Read Ngemba Yoane 12 Bible Online

Yoane 12 - Ngemba bible

Yoane 12

¹A bé njwi tsi ntugə bɔŋ á njwi Nɨdorɨ nɨ Tsa-yɛʼnɨ ɨ kuʼ, Yeso a ghɛ́n a Bɛtani, a ndá Lǎtsorə, zɨ wa Yeso a zhwémnɨ́nɨ́ a mbó nɨvwo lá.

²Ɨwu, bɨ ghɨ́ mɨdzɨ mɨ nkwɛfɔ wəmbo; Marɨta a tsagɨnɨ a mɛrə ghe. Lǎtsorə a bé táʼ ŋwɔn wa a tsínɨ́ atú atɛkɨ bo bɨ Yeso ghe.

³Mɛrɨ a lɔ́gɨ́ akum a lita a mɨvwurɨ mɨ atɨŋndvuŋ mɨ ɨfɔgɨ wu shiʼnɨ ma bɨ kámnɨ́ tsɛʼ mɛrə mɛrə a nye atɨ za bɨ kɨ́nə́ ntɔ́ŋə́ nɨ nadɨ, nchwirɨ a mɨku Yeso, ɨ mɛtɨ nchiʼ nɨ ɨnyɔŋ atú ɨchi ɛ. Ɨfɔgɨ mɨvwurɨ mɨ atɨŋndvuŋ mɨ ɨfɔgɨ wu shiʼnɨ wa tíʼ ndúŋ ndá tsum ə.

⁴Lá Yudasɨ Iskario, táʼ ŋwɔn abɔʼnɨ bɨyɛʼ ɨbyi ba (zɨ wa a tsínɨ́ ɨ ghɨ fen a Yeso), a bítɨ́ ngə́,

⁵“Bɨ ló nkeʼ fiŋ mɨvwurɨ mɨ atɨŋndvuŋ mɨ ɨfɔgɨ wu shiʼnɨ men nɨ nkáb za be bɨ tfu a ŋwɔn tɨ abó afaʼ ɨwu atú bɨsaŋ bi nɨfə̧ nga nkáb zɨ wu a mbó ɨfúm lá ngə́ ke le?”

⁶A sé sóŋ a məzen lá mbɨ́ʼ ngə́ wɛrə a kɔ́ŋ ndə̌tú nɨ ɨfúm ə. A nɨ mbɨ́ʼ ngə́ wɛrə a bé ndzɛrə ghe. Wɛrə a kə́ ndě aban za bɨ kɨ́nə́ nɨ̌ŋ nkáb wə mu, nkə́ ngaʼə fɨ́gɨ́ nkáb məza ngɨ̌ mɨnu ɨmyi ɨwu ə.

⁷Lá Yeso a sóŋ ngə́, “Nyɛʼtɨ ayi ɛ! Bɨ kwɛ́nə nkyaŋtɨ ngə́ á lɛn mɨvwurɨ mɨ atɨŋndvuŋ məmen a njwi za bɨ ghɨnɨ twə́ŋ aghə.

⁸Ɨfúm tsi bɨŋ bo tsɛʼ nkfu tsum, lá ma ghɨ kaʼ nkfu tsum bɨgɨnə chyɛ.”

⁹Ɨnɔ ɨbɛn wu wi zúʼ ngə́ Yeso a tsí a Bɛtani ə. Ma lan, bo ghɛ́n ɨwu, lá nkeʼ tsɛʼ mbɨ́ʼ atú a Yeso be, lá bo kə́ ndǒ ɨ kɨ zɛ́n a Lǎtsorə, zɨ wa Yeso a zhwémnɨ́nɨ́ a mbó nɨvwo lá.

¹⁰Ma lan, Bɨntumshe bə wi ghɨ́ akyaŋtɨ ɨ kɨ zhwitɨ a Lǎtsorə,

¹¹mbɨ́ʼ ngə́ bə Yuda a ɨnɔ kə́ ntíʼə nyɛ́ʼnə awa, ɨ nɨ̌ŋ mɨntəm ɨma a nye Yeso mbɨ́ʼ anu za a fúnɨ́ a nye Lǎtsorə lá.

¹²Njwi zɨ mɔʼɔ bənə ndan, ɨnɔ ɨbɛn wa ɨ yénɨ́ adiʼ a Nɨdorɨ nɨ Tsa-yɛʼnɨ na zúʼ ngə́ Yeso a kə́ ngyiŋə a Yerosalɛm ə.

¹³Ma lan, bo tíʼ nchwán ɨdzáŋ mbaŋ ɨ fu ngɛn a mbom zɨ, ntɔ́nkə́ ngə́, “A bɨgɨnə bontɨ a Ŋwi ə! A Ŋwi a fɔgɨ a zɨ wa a yenə nɨ ɨkum Maʼmbyí ɛ! A Ŋwi a fɔgɨ a Ɨfɔ bə Izrai ghe!”

¹⁴Yeso a tíʼ ndɔgɨ a mɨmu jakashi nkɔʼ wu atú, tsɛʼ tso mbáʼ aŋwaʼnɨ a Ŋwi a soŋnɨ ngə́,

¹⁵“Ntáʼmbagə wu wi wu Zayɔn, koʼ bɔgə! Ɨfɔ ɨwən a wen mbáʼ a yenə lan, nkɔʼ atú mɨmu jakashi ɛ.”

¹⁶A nyom məwa, bɨyɛʼ ɨbyi sé zúʼ nkɨ njí anu za ɨnu mətsiŋ díʼnə́; lá a nkfu za bɨ kɔ́ʼsɨ́nɨ́ a Yeso a mu nɨfáŋ ɨni lá, bo wáʼtɨ́ ngə́ aŋwaʼnɨ a Ŋwi a sóŋ ɨnu mətsen mbɨ́ʼ ayi ɛ. Bo kɨ́ ngwáʼtɨ́ ngə́ bo kɨ́nə ngɨ ɨnu mətsen wəmbo ə.

¹⁷Ɨbɛn ba bɨ tsínɨ́ bo bɨ Yeso a nkfu za a tɔ́ŋnɨ́ a Lǎtsorə a mu nɨshe wa, nzhwemnɨ ayi lá, ghɛ́n nɨ mbyi nkə́rɨ́ anu za a fúnə́.

¹⁸Lá nɨ anu za a ghɨ́nɨ́ ɨnɔ wa fu ngɛn mbom ayi ɛ — mbɨ́ʼ ngə́ bo zúʼ ngə́ a ghɨ́ anu zə yerɨnɨ-yerɨnɨ məziŋ ə.

¹⁹Bə Farisao tíʼ ngamnɨ bo nɨbo ngə́, “Zɛnə azɨŋ ə, anu zə ghɨnɨ zə daŋ a se be; mbyi tsum tiʼə nkumə ndzɔ́ŋə́ tsɛʼ wə ndzum ə!”

²⁰Bə Grikɨ bə tsɛrə tsí a tɨtərɨ ɨbɛn ba bɨ ghɛ́nɨ́ a Yerosalɛm a ngúʼsɨ́ Ŋwi a nkfu Nɨdorɨ nɨ Tsa-yɛʼnɨ wa.

²¹Bo ghɛ́n a mbó Firɨbɔ (ŋwɔn Bɛtɨsaida a mu Galili) ɨ soŋ wəmbo ngə́, “Tə̧, bɨgɨ lǒ ndze Yeso ghe.”

²²Firɨbɔ a ghɛ́n sóŋ a mbó Andɨrɨya, bo bɨbá tiʼ ngɛn soŋ a mbó Yeso ghe.

²³Yeso a chwɨ́gɨ́ a mbó bo ngə́, “Nyom a kuʼnə á Mɔn Ŋwɔn a kwarɨ nɨfáŋ nə wi ə.

²⁴Ma sǒŋ nkənu a mbó bɨŋ ə: mbum nchwi ɨ ghɔ́ŋə́ tsɛʼ zɛrə zɛrə mbáʼ be bɨ tú bi a zɛrə a ɨshe, á ɨ kfoə, be ɨ kfo, ɨ tiʼ ntom ngɨ mbum tsə ghaʼnə.

²⁵Ŋwɔn tsum wa a kɔŋnɨ ntsi ntən ɨzhi, a mɨ sam a zɛrə; ŋwɔn wa a banɨ ntsi ntən ɨzhi atuəshe wen, a mɨ lɛn a zɛrə taŋ ɨ ghɨ tiʼ tsi ntən nɨnkoŋ ə.

²⁶Ŋwɔn tsum wa a faʼnə a mbó me a tsi nɨ ɨ zagɨ zɔŋ aghan, taŋ á ŋwɔn afaʼ ɨghan a tsi bɨgɨ zɨ adiʼ wa ma tsinɨ ɨwu ə. Ta ɨghan a mɨ kɔʼsɨ a ŋwɔn tsum wa a faʼnə a mbó me atɨ́ ə.”

