Read Ngemba Yoane 19 Bible Online

Yoane 19 - Ngemba bible

Yoane 19

¹Branto a tíʼ ndɔgɨ a Yeso nga bɨ ləŋ nɨ ngwan ə.

²Bɨgwe kárɨ́ ɨsáʼfɔ nɨ kyɛrə-kyɛrə ngwəgɨ wu atú; ngwəgɨ a tɔgɨ wu mbaŋnɨ wə ɨnye

³ntiʼə nkɔ́ʼə ngyíŋə́ wə ɨshi nɨ nkfu nɨ nkfu, ɨ sóŋə́ ngə́, “A ɨfɔ bə Yuda a tsi nɨnkoŋ ə!” Ntiʼə nkə́ ndúbə́ ayi a ɨshi zɨə.

⁴Branto a bə́ nkwiʼ fu abyɛn ɨ soŋ a mbó ɨnɔ ɨbɛn wa ngə́, “Zɛnə azɨŋ ə, ma mɨ soŋ á bɨ fu nɨ zɨ abyɛn a ɨshi bən á nɨ zɛn ngə́ ma sa anu zə tse zɛn za a diʼnɨ ngə́ ŋwɔn wen a vwo ɨsáʼ ə.”

⁵Yeso a tíʼ fú abyɛn, ngwəgɨ ɨsáʼfɔ kyɛrə-kyɛrə za atú zɨ abɔʼnɨ tɔgɨ wu mbaŋnɨ wa. Branto a sóŋ a mbó bo ngə́, “Zɛnə azɨŋ ə! Ŋwɔn wa a wɛnə!”

⁶Mbáʼ bɨntumshe bə wi abɔʼnɨ bɨntsiŋ ɨdiʼ bɨ Ndáŋwi zɨ Ngwi zɛ́nɨ́ ayi lá, bo tɔ́nkɨ́ ngə́, “Kwemtɨ ayi atɨ abaŋnɨ-baŋnɨ ə! Kwemtɨ ayi atɨ abaŋnɨ-baŋnɨ ə!” Branto a sóŋ a mbó bo ngə́, “Nɨ tiʼ ndɔgɨ ayi tsɛʼ bɨŋ mboŋ ngɛn nkwemtɨnə ghe. Ka ma zɛn aghan anu za a fanɨ mbáʼ a diʼnɨ ngə́ ŋwɔn wen a vwo ɨsáʼ ə.”

⁷Bə Yuda ba byígɨ́ wəmbo ngə́, “Bɨgɨ tsi nɨ nyɔngɔŋ wa a soŋnɨ ngə́ a tsi nɨ nkfo mbɨ́ʼ ngə́ wɛrə a káŋ ngə́ zɨə nɨ Mɔn Ŋwi ə.”

⁸Mbáʼ Branto a zúʼnɨ́ bo soŋ a məzen lá, nɨbɔgɨ ɨni bə ngɛn nɨ mbyi ɛ.

⁹Wɛrə a bə́ nkón ngɛ́n a mu ntɔ́ʼ zɨ, mbitɨ a Yeso ngə́, “O lo lá ɨ ghé?” Lá Yeso a keʼ chwɨgə.

¹⁰Branto a bítɨ́ ayi ngə́, “O mɨ koʼ a mbó me gham mbɨ́ʼ ake le? Zhi ɨ shiʼnɨ ngə́ ma tsi nɨ mɨtən mbáʼ be ma nyɛʼtɨ agho kə ɨ chi ghɨ á bɨ kwemtɨ agho atɨ abaŋnɨ-baŋnɨ ə.”

¹¹Yeso a chwɨ́gɨ́ ayi ngə́, “O tsi nɨ mɨtən atú me tsɛʼ mbɨ́ʼ ngə́ Ŋwi a ghá a mɛrə ɨwa. A tiʼ mbe ngə́, ŋwɔn wa a ghanɨ aghan a mbó gho lá, a ghɨ ɨbvu wa ɨ tsanɨ ɨgho ə.”

¹²Mbáʼ Branto a zúʼnɨ́ a məzen lá, ndɔbtɨ a ndǒ ndóm wa be zɨə tsa ɨwu ɨ nyɛʼtɨ a Yeso ghe. Lá nángyérə́ wa a tɔ́nkɨ́ wu atú ngə́, “Be o nyɛʼtɨ ayi, a be ngə́ o so ɨson Kaisa be. Ŋwɔn tsum wa a kaŋnɨ ngə́ zɨə nɨ ɨfɔ, a nɨ ŋwɔn atɨŋətú a mbó Kaisa ghe!”

