Read Ngemba Yoane 10 Bible Online

Yoane 10 - Ngemba bible

Yoane 10

¹Yeso a sóŋ ngə́, “Ma soŋə a mbó bən tsɛʼ a nkənu ə: ŋwɔn wa a se tsa a ntsu nká bɔŋ ɨ kon a mu akarɨ a mbyindzɨ, mbaŋnɨ nkɔʼ ntsa be a nye ndóm adaŋ, ŋwɔn məwa a nɨ ndzɛrə nkɨ mbe mbɛʼ ndá ə.

²Ŋwɔn wa a tsanɨ a ntsu nká, a nɨ zɨ wa a nɨ ntsiŋ mɨnyam wa a tsenɨ mbyindzɨ tsa.

³Ntsiŋ ntsu nká a ŋaʼə ntsu nká wəmbo; mbyindzɨ tsa zǔʼ nji ɨzhi, adzaŋ za wɛrə a tɔ́ŋnɨ́ mbyindzɨ ɨchi a ɨkum, ntiʼ ntsɨŋnɨ a tsɛrə ɨ fuə nɨ tsɛrə abyɛn ə.

⁴A be ngə́ a tsagɨnə mbyindzɨ ɨchi ɨtsum abyɛn, a tsa mbyi ɨza, mbyindzɨ tsa tiʼə ndzɔŋə a wɛrə, mbɨ́ʼ ngə́ tsɨ zhi nji wɛrə ghe.

⁵Tsɨ chi keʼ a ŋwɔn adaŋ zɔŋ; tsɨ mɨ baŋnɨ kɨə awa ayi, mbɨ́ʼ ngə́ bo se nji ɨzhi zhyɛ.”

⁶Yeso a ná nɨgham nen a mbó bo, lá bo keʼ zuʼ nkɨ nji anu za a kɨ́nə́ sóŋə́ a mbó bo ghe.

⁷Ma lan, Yeso a tíʼ nkwátɨ́ sóŋ a mbó bo ngə́, “Ma soŋə tsɛʼ nkənu a mbó bɨŋ ə: ma nɨ ntsu nká a mbó mbyindzɨ ə.

⁸Ɨbɛn bɨtsum ba bɨ fómnɨ́ ntsa mbyi ngyen tɨ me bo nɨ mɨzɛrə abɔʼnɨ bɨmbɛʼ ndá, lá mbyindzɨ tsa sé zhwiʼtɨ a mbó bo ghe.

⁹Ma nɨ ntsu nká ə. Ŋwɔn tsum wa a tsanɨ a ndzum me nkon, bɨ ghɨ loŋ ayi; bo mɨ kon ɨ yen ɨ tiʼ fu ghɛn zɛn ngyɛn zɨ nkfurɨnə.

¹⁰Ndzɛrə a yiŋə tsɛʼ a ndzé, ɨ zhwitɨ ɨ kɨ tsənkə. Ma yen lá taŋ á nɨ chi tsi nɨ ntsi ntən, ɨ kɨ tsi nɨ zɛrə á ɨ lon ntiʼə ndzagɨnə ghe.

¹¹Ma nɨ ntsiŋ mɨnyam wu shiʼnɨ ə. Ntsiŋ mɨnyam wu shiʼnɨ a chi kfo bɔm mbyindzɨ ɨchi ɛ.

¹²Ŋwɔn wa bɨ lɔnɨ ayi ndɛn ntfúə, wa a se ntsiŋ mɨnyam be, wa mbáʼ ka mbyindzɨ tsa be ayi ɨchi, a ze angwabaʼ a tɨ yiŋə lá, a nyɛʼ mbyindzɨ tsa nkɨə; ma lan, angwabaʼ a ko a táʼ, ndzagɨ abvuʼ ə.

¹³Ŋwɔn wa bɨ lɛnɨ ntfúə a kɨə ayi lá mbɨ́ʼ ngə́ bɨ tfúə ayi ɨ tfúnɨ́, a keʼ atú azhi a nye mbyindzɨ tsa kɨ ntɛgə.

¹⁴Ma nɨ ntsiŋ mɨnyam wu shiʼnɨ ə; ma zhi mɨnyam ɨmə, mɨnyam ɨmə kɨ nji aghə,

¹⁵tso mbáʼ Tarɨ a zhinɨ aghan lá, ndəŋndəŋ, ma kɨ nji a Tarɨ; nchi kɨ kfo ɨ bɔm mbyindzɨ ə.

