Read Ngemba Yoane 14 Bible Online

Yoane 14 - Ngemba bible

Yoane 14

¹Yeso a sóŋ a mbó bo ngə́, “A nɨ keʼ ɨnye ɨtsən a mbúʼə, á ɨtú ɨtsɨŋ keʼ kɨ mbvurə. A nɨ nɨŋ mɨntəm ɨmən a nye Ŋwi nkɨ nɨŋ a nye me ghe.

²Bɨkwasɨ bɨ ndá bə ghaʼnɨ tsi a mu ndá Ta ɨghə. Ma ghěn a mbyi bən a nkyáŋtɨ́ adiʼ a mbó bɨŋ ə. A tú lá be muŋ ka ma soŋ aghan a mbó bɨŋ ə.

³A be ngə́ ma ghɛnə nkyaŋtɨ adiʼ a mbó bən, ma mɨ bə yen ɨ lɔgɨ awən á nɨ yen a mbó atuəmbəm azan, taŋ á nɨ tsi adiʼ za ma tsinə.

⁴Nɨ zhi ndómnji wa ɨ ghɛnə adiʼ za ma ghɛnə ɨwu ə.”

⁵Tɔməshi a sóŋ wəmbo ngə́, “Maʼmbyí, ka bɨgɨ zhi awɨgɨ adiʼ za o ghɛnə ɨwu ə; ma lan, bɨgɨ mɨ tiʼ zhi ndómnji wa ɨ ghɛnə ɨwu lá ɨ nə́ le?”

⁶Yeso a chwɨ́gɨ́ ayi ngə́, “Ma nɨ ndómnji wa, nkənu za, nkɨ mbe ntsi ntən za; ŋwɔn tse a chi keʼ ghɛn nkuʼ a mbó Tarɨ tɨ tsa a ndzum me ghe.

⁷Tɨtsɔŋnɨ mbáʼ nɨ zhinə aghan lá, nɨ ghɨ zhi a Ta ɨghə.[13] Ɨ lɔgɨnɨ tɨtsɔŋnɨ ɨ ghěn nɨ mbyi nɨ zhinə ayi, nɨ kɨnə nkɨ ndzɛn ayi ɛ.”

⁸Firɨbɔ a sóŋ a mbó wɛrə ngə́, “Maʼmbyí, atsum za bɨgɨ lɔnə a nɨ ngə́ o diʼ a Ta ɨgho wen a mbó bɨgɨ ə.”

⁹Yeso a chwɨ́gɨ́ ngə́, “Bɨgɨnə tsinə a nye abaŋ zə sa; lá o koʼ aghan zhi, nə Firɨbɔ? Ŋwɔn tsum wa a zɛnə aghan, a zɛnə a Tarɨ məwa. O tiʼə mbítə́ ngə́, ‹Diʼ a Tarɨ a mbó bɨgɨ lá ngə́ ke le›?

¹⁰Firɨbɔ, o so ntəm ɨgho ɨwu nɨŋ, ngə́ ma tsi a mu ɨnye Tarɨ, Tarɨ a kɨ ntsi a mu ɨnye me le?” Yeso a sóŋ a mbó bɨyɛʼ ɨbyi ngə́, “Mɨgham ma ma ghamnə a mbó bən lá, ka mɨ lo awa lá a mbó me ghe. Tarɨ, zɨ wa a tsínə́ a mu ɨnye me, a fǎʼ ɨfaʼ ɨyi ɛ.

¹¹Nɨ nɨŋ mɨntəm ɨmən a nye me mbáʼ be ma soŋ ngə́ ma tsi a mu ɨnye Tarɨ, Tarɨ a kɨ ntsi a mu ɨnye me ghe. A tú lá be, nɨ nɨŋ mɨntəm ɨmən a nye me mbɨ́ʼ ɨnu tsɨ yerɨnɨ-yerɨnɨ tsa ma ghɨnə ghe.

¹²Ma soŋ nkənu a mbó bɨŋ ə: ŋwɔn tsum wa a nɨŋnɨ ntəm ɨyi a nye me, a mɨ ghɨ ɨnu tsa ma ghɨnə ghe — tsɛʼ a nkənu, a mɨ ghɨ ɨnu tsɨ wi á tsɨ gháʼ ngɛn nɨ mbyi, mbɨ́ʼ ngə́ ma ghěn a mbó Tarɨ ə.

¹³Ma ghɨ tíʼ ghɨ anu atsum za nɨ bitɨnɨ nɨ ɨkum ɨghan, taŋ á bɨ tsa a ndzum Mɔn ndiʼ nɨfáŋ nɨ Tarɨ ə.

¹⁴Be nɨ bitɨ anu atsum a ɨkum me, ma mɨ ghɨ a zɛrə ghe.”

¹⁵Yeso a kwíʼtɨ́ ngə́, “Be nɨ kɔŋ aghan, muŋ nɨ mɨ len ntɨgə ɨtsə.

¹⁶Ma mɨ soŋ a mbó Tarɨ, á tiʼ nga a Nkwatɨ wu mɔʼɔ, mbáʼ a mɨ ghɔŋ bɨŋ bo nɨnkoŋ ə.

