Read Ngemba Yoane 21 Bible Online

Yoane 21 - Ngemba bible

Yoane 21

¹Məzen a ghɨnə ntsá, Yeso a kwiʼ mbə fu a ɨshe a ɨshi bɨyɛʼ ɨbyi a ngə́rɨ́ Sagɨrə Tiberia ghe. A tsá lá ɨ nanə ghe:

²Samɔn Bita, Tɔməshi (bɨ kə́ ntɔ́ŋə́ ayi ngə́ Nɨfágɨ ə), Natania (wa a lónɨ́ a Kana a mu Galili), ɨbɔ bɨ Zebɨdi bə mbáŋnɨ́, abɔʼnɨ bɨyɛʼ bə mɔʼɔ bi bɨbá bɨ tsí táʼ adiʼ ə.

³Samɔn Bita a sóŋ a mbó bə mɔʼɔ ba ngə́, “Ma ghěn aghan achwiʼ ə.” Bə mɔʼɔ ba sóŋ wəmbo ngə́, “Bɨgɨ mɨ zɔŋ agho.” Ma lan, bo fú abyɛn ngɛn nkon a mu abáŋ a nkyi ngɛn achwiʼ wa. Lá a mu ɨtfúʼ wa ɨtsum, bo sé ɨshwú zɨ tse koə.

⁴Mbáʼ nɨnyom a tíʼnə́ sáʼə, Yeso a tɛ́m a ngə́rɨ́ nkyi wa, lá bɨyɛʼ ba sé zhi ngə́ a bé Yeso ghe.

⁵Yeso a tíʼ mbítɨ́ awa ngə́, “Ɨbɔ ɨban, nɨ bvurɨ ɨshwú zɨ tse tɨ ko le?” Bo chwɨ́gɨ́ ngə́, “kə́ kə́ tsɛʼ azúm zə tse ghe.”

⁶Wɛrə a sóŋ a mbó bo ngə́, “Tamnə nɨghoŋ ɨnən a bagɨ abó maʼə zə abáŋ a nkyi za, nɨ mɨ ko ɨshwú ə.” Ma lan, bo tám nɨghoŋ na ntiʼə ngúʼ ɨ bə shwuŋ ɨ bən nɨ nɛrə nɨ ndzum kɨ́káŋ mbɨ́ʼ ngə́ bo kó ɨshwú ɨ gháʼ ntsa mbó ə.

⁷Ngyɛʼ wa Yeso a kɔ́ŋnɨ́ lá a sóŋ a mbó Bita ngə́, “A nɨ Maʼmbyí ɛ!” Mbáʼ Bita a zúʼnɨ́ ngə́ a nɨ Maʼmbyí lá, a wə́gɨ́ ɨtsɛʼ ɨchi (mbɨ́ʼ ngə́ a kwɛ́ ntsɔ́ʼtɨ́ a tsɛrə) ntiʼ nkanɨ a mu sagɨrə wu ngwi wa.

⁸Bɨyɛʼ ba bə mɔʼɔ ghɛ́n a ngə́rɨ́ a mu abáŋ a nkyi za, ɨ shwǔŋ nɨghoŋ na ɨshwú ɨ lónɨ́ wə mu lá. Aghagɨ aza a sé sagɨ a nkuʼə a ngə́rɨ́ nkyi ɛ. Aghagɨ aza a bé tso bɨmita táʼ nkɨ ə.

⁹Bo ghɛnə nkuʼ a ngə́rɨ́ nkyi, ndzɛn ɨmugɨ wa bɨ nyɛ́tɨ́nɨ́ nɨ nkyé ɨ kɨənə ɨwu nɨ ɨshwú wu atú abɔʼnɨ abán ə.

¹⁰Yeso a tíʼ soŋ a mbó bo ngə́, “Yenə nɨ ɨshwú tsa tsə tse tsa nɨ lonɨ a nkó lá.”

¹¹Samɔn Bita a kɔ́ʼ nkón a mu abáŋ a nkyi za, ɨ shwuŋ nɨghoŋ na na nɨ lónɨ́ nɨ ɨshwú tsɨ wi, tsɨ bé 153 a nchintə. Tsɨ báʼtɨ́ ngaʼ ghaʼnɨ tɨ́sə́n lá, nɨghoŋ na sé tɨ́nkə.

¹²Yeso a sóŋ a mbó bo ngə́, “Nɨ yen ndzɨə.” Ngyɛʼ wa wu tse a sé zhwəŋtɨ a mbítɨ́ wɛrə ngə́, “O nɨ ɨwa le?” mbɨ́ʼ ngə́ bo zhí ngə́ a bé Maʼmbyí ɛ.

¹³Ma lan, Yeso a ghɛ́n ndɔgɨ abán za nga a mbó bo; nkɨ ngɨ ndəŋndəŋ anu nɨ ɨshwú za.

¹⁴Məzen a tíʼ mbé nkfu tsi tárə́ mbáʼ Yeso a fúnɨ́ a ɨshe a ɨshi bɨyɛʼ ɨbyi mbáʼ bɨ zhwémnɨ́nɨ́ ayi a mbó nɨvwo ə.

¹⁵Bo ghɨnə mɛ́tɨ́ a ndzɨ́ə, Yeso a bitɨ a Samɔn Bita ngə́, “Samɔn mɔn Yoane wu mbáŋnɨ́, o kɔŋ aghan ntsa adzaŋ za bə mɔʼɔ benə kɔŋnɨ le?” Samɔn Bita a chwɨ́gɨ́ ngə́, “Eŋə a Maʼmbyí, o zhi ngə́ ma kɔŋ agho ə.” Yeso a tíʼ sóŋ wəmbo ngə́, “Lətu nɨ ɨbɔ bɨ mbyindzɨ ɨban biŋ ə.”

¹⁶Ɨ bə kwiʼ zɔŋtɨ a nye nkfu tsi bá, Yeso a bítɨ́ ngə́, “Samɔn mɔn Yoane wu mbáŋnɨ́, o kɔŋ aghan le?” Samɔn Bita a chwɨ́gɨ́ ngə́, “Eŋə a Maʼmbyí, o zhi ngə́ ma kɔŋ agho ə.” Yeso a sóŋ wəmbo ngə́, “Lətu nɨ mbyindzɨ ɨtsan tsiŋ ə.”

¹⁷A nye nkfu tsa tsɨ kúʼnɨ́ tsi tárə́, Yeso a bítɨ́ ngə́, “Samɔn mɔn Yoane wu mbáŋnɨ́, o kɔŋ aghan le?” Bita a tíʼ ntsí nɨ adzə́ŋnɨ mbɨ́ʼ ngə́ Yeso a bítɨ́ ayi a nye nkfu tsa tsɨ kúʼnɨ́ tsi tárə́ ngə́, “O kɔŋ aghan le?” Ma lan, a tíʼ nchwɨ́gɨ́ wəmbo ngə́, “Maʼmbyí, o zhi anu atsum ə; o zhi ngə́ ma kɔŋ agho ə!” Yeso a sóŋ wəmbo ngə́, “Lətu a nye mbyindzɨ ɨtsə.

¹⁸Ma sǒŋ nkənu a mbó gho ghe; mbáʼ o bvúrɨ́nɨ́ ngwaʼ ngwasom, o kə́ ngwə́gɨ́ ɨtsɛʼ ɨtso ngěn agho adiʼ atsum za o kɔ́ŋnə́; lá mbáʼ o ghɨnɨ bé tankaŋ, o mɨ shiŋ mbó ɨmