Read Ngemba Yoane 18 Bible Online

Yoane 18 - Ngemba bible

Yoane 18

¹Yeso a ghɨnə mɛ́tɨ́ a ntsaʼtɨ Ŋwi, ndɔgɨ bɨyɛʼ ɨbyi bo bo tom nɨbɔ́rɨ́ na bɨ kɨ́nə́ ntɔ́ŋə́ ngə́ Kidrɔnɨ lá. Yeso bo bɨ bɨyɛʼ ɨbyi kón ngɛn a mu mɨnya mɨ ɨshwom wu tse wa ɨ tsínɨ́ ɨwu ə.

²Yudasɨ, ngaŋ mɨnaŋ, a zhí adiʼ məzen mbɨ́ʼ ngə́ Yeso a kə́ ngáʼə ngěn ɨwu bo bɨ bɨyɛʼ ɨbyi ɛ.

³Ma lan, Yudasɨ a lɔ́gɨ́ achwirɨ a bɨgwe bɨ bə Roma, nkwiʼtɨ bɨntsiŋ ɨdiʼ bɨ Ndáŋwi zɨ Ngwi bə tse, ba awa a tságɨ́nɨ́ bɨntumshe bə wi bo bɨ bə Farisao, bo bo ghɛn a mu ɨshwom wa. Bo tíʼtɨ́ ɨdzúm ntso ndzɔŋ nkɨ ntíʼtɨ́ bɨlam abɔʼnɨ ɨzhwibtɨ nkaʼ ə.

⁴Mbɨ́ʼ ngə́ Yeso a zhí anu atsum za a tsínɨ́ nɨ ɨfuə a ɨnye zɨ, wɛrə a fú a tɨtərɨ bɨyɛʼ ɨbyi, mbitɨ ɨbɛn ba ngə́, “Nɨ lǒ lá awa le?”

⁵Bo chwɨ́gɨ́ ngə́, “A Yeso ŋwɔn Nazarɛ ghe.” Yeso a byígɨ́ ngə́, “Ma lá zɨə.” Yudasɨ, ngaŋ mɨnaŋ, a tɛ́m ɨwu bo bo ghe.

⁶Mbáʼ Yeso a sóŋnɨ́ a mbó bo ngə́, “Ma lá zɨ”, lá bo bə́ntɨ́ nɨ ndzum ngwokɨ a tɨshe ə.

⁷Yeso a bə́ nkwiʼ nkwátɨ́ mbitɨ awa ngə́, “Nɨ lǒ lá awa le?” Bo chwɨ́gɨ́ ngə́, “A Yeso ŋwɔn Nazarɛ ghe.”

⁸Yeso a sóŋ ngə́, “Ma kwɛnə soŋ a mbó bən ngə́ ma lá zɨə. Be a be ngə́ nɨ lǒ lá aghan, á bɨyɛʼ ɨban biŋ ghenkɨ awa ghe.”

⁹(A sóŋ a məzen lá taŋ á kɔʼ mbomnkɨ bo za wɛrə a kwɛ́nə soŋ ngə́: “Tarɨ, ma bvurɨ tɨ byɛgɨ tsɛʼ a táʼ a tɨtərɨ ba o ghánɨ́ a mbó me ghe.”)

¹⁰Samɔn Bita a tsí nɨ ɨŋwi mbáʼ ə. Wɛrə a sɔ́ŋ a zɛrə ndɨŋ atoŋnɨ zə bagɨ abó zə dzɨnɨ zə abuʼ za a bénɨ́ zə Ntumshe wu Ngwi ə. Ɨkum abuʼ za ɨ bé Malkusɨ ə.

¹¹Yeso a sóŋ a mbó Bita ngə́, “Bə sɔʼ ɨŋwi mbáʼ ɨzo a mbáʼ wədiʼ ə! O wiʼtɨ ngə́ ma mɨ kaʼ ndɔ́ŋ ngɨ́ʼ za Ta ɨghan a ghanə a mbó me lá no le?”

¹²Ma lan, bɨgwe bɨ bə Roma abɔʼnɨ tantso bɨgwe wa, nkwiʼtɨ bɨntsiŋ ɨdiʼ bɨ Ndáŋwi zɨ Ngwi, bɨ kó a Yeso, nkorɨ ayi ɛ.

¹³Bo fóm ndɔgɨ ayi ngɛn nɨ zɨ a mbó Anasɨ ə. Anasɨ wen a bé nchi Kayafasɨ wa a bénɨ́ Ntumshe wu Ngwi alom məwa.

¹⁴A bé Kayafasɨ məwen wa a tɨ́gɨ́tɨ́nɨ́ bɨsáʼ bɨ ɨlaʼ bɨ bə Yuda ngə́ a bɔŋ á táʼ ŋwɔn a kfo mbɔm ɨbɛn bɨtsum ə.

¹⁵Samɔn Bita bo ngyɛʼ wa wu mɔʼɔ zɔ́ŋ a Yeso ghe. Ntumshe wu Ngwi a zhí a ngyɛʼ wa wu mɔʼɔ tsɛʼ nkə, ma lan, wɛrə a zɔ́ŋ a Yeso kón ngɛn a mu ɨsaŋəbyɛn Ntumshe wu Ngwi wa.

¹⁶Le buŋ, Bita a ghɔ́ŋ abyɛn a ntsunká ə. Ngyɛʼ wu mɔʼɔ wa, wa Ntumshe wu Ngwi zhínɨ́ ayi lá a bə́ mbən nɨ ndzum ɨ fu abyɛn, ngamnɨ bo mɔn mangye wa a tɛ́mnɨ́ a ntsunká wa lá, ntiʼ ndɔgɨ a Bita nkon nɨ zɨ a ɨmu ə.

¹⁷Mɔn mangye wa a tɛ́mnɨ́ a ntsunká wa a bítɨ́ a Bita ngə́, “O so táʼ ngyɛʼ a tɨtərɨ bɨyɛʼ bɨ mba yirɨ kɨ mbe le?” Bita a chwɨ́gɨ́ ngə́, “Ngáŋ, ka ma be aghə.”

¹⁸Ɨfɛgɨ ɨ kə́ nkǒ ghe, ma lan, ngaŋ afaʼ abɔʼnɨ bɨntsiŋ ɨdiʼ bɨ tɔ́n ɨmugɨ nɨ nkyé ntɛm nkarɨsɨ, ndzɔ́gə́ ghe. Ma lan, Bita a tíʼ ntsa ngɛn nkwatɨ awa, nkɨ ntɛm, nkə́ ndzɔ́gɨ́ ɨmugɨ məwa.

¹⁹Ntumshe wu Ngwi a bítɨ́ a Yeso nɨ ɨbítɨ mbɨ́ʼ bɨyɛʼ ɨbyi abɔʼnɨ ɨnu tsa a kɨ́nə́ ndiʼə ghe.

²⁰Yeso a chwɨ́gɨ́ wəmbo ngə́, “Nkfu tsum ma ghamnə a mbó ŋwɔn tsum asaŋəsaŋ; atsum za ma kɨ́nə́ ndiʼə, ma díʼ a zɛrə a mu ndáŋwi bə Yuda abɔʼnɨ Ndáŋwi zɨ Ngwi, mbe ɨdiʼ tsa bə Yuda bɨtsum bomnkɨnə ɨwu ə. Ma láʼnə nkaʼ anu zə tsɛrə a nkubə soŋə.

²¹O tiʼə mbitə aghan nɨ ɨbítɨ lá ngə́ ke le? Bitɨ ɨbɛn ba bɨ zhwíʼtɨ́nɨ́ ɨnu ɨtsum tsa ma sóŋnə́ — bo zhi ɨnu tsa ma sóŋnə́.”

²²Mbáʼ Yeso a sóŋnɨ́ ɨnu tsiŋ ɨtsum lá, táʼ ntsiŋ ɨdiʼ wa wu mɔʼɔ a lúbɨ́ ayi, mbitɨ ngə́, “O tsa lá ɨ nə́ ngámə́ a mbó Ntumshe wu Ngwi adzaŋ wa le?”

²³Yeso a chwɨ́gɨ́ ayi ngə́, “Be a be ngə́ ma soŋ anu za ka a kuʼnɨ ayi, soŋ a zɛrə a mbó ŋwɔn tsum ɨghə. Lá, be a be ngə́ ma gham ɨ shiʼnɨ, o tiʼ ntsɔgɨ aghan lá ngə́ ke le?”

²⁴Anasɨ a tíʼ ntsagɨ ayi mbáʼ bɨ bvúrɨ́nɨ́ nkórɨ́ ayi a mbó Kayafasɨ wa a bénɨ́ Ntumshe wu Ngwi ə.

²⁵Bita a bvúrɨ́ ntɛm adiʼ wa ndzɔ́gɨ́ ɨmugɨ ɨyi ɛ. Ma lan, bə mɔʼɔ bítɨ́ ayi ngə́, “O so táʼ ŋwɔn abɔʼnɨ bɨyɛʼ bɨ ŋwɔn yirɨ kɨ mbe le?” Samɔn Bita a tón ayi ɨ soŋ ngə́, “Ɨnya aghan, ka ma be aghan wu mɔʼɔ ghe.”

²⁶Táʼ abuʼ wu Ntumshe wu Ngwi, ŋwɔn ngwəgɨ ŋwɔn wa Bita a lɨ́ŋnɨ́ atoŋnɨ azhi lá, a ghám mbitɨ ngə́, “Ma lo mbá nkaʼ awɨŋ zɨ zɛn a mu mɨnya mɨ ɨshwom wa le?”

²⁷Bita a kwíʼ nkwátɨ́ sóŋ ngə́, “Ngáŋ” — tsɛʼ a nyom məwa ankɨʼə a tɔ́ŋə.

²⁸A tənjwi a mbáʼəmbáʼə, bɨ lɔ́gɨ́ a Yeso a ndá Kayafasɨ ngɛn nɨ zɨ a ntɔ́ʼ gobɨna ghe. Bɨsáʼ bɨ ɨlaʼ bɨ bə Yuda sé kón a mu ntɔ́ʼ za mbɨ́ʼ ngə́ bo kə́ ndǒ ndě ɨtumbəm ɨtsa á tsɨ fɛm a mu mbɔm, taŋ á bo chi dzɨ mɨdzɨ mɨ Tsa-yɛʼnɨ ə.

²⁹A ghɨnə mbé mə lan lá, Branto a tsá ngɛn abyɛn mbitɨ awa ngə́, “Nɨ kaŋ a ŋwɔn wen lá mbɨ́ʼ ake le?”

³⁰Achwɨgə aza a bé ngə́, “A lo be tú anu zə tse fan muŋ ka bɨgɨ lɔgɨ awɨgɨ ayi ngyen nɨ zɨ a mbó gho ghe.”

³¹Branto a sóŋ a mbó bo ngə́, “Nɨ lɔgɨ ayi bɨŋ mboŋ ngɛn sáʼ ndzɔ̌ŋ a nyɔngɔŋ ɨwɨŋ ə.” Bo chwɨ́gɨ́ ngə́, “Ka bɨgɨ tsi awɨgɨ nɨ mɨtən mə tsɛrə a njwítɨ́ ŋwɔn ə.”

³²(Məzen a fú lá taŋ ɨ kɔʼ bom bo mɨgham ma Yeso a kwɛ́nə sóŋ mbɨ́ʼ abə́ŋ a nɨvwo za zɨə ghɨnɨ kfoə.)

³³Branto a bə́ nkón ngɛ́n a mu ntɔ́ʼ ntɔŋ a Yeso ɨwu mbitɨ ayi ngə́, “O nɨ ɨfɔ bə Yuda le?”

³⁴Yeso a chwɨ́gɨ́ ngə́, “Abítɨ zen a lo lá a mbó gho kə ɨbɛn bə mɔʼɔ fɨʼtɨ a mbó gho mbɨ́ʼ aghan le?”

³⁵Branto a chwɨ́gɨ́ ngə́, “O kwaʼtɨ ngə́ ma nɨ ŋwɔn bə Yuda le? A kɨ be ɨbɛn ɨbo abɔʼnɨ bɨntumshe bə wi mbáʼ bɨ kɨ yenɨ nga agho a mbó me ghe. O fan lá anu ake le?”

³⁶Yeso a sóŋ ngə́, “Nɨfɔ ɨnan, ka nɨ be ayi nə atuəshe; nɨ ba be be lá nə atuəshe muŋ bɨyɛʼ ɨban bɨ tokɨ nkwarɨ aghan ngə́ á bɨ keʼ aghan gha a mbó bɨsáʼ bɨ ɨlaʼ bɨ bə Yuda ghe. Ngáŋ, ka nɨfɔ ɨnə be ayi nə atuəshe!”

³⁷Ma lan, Branto a bítɨ́ ayi ngə́, “Ma lan, O nɨ ɨfɔ le?” Yeso a chwɨ́gɨ́ ngə́, “O soŋ ngə́ ma nɨ ɨfɔ ghe. Bɨ jwí aghan lá mbɨ́ʼ a táʼ anu wiŋ ə, ma kɨ́ ngyen atuəshe lá mbɨ́ʼ a táʼ anu məwiŋ ə, a be mbɨ́ʼ ngamə mbɨ́ʼ nkənu ə. Ŋwɔn tsum wa a tsinɨ a bagɨ nkənu, a zhwíʼtə́ a mbó me ghe.”

³⁸Branto a bítɨ́ ngə́, “Nkənu tiʼ mbe lá ake le?” Branto a bə́ fú abyɛn ɨ soŋ a mbó ɨbɛn ba bɨ tsínɨ́ ɨwu ngə́, “Ma sa anu zə tse zɛn a sóŋə́ ngə́ ŋwɔn wen a vwo ɨsáʼ nkuʼnɨ a njwítə́ ghe.

³⁹Lá ndzɔ̌ŋ mbɔm alaʼ za nɨ tsinɨ nɨ zɛrə, ma fɨ́gə́ a táʼ ŋwɔn atsáŋ nkfu tsum za nɨ tsinɨ nɨ nɨdorɨ nɨ Tsa-yɛʼnɨ ɨ nyɛ́ʼtə́ ghe. Nɨ lǒ ngə́ á ma fɨgɨ a ɨfɔ bə Yuda ɨ nyɛʼtɨ a mbó bən le?”

⁴⁰Bo tɔ́nkɨ́ nchwɨgɨ ngə́, “Ngáŋ, nkeʼ wɛrə be! Bɨgɨ lǒ a Barabasɨ ə!” (Barabasɨ a bé ntɨŋ ndzɛrə ghe.)