¹³Mbáʼ Branto a zúʼnɨ́ a miŋ mɨgham lá, ndɔgɨ a Yeso ɨ fu nɨ wɛrə abyɛn, ɨ shiʼtɨ ntsi atú alaŋ a tabyɛn, a nye adiʼ za bɨ kɨ́nə́ ntɔ́ŋə́ ngə́, “Adiʼ za bɨ lɨʼnɨ nɨ mɨngɔʼ ə”. (Mbe lá “Gabata” a nye nɨgham nɨ bə Ɛbal ə)

¹⁴A kə́ ntíʼə mbě tso ntənɨ nyom a nye njwi za njwi mɨ lan á be nɨdorɨ nɨ Tsa-yɛʼnɨ ə. Branto a sóŋ a mbó ɨbɛn ba ngə́, “Ɨfɔ ɨwən a wɛnə!”

¹⁵Bo tɔ́nkɨ́ mbyigɨ wəmbo ngə́, “Zhwitɨ ayi ɛ! Zhwitɨ ayi ɛ! Kwemtɨ ayi atɨ abaŋnɨ-baŋnɨ ə!” Branto a bítɨ́ awa ngə́, “Nɨ lǒ ngə́ á ma kwemtɨ a ɨfɔ ɨwən atɨ abaŋnɨ-baŋnɨ le?” Bɨntumshe bə wi chwɨ́gɨ́ ngə́, “Bɨgɨ tsi tsɛʼ nɨ táʼ ɨfɔ, a be Kaisa ghe!”

¹⁶Branto a tíʼ ngá a Yeso ngə́ á bo ghɛn nkwemtɨ atɨ abaŋnɨ-baŋnɨ ə. Ma lan, bɨgwe tíʼ ndɔgɨ a Yeso ghe.

¹⁷A fú abyɛn ntáʼmbagə wu wi wa, mbáʼ a byɛ́ʼnɨ́ abaŋnɨ-baŋnɨ azhi zɨmboŋ, ngɨ́ ngyen nkuʼ a nye “Ntáʼ Aghɔʼrɨ Atú”, adzaŋ za bɨ tɔ́ŋnə́ ghe. (Mbe “Gɔlgɔta” a nye nɨgham nɨ bə Ɛbal ə.)

¹⁸Ɨwu bɨ kwémtɨ́ ayi atɨ abaŋnɨ-baŋnɨ; bo kɨ́ ndzɔŋ nkwemtɨ ɨbɛn bə daŋ bi bɨbá a nye bɨbagɨ bɨ mbó ɨmyi mɨtsum, Yeso a tiʼ ntsi a tɨtərɨ ə.

¹⁹Branto a ŋwáʼnɨ́ aŋwaʼnɨ mbán wu atú atɨ́ mbáʼ a kɨ́nə́ sóŋə́ ngə́, “Yeso ŋwɔn Nazarɛ, ɨfɔ bə Yuda” ghe.

²⁰Ɨbɛn bə ghaʼnɨ tɔ́ŋ a zɛrə, mbɨ́ʼ ngə́ adiʼ za bɨ kwémtɨ́nɨ́ a Yeso ɨwu, aghagɨ azhi a sé sagɨ a ndǒ a ntáʼmbagə wu wi ə. Bɨ ŋwáʼnɨ́ aŋwaʼnɨ məzen a nye mɨgham mɨ ɨtóm tsi tárə́; nɨgham nɨ bə Ɛbal, nə Latɨn abɔʼnɨ bə Grikɨ ə.

²¹Bɨntumshe bə wi sóŋ a mbó Branto ngə́, “Koʼ ŋwaʼnɨ ngə́, ‹Ɨfɔ bə Yuda›, baŋnɨ ŋwaʼnɨ be ngə́, ‹Mba wen a sóŋ ngə́ ma nɨ ɨfɔ bə Yuda ghe.› ”

²²Branto a chwɨ́gɨ́ ngə́, “Za ma ŋwanɨnə lá, ma ŋwaʼnɨnə ghe.”

