mɨ yɛbtɨ ɨtsɛʼ wɛrə ghe.

³⁵Ɨbɛn tɛ́mnkɨ́ ɨwu ndyíŋə́ anu za a kɨ́nə́ fúə le buŋ bɨntsagɨnɨ bɨ bə Yuda kə́ ngwerə ayi ɨ sóŋə́ ngə́: “A lóŋ ɨbɛn bə daŋ ə; á loŋ atuəmbəm azhi mbáʼ be a be Wa bɨ Zɔ́ʼnɨ́ wa Ŋwi a tsɔʼnə!”

³⁶Bɨgwe ba kɨ́ ngwerɨ ayi ɛ: bo kɔ́ʼ ngɛn nga tɨntsəgɨ mɨluʼ wəmbo,[128]

³⁷ntiʼ nkɨ soŋ ngə́, “Be o be ɨfɔ bə Yuda, loŋ atuəmbəm azo ə.”

³⁸Bɨ ŋwáʼnɨ́ mbán wu atú atɨ́ ngə́, “Lə nɨ ɨfɔ bə Yuda a wɛnə ghe.”

³⁹Táʼ mbuʼənu wa wu mɔʼɔ, wa bɨ kwémtɨ́nɨ́ awa bɨ Yeso lá, a zɔ́m a wɛrə, mbitɨ ngə́, “Be o lá Wa bɨ Zɔ́ʼnɨ́ wa le? Loŋ atuəmbəm azo nkwiʼtɨ awɨgɨ ə!”

⁴⁰Lá, wu mɔʼɔ wa a yágɨ́ ayi, mbitɨ ngə́, “O so a Ŋwi a mbɔ́gə́ le? O tsi a mu ndəŋndəŋ ngɨ́ʼ tso wɛrə ghe.

⁴¹Tsɛʼ a nkənu, tɨ tfǔ ndzo a nye mɨnu ma tɨ buʼnə; lá ŋwɔn wen ka a fə ayi anu zə tsɛrə ghe.”

⁴²Ntiʼ mbə nkwiʼtɨ ngə́, “Yeso, waʼtɨ aghan a nkfu za o yenɨ tso ɨfɔ ghe.”

⁴³Yeso a chwɨ́gɨ́ wəmbo ngə́, “A nkənu, ma kaʼ agho, ɨ sɨŋə wen, o mɨ tsi bɔgə a Baradiso ghe.”

⁴⁴A bé tso ntənɨ nyom, ndzumnɨ ɨ lám alaʼ za atsum ngɨ́ nkɔ́ʼ nkúʼ a nye bɨnyom bɨtárə́,

⁴⁵abagɨ atsɛʼ zə nkwasə a mu Ndáŋwi zɨ Ngwi a wánɨ́ ɨbagɨ tsi bá ghe.[129]

⁴⁶Yeso a búgɨ́ tsɛʼ nɨvwo nɨvwo ngə́, “Tarɨ! Ma nɨŋ azhwi azan a mu mbó gho ghe!” A mɛtɨnə a sóŋ məzen lá, ntsəmə.[130]

⁴⁷Tantso bɨgwe nkɨ wu fɨgɨnɨ a zɛ́n anu za a fúnɨ́ lá, mbontɨ a Ŋwi, ɨ soŋ ngə́, “Tsɛʼ a nkənu ŋwɔn wen a bé mbuʼ ə!”

⁴⁸Mbáʼ ɨbɛn ba bɨ ghótɨ́nɨ́ adiʼ wa a ndzé anu za a kɨ́nə́ fúə lá, bo ghɨnə ndzɛ́n a məzen, ntíʼə nkwě ngěn a wa nɨ njwuʼ ɨtsa, ɨ nyɔŋ mbó ɨma a nɨgo bo a mu adzə́ŋnɨ ə.

⁴⁹Ɨkaʼ ɨchi bo bɨ bəngye ba bɨ kɨ́nə́ ndzɔŋə ayi nchwuʼnɨ a Galili, bɨ tɛ́m nəghagɨ ndzě ɨnu tsenə ghe.[131]

⁵⁰Yosɛb, wa a lónɨ́ a ntáʼmbagə Arimatia a mu Yudiya, a bé ŋwɔn wu shiʼnɨ, nkə́ ngɨ̌ ɨnu tsa tsɨ tɛ́mnɨ́nɨ́ a ɨshi ɨmɨgɨ Ŋwi ə. Wɛrə a kə́ ntsǐŋ nkfu za Nɨfɔ nɨ Ŋwi na ghɨnɨ yiŋə.

⁵¹A báʼtɨ́ mbe be táʼ ŋwɔn wu mɔʼɔ abɔʼnɨ Ngaŋ Sáʼ Abyɛn lá, nton ayi anu za bɛrə bémnɨ́nɨ́ nkɨ ngɨ lá.

⁵²Wɛrə a ghɛ́n a mbó Branto, mbitɨ akfú a Yeso wəmbo ə.

⁵³Mbáʼ a ghánɨ́ lá, a tíʼ shíʼsɨ́ a zɛrə, ndwɛrɨ a mu atsɛʼ atɨŋndvuŋ zə fúə. Wɛrə a nyɔ́ŋ a mu nɨshe na nɨ bénɨ́ ɨfúʼ wa bɨ tóŋnɨ́ a tɨtərɨ aláŋsə́ ngɔʼ ə. Bɨ láʼnə mbvurɨ a ŋwɔn tse ɨwu tɨ nyɔŋə.

⁵⁴A bé njwi za bɨ kɨ́nə́ nkyáŋtɨ́ ɨnye á Njwi Alaʼ Ŋwi ɨ tiʼ ndə̌.

⁵⁵Bəngye ba bɨ kɨ́nə́ ndzɔŋə a Yeso nchwuʼnɨ a Galili lá, bɨ zɔ́ŋ ndzɛ́n nɨshe na, abɔʼnɨ adzaŋ za Yosɛb a nyɔ́ŋnɨ́ akfú za a mu nɛrə ghe.

⁵⁶Bo tíʼ mbən awa, ngɛn nkyaŋtɨ bɨnyuʼtə abɔʼnɨ mɨvwurɨ mɨ ɨfɔgɨ wu shiʼnɨ a ndzɔ́ʼ akfú za ɨwu ə. A benə a Njwi Alaʼ Ŋwi, bɛrə zhwitɨ ndzɔŋ adzaŋ za Nyɔngɔŋ a sóŋnə́.[132]