Read Ngemba Alukasɨ 7 Bible Online

Alukasɨ 7 - Ngemba bible

Alukasɨ 7

¹Mbáʼ Yeso a mɛ́tɨ́nɨ́ a sóŋ ɨnu tsiŋ ɨtsum a mbó ɨbɛn ba lá, ntiʼ ndo ngɛn a Kabɛrɨnaum ə.

²Tantso bɨgwe nkɨ wu fɨgɨnɨ wu bə Roma a tsí ɨwu, ŋwɔn afaʼ ɨyi wa a lánɨ́ nkɔ́ŋ ayi tsɛʼ nkan a kə́ ngǒ, ntiʼ tsɛʼ a ntsu nɨvwo ə.

³Mbáʼ a zúʼnɨ́ mbɨ́ʼ a Yeso lá, ntsagɨ bɨkum bɨ bə Yuda bə tse ngə́ á bɨ ghɛn ntɔŋ a Yeso ngə́ á yen ntsuʼ a ŋwɔn afaʼ ɨyi wa.

⁴Bo yenə nkuʼ a nye Yeso lá, mbuʼ mbó wəmbo tsɛʼ nɨ mɨntəm ɨma mɨtsum ɨ sóŋə́ ngə́, “Ŋwɔn wen a lanɨ nkuʼnɨ a nkwárɨ́ akwatɨ azo ə.

⁵A lanɨ nkɔŋ ɨbɛn ɨbɨgɨnə tsɛʼ nkə. A kɨnə ngvwu ndáŋwi bə Yuda a mbó bɨgɨnə ghe.”

⁶Yeso a tíʼ ndzɔŋ awa ghe. Bo ghɛnə ntiʼə nkúŋə́, Tantso wa a tsagɨ bɨson ɨbyi ngə́ á bɨ ghɛn ɨ soŋ wəmbo ngə́, “Tə̧, koʼ zhwi ɨnye ɨzo ghe, mbɨ́ʼ ngə́ ka ma kuʼnɨ aghan ngə́ o yen a ndá me ghe.

⁷Ka ma kɨ nkyɛ nkuʼnɨ aghan ɨ yen fəŋsɨ agho me mboŋ ə. Nyam soŋ tsɛʼ a táʼ atú a nɨgham ə, ŋwɔn afaʼ ɨghan wa a mɨ shwetɨ ayi ɛ.

⁸Mbɨ́ʼ ngə́ ma nɨ ŋwɔn wa a tsinɨ a shwúrɨ́ wu mɔʼɔ ŋwɔn wa a tsinɨ atú, nkɨ ntsi nɨ bɨgwe a shwúrɨ́ me ghe. Ma soŋ a mbó gwe wa wu tse ngə́, ‹Ghen!› a ghen; ma soŋ a mbó wu mɔʼɔ ngə́, ‹Yiŋə!› a yiŋə; ma soŋ a mbó abuʼ azan ngə́, ‹Ghɨ lə!› a kɨ ngɨ tsɛʼ mə lá.”

⁹Anu məzen a kɨ́ʼnɨ́ a Yeso tsɛʼ nkə; a bə́nkɨ́ ayi ɨ soŋ a mbó ɨnɔ ɨbɛn wa ɨ kɨ́nə́ ndzɔŋə ayi lá ngə́, “Ma soŋ awɨŋ ə, ka ma zɛ́nə aghan abeməntəm tso zɛnə ghe, kə́ be a mu Izrai tsum ə!”

¹⁰Ntóm tantso tsa bə́ tɨ bɨŋə a ndá wɛrə, ndzɛn ngə́ ŋwɔn afaʼ wa a shwétɨnə ayi ɛ.

¹¹Məkum a nkfu a bənə ntsa[42], Yeso a ghɛn a mu ntáʼmbagə zɨ tse bɨ tɔŋənə nɨ Nain, bo bɨ bɨyɛʼ ɨbyi abɔʼnɨ ɨnɔ ɨbɛn ə.

¹²Tsɛʼ mbáʼ a kúʼnə a ntsuəbuʼ ntáʼmbagə wa lá, bɨ byɛʼ akfú a ŋwɔn ɨ fuə nɨ zɛrə; mɨndɔŋ mɔn mbáŋnɨ́ a mbó nɨmi ɨyi wa a bénɨ́ nkfugɨ mangye; ɨnɔ ɨbɛn a mu ntáʼmbagə wa tsí bo bo ghe.

