Read Ngemba Alukasɨ 8 Bible Online

Alukasɨ 8 - Ngemba bible

Alukasɨ 8

¹Abaŋ a ghɨnə mbé ɨwu, Yeso a yiŋənə ntsǎ a mu ntáʼmbagə abɔʼnɨ ɨtóm ɨ sǒŋ Nkən wu Shiʼnɨ mbɨ́ʼ nɨfɔ nɨ Ŋwi ə. Bɨyɛʼ ɨbyi ba nɨghúm ntsɔb bá tsí bo zɨ,

²nkwiʼtɨ bəngye bə tse ba bɨ tsúʼnɨ́ awa a mbó ɨzhwi tsɨ tɔmnɨnɨ abɔʼnɨ mɨghɔ: Mɛrɨ (wa mɨkyɛgɨnɨ ɨmyi bénɨ́ Matarɨna), wa bɨ fɨ́gɨ́nɨ́ bɨdzɨŋ bi samba wə ɨnye;

³Yoana, ngwe Chuza, mangye wa a kɨ́nə́ faʼə a mbó Ɨfɔ Ɛrɔd; Susana abɔʼnɨ bəngye bə mɔʼɔ bə ghaʼtɨnɨ ba bɨ kɨ́nə́ nkwátə́ a Yeso bo bɨ bɨyɛʼ ɨbyi a mu ɨdzúm tsa bo tsínɨ́ nɨ tsɛrə ghe.

⁴Ɨbɛn kə́ ntyínə́ ngyíŋə́ a mbó Yeso ndǒ a mu ntáʼmbagə nkúŋə́ a mu wu mɔʼɔ; ɨnɔ ɨbɛn ghɨnə ngótɨ́ táʼ adiʼ Yeso a ná nɨgham nɛnə ngə́:

⁵“A nkfu tse ŋwɔn tse a fú ngɛn a mbi nchwi ɨzhi ɛ. Adzaŋ za a kɨ́nə́ mbǐ nchwi za a mu ɨshwom ɨyi lá, tsə tse vwókɨ́ alaŋ a ndóm, ɨbɛn tsa nyəŋtɨ, bɨsɨ́ŋ sɛʼ nkfurə.

⁶Tsə mɔʼɔ vwókɨ́ atú aláŋsə́ ngɔʼ, ntomnkɨ, lá mbə́ ndzomnkɨ mbɨ́ʼ ngə́ nkyi sé ɨwu be ə.

⁷Nchwi za zɨ mɔʼɔ ɨ vwókɨ́ a tɨtərɨ kyɛrə-kyɛrə, nkwi ndzɔ́ŋ ndzɔ́ŋ zhiʼ mbyigɨ a ɨshe ə.

⁸Mbum tsə mɔʼɔ vwókɨ́ atú ɨshe nɨkomə; ntomnkɨ nkwi ɨ fɨgɨ nchwi nkfu táʼ nkɨ ə.” Yeso a lwɨ́gɨ́nɨ́ ɨ soŋ ngə́, “Be nɨ tsi nɨ ɨtoŋnɨ nɨ zuʼə!”

⁹Bɨyɛʼ ɨbyi tíʼ mbítɨ́ ayi ngə́, “O na nɨgham nen ndiʼ lá ngə́ ke le?”

¹⁰Wɛrə a tíʼ nchwɨ́gɨ́ ngə́, “Bɨ kyaŋ awən nɨ azhyɛ za a tsinɨ a nkubə mbɨ́ʼ nɨfɔ nɨ Ŋwi, lá a mbó abvuʼ a ɨbɛn a mɨ yen a mbó bo a nye nɨgham nə nanɨ, taŋ á bɨ ndyíŋə́ nkeʼ ndzě, njwíʼtə́ nkeʼ ndzúʼə nkə́ njíɛ ghe.”

¹¹“Nɨgham nə nanɨ nen diʼ lá ngə́: nchwi za be lá anu a Ŋwi ə.

¹²Mbum nchwi tsa tsɨ vwókɨ́nɨ́ a ndómnji lá, diʼ lá ɨbɛn ba bɨ zuʼnɨ anu a Ŋwi; lá Dəbɨrɨ a yen ɨ shwerɨ nkən wa ɨ fu nɨ wɛrə a mu mɨntəm ɨma, taŋ á bo tsi tɨ nɨŋ mɨntəm ɨma a nye Ŋwi taŋ á bɨ loŋ awa ghe.

