Read Ngemba Yoane 15 Bible Online

Yoane 15 - Ngemba bible

Yoane 15

¹Ma nɨ ngótɨ́ atɨ a mɨntam ma bɨ nyɛtɨnɨ mɨluʼ ɨwu, Ta ɨghan a be ŋwɔn wa a lánɨ́ atú nɨ ɨtɨ mɨntam mɨ mɨluʼ ə.

²Wɛrə a bɛ́ʼtɨ́ abó atɨ atsum za ka a nkónə́ ayi mɨntam nkə́ nyɛ́tɨ́ abó atsum za a kónɨ́nɨ́ mɨntam, taŋ á atɨ za a fɛm nkɨ nkonɨ mɨntam mə ghaʼnə.

³Ɨnu tsa ma diʼnə awən nɨ tsɛrə lá, tsɨ byinə sugɨ awən, nɨ fɛmə.

⁴Nɨ ghɔŋ a mbúm bɨgɨnə a ɨnye me, á ma kɨ ntsi a mbúm a ɨnye bɨŋ ə. Abó atɨ a chi keʼ konɨ mɨntam zɨzɨ; a chi konɨ tsɛʼ mbáʼ be a bvurɨ nchwuʼnɨ a nye atɨ ə. Ndəŋndəŋ, nɨ chi keʼ mɨntam konɨ tɨgha nɨ chwuʼnɨ ɨtumbəm ɨtsən a nye me ghe.

⁵“Ma nɨ atɨ a mɨntam ma bɨ nyɛtɨnɨ mɨluʼ ɨwu, nɨ be mbó ɨmyi ɛ. Ɨbɛn ba bɨ ghɔŋnɨ a mu ɨnye me, ma kɨ nghɔŋ a mu ɨnye bo, ghɨ kónɨ́ mɨntam á mɨ gháʼ ngɛn nɨ mbyi; mbɨ́ʼ ngə́ o chi koʼ anu zə tsɛrə ghɨ tɨ me ghe.

⁶Ŋwɔn tsum wa a se ghɔŋ a mu ɨnye me, bɨ mɨ nyɛʼ ayi tso abó atɨ á zomnkə; bɨ ghótɨ́ mbó mɨ atɨ məma ngěn nkúmə́ a ɨmugɨ, mɨ kɨənə ghe.

⁷Be nɨ ghɔŋ a mu ɨnye me, mɨgham ɨmə kɨ nghɔŋ a mu ɨnye bən, muŋ nɨ mɨ bitɨ azúm atsum za nɨ kɔŋnɨ ɨ kɨ tsi nɨ zɛrə ghe.

⁸A nɨ a ntsǎ a ndzum mɨntam mə ghaʼnɨ ma nɨ kónɨ́nə́ mbáʼ mɨ diʼnɨ nɨfáŋ nɨ Ta ɨghan; a nye ndóm məwen nɨ tiʼ mbe bɨyɛʼ ɨbə.

⁹Ma kɔŋ awən tsɛʼ adzaŋ za Tarɨ a kɔŋnɨ aghə; á nɨ ghɔŋ a mu akɔŋnɨ azan a nye bɨŋ ə.

¹⁰Be nɨ ndzúʼnɨ́ ntɨgə ɨtsan muŋ nɨ mɨ ghɔŋ a mu akɔŋnɨ azan, tsɛʼ tso mbáʼ ma zúʼnɨ́nɨ́ ntɨgə Ta ɨghan nkɨ nghɔŋ a mu akɔŋnɨ azhi lá.

¹¹Ma soŋ ɨnu tsen lá taŋ á nɨdorɨ ɨnə tsi a mu ɨnye ɨtsən, á nɨ kɨ ntsi nɨ nɛrə a nɨ́lónɨ́ ə.

¹²Ntɨgə ɨzan ɨ be ngə́: kɔŋnɨnə awən bən nɨ bɨŋ ə, tsɛʼ adzaŋ za ma kɔŋnɨ awən lá.

¹³Akɔŋnɨ za a tsanɨ mbó mbáʼ be ŋwɔn a tsi nɨ zɛrə a nye bɨson ɨbyi a nɨ ngə́ á kfo mbɨ́ʼ atú aza ghe.

¹⁴Nɨ nɨ bɨson ɨban mbáʼ be nɨ len ntɨgə ɨtsə.

¹⁵Ka ma mbvúrə́ ntɔ́ŋə aghə awən lá nɨ ɨbɔ bɨ afaʼ ɨbə, mbɨ́ʼ ngə́ ka mɔn afaʼ a zhi ayi akyaŋtɨ a tafaʼ ɨyi ɛ. Ma baŋnə ntɔŋə awən nɨ bɨson ɨban, mbɨ́ʼ ngə́ ma soŋnə anu atsum za ma zuʼnɨ a mbó Ta ɨghan a mbó bɨŋ ə.

¹⁶Nɨ sé aghan zarɨ; ma zárɨ́ awən nkɨ ntsɔ́ʼ awən ngə́ á nɨ ghɛn nkónɨ́ mɨntam mə ghaʼnɨ, ɨbə́ŋ mɨntam ma mɨ ghɔ́ŋnə́ nɨnkoŋ ə. Ma lan, Tarɨ a mɨ gha azúm atsum za nɨ bitɨnɨ wəmbo nɨ ɨkum ɨghə.

¹⁷Ntɨgə za ma ghanɨ a mbó bən ɨ nɨ ngə́: kɔŋnɨnə awən bən nɨ bɨŋ ə.”

¹⁸“Be ɨbɛn bɨ atuəshe ban awən, á nɨ zhi ngə́ bo fom ban lá aghə.

¹⁹Be nɨ tsi a mbó ɨbɛn bɨ atuəshe, muŋ ɨbɛn bɨ atuəshe mɨ kɔŋ awən tso ɨba ɨbɛn ə. Lá ma zárɨ́ awən a tɨtərɨ ɨbɛn bɨ atuəshe, nɨ keʼ a mbó ɨbɛn bɨ atuəshe tsi; nə nɨ anu za a ghɨnɨ ɨbɛn bɨ atuəshe ban awən lá.

²⁰Waʼtɨnə anu za ma sóŋnɨ́ a mbó bɨŋ ə: ‹Ka ɨbuʼ be awa ɨbɛn bə wi ntsatɨ a tabuʼ ɨwa ghe.› Be a be ngə́ ɨbɛn dɨ́gɨ́ aghan, bɨ ghɨ kɨ dɨgɨ awɨŋ ə; be a be ngə́ bo zúʼnɨ́ ɨnu tsa ma díʼnɨ́, bo ghɨ kɨ zuʼnɨ ɨtsɨŋ ə.

²¹Bo mɨ dɨgɨ awən lá mbɨ́ʼ ngə́ nɨ zɔŋə aghə; mbɨ́ʼ ngə́ bo se zhi a ŋwɔn wa a tságɨ́nɨ́ aghə.

²²Ma bá bé tú yen gham a mbó bo muŋ ka bo vwo awa ɨsáʼ ngə́ bo ghɨ ɨbvu ə; adzaŋ za a tsinɨ, tɨtsɔŋnɨ bo chi keʼ soŋ ngə́, ‹Bɨgɨ sé zhi ngə́ ɨnu tsa bɨgɨ ghɨ́nɨ́ lá tsɨ bé mɨbvu ə.›

²³Ŋwɔn tsum wa a banɨ aghan, a kɨ mban a Ta ɨghə.

²⁴Ma bá bé tú ghɨ ɨnu a tɨtərɨ bo tsa ŋwɔn tse a láʼnə mbvurɨ tɨ ghɨ muŋ ka bo vwo awa ɨsáʼ ngə́ bo ghɨ ɨbvu ə; adzaŋ za a tsinɨ, bo zɛnə a za ma ghɨ́nɨ́, ntiʼ mban awɨgɨ Ta ɨghə.

²⁵Lá, zen a zágɨ́ ntsi nɨ ɨ fuə taŋ ɨ chi kɔʼ bomnkɨ bo anu za bɨ ŋwaʼnɨnɨ a mu Nyɔngɔŋ ngə́: ‹Bo bán aghan tsɛʼ atú adaŋədaŋə ghe.›

²⁶Nkwatɨ, zɨ wa a nɨ Azhwi zə nkənu lá, a ghɨ yiŋə, wa a kyɛʼnɨ nkənu mbɨ́ʼ a Ŋwi, wa a kɨnɨ ndo lá a mbó Tarɨ lá. Ma mɨ kwarɨ ayi a mbó Tarɨ ɨ tsagɨ a mbó bən, á tiʼ ngam mbɨ́ʼ aghə.

²⁷Nɨ mɨ tiʼ kɨ gham mbɨ́ʼ aghan mbɨ́ʼ ngə́ nɨ tsí bɨgɨnə ndɔgɨnɨ a mbiʼnə ghe.”