Read Ngemba Yoane 11 Bible Online

Yoane 11 - Ngemba bible

Yoane 11

¹Ŋwɔn wu tse a kə́ ngǒ a Bɛtani, ɨkum ɨyi be Lǎtsorə ghe. Bɛtani a bé ntáʼmbagə wa Mɛrɨ bo Marɨta kɨ́nə́ nchyɛ̌ ɨwu ə.

²(Mɛrɨ məwen a bé lá mangye wa a chwírɨ́nɨ́ mɨvwurɨ mɨ ɨfɔgɨ wu shiʼnɨ a mɨku Maʼmbyí nkɨ nchiʼ nɨ ɨnyɔŋ atú ɨchi lá. Lǎtsorə wa a kɨ́nə́ ngǒ a bé lá mɨma Mɛrɨ məwiŋ ə.)

³Ɨbɔmbɨma ɨbyi ben bə bəngye tíʼ ntsagɨ ntom a mbó Yeso ngə́ á bɨ ghɛn ɨ soŋ a mbó Yeso ngə́, “Maʼmbyí, mbɔŋ ɨson ɨgho a ghǒ ghe.”

⁴Yeso a ghɨnə ndzúʼ a zɛrə ɨ soŋ ngə́, “Ndwitɨ nɨghɔ niŋ mɨ keʼ be nɨvwo nɨ Lǎtsorə ghe; məzen a fu lá taŋ ɨ gha nɨfáŋ a mbó Ŋwi, a mɨ kɨ be ndóm wa Mɔn Ŋwi wu Mbáŋnɨ́ a mɨ tsa ɨwu ɨ kwarɨ nɨfáŋ ə.”

⁵Yeso a kɔ́ŋ a Marɨta, Mɛrɨ abɔʼnɨ Lǎtsorə ghe.

⁶Lá mbáʼ wɛrə a kwárɨ́nɨ́ nkən ngə́ Lǎtsorə a kə́ ngǒ lá, mbə nkwiʼ ntsi adiʼ wa a tsínɨ́ ɨwu lá atú njwi tsi bá ghe.

⁷Ntiʼ soŋ a mbó bɨyɛʼ ɨbyi ngə́, “Bɨgɨnə bə́ mbən ngɛn a Yudiya ghe.”

⁸Bɨyɛʼ ɨbyi chwɨ́gɨ́ wəmbo ngə́, “Rabai, aghagɨ a bvurɨ tɨ sagɨ mbáʼ bə Yuda kɨ chinə ndǒ ntumtɨ gho nɨ mɨngɔʼ, o bɨŋə ndǒ ngə́ á bɨgɨnə kwiʼ ngɛn ɨwu le?”

⁹Yeso a chwɨ́gɨ́ a mbó bo ngə́, “Be nəzhwɨgɨnɨ ɨ tsi lá nɨ bɨnyom nɨghúm ntsɔb bá le? Be ŋwɔn a ngyíŋə́ nəzhwɨgɨnɨ, a chi keʼ kɔmkɨ ngvo mbɨ́ʼ ngə́ a zě nkaʼ wa ɨ fúgɨ́nə́ a mu mbyi ɛ.

¹⁰Lá be ŋwɔn a ngyíŋə́ nɨ ɨtfúʼ, a kɔmkɨ ngvo, mbɨ́ʼ ngə́ ka bo tsi awa nɨ nkaʼ ə.”

¹¹Yeso a ghám ma lan ntiʼ soŋ a mbó bo ngə́, “Ɨson ɨwɨgɨnə Lǎtsorə a nɔŋ ndyě ghe, lá ma mɨ ghɛn zɛm ayi a fɨlye ə.”

¹²Bɨyɛʼ ɨbyi sóŋ wəmbo ngə́, “Maʼmbyí, be a be ngə́ a nɔŋ ndyě, muŋ a mɨ shwetə.”

¹³Anu za Yeso a sóŋnɨ́ a díʼ lá ngə́ Lǎtsorə a kfóə, lá bɨyɛʼ ɨbyi wíʼtɨ́ ngə́ a sóŋ lá ngə́ a nɔ́ŋ ndyě tsɛʼ lyenə.

¹⁴Ma lan, Yeso a tíʼ sóŋ a mbó bo asaŋəsaŋ ngə́, “Lǎtsorə a kfoə;

¹⁵lá mbɨ́ʼ atú azən ma dorɨtɨ ngə́ ma lo nkaʼ ɨwu tsi, taŋ á nɨ chi nɨŋ mɨntəm ɨmən a nye me ghe. Bɨgɨnə ghɛn wə mbyɛn ə.”