¹³Mbum tsa tsɨ vwókɨ́nɨ́ atú aláŋsə́ ngɔʼ diʼ lá ɨbɛn ba bɨ zuʼnɨ anu a Ŋwi, nkɨ ndanɨ nkwarɨ a zɛrə tsɛʼ nɨ nɨdorɨ ə. Lá nɨ ghɔŋ be atú a ntəm bo nkeʼ kunkɨ a mu ɨnye bo; bo nɨŋ mɨntəm ɨma ɨwu tsɛʼ a nye mə baŋtɨ, lá a nkfu za azhwəŋtɨ a yenɨ, bo bəŋ mɨntəm ɨma ghe.

¹⁴Mbum tsa tsɨ vwókɨ́nɨ́ a tɨtərɨ kyɛrə-kyɛrə lá, tsɨ diʼ lá ɨbɛn ba bɨ zuʼnɨ; lá ɨnu atuəshe, afuʼ aza abɔʼnɨ ndzɨ mbyi juŋnɨ ɨ sɔbtɨ a zɛrə, nchwi za bán lá ndáʼ keʼ tɨŋə.

¹⁵Mbum tsa tsɨ vwókɨ́nɨ́ atú ɨshe nɨkomə lá, tsɨ diʼ lá ɨbɛn ba bɨ zuʼnɨ anu a Ŋwi ndɛn a zɛrə a mu ntəm wu shiʼnɨ nkə́ nchigɨ mɨntəm ɨma ɨ kɔʼ kuʼ nkfu za a ghɨ yen nɨ anu zə shiʼnɨ ə.”

¹⁶“Ka ŋwɔn tsɛrə a nchwuʼə ayi nkaʼ ntságə́ ntɛ́gə́ a shwúrɨ́ ɨkon ə. A baŋnə ntɛ́gə́ atú atɛkɨ a nkaʼ, taŋ ɨbɛn kon a ndá bɨ ze ɨdiʼ ə.[46]

¹⁷Azúm atsum za bɨ lwɛʼnɨ, a ghɨ fú yen asaŋəsaŋ, azúm atsum za bɨ bɔmtɨnɨ, bɨ ghɨ zɛ́n ɨ fɨgɨ ɨ fú nɨ zɛrə a ɨfúgɨ́ ɨdiʼ ə.[47]

¹⁸A nɨ lə ɨtú ɨtsən adzaŋ za nɨ zhwíʼtɨ́nə́ anu a Ŋwi; mbɨ́ʼ ngə́ ŋwɔn tsum wa a tsinɨ nɨ zɛrə; bɨ ghɨ kwiʼtə, lá ŋwɔn wa a tsinɨ mbômbô; tsɛʼ mɨnyiə wa a kwaʼtɨnɨ ngə́ zɨə tsi nɨ wɛrə lá, bɨ ghɨ kwárə́.”[48]

¹⁹Nɨmi bɨ Yeso bo bɨ ɨbɔmbɨma bɨ Yeso bə mbáŋnɨ́ yén a ndzé Yeso, lá nchi keʼ ayi zɛn mbɨ́ʼ ngə́ ɨnɔ ɨbɛn ɨ ghaʼ ɨwu ə.

²⁰Ŋwɔn tse a sóŋ a mbó Yeso ngə́, “Nɨmo ɨgho bo bɨ ɨbɔmbɨma ɨbo bə mbáŋnɨ́ bɨ tɛm abyɛn ndǒ ndze gho ghe.”

²¹Lá Yeso a chwɨ́gɨ́ a mbó bo bɨtsum ngə́, “Nɨmi ɨghan bo bɨ ɨbɔmbɨma ɨban bə mbáŋnɨ́ a nɨ ɨbɛn ba bɨ zúʼnə́ nɨgham nɨ Ŋwi nkə́ ndě a nɛrə ghe.”