¹³Mbáʼ Maʼmbyí a zɛ́nɨ́ a nkfugɨ mangye wa lá, nko a mɨlɨŋnɨ wə ɨnye tsɛʼ nkan, ɨ soŋ wəmbo ngə́, “Koʼ kwiʼ mbugə.”

¹⁴Wɛrə a zɔ́ŋ ɨ mɔmtɨ nkom akfú a ŋwɔn wa, ɨbɛn ba bɨ byɛ́ʼnɨ́ bɨ tɛm njwiʼtə. Yeso a tíʼ sóŋ ngə́, “Mbáŋnɨ́! Ma soŋ a mbó gho ghe, lo atɨ́ ə.”

¹⁵Akfú a ŋwɔn za a ló ɨ shiʼtɨ ntsi, mbiʼnɨ ngamə ghe. Yeso a tíʼ mbyigɨ ayi nga a mbó nɨmi ɨyi ɛ.

¹⁶Nɨbɔgɨ tíʼ ndón a mu mɨntəm mɨ ɨbɛn bɨtsum, bɨ tiʼə mbóntə́ a Ŋwi ɨ sóŋə́ ngə́, “Ntom Ŋwi zɨ ngwi ɨ fu a ɨshe a tɨtərɨ bɨgɨnə ghe! Ŋwi a yen a ndoŋ ɨbɛn ɨbyi ɛ!”

¹⁷Nkərɨ mbɨ́ʼ a Yeso ɨ kárɨ́sɨ́ a Yudiya tsum abɔʼnɨ ɨtóm nɨbarə ghe.

¹⁸Mbáʼ bɨyɛʼ bɨ Yoane fɨ́ʼtɨ́nɨ́ ɨnu tsiŋ ɨtsum tsa tsɨ kɨ́nə́ fúə a mbó Yoane lá, a tsɔ́ʼ a bə bi bɨbá

¹⁹ntsagɨ a mbó Maʼmbyí á bɨ bitɨ ayi ngə́, “Lá nɨ gho wa Yoane a kɨ́nə́ sóŋə́ ngə́ a ghɨ yen lá, kə bɨgɨ ntsiŋə a wə daŋ le?”

²⁰Bo yenə nkuʼ a mbyɛn Yeso, ntiʼ soŋ ngə́, “Yoane Ngaŋ Nga Nkyi a mbó ɨbɛn a tyigɨ awɨgɨ ngə́ á bɨgɨ yen mbitɨ ngə́ a lá gho wa zɨə kɨ́nə́ sóŋə́ ngə́ a ghɨ yen lá kə bɨgɨ ntsiŋə a wə daŋ le.”

²¹Tsɛʼ a nyom məwa Yeso a tsúʼ mɨghɔ abɔʼnɨ bɨtátú, ɨ fɨgɨ ɨzhwi tsɨ tɔmnɨnɨ, ntiʼ nkɨ ntsuʼ bɨfɨgɨ ə.

²²A chwɨ́gɨ́ a mbó ntóm Yoane tsa ngə́, “Bə ngɛnə, ɨ fɨʼtɨnə a mbó Yoane ɨnu tsa nɨ zɛnɨ nkɨ ndzuʼə: bɨfɨgɨ bɨŋə ndzě ɨdiʼ ə, bɨchənkərə bɨŋə ntɛ́mə́, ɨtɨchwen bɨŋə fɛ́mə́, ɨkfo ɨtú bɨŋə ndzǔʼ ɨnu, bɨkfú bɨŋə nzhwémnə́, bɨ kə́ sǒŋ Nkən wu Shiʼnɨ a mbó ɨfúm ə.[43]

²³Nɨdorɨ nə wi tsi a mbó ɨbɛn ba ka bɨ mə́ŋnə́ awa aghə!”

²⁴Ntóm Yoane tsa ghɛnə awa, Yeso a bə mbiʼnɨ ngamə mbɨ́ʼ a Yoane a mbó ɨnɔ ɨbɛn wa ngə́: “Nɨ kə́ ngěn a mbó Yoane a mu mɨkɨghonɨ lá, nkwaʼtɨ a ndzé ake le? Ngyɛn á ɨ nchíʼnə́ a mu kɨfɛrɨ le?

²⁵Nɨ lánɨ́ ngɛn lá a ndzé ake le? A ŋwɔn wa a wəgɨnɨ ɨtsɛʼ mɨsom ɨchi le? Zɛnə a zɨŋə, ɨbɛn ba bɨ wə́gɨ́nə́ awa adzaŋ məwa nkə́ nchyɛ̌ a mu tɨboŋəzúm, bɨ chyɛ̌ lá a mu mɨntɔ́ʼ ə!