¹⁶Lá Tɔməshi (zɨ wa bɨ kɨ́nə́ ntɔ́ŋə́ ngə́ Mɔn Nɨfágɨ́ lá) a sóŋ a mbó ɨbɛn ba bo bo bénɨ́ bɨyɛʼ lá ngə́, “A bɨgɨnə ghɛn bɨgɨnə bɨ Ndiʼ Aŋwaʼnɨ, taŋ be a be ngə́ wɛrə a tsi nɨ nkfoə, bɨgɨnə chi kfo bɨgɨnə bɨ wɛrə ghe!”

¹⁷Yeso a ghɨnə ngyén nkón, ndzɛn ngə́ njwi tsi nɨkwa tsánə mbáʼ bɨ twə́ŋnɨ́ a Lǎtsorə ghe.

¹⁸Bɛtani a tsí ɨ fátɨ́ a Yerosalɛm, mbe nɨyen tso bɨmarɨ bɨbá ghe.

¹⁹Bə Yuda bə ghaʼnɨ yén a mbó Marɨta bo Mɛrɨ a ndɛ́tɨ́ bo a nɨvwo mɨma ɨwa ghe.

²⁰Marɨta a ghɨnə ndzúʼ ngə́ Yeso a kə́ ngyiŋə, ɨ fu ngɛn a mbom zɨ, lá Mɛrɨ a baŋnɨ ntsi a mu ndá ə.

²¹Marɨta a sóŋ a mbó Yeso ngə́, “Maʼmbyí, o lo mba be tsi ɨghan muŋ ka mɨma ɨghan wu mbáŋnɨ́ a kfo ayi ɛ!

²²A baʼtɨnə nkfo ɨ kfonɨ lá, ma zhi ngə́ atsum atsum za o bitɨnɨ a mbó Ŋwi, Ŋwi a mɨ gha ɨwa.”

²³Yeso a sóŋ wəmbo ngə́, “Mɨma ɨgho wu mbáŋnɨ́ a mɨ zhwemnɨ a mbó nɨvwo ə.”

²⁴Marɨta a sóŋ wəmbo ngə́, “Ma zhi ngə́ a ghɨ zhwemnɨ a mbó nɨvwo a ntsɨrɨndzum njwi ɛ.”

²⁵Yeso a sóŋ wəmbo ngə́, “A zhwémnə́ me nzhwemnɨ ɨbɛn a mbó nɨvwo nkə́ ngǎ ntsi ntɨŋ ə. Ba bɨ nɨŋnɨ mɨntəm ɨma a nye me, bɨ baʼtɨ nkfo ɨ kfonɨ lá, bo ghɨ tsi ntən;

²⁶ŋwɔn tsum wa a tsinɨ ntən, nkɨ nɨŋ ntəm ɨyi a nye me, a láʼ keʼ kfoə. O nɨŋ ntəm ɨgho a nye məzen le?”

²⁷Marɨta a chwɨ́gɨ́ a mbó Yeso ngə́, “Eŋə, a Maʼmbyí; ma nɨŋ ntəm ɨghan ɨwu ngə́ o nɨ Wa bɨ Zɔ́ʼnɨ́, mbe Mɔn Ŋwi wu Mbáŋnɨ́, zɨ wa a tsínɨ́ nɨ ngyiŋə a mu mbyi ɛ.”

²⁸Marɨta a ghɨnə sóŋ a məzen, ntiʼ mbə mbən ngɛn ntɔŋ a mɨma ɨyi Mɛrɨ adiʼ wa bo zɨ tsínɨ́ ɨwu tsɛʼ bo bo, ntsumtɨ wəmbo ngə́, “Ndiʼ Aŋwaʼnɨ a tsi ɨghan ntɔŋə agho ə.”

²⁹Mbáʼ a zúʼnɨ́ a məzen lá, ndyiʼ ndo atɨ́ ɨ ghɛn bom ayi ɛ.

³⁰(Yeso a bvúrɨ́ tɨ yen nkon a mu atom za, wɛrə a bvúrɨ́ ntsí tsɛʼ adiʼ wa Marɨta a ghɛ́nɨ́ mbom ayi ɨwu lá.)