¹⁷Nkwatɨ wa nɨ Azhwi, zɨ wa a kyɛʼnɨ nkənu mbɨ́ʼ a Ŋwi ə. Ɨbɛn bɨ atuəshe wiŋ chi keʼ ayi kwarɨ, mbɨ́ʼ ngə́ bo chi keʼ ayi zɛn kə nkɨ nji ayi ɛ. Lá nɨ zhi ayi, mbɨ́ʼ ngə́ a chyɛ̌ bɨŋ bo, nkɨ ntsi a mu ɨnye bɨŋ ə.[14]

¹⁸Be ma ghɛn, muŋ nɨ mɨ keʼ bən bən chyɛ; ma mɨ bə yen a mbó bɨŋ ə.

¹⁹A nye məkum a nkfu ɨbɛn bɨ atuəshe mɨ keʼ aghan bə ndzɛn, lá nɨ mɨ zɛn aghan; mbɨ́ʼ ngə́ ma tsi ntən nɨ ghɨ kɨ tsi ntɨŋ ə.

²⁰Njwi za ghɨ nkúʼ, nɨ mɨ zhi ngə́ ma tsi a mu ɨnye Ta ɨghan, ɨ kɨ zhi ngə́ nɨ tsi a mu ɨnye me, tsɛʼ tso mbáʼ ma tsinɨ a mu ɨnye bən lá.

²¹Ŋwɔn tsum wa a kwarɨnɨ ntɨgə ɨtsan, nkə́ ndzúʼnə́ a tsɛrə, a nɨ ŋwɔn wa a kɔŋnɨ aghə. Ta ɨghan a mɨ kɔŋ a ŋwɔn tsum wa a kɔŋnɨ aghə; ma mɨ kɨ tiʼ kɔŋ ayi, ɨ kyɛʼ atuəmbəm azan wəmbo ə.”

²²Yudasɨ (nkeʼ Yudasɨ Iskario be) a bítɨ́ ngə́, “Maʼmbyí a diʼ lá ngə́ ke mbáʼ o soŋnɨ ngə́ o ghɨ kyɛʼ atuəmbəm azo a mbó bɨgɨ, nkoʼ a mbó atuəshe kyɛʼ le?”

²³Yeso a chwɨ́gɨ́ wəmbo ngə́, “Ŋwɔn tsum wa a kɔŋnɨ aghan, a mɨ zuʼnɨnə ɨnu tsa ma diʼnə ghe. Ta ɨghan a mɨ kɔŋ ayi, á bɨgɨ Ta ɨghə ghɨ ngyen wəmbo, ntsi bɨgɨ bo ghe.

²⁴Ŋwɔn tsum wa ka a kɔŋ ayi aghan, ka a ndzúʼnə́ ayi ɨnu tsa ma diʼnə ghe. Ɨnu tsa nɨ zuʼnɨ ma diʼ ka ɨ be ayi ɨtsə, tsɨ lo lá a mbó Tarɨ, zɨ wa a tságɨ́nɨ́ aghə.

²⁵Ma soŋ a məzen mbáʼ ma bvurɨnɨ ntsi bɨgɨnə ghe.

²⁶Nkwatɨ, Azhwi zə Fɛmnɨ wa Tarɨ a ghɨ tsagɨ nɨ ɨkum ɨghan lá, a ghɨ diʼ awən nɨ anu atsum, ɨ kɨ ghɨ á nɨ waʼtɨ ɨnu ɨtsum tsa ma kwɛnə soŋ a mbó bɨŋ ə.

²⁷Mbɔnɨ a nɨ azúm za ma nyɛʼtɨnɨ a mbó bɨŋ ə; a nɨ mbɔnɨ ɨzan za ma ghanɨ a mbó bɨŋ ə. Ma sa a zɛrə gha lá adzaŋ za ɨbɛn bɨ atuəshe ghánə́ ghe. A nɨ keʼ ɨnye ɨtsən a mbúʼə, á ɨtú ɨtsɨŋ keʼ kɨ mbvurɨ; nɨ keʼ anu zə tse bɔgə.

²⁸Nɨ zúʼ ma soŋ a mbó bən ngə́, ‹Ma mɨ nyɛʼtɨ awən lá ɨ ghɨ bə yen a mbó bɨŋ ə.› Nɨ be kɔŋ aghan tsɛʼ a nkənu, muŋ nɨ tsi nɨ nɨdorɨ ngə́ ma ghěn a mbó Tarɨ ə; mbɨ́ʼ ngə́ wɛrə nɨ ŋwɔn wu ngwi ntsa aghə.

²⁹A ma soŋ a məzen a mbó bən bɔŋ atsum a ghɨ fú, taŋ a ghɨ́ fú, nɨ tiʼ nɨŋ mɨntəm ɨmən ɨwu ə.

³⁰Ma chi kaʼ bə ntsi ngámnə́ bɨgɨnə a nye abaŋ zə sa, mbɨ́ʼ ngə́ nsalaʼ atuəshe a yiŋə ghe. Ka a tsi ayi nɨ mɨtən mə tsɛrə atú me,

³¹lá ɨbɛn bɨ atuəshe wiŋ tsi nɨ ɨ zagɨ zhi ngə́ ma kɔŋ a Tarɨ ə; nə nɨ anu za a ghɨnɨ ma ghɨnɨ ɨnu ɨtsum ndzɔŋə tsɛʼ ntɨgə tsa wɛrə a ghánə́ a mbó me lá. Nɨ yen á bɨgɨnə lo adiʼ wen nkwebtɨ adiʼ ə.”