²²Njwi tsɛrə Yeso a kón a mu abáŋ a nkyi bo bɨ bɨyɛʼ ɨbyi ɨ soŋ a mbó bo ngə́, “Bɨgɨnə daŋ ntom ngɛn a ndzɨŋ sagɨrə wen zɨ mɔʼɔ ghe.” Bo bíʼnɨ́ ntiʼə ngěn ghe.

²³Bo tsinə a mu nkyi ntiʼə ngěn, fɨlye chwa a Yeso ghe. Kɨfɛrɨ wu ntən wu tsɛrə a vwúkɨ́ ntsa a mu sagɨrə wa, nkyi chwuʼ ntiʼə nkúŋə́ a mu abáŋ a nkyi za, bo tsi nɨ nɨbɔgɨ ngə́ zə tɨbɔŋ a chi fuə.

²⁴Bɨyɛʼ ɨbyi ghɛ́n ndzɛm ayi, ɨ sóŋə́ ngə́, “Tafaʼ, Tafaʼ! Bɨgɨ mɨ kfókə́!” Yeso a ló atɨ́ ngámtɨ́ a kɨfɛrɨ wa bo nkyi wa ɨ kɨ́nə́ nɛ́mə́ lá; bɨ bɔrɨ ɨdiʼ ɨ mbɔnɨ ngə́ tum ə.

²⁵Wɛrə a tíʼ mbítɨ́ bɨyɛʼ ɨbyi ngə́, “Abeməntəm azən a mé le?” Lá a kɨ́ʼnɨ́ awa, bo tsi nɨ nɨbɔgɨ, mbitɨ awa bo nɨbo ngə́, “Ŋwɔn wen a lá ɨwa le? A ghǎ ntɨgə, titi nkɨ nga a mbó bɨkɨfɛrɨ abɔʼnɨ nkyiɛ yiŋənɛmə, tsɨ zuʼnɨnə ayi ɛ!”

²⁶Yeso bo bɨ bɨyɛʼ ɨbyi tíʼ ndɔgɨ nɨyen a mu sagɨrə wa ndaŋ ntom ngɛn a Gɛrasa[49], a ndaŋ ndzɨŋə Galili ə.

²⁷Tsɛʼ mbáʼ Yeso a fúnɨ́ a ngə́rɨ́ nkyi wa lá, ŋwɔn tse wa a lónɨ́ a Ntáʼmbagə Gɛrasa wa bɨdzɨŋ lɔ́gɨ́nɨ́ a yén ɨ fú wə ɨnye ə. A nye nkfu zɨ sa a kə́ ngyǐŋ ntyigɨnɨ, nkeʼ a ndá a ndyě lá nchyɛ̌ ayi be nɨ ɨtú mɨshe ghe.

²⁸Mbáʼ a zɛ́nɨ́ a Yeso lá, ntɔnkɨ mbugɨ, ntso ayi nchwirɨ a ɨshe wə mɨku, ntɔnkɨ ngə́, “Yeso, Mɔn Ŋwi Akɔ́ʼɔ́ntsɨrə! O lǒ lá ngɨə ake nɨ me le? Ma buʼ mbó, koʼ nɨŋ ngɨ́ʼ a nye me ghe!”

²⁹A sóŋ a məzen lá mbɨ́ʼ ngə́ Yeso a kɨ́ŋnə ɨzhwi tsɨ tɔmnɨnɨ tsa ngə́ á tsɨ fu a mu ɨnye zɨə. Dzɨŋ wa kə́ fě ayi ntyíŋə́ ntságə́ a mu mɨkɨghonɨ mbáʼ bɨ kɨ́nə́ nkórɨ́ mbó ɨmyi nɨ mɨnkɨ mɨ atɨŋə nkə́ nɨ̌ŋ bɨkɨbuʼ a mɨku zɨə.

³⁰Yeso a bítɨ́ ayi ngə́, “Ɨkum ɨgho nɨ ɨwa le?” A chwɨ́gɨ́ ngə́, “Ɨkum ɨghə nɨ ‹Akarɨ›” mbɨ́ʼ ngə́ bɨdzɨŋ bə ghaʼnɨ tsí wə mu ɨnye ə.

³¹Bɨdzɨŋ ba búʼ mbó a mbó Yeso ngə́ á keʼ awa fɨgɨ ntsagɨ abɨ́ a kfúrɨ́mándzó ghe.