¹⁶Ma kɨ ntsi nɨ mbyindzɨ tsɨ mɔʼɔ tsa mbáʼ ka tsɨ tsi awa a mu ndá mbyi ziŋ ə. Ma tsi nɨ ɨ kɨ zagɨ yen nɨ tsɛrə; tsɨ mɨ zuʼ nji ntsu ɨzan, tsɨ mɨ tiʼ be táʼ akarɨ ntsi nɨ táʼ ntsiŋ mɨnyam ə.

¹⁷Tarɨ a kɔŋ aghan mbɨ́ʼ ngə́ ma bem nɨvwo, taŋ ɨ bə kwarɨ ntsi ntən ɨzan wədiʼ ə.

¹⁸Ka ŋwɔn tse a ndɔ́gə́ ayi ntsi ntən ɨzan a mbó me ghe. Ma ghǎ a zɛrə be a nkɔŋ me ghe. Ma tsi nɨ mɨtən a ngá nkɨ mbə ntsi nɨ mɨtən a nkwárə́ wədiʼ ə. Nə nɨ anu za Ta ɨghan a soŋnɨ ngə́ á ma ghɨə.”

¹⁹Ayɛbtɨ a kwíʼ mbə nkɨ ntsi a tɨtərɨ bə Yuda mbɨ́ʼ mɨgham məmiŋ ə.

²⁰Bo bə ghaʼnɨ kə́ sóŋə́ ngə́, “A tsi nɨ dzɨŋ ə! A banə! Nɨ zhwíʼtə́ wəmbo lá ngə́ ke le?”

²¹Bə mɔʼɔ kə́ sóŋə́ ngə́, “Ŋwɔn wa a tsinɨ nɨ dzɨŋ a chi keʼ adzaŋ wen ghamə! Dzɨŋ a chi ghɨ á bɨfɨgɨ bə ndzɛn ɨdiʼ lá ɨ nə́ le?”

²²A bé a nkfu ɨfɛgɨ wu tən[9], bɨ kə́ ngɨ̌ Nɨdorɨ nɨ Nkwemtɨ Ɨŋaʼ Ndáŋwi zɨ Ngwi nɨ Atsaʼtɨ a Ŋwi a Yerosalɛm ə.

²³Yeso a kə́ ngántə́ ayi a mu Ntaŋ wu Tɛʼnɨ wu Sanɨmɔ a mu Ndáŋwi zɨ Ngwi,

²⁴mbáʼ ɨbɛn ghótɨ́nɨ́ nkarɨsɨ ayi mbitɨ ayi ngə́, “O mɨ lɛn awɨgɨ a mu nɨwiʼ lá a nye ndvuŋ nkfu ake le? Soŋ nkənu za ɨ tsinɨ ɨwu asaŋəsaŋ a mbó bɨgɨ ə: Wa bɨ Zɔ́ʼnɨ́ wa a lá gho le?”

²⁵Yeso a chwɨ́gɨ́ a mbó bo ngə́, “Ma kwɛnə soŋ a mbó bɨŋ ə, lá nɨ keʼ mɨntəm ɨmən ɨwu nɨŋ ə. Ɨfaʼ tsa ma faʼnə nɨ mɨtən mɨ Ta ɨghan, tsɨ diʼə a ŋwɔn wa ma nɨ wɛrə;

²⁶lá nɨ keʼ mɨntəm ɨmən ɨwu nɨŋ, mbɨ́ʼ ngə́ ka nɨ tsi awən a mu akarɨ a mbyindzɨ azə.

²⁷Mbyindzɨ ɨtsan ɨ zǔʼ nji ɨzan; ma zhi a tsɛrə, tsɨ kə ndzɔŋə aghə.

²⁸Ma tiʼə nkə́ ngǎ awa nɨ ntsi ntən nɨnkoŋ, tsɨ láʼ keʼ kfokɨ, ŋwɔn wu tsɛrə a chi keʼ a tsɛrə a mu mbó me shwuʼə.

