Read Ngemba Yoane 20 Bible Online

Yoane 20 - Ngemba bible

Yoane 20

¹A tənjwi nɨ mbvugɨrɨ a nye ntsambyi njwi a mu ngabɨ mbáʼ a bénɨ́ Sɔnde, Mɛrɨ Matarɨna a ghɛ́n atú a nɨshe wa ndzɛn ngə́ bɨ lɔ́gɨ́ ngɔʼ za a ntsu nɨshe wa ndotɨ nɨ zɛrə ghe.

²A ló nkɨə tsɛʼ kɨənɨ ngɛn soŋ a mbó Samɔn Bita bo ngyɛʼ wa wu mɔʼɔ, wa Yeso a kɔ́ŋnɨ́ tsɛʼ a nkan lá, ngə́, “Bɨ fɨgɨ a Maʼmbyí gha a mu nɨshe, lá bɨgɨ keʼ zhi adiʼ za bɨ lɛnɨ ayi ɨwu ə!”

³Bita bo ngyɛʼ wa wu mɔʼɔ tíʼ ndo ngɛn atú a nɨshe wa.

⁴Bo wa bɨbá kə́ ngyiŋə nkɨə, lá ngyɛʼ wa wu mɔʼɔ a kɨ́ə ntsa a Bita ɨ fom ngɛn nkon atú a nɨshe wa.

⁵A kfúʼnɨ́ ndzɛn atsɛʼ atɨŋndvuŋ za, lá nkeʼ a mu nɨshe wa kuŋə.

⁶Samɔn Bita a yén a ndzum zɨ, mbyi ntsa nkon ngɛn a mu nɨshe na. A zɛ́n atsɛʼ atɨŋndvuŋ za a nɔŋ ɨwu

⁷abɔʼnɨ atsɛʼ za bɨ kárɨ́nɨ́ atú a Yeso ɨwu lá. A sé nɔŋ abɔʼnɨ atsɛʼ atɨŋndvuŋ za, lá bɨ kárɨ́ a nɔŋ atú zɨə.

⁸Ngyɛʼ wa wu mɔʼɔ, wa a tsánɨ́ mbyi nkuʼ atú a nɨshe wa lá, a kɨ́ nkón wə mu; ndzɛn nkɨ nɨŋ ntəm ɨyi ɨwu ə.

⁹(Bo bvúrɨ́ tɨ zuʼ kɨ nji aŋwaʼnɨ a Ŋwi za a sóŋnɨ́ ngə́ a ghɨ zagɨ zhwemnɨ a mbó nɨvwo ə.)

¹⁰Bɨyɛʼ ba tíʼ mbə nkwɛn ngɛn awa a njwuʼ ə.

¹¹Mɛrɨ a tɛ́m abyɛn a ntsu nɨshe wa mbúgə́ ghe. A kfúʼnɨ́ nden ɨmu nɨshe za mbáʼ a kɨ́nə́ mbvúrə́ mbúgə́

¹²ndzɛn ɨtsenda Ŋwi tsi bá tsɨ wəgɨ ɨtsɛʼ tsə fú, tsɨ shiʼtɨ ntsi adiʼ wa bɨ nyɔ́ŋnɨ́ akfú za ɨwu, táʼ a kɨʼ wa atú azhi a nɔ́ŋnɨ́, wu mɔʼɔ a kɨʼ wa mɨku ɨmyi nɔ́ŋnə́.

¹³Bo bítɨ́ ayi ngə́, “Mangye, o búgə́ lá ake le?” Wɛrə a chwɨ́gɨ́ ngə́, “Bɨ lɔgɨ a Maʼmbyí ɨghan ndo nɨ wɛrə, ma kaʼ zhi adiʼ za bɨ lɛnɨ ayi ɨwu ə!”

¹⁴Mbáʼ a kɨ́nə́ soŋə a məzen lá, mbəŋtɨ ayi ndzɛn a Yeso a tɛm ɨwu; lá a sé zhi ngə́ a nɨ Yeso ghe.

¹⁵Yeso a bítɨ́ a wɛrə ngə́, “Mangye, o búgə́ lá ake le? O lǒ lá a ɨwa le?” Wɛrə a kwáʼtɨ́ ngə́ a bé lá ŋwɔn wa a kɨ́nə́ faʼə a mu mɨnya ɨshwom wa, ntiʼ soŋ wəmbo ngə́, “Tə̧, be a be ngə́ o lo ndɔgɨ akfú a Yeso za ngɛn ndɛn adiʼ zə tse, soŋ adiʼ zə wu á ma ghɛn ndɔgɨ a zɛrə ghe.”

¹⁶Yeso a tɔ́ŋ ayi ngə́, “Mɛrɨ!” Mɛrɨ a tíʼ mbəŋ ayi ndyiŋə a wɛrə, ɨ soŋ nɨ nɨgham nɨ bə Ɛbal ngə́, “Rabonai!” (Məzen a diʼ lá ngə́ “Ndiʼ aŋwaʼnɨ”.)

¹⁷Yeso a sóŋ wəmbo ngə́, “Njimbɨʼ o mɔmtɨ aghə, mbɨ́ʼ ngə́ ma bvurɨ tɨ bə nkɔʼ ngɛn nkon a mbó Tarɨ ə. Lá ghɛn soŋ a mbó ɨbɔmbɨma ɨban ngə́ ma tiʼnə mbɨŋə ngěn a mbó zɨ wa a nɨ Ta ɨghan nkɨ mbe Ta ɨwa, Ŋwi ɨghan nkɨ mbe Ŋwi ɨwa lá.”