²³Mbáʼ bɨgwe ba mɛ́tɨnə a nkwemtɨ Yeso, bo lɔ́gɨ́ ɨtsɛʼ ɨchi ngyɛbtɨ ɨdiʼ tsi nɨkwa, táʼ gwe a tsi nɨ táʼ adiʼ ə. Bo kɨ́ ndɔgɨ a tɔgɨ ɨyi wa bɨ nyɛ́tɨ́nɨ́ nɨ táʼ abó atsɛʼ wa bɨ nyɛ́tɨ́nɨ́ ndɔgɨnɨ atú ɨ shiʼ nkuʼ a ntɨ́ŋ tɨ adiʼ za bɨ bósɨ́nɨ́ nta ɨwu ə.

²⁴Bɨgwe ba sóŋ a mbó ŋwɔn nɨ ŋwɔn ngə́, “Bɨgɨnə keʼ a zɛrə abagɨ abagɨ yɛbtə; bɨgɨnə maʼ ndzɔʼ a njí ŋwɔn wa a mɨ tsi nɨ zɛrə ghe.” Məzen a fú lá taŋ ɨ kɔʼ bomnkɨ bo anu za aŋwaʼnɨ a Ŋwi a kwɛ́nə sóŋ ngə́: “Bo yɛ́btɨ́ ɨtsɛʼ ɨtsan a tɨtərɨ bo, ɨ maʼ ndzɔʼ a nchyɛ́ nɨ tɔgɨ ɨghə.” Nə nɨ anu za bɨgwe ba ghɨ́nə́.

²⁵Nɨmi bɨ Yeso, mɨma nɨmi bɨ Yeso, Mɛrɨ ngwe Krobasɨ abɔʼnɨ Mɛrɨ Matarɨna tɛ́m ɨ fátɨ́ abaŋnɨ-baŋnɨ a Yeso ghe.

²⁶Yeso a kɨ́ ndzɛ́n a ngyɛʼ ɨyi wa a kɔ́ŋnɨ́ tsɛʼ a nkan lá a tɛm a mbyɛn nɨmi bɨ Yeso ghe. Ma lan, Yeso a sóŋ a mbó nɨmi ɨyi ngə́, “Lɔgɨ ayi tso mɔn ɨgho wu mbáŋnɨ́ ə.”

²⁷A kɨ́ ntíʼ sóŋ a mbó ngyɛʼ ɨyi wa ngə́, “Lɔgɨ ayi tso nɨmi ɨgho ghe.” Nchwuʼnɨ a njwi məwa, ngyɛʼ wa a lɔ́gɨ́ ayi a tiʼə nchyɛ̌ a njwuʼ zɨə.

²⁸Məzen a ghɨnə ntsá, Yeso a zhí a nyom məwa ngə́ ɨnu ɨtsum tsa tsɨ tsínɨ́ nɨ ɨ fuə taŋ á kɔʼ mbom bo za aŋwaʼnɨ a Ŋwi a kwɛ́nə soŋ tsɨ fúnə ghe. Wɛrə a tíʼ sóŋ ngə́, “Nji nkyi ɨ zaŋə aghə.”

²⁹Sotɨ a tɛ́m ɨwu, ndon nɨ tɨntsɛgɨ mɨluʼ ə; ma lan, bɨ tsúbtɨ́ a kuncha a mu tɨntsɛgɨ mɨluʼ za, ndoŋ atú atɨ aisɔbɨ nkɔʼsɨ a wɛrə atɨ́ a nye ɨwəŋ ntsu ɨchi ɛ.

³⁰Yeso a nó mɨluʼ ma ntiʼ soŋ ngə́, “A minə ghe!” Ntiʼ ndzəŋ atú azhi a ɨshe, ntsəmə.

³¹Bɨsáʼ bɨ ɨlaʼ bɨ bə Yuda tíʼ ndɔ́ntɨ́ a mbó Branto ngə́ á nyɛʼtɨ awa á bo bɛʼtɨ mɨku mɨ ɨbɛn ba bɨ kwémtɨ́nɨ́ atɨ abaŋnɨ-baŋnɨ lá, ntiʼ shiʼsɨ ɨkfú ɨtsa a nye ɨbaŋnɨ-baŋnɨ ɨtsa ghe. Bo lɔ́ntɨ́ a məzen lá mbɨ́ʼ ngə́ a bé Frade, bo sě ndǒ ngə́ á ɨkfú ɨtsa tsi ɨwu a nye Njwi Alaʼ Ŋwi, mbɨ́ʼ ngə́ Njwi Alaʼ Ŋwi məza ɨ bé zɨ fɛmnɨ nɨ líʼ ə.