³¹Mbáʼ ɨbɛn ba bɨ tsínɨ́ a ndá wa ndɛ́tə́ a Mɛrɨ bɨ zɛ́nɨ́ ngə́ Mɛrɨ a lyíʼ ndo atɨ́ ntsa abyɛn lá, bo zɔ́ŋ ayi, ngwíʼtə́ ngə́ a kə́ ngěn atú a nɨshe ɨ ghɛn ɨ bugɨ ɨwu ə.

³²Mɛrɨ a yén nkuʼ adiʼ wa Yeso a tsínɨ́ ɨwu lá. Tsɛʼ mbáʼ a byínɨ́ ndzɛ́n ayi lá, ngvo wə mɨku ɨ soŋ ngə́, “Maʼmbyí, o lo be tsi ɨghan, muŋ ka mɨma ɨghan a kfo ayi ɛ!”

³³Yeso a zɛ́n a Mɛrɨ a bugɨnə, nkɨ ndzɛn adzaŋ za ɨbɛn ba bɨ tsínɨ́ bo bo kɨ́nə́ mbúgə́ wəbɔʼ; anu zə wu a tsɔ́ʼtɨ́ ayi a mu azhwi, ntəm ɨyi kɨ mbɨ́gɨ́;

³⁴a tiʼ mbitɨ ngə́, “Nɨ twəŋ ayi lá adiʼ ake?” Bo sóŋ wəmbo ngə́, “Maʼmbyí, yen ndzɛn azo ə.”

³⁵Yeso a zɛ́ʼə.

³⁶Ɨbɛn sóŋ ngə́, “Ze adzaŋ za a kɔ́ŋnɨ́ ayi ɛ!”

³⁷Lá bə mɔʼɔ bítɨ́ ngə́, “A ghɨ́ ɨmɨgɨ mɨ ɨfɨgɨ ŋaʼnə, kə ndé? A lo nchi keʼ chwa a Lǎtsorə á keʼ kfo le?”

³⁸Anu za a kwíʼ ntsɔ́ʼtɨ́ ntəm Yeso, wɛrə a ghɛn atú a nɨshe wa. A bé ɨfúʼ wa bɨ kə́nɨ́ ntsu ɨyi nɨ ngɔʼ ə.

³⁹Yeso a sóŋ ngə́, “Nɨ bɨŋsɨ ngɔʼ za ndotɨ nɨ zɛrə ghe.” Marɨta, mɨma ŋwɔn wa a kfónɨ́ lá, a chwɨ́gɨ́ ngə́, “Maʼmbyí, ɨfɔgɨ tɨbɔŋ mɨ fu ɨwu ə. A nɨ njwi tsi nɨkwa mbáʼ bɨ kɨ twəŋnɨ ayi ɛ!”

⁴⁰Yeso a bítɨ́ a Marɨta ngə́, “Tso ma lo mbá soŋ ngə́, be o nɨŋ ntəm ɨgho ɨwu, o mɨ ze nɨfáŋ nɨ Ŋwi le?”

⁴¹Bɨ bɨŋsɨ ngɔʼ za ndotɨ nɨ zɛrə ghe. Yeso a bíʼ ɨmɨgɨ ɨmyi atɨ́ ɨ soŋ ngə́, “Ta ɨghan, ma gha a mɨya a mbó gho mbɨ́ʼ ngə́ o zúʼə aghə.

⁴²Ma zhi ngə́ o zúʼə aghan nkfu tsum, lá ma soŋ a məzen lá mbɨ́ʼ atú a ɨbɛn ba bɨ tɛmnkɨnɨ ɨghan, taŋ á bo nɨŋ mɨntəm ɨma ɨwu ngə́ o tságɨ́ aghə.”

⁴³Mbáʼ a sóŋnɨ́ a məzen lá, ntɔnkɨ nɨ nji zɨ ntən ngə́, “Lǎtsorə, fu ngyiŋə!”

⁴⁴Akfú a ŋwɔn za a fú a ntáʼ, bɨ korɨ mbó ɨmyi bo bɨ mɨku ɨmyi nɨ ɨsagɨ ɨtsɛʼ nɨshe, bɨ kɨ ndyim ɨshi ɨyi nɨ atsɛʼ ə. Yeso a sóŋ a mbó ɨbɛn ba ngə́, “Nɨ kyɛgɨ ayi, ɨ nyɛʼtɨ á ghɛn ayi ɛ.”

⁴⁵Ɨbɛn bə ghaʼnɨ ba bɨ yénɨ́ a mbyɛn Mɛrɨ zɛ́n anu za Yeso a ghɨ́nɨ́, ntiʼ nɨŋ mɨntəm ɨma a nye zɨə.