²⁶Soŋnə aghə, nɨ lánɨ́ ngɛn lá a ndzé ake le? Ntom Ŋwi le? E tsɛʼ a nkənu ə, nɨ zɛ́n a za a ghɛnɨ nɨ mbyi ntsa Ntom Ŋwi ə.

²⁷Mbɨ́ʼ ngə́ aŋwaʼnɨ a Ŋwi a soŋ lá mbɨ́ʼ a Yoane ngə́: ‹Ŋwi a soŋ ngə́, ma mɨ tsagɨ ntom ɨzan a mbyi gho á ɨ ŋaʼ ndóm a mbó gho ghe.›”[44]

²⁸Yeso a kwíʼtɨ́ ngə́, “Ma sóŋə́ awən ngə́, Yoane a tsa a ŋwɔn tsum wa a kwɛnə ntsi a atuəshe. Lá ŋwɔn tsum wa a kɨgɨnɨ ntsa a ŋwɔn tsum a mu nɨfɔ nɨ Ŋwi a tsa a Yoane ghe.”

²⁹Ŋwɔn tsum a zúʼ ayi ɛ; bo tɨ́sə́n tɨ́sə́n bo bɨ ngaŋ nkwárɨ́ ashɛbɨ; a bé bo wa bɨ zúʼnɨ́nɨ́ ɨnu tsɨ tɛmnɨnɨ tsa Ŋwi a kɨ́nə́ ndǒ ntiʼ nkwarɨ nkyi a mbó Yoane ghe.[45]

³⁰Lá bə Farisao bo bɨdiʼ bɨ Nyɔngɔŋ tón awa anu za Ŋwi a kɨ́nə́ ndǒ a mbó bo, ntiʼ nkɨ nton awa a nkwárɨ́ nkyi a mbó Yoane ghe.

³¹Yeso a ghɛ́n nɨ mbyi ngə́, “Be ma fɨʼnɨ ɨbɛn bɨ tɨtsɔŋnɨ lá bo bɨ ake le? Bo fi lá ɨke le?

³²Bo fi ɨbɔ bə bɔrɨ ba bɨ tsinɨ a ɨsaŋəbyɛn ə. Táʼ bagɨ a tɔnkɨnə a mbó bagɨ wu mɔʼɔ ngə́, ‹Bɨgɨ búʼ mɨkom mɨ nɨzɔ́ʼ a mbó bən, lá nɨ keʼ awən bɨŋə! Bɨgɨ zɔ́bɨ́ mɨnkyi mɨ nɨvwo a mbó bən, lá nɨ keʼ awən bugə!›

³³Yoane Ngaŋ Nga Nkyi a yén lá nchigɨ nji tsɨ ntsaʼtɨ Ŋwi, nkeʼ mɨluʼ kɨ no, nɨ soŋ ngə́, ‹A tsi nɨ dzɨŋ a mu ɨnye zɨə!›

³⁴Mɔn Ŋwɔn a yenə, ndzɨ́ə mɨdzɨ nkə́ nǒ mɨluʼ, nɨ soŋ ngə́, ‹Zɛnə a mba wiŋ ə! A nɨ ndánɨdzɨ nkɨ mbe abarə mɨluʼ, ɨson bɨ ngaŋ nkwárɨ́ ashɛbɨ bo bɨ ngaŋ ngɨ mɨbvu ə!›

³⁵Zóŋ Ŋwi a diʼ ngə́ a nɨ nkənu a mu ntsi mbyi ɨbɔ bɨ Ŋwi ə.”

³⁶Ŋwɔn bə Farisao tse a ghón a Yeso ngə́ á yen ndzɨ bo zɨ a nkwɛfɔ ə. Yeso a ghɛ́n ɨwu ɨ shiʼtɨ ntsi a ndzɨ mɨdzɨ ə.

³⁷A mu ntáʼmbagə məwa mangye tse a tsí ɨwu mbe mbuʼ mɨbvu ə. Mbáʼ a zúʼnɨ́ ngə́ Yeso a tsí ndzɨ́ə a ndá ŋwɔn bə Farisao wa lá, ndɔgɨ ntsəŋ za bɨ nyɛ́tɨ́nɨ́ nɨ ngɔʼ tsɨ fú ɨ lon nɨ bɨnyuʼtə bə atɨŋndvuŋ

³⁸ngɛn ntɛm a ndzum Yeso ndzɛʼə nkyi nɨzɛʼ ɨyi ɨ shiʼə ntsúbə́ mɨku mɨ Yeso ghe. A zɔ́ŋtɨ́ nchiʼ a mɛrə nɨ ɨnyɔŋ atú ɨchi, nchwɨgə a mɛrə, nchwirɨ mɨvwurɨ mɨ ɨfɔgɨ wu shiʼnɨ ma ɨwu ə.