³²Akarɨ a bəkfunyam a tsí ɨ fátɨ́ adiʼ za ndzɨə awa a mbəm ntáʼ ə. Bɨdzɨŋ ba tíʼ mbúʼ mbó a mbó Yeso ngə́ á nyɛʼtɨ awa á bo fu nkon a mu bəkfunyam ba, Yeso a bemtə.

³³Bo tíʼ fú a ɨnye ŋwɔn wa nkon ngɛn a nye bəkfunyam ba. Akarɨ za atsum a zhwúʼ ɨ shiʼ mbəm abaŋ za ɨ naŋ a mu sagɨrə wa ɨ shwimkə.

³⁴Ɨbɛn ba bɨ kɨ́nə́ ntsǐŋ bəkfunyam ba zɛ́n anu za a fúnɨ́ lá, nkɨənɨ, ndzagɨ nkərɨ məzen a mu ntáʼmbagə za abɔʼnɨ ɨnyanya mɨkfú ma mɨ tsínɨ́ a ngɔbə ghe.

³⁵Ɨbɛn fú ngɛn a ndzé anu za a fúnə́. Bo yenə nkuʼ a mbyɛn Yeso, ndzɛn a ŋwɔn wa bɨdzɨŋ ba fúnɨ́ wə mu ɨnye lá a shiʼtɨ ntsi a ɨshi mɨku Yeso, ngwəgɨ ɨtsɛʼ nkɨ shwetɨ, ayigɨnɨ azhi a bə mbɨŋə; bo bɨtsum tíʼ ntsí nɨ nɨbɔgɨ ə.

³⁶Ɨbɛn ba bɨ zɛ́nɨ́ adzaŋ za Yeso a tsúʼnɨ́ a ŋwɔn wa lá tíʼ fɨʼtɨ a mbó ɨnɔ wa adzaŋ za a tsánə́.

³⁷Ɨbɛn bɨtsum ba bɨ lónɨ́ a kárɨ́kɨ́ mbuʼ Gɛrasa za tíʼ nkɨŋ a Yeso ngə́ á ghɛn ayi mbɨ́ʼ ngə́ bo tsí nɨ nɨbɔgɨ be tɨsɨŋə. Yeso a tíʼ nkón a mu abáŋ a nkyi za ngɛn ayi ɛ.

³⁸Ŋwɔn wa bɨ tsúʼnɨ́ ayi a mbó bɨdzɨŋ ba lá a búʼ mbó a mbó Yeso ngə́, “Ma lǒ ndzɔŋ gho ghe.” Lá Yeso a kə́ntɨ́ ayi ɨ soŋ ngə́,

³⁹“Bə nkwɛn ngɛn a ntsu ndá ɨ fɨʼtɨ anu za Ŋwi a ghɨnɨ a mbó gho ghe.” Ŋwɔn wa a tósɨ́ ntsa a mu ntáʼmbagə za tsum ɨ fɨʼtə anu za Yeso a ghɨ́nɨ́ a mbó zɨə.

⁴⁰Mbáʼ Yeso a bə́nɨ́ mbən a ndaŋ ndzɨŋə sagɨrə wa lá, ɨbɛn kwárɨ́ a wɛrə tsɛʼ ɨ shiʼnɨ, mbɨ́ʼ ngə́ bo kɨ chínə ndɔ́gɨ́nɨ́ ntsíŋə́ a wɛrə ghe.

⁴¹Tsɛʼ a nyom məwa, ŋwɔn tse wa bɨ kɨ́nə́ ntɔ́ŋə́ ngə́ Yaro a zɔ́ŋ ngyiŋə; a bé ŋwɔn wu ndɨtɨnɨ a ndáŋwi bə Yuda ghe. A vwó a mɨku Yeso mbuʼ mbó ngə́ á yen a ndá zɨ,

⁴²mbɨ́ʼ ngə́ mɨndɔŋ mɔn ɨyi wu mangye, mbe tso ɨlom nɨghúm ntsɔb bá, a tíʼ tsɛʼ a nkfó ghe. Adzaŋ za Yeso a kɨ́nə́ ngěn lá, ɨnɔ ɨbɛn kə́ fágɨ́tə́ ayi bɨbagɨ bɨtsum ə.