⁴⁶Lá bə tse a tɨtərɨ bo ló mbən a mbó bə Farisao nkərɨ anu za Yeso a ghɨ́nə́.

⁴⁷Bɨntumshe bə wi abɔʼnɨ bə Farisao tíʼ mbomnkɨ bo bɨ Ngaŋ Sáʼ Abyɛn, ntiʼ soŋ ngə́, “Bɨgɨnə mɨ ghɨ lá ɨ nə́ le? Ze ɨnu tsɨ yerɨnɨ-yerɨnɨ tsa ŋwɔn wen a ghɨnə ghe!

⁴⁸Be bɨgɨnə nyɛʼtɨ ayi a kə́ ngěn nɨ mbyi tsɛʼ adzaŋ məwen, muŋ ɨbɛn bɨtsum mɨ nɨŋ mɨntəm ɨma wə ɨnye, á bɨsáʼ bɨ ɨlaʼ bɨ bə Roma yen saʼ Ndáŋwi zɨ Ngwi ɨzɨgɨnə abɔʼnɨ alaʼ azɨgɨnə ghe!”

⁴⁹Táʼ ŋwɔn nɨbo wa ɨkum ɨyi bénɨ́ Kayafasɨ wa a bénɨ́ Ntumshe wu Ngwi alom məwa, a sóŋ a mbó bo ngə́, “Ka nɨ zhi awən kə́ tsɛʼ a mɨnya mɨ anu ə!

⁵⁰Nɨ se zɛn ngə́ a bɔŋtɨ ngə́ á nɨ nyɛʼtɨ á táʼ ŋwɔn a kfo atú ɨbɛn ntsa adzaŋ za be alaʼ atsum a ghɔʼnɨ le?”

⁵¹Tsɛʼ a nkənu, a sé a məzen soŋ lá nɨ atú azhi, lá mbɨ́ʼ ngə́ a bé Ntumshe wu Ngwi alom məwa, a kə́ sóŋə́ lá a za a ghɨnɨ fú ngə́ Yeso a ghɨ kfó mbɨ́ʼ atú a bə Yuda,

⁵²ɨ keʼ tsɛʼ mbɨ́ʼ atú aza be, lá ɨ kɨ ghotɨ ɨbɛn bɨ Ŋwi adiʼ a mɔ́ʼɔ́ ba bɨ dzagɨnɨnɨ nɨ ɨdiʼ nɨ ɨdiʼ ə.

⁵³Ndɔgɨnɨ njwi məwa, bɨsáʼ bɨ ɨlaʼ bɨ bə Yuda kə́mnɨ́ nkorɨ a mɨnaŋ a njwítɨ́ a Yeso ghe.

⁵⁴Ma lan, Yeso a sé mbɨ́ŋə́ nkárə́ asaŋəsaŋ a mu Yudiya, lá ndo ɨwu ngɛn ayi adiʼ zə tse za a fátɨ́nɨ́ mɨkɨghonɨ, a nye ntáʼmbagə wu tse wa bɨ kɨ́nə́ ntɔ́ŋə́ ngə́ Efrem, ntsi ayi ɨwu bo bɨ bɨyɛʼ ɨbyi ɛ.

⁵⁵Nkfu Nɨdorɨ nɨ Tsa-yɛʼnɨ tíʼ tsɛʼ abó, ɨbɛn bə ghaʼnɨ fú a mu alaʼ nkɔ́ʼ ngɛn a Yerosalɛm bɔŋ njwi nɨdorɨ za ɨ kuʼ, taŋ ɨ sugɨ awa ɨ fɛm a mu mbɔm ndzɔŋə a nyɔngɔŋ Mǒse ghe.

⁵⁶Bo kə́ shwébtə́ a Yeso ghe. Mbáʼ bo ghótɨ́nɨ́ a mu Ndáŋwi zɨ Ngwi lá, bo kə́ mbítə́ a ŋwɔn nɨ ŋwɔn ngə́, “Nɨ wiʼtɨ ngə́ ke? Tsɛʼ a nkənu, a mɨ keʼ a nɨdorɨ wen yiŋə, kə ndé?”

⁵⁷Bɨntumshe bə wi bo bɨ bə Farisao kwɛ́nə nga ntɨgə ngə́ be ŋwɔn tse a zhi adiʼ za Yeso a tsínɨ́ ɨwu, a zagɨ fɨʼtɨ, taŋ á bɨ ko ayi ɛ.