³⁹Ŋwɔn bə Farisao wa a ghónɨ́ a Yeso a zɛnə a məzen lá, ntiʼə ngwiʼə ayi ngə́, “Be ŋwɔn wɛnə, tsɛʼ a nkənu, a be lá Ntom Ŋwi, muŋ a tsi nɨ nji mangye wen wa a mɔmtɨnə ayi lá; muŋ a zhi ngə́ mangye wen a nɨ mbuʼ mɨbvu ə!”

⁴⁰Yeso a chwɨ́gɨ́ ngə́, “Samɔn a, ma tsi nɨ anu zə tse a sóŋə́ a mbó gho ghe.” Samɔn a chwɨ́gɨ́ ngə́, “Ndiʼ aŋwaʼnɨ, a be lá ngə́ ke le?”

⁴¹“Ŋwɔn tətsɔʼnɨ wu tse a tsí nɨ ngaŋ mɨká ɨchi tsi bá; táʼ a wɛmnə ayi nɨ ɨban nkáb tsi tə̧̂, wu mɔʼɔ a wɛmnə ayi nɨ nchwuʼ mɨghúm mɨntə̧̂ ghe.

⁴²Bɨ ghɨnə nchí keʼ tfu mɨká ɨma, wɛrə a nyɛʼtɨ awa ngə́ á bɨ keʼ nkáb za byigə. O kwaʼtɨ ngə́ a mɨ kɔŋ wɨŋə ɨ kɔŋ a ŋwɔn tətsɔʼnɨ wa ɨ tsa a wu mɔʼɔ le?”

⁴³Samɔn a chwɨ́gɨ́ ngə́, “Ma kwaʼtɨ ngə́ a nɨ ŋwɔn wa bɨ nyɛʼtɨnɨ ayi nɨ nkáb zɨ ngaʼtɨnɨ lá.” Yeso a tíʼ sóŋ ngə́, “O chwɨgɨ ɨ shiʼnɨ ə.”

⁴⁴Wɛrə a tíʼ mbəŋ ayi nden a mangye wa mbitɨ a Samɔn ngə́, “O ze a mangye wen le? Ma lo ngyen a ndá gho lá, o koʼ nkyi sugɨ mɨku ɨman gha, lá a tsubɨ mɨku ɨman nɨ nkyi nɨzɛʼ ɨyi, nchiʼ nɨ ɨnyɔŋ atú ɨchi ɛ.

⁴⁵O lo nkoʼ aghan chwɨgɨ a ngɨ yiŋ ɨ shiʼnɨ a mbó me, lá ka a kyɛntɨnə ayi a nchwɨgɨ mɨku ɨman nchwuʼnɨ mbáʼ ma yenɨ ɨghə.

⁴⁶O lo nkoʼ atú azan nɨ mɨvwurɨ zɔʼ lá a zɔʼnə mɨku ɨman nɨ mɨvwurɨ mɨ ɨfɔgɨ wu shiʼnɨ ə.

⁴⁷Ma tiʼə sóŋə́ a mbó gho ngə́, təkɔʼ bɨ akɔŋnɨ wa a diʼnɨ a nye me lá a ghɨ ngə́ á ma lɨgɨnɨ mɨbvu ɨmyi ma mɨ ghaʼnɨ be tɨ́sə́n lá. Ŋwɔn tsum wa bɨ lɨgɨnɨnɨ mɨbvu ɨmyi tsɛʼ mɨnyiə a kə́ ndíʼə akɔŋnɨ tsɛʼ mɨnyiə ghe.”

⁴⁸Yeso a tíʼ sóŋ a mbó mangye wa ngə́, “Awa bɨ lɨgɨnɨnə mɨbvu ɨmo ə.”

⁴⁹Ɨbɛn bə mɔʼɔ ba bɨ shíʼtɨ́nɨ́ ntsi ndzɨə tíʼə mbítə́ awa bo nɨbo ngə́, “A lanɨ mbe lá ɨwa a wen mbáʼ a kwɛnə nkə́ ndɨ́gɨ́nɨ́ mɨbvu mɨ ɨbɛn lá le?”

⁵⁰Lá Yeso a sóŋ a mbó mangye wa ngə́, “Abeməntəm azo a loŋ agho; ghɛn nɨ mbɔnɨ ə.”