⁴³Mangye tsɛrə wa alɛm a kɨ́nə́ fúə wə ɨnye atú ɨlom nɨghúm ntsɔb bá; a tsí a tɨtərɨ ɨbɛn ba; a kɨ tɔ́nɨ́ nkáb ɨzhi tsum a ndá ngaŋ, lá ŋwɔn ngaŋ wa wu tse a kɨ chi keʼ ayi tsuʼə.

⁴⁴Mangye wa a kóŋ ndzɔŋ a ndzum Yeso a tɨtərɨ ɨnɔ ɨbɛn wa ɨ mɔmtɨ atsə́ŋ atsɛʼ a Yeso, alɛm azhi za a kɨ́nə́ fúə lá a byi nchwanə.

⁴⁵Yeso a bítɨ́ ngə́, “Aghan lá a mɔmtɨ ɨwa le?” Ŋwɔn tsum a tón ayi ɛ. Bita a sóŋ ngə́, “Tafaʼ, ɨbɛn karɨsɨ agho ntyínə́ ngyíŋə́ a ɨnye gho ghe.”

⁴⁶Lá Yeso a sóŋ ngə́, “Ŋwɔn tse a mɔmtɨ aghə, ma zhyɛ, mbɨ́ʼ ngə́ adaʼ a ló fú a ɨnye me ghe.”

⁴⁷Mangye wa a zhí ngə́ zɨə ló nchi keʼ lyɛmtɨ, ntiʼ fu a ɨshe ngyíŋə́ mbɨ́ŋnə́, ngvo a ɨshe a mbyi Yeso ɨ fɨʼtɨ asaŋəsaŋ anu za a ghɨ́nɨ́ zɨə mɔmtɨ a wɛrə abɔʼnɨ adzaŋ za wɛrə a kɨ́nɨ́ ntiʼ mbyi shwétə́.

⁴⁸Yeso a sóŋ wəmbo ngə́, “Mɔn ɨghan, abeməntəm azo a tsuʼ agho ə. Ghɛn nɨ mbɔnɨ ə.”

⁴⁹Yeso a chyɛ́ mbvúrə́ sóŋə́ a məzen mbáʼ ntom zɨ tse ɨ lónɨ́ a ndá adɨtɨ a ŋwɔn za ngyen ɨ soŋ a mbó Yaro ngə́, “Mɔn ɨgho wa a kfonə ghe; koʼ mbɨ́ŋə́ ngágə́ a ndiʼ aŋwaʼnɨ wiŋ ə.”

⁵⁰Lá Yeso a zúʼ ɨ soŋ a mbó Yaro ngə́, “Koʼ bɔgə; nɨŋ tsɛʼ ntəm ɨgho a nye Ŋwi ə, mɔn wa a mɨ shwetə.”

⁵¹Yeso a yenə nkuʼ a ndá Yaro lá, nton ngə́ ŋwɔn adaŋ a keʼ kuŋə, lá ndɔgɨ a Bita, Yoane bo Jemsɨ nkɨ mbən mbe ta bɨ mɔn wa bo nɨmi ɨyi ɛ.

⁵²Ŋwɔn tsum adiʼ wa kə́ mbúgɨ́ nɨvwo nɨ mɔn wa ə. Yeso a sóŋ ngə́, “Nɨ keʼ mbúgə́ ghe; ka mɔn wen a kfo ayi ɛ — a lyě ayi ɛ!”

⁵³Ŋwɔn tsum a kúmnɨ́ ngwe a Yeso, mbɨ́ʼ ngə́ bo zhí ngə́ mɔn wa a kfóə.

⁵⁴Lá Yeso a tságɨ́ abó azhi nchwa a zə mɔn wa ɨwu ɨ soŋ ngə́, “Lo atɨ́ a mɔn ɨghan!”

⁵⁵Azhwi a mɔn wa a bə́n wədiʼ, a byi ndo atɨ́, Yeso a soŋ ngə́ á bɨ gha mɨdzɨ wəmbo ə.

⁵⁶A kɨ́ʼnɨ́ a ta ɨyi bo nɨmi ɨyi, lá Yeso a kwántɨ́ ngə́ njimbɨʼ nɨ soŋ anu za a funɨ lá a mbó ŋwɔn tse ghe.