²⁹Ta ɨghan, zɨ wa a ghánɨ́ a tsɛrə a mbó me, a tsa a ŋwɔn tsum, ŋwɔn wu tsɛrə a chi keʼ a tsɛrə a mu mbó Tarɨ shwuʼə.[10]

³⁰Bɨgɨ Tarɨ nɨ táʼ azúm ə.”

³¹Bə Yuda kwíʼ nkɨ́ mbye mɨngɔʼ a ntúmtɨ́ wɛrə nɨ mɛrə ghe.

³²Yeso a sóŋ a mbó bo ngə́, “Ma faʼnə ɨfaʼ tsə shiʼnɨ tsə ghaʼnɨ a ɨshi bən tsa Ta ɨghan a ghánɨ́ a mbó me a faʼə ghe; nɨ mɨ tumtɨ aghan nɨ mɨngɔʼ lá mbɨ́ʼ a zɨŋə afaʼ le?”

³³Bə Yuda chwɨ́gɨ́ wəmbo ngə́, “Bɨgɨ mɨ keʼ agho nɨ mɨngɔʼ tumtɨ lá mbɨ́ʼ ɨfaʼ tsɨ shiʼnɨ ə, a nɨ be mbɨ́ʼ ngə́ o ghǎm mɨgham mɨ ndzɔm Ŋwi ə! O lá tsɛʼ ŋwɔn mɨsɔŋ a ntsu ə, lá o zhwə́ŋtɨ́ ngɨ atuəmbəm azo a nye Ŋwi ə!”

³⁴Yeso a chwɨ́gɨ́ a mbó bo ngə́, “Bɨ ŋwaʼnɨ a mu Nyɔngɔŋ ɨwən ngə́ Ŋwi a sóŋ ngə́, ‹Nɨ nɨ bɨŋwi ə.›

³⁵Bɨgɨnə zhi ngə́ anu za Aŋwaʼnɨ a Ŋwi a soŋnɨ a nɨ nkənu ɨ láʼ ghɛn lwitɨ; Ŋwi a tɔ́ŋ ɨbɛn məba nɨ bɨŋwi, a bé ɨbɛn ba bɨ ghánɨ́ nkən ɨyi a mbó bo ghe.

³⁶Lá a mbó me, Tarɨ a ghɨ́ aghan ma fɛm ntiʼ ntsagɨ aghan a mu mbyi ɛ. Nɨ tiʼ ntsa lá ɨ nə́ a sóŋə́ ngə́ ma ghǎm nɨgham nɨ ndzɔm Ŋwi mbɨ́ʼ ngə́ ma sóŋ ngə́ ma nɨ Mɔn Ŋwi wu Mbáŋnɨ́ le?

³⁷Nɨ keʼ mɨntəm ɨmən a nye me nɨŋ mbáʼ be a be ngə́ ka ma ngɨə aghan ɨnu tsa Ta ɨghan a lɔnə ngə́ á ma ngɨə ghe.

³⁸Lá be ma ghɨ a tsɛrə, nɨ baʼtɨ keʼ mɨntəm ɨmən a nye me nɨŋ ɨ nɨŋnɨ lá, nɨ nɨŋ mɨntəm ɨmən a nye ngɨnɨ mɨnu ɨman, taŋ á nɨ chi zhi táʼ nkfu wa a nunɨ nɨnkoŋ ngə́ Tarɨ a tsi a mu ɨnye me, ma kɨ ntsi a mu ɨnye Tarɨ ə.”

³⁹Bɨ kwíʼ mbə nkwátɨ́ ndɔ́btɨ́ a nko Yeso, lá a tyigɨnɨ ɨ fu a mu mbó bo ghe.

⁴⁰Yeso a bə́ nkwátɨ́ ndaŋ a mɨzam Yorɨdan ngɛn adiʼ wa Yoane a kɨ́nə́ ngǎ nkyi ɨwu lá, ntiʼ ntsi ayi ɨwu ə.

⁴¹Ɨbɛn bə ghaʼnɨ yén wəmbo ə. Bo sóŋ ngə́, “Yoane a sé ɨnu tsɨ yerɨnɨ-yerɨnɨ ghɨə, lá anu atsum za a sóŋnɨ́ mbɨ́ʼ a ŋwɔn wɛnə a bé nkənu ə.”

⁴²Ɨbɛn bə ghaʼnɨ adiʼ wa nɨ́ŋ mɨntəm ɨma a nye Yeso ghe.