²⁷“Tɨtsɔŋnɨ, ma mɨ soŋ lá ngə́ ke le? Zə tse a zen ngágə aghan a mu ntəm me — a nə́ ma mɨ soŋ be ngə́, ‹Ta ɨghan, njimbɨʼ o nyɛʼtɨ ma ze ndvuŋ ngɨ́ʼ wen wa ma zhinɨ ngə́ ma mɨ zɛn lá le›? Lá, be lá anu za ma yénɨ́ mbɨ́ a zɛrə — taŋ á ma chi ze ngɨ́ʼ məzen za ma mɨ tsa wə mu a nye nkfu zen lá.

²⁸Tarɨ, ghɨ á ɨkum ɨgho tsi nɨ nɨfáŋ ə!” Nji zɨ tse tíʼ ndo a fɔməbvurə ɨ soŋ ngə́, “Ma ghanə nɨfáŋ ɨwu ə, ma mɨ bə kwiʼ kwátɨ́ ɨ gha.”

²⁹Ɨnɔ ɨbɛn wa ɨ tɛ́mnɨ́ ɨwu zúʼ nji za, bə tse sóŋ ngə́ a kǔm mbəŋ, lá bə mɔʼɔ sóŋ ngə́, “Ntsendá Ŋwi ɨ gham wəmbo ə!”

³⁰Lá Yeso a sóŋ a mbó bo ngə́, “Ka nji za gham ayi lá mbɨ́ʼ atú azə, ɨ gham lá mbɨ́ʼ atú azɨŋ ə.

³¹Tɨtsɔŋnɨ a nɨ nyom á bɨ sáʼ ɨbɛn bɨ mbyi ziŋ ə; nkfu ɨ kuʼ za bɨ mɨ gháʼ a zɨ wa a sáʼnɨ́ mbyi ziŋ ə.

³²Bɨ ghɨ ntsɔʼ aghan atuəshe ntsagɨ atɨ́, ma mɨ ghɨ á ŋwɔn tsum a tiʼ ngyen a mbó me ghe.”

³³(A sóŋ a məzen lá a ndiʼ abə́ŋ a nɨvwo za zɨə ghɨnɨ kfóə.)

³⁴Ɨnɔ ɨbɛn wa ɨ chwɨ́gɨ́ wəmbo ngə́, “Nyɔngɔŋ ɨwɨgɨ a soŋ a mbó bɨgɨ ngə́ Wa bɨ Zɔ́ʼnɨ́ wa a ghɨ tsí atuəshe nɨnkoŋ ə. O tiʼ ntsa lá ɨ nə́, ɨ soŋ ngə́ bɨ ghɨ zagɨ tsɔʼ a Mɔn Ŋwɔn ɨ kɔʼsɨ atɨ́ le? Mɔn Ŋwɔn wen a lanɨ mbe lá ɨwa le?”

³⁵Yeso a chwɨ́gɨ́ a mbó bo ngə́, “Nkaʼ mɨ bə bvurɨ tsi a tɨtərɨ bən a nye məbaŋtɨ wu sa ghe. A nɨ ndzɔ̌ŋ ndómnji ɨwən mbáʼ nkaʼ ɨ bvurɨnɨ ntsi, taŋ á ndzumnɨ keʼ yen nkubɨnɨ awən; mbɨ́ʼ ngə́ ŋwɔn wa a yenə a mu ndzumnɨ ka a zhi ayi ndóm wa a ghɛnə ɨwu ə.

³⁶A nɨ tíʼ lá nɨŋ mɨntəm ɨmən a nye ŋwɔn wa a ghánɨ́ nkaʼ, mbáʼ a bvurɨnɨ ntsi bɨŋ bo, taŋ ɨ be ɨbɛn ba bɨ tsinɨ a mu nkaʼ ə.” Yeso a ghɨnə mɛ́tɨ́ a sóŋ məzen lá, ndo ɨ fu ayi ngɛn ndyɛmtɨ taŋ á bo keʼ ayi ze.