¹⁸Ma lan, Mɛrɨ Matarɨna a tíʼ ngɛn a mbó bɨyɛʼ bɨ Yeso nkərɨ a mbó bo ngə́ zɨə zɛ́n a Maʼmbyí nkɨ soŋ ɨnu tsa wɛrə a sóŋnɨ́ a mbó zɨə.

¹⁹A bé a nkwɛfɔ ntsambyi njwi a mu ngabɨ, bɨyɛʼ bɨ Yeso ghótɨ́ ɨ fɨŋ ndá ntsi ɨwu, mbɨ́ʼ ngə́ bo kə́ mbɔ́gɨ́ bɨsáʼ bɨ ɨlaʼ bɨ bə Yuda ghe. Yeso a tíʼ ngyen ntɛm a tɨtərɨ bo ɨ soŋ ngə́, “A mbɔnɨ ɨ tsi a mbó bɨŋ ə.”

²⁰A soŋnə a məzen lá, ntiʼ ndiʼ mbó ɨmyi bo bɨ mumbyɛn ɨyi a mbó bo ghe. Bɨyɛʼ bɨ Yeso lón nɨ nɨdorɨ a ndzé Maʼmbyí ɛ.

²¹Yeso a kwíʼ nkwátɨ́ sóŋ a mbó bo ngə́, “A mbɔnɨ ɨ tsi a mbó bɨŋ ə. Adzaŋ za Tarɨ a tságɨ́nɨ́ aghan lá, ma kə́ ntságə́ awɨŋ ə.”

²²A nyom məwa a tíʼ nzhwi a nye bo ɨ soŋ ngə́, “A nɨ kwarɨ Azhwi zə Fɛmnɨ ə.

²³Be nɨ lɨgɨnɨ mɨbvu mɨ ɨbɛn, muŋ bɨ lɨgɨnɨnə a mɛrə ghe; be nɨ tú mɨbvu ɨma ɨ lɨgɨnɨ, bɨ keʼ kɨ ndɨgɨnə.”

²⁴Táʼ ngyɛʼ wa wu mɔʼɔ a tɨtərɨ bɨyɛʼ ba nɨghúm ntsɔb bá wa ɨkum ɨyi bénɨ́ Tɔməshi (bɨ kə́ ntɔ́ŋə́ ayi ngə́ Nɨfágɨ ə), a sé ɨwu tsi a nkfu za Yeso a yénə́.

²⁵Ma lan, bɨyɛʼ bə mɔʼɔ ba sóŋ wəmbo ngə́, “Bɨgɨ zɛnə a Maʼmbyí ɛ!” Tɔməshi a byígɨ́ a mbó bo ngə́, “Be ma tú ze ɨləŋ mbán tsa a nye mbó ɨmyi, ɨ tsagɨ bɨshwi bɨ mbó ɨban a nye ɨləŋ tsa, ɨ kɨ tsagɨ abó azan a nye ngvo wa wə mumbyɛn, ma chi kaʼ ntəm ɨghan ɨwu nɨŋə.”

²⁶Ngabɨ bənə nkwem, bɨyɛʼ ba bə nkɨ ngyen mbomnkɨ a mu ndá, mbvuʼnɨ, Tɔməshi a tsi bo bo ghe. Bɨ fɨ́nkɨ́ mɨntsu mɨ ndá, lá Yeso a yén ntɛm a tɨtərɨ bo ɨ soŋ ngə́, “A mbɔnɨ ɨ tsi a mbó bɨŋ ə.”

²⁷Wɛrə a tíʼ soŋ a mbó Tɔməshi ngə́, “Tsagɨ a shwi abó gho ɨghan, nkɨ ndyiŋ mbó ɨmə; tiʼ nkɨ nasɨ abó azo ɨ nɨŋ a mumbyɛn me ɨghə. Kyɛntɨ ɨməŋnə ɨzo za, ntiʼ nɨŋ ntəm ɨgho a nye me ghe!”

²⁸Tɔməshi a chwɨ́gɨ́ ngə́, “O nɨ Maʼmbyí ɨghan nkɨ mbe Ŋwi ɨghə!”

²⁹Yeso a sóŋ wəmbo ngə́, “O nɨŋ ntəm ɨgho ɨwu lá mbɨ́ʼ ngə́ o zɛn aghan le? Ɨfɔgə wu wi tsi a mbó ɨbɛn ba bɨ nɨŋnɨ mɨntəm ɨma ɨwu tə́ ndzě aghə!”

³⁰Yeso a ghɨ́ ɨnu tsɨ yerɨnɨ-yerɨnɨ tsə mɔʼɔ tsə ghaʼnɨ a ɨshi bɨyɛʼ ɨbyi tsa bɨ se a mu aŋwaʼnɨ zen ŋwaʼnə.

³¹Lá bɨ ŋwaʼnɨ a tsen lá taŋ o chi nɨŋ ntəm ɨgho ɨwu ngə́ Yeso a nɨ Wa bɨ Zɔ́ʼnɨ́ nkɨ mbe Mɔn Ŋwi ə. Nkɨ mbe ngə́ a ntsǎ a ndzum abeməntəm azo wə nye, o chi tsi nɨ ntsi ntən nɨnkoŋ ə.