³²Ma lan, bɨgwe tíʼ ngɛn mbɛʼtɨ mɨku mɨ ntsambyi ŋwɔn, ndzɔŋtɨ nɨ wu mɔʼɔ ŋwɔn, bo wa bɨ kwémtɨ́nɨ́ awa atú ɨtɨ ɨbaŋnɨ-baŋnɨ bo bɨ Yeso lá.

³³Lá bo ghɨnə ngyén nkuʼ a nye Yeso, ndzɛn ngə́ a kfónə ghe. Bo tíʼ nkeʼ mɨku ɨmyi bɛʼtə.

³⁴Lá táʼ gwe wa wu mɔʼɔ, a sɔ́bɨ́ nɨkɔŋ ɨni a mumbyɛn Yeso, alɛm bo nkyi tiʼ mbyi mbebɨnɨ ɨ fu ɨwu ə.

³⁵(Ŋwɔn wa a zɛ́nɨ́ anu məzen a gham mbɨ́ʼ a zɛrə lá taŋ o chi kɨ nɨŋ ntəm ɨgho ɨwu ə. Anu za wɛrə a sóŋnɨ́ lá a nɨ nkənu ə, a kɨ nji ngə́ zɨə ghamə lá nkənu ə.)

³⁶ Bɨ ghɨ́ a məzen lá taŋ á kɔʼ mbom bo za aŋwaʼnɨ a Ŋwi a kwɛ́nə soŋ ngə́, “Kə́ tsɛʼ táʼ akwɛn ɨyi a ghɨ keʼ bɛʼnə.”

³⁷ Adiʼ aŋwaʼnɨ a Ŋwi zə mɔʼɔ a kwiʼ soŋ ngə́, “Ɨbɛn ghɨ liŋ ayi wa bo sɔ́bɨ́nə́.”

³⁸Məzen a ghɨnə ntsá, Yosɛb, wa a lónɨ́ a ntáʼmbagə Arimatia, a ghɛ́n ndɔ́ntɨ́ akfú a Yeso a mbó Branto ɨ ghɛn nɨ zɛrə ghe. (Yosɛb a bé ngyɛʼ Yeso lá ngɨə ma lan be ndzum ndzum, mbɨ́ʼ ngə́ a kə́ mbɔ́gə́ bɨsáʼ bɨ ɨlaʼ bɨ bə Yuda ghe.) Branto a sóŋ ngə́ a chi ghɛn lɔgɨ akfú za. Yosɛb a tíʼ ngɛn ndɔgɨ ndo nɨ zɛrə ɨ ghɛn twəŋə.

³⁹Nɨkorɨmbo, wa a kwɛ́nə ngɛn a ndzé Yeso nɨ ɨtfúʼ lá, a ghɛ́n bo Yosɛb ə. A tíʼtɨ́ bɨnyuʼtə bətɨŋndvuŋ ba bɨ kɨ́nə́ ntɔ́ŋə́ ngə́ maya abɔʼnɨ alo, ndɨrɨ ɨzhi be tso bɨkilogram mɨghúm mɨntárə́ nɨ ntsɔb nɨkwa ghe.

⁴⁰Ɨbɛn ba bi bɨbá lɔ́gɨ́ akfú a Yeso, ndwɛrɨ a zɛrə a mu atsɛʼ atɨŋndvuŋ abɔʼnɨ bɨnyuʼtə ba wə mu, ndzɔ̌ŋ mbɔm bə Yuda a nkyáŋtɨ́ akfú a ŋwɔn bɔŋ á bɨ twəŋə.

⁴¹Mɨnya mɨ ɨshwom wu tse a tsí ɨwu a kɨʼ adiʼ wa bɨ zhwítɨ́nɨ́ a Yeso lá. A mu mɨnya mɨ ɨshwom wa nɨshe nə fi (mbe be ɨfuʼ wa bɨ tóŋnɨ́ a mu ngɔʼ) mbáʼ bɨ bvúrɨ́nɨ́ a ŋwɔn ɨwu tɨ twəŋ nɨ tsí ɨwu ə.

⁴²Mbɨ́ʼ ngə́ njwi za ɨ lán nga nɨ Njwi Alaʼ Ŋwi, nkɨ mbe ngə́ nɨshe na tsí ɨ fátɨ́, bo nyɔ́ŋ akfú a Yeso wə mu ə.