³⁷A báʼtɨ́ ngɨ ɨnu tsɨ yerɨnɨ-yerɨnɨ tsen a ɨnɔ ɨnɔ a ɨshi ɨmɨgɨ bo ɨ ghɨnɨ lá, bo bvúrɨ́ nkeʼ mɨntəm ɨma wə ɨnye nɨŋ,

³⁸taŋ á kɔʼ mbomnkɨ bo anu za ntom Ŋwi za bɨ kɨ́nə́ ntɔ́ŋə́ ngə́ Asaya a ŋwáʼnɨ́nɨ́ ngə́: “Maʼmbyí, a nɨ́ŋ ɨwa ɨ nɨŋ ntəm ɨyi a nye nkən wa bɨgɨ sóŋnɨ́ le? Maʼmbyí a kyɛ́ʼ mɨtən ɨmyi lá a mbó ɨwa le?”

³⁹Ma lan, bo ghúʼ ɨ nɨŋ mɨntəm ɨma a nye Ŋwi kɨ́káŋ, mbɨ́ʼ ngə́ Asaya a kwɛ́nə nkɨ sóŋ ngə́:

⁴⁰[11] “Wɛrə a nɨŋnə ɨfɨgɨ a nye ɨmɨgɨ ɨma nkɨ fɨŋ ɨtú ɨtsa, taŋ á ɨmɨgɨ ɨma chi keʼ ɨdiʼ zɛn, á ɨtú ɨtsa keʼ zuʼ nkɨ nji, á bo keʼ bəŋ mɨntəm ntsi a bagɨ me, taŋ á ma tsuʼ awa ghe.”

⁴¹Asaya a sóŋ a məzen mbɨ́ʼ ngə́ wɛrə a zɛ́n nɨfáŋ ɨni nkɨ ngam mbɨ́ʼ ayi ɛ.

⁴²A báʼtɨ́ mbé be mə lan lá, bɨsáʼ bɨ ɨlaʼ bɨ bə Yuda bə ghaʼnɨ nɨ́ŋ mɨntəm ɨma a nye Yeso; lá mbɨ́ʼ bə Farisao bo sě fɨ́gə́ anu məzen ɨ sóŋə́ asaŋəsaŋ, mbɨ́ʼ bɨ fɨgɨ awa ɨ kwiʼ bə kon a mu ndáŋwi bə Yuda ghe.

⁴³Bo kɔ́ŋ abemtɨ a ŋwɔn mɨsɔŋ ntsa abemtɨ a Ŋwi ə.

⁴⁴Yeso a ghám nji ɨzhi kɔʼ atɨ́ ɨ soŋ ngə́, “Ŋwɔn tsum wa a nɨŋnɨ ntəm ɨyi a nye me, ka a nɨŋ ayi ntəm ɨyi lá tsɛʼ a nye me ghe, a kɨ nɨŋ ntəm ɨyi lá a nye zɨ wa a tságɨ́nɨ́ aghə.

⁴⁵Ŋwɔn tsum wa a zɛ́nə́ aghan, a kə́ ndzě a wɛrə wa a tságɨ́nɨ́ aghə.

⁴⁶Ma yen atuəshe tso nkaʼ, taŋ ŋwɔn tsum wa a nɨŋnɨ ntəm ɨyi a nye me a mɨ keʼ ghɔŋ a mu ndzumnɨ ə.

⁴⁷Be ŋwɔn tse a zuʼ nkən ɨghan nkeʼ a wɛrə zuʼnɨ, ma mɨ kaʼ ayi sáʼə. Ma sá yen lá a sáʼ atuəshe, ma yén be a ndoŋ zɛrə ghe.

⁴⁸Ŋwɔn tsum wa a tonɨ ayi aghan, nkeʼ nkən ɨghan kwarɨ, a tsi nɨ ŋwɔn wa mbáʼ a ghɨnɨ sáʼ ayi ɛ. Mɨgham ma ma ghamnə ghɨ sáʼ ayi a ntsɨrɨndzum njwi ɛ!

⁴⁹Məzen a nɨ nkənu, mbɨ́ʼ ngə́ ka ma gham aghan lá nɨ ɨmə mɨtən, lá Tarɨ wa a tságɨ́nɨ́ aghan, a fɨ́ʼtɨ́ anu za ma mɨ zagɨ ghamə.

⁵⁰Ma zhi ngə́ ntɨgə ɨzhi ɨ yiŋə nɨ ntsi ntən nɨnkoŋ ə. Anu za ma sóŋnə́ lá, a nɨ za Tarɨ a soŋnɨ a mbó me ngə́ á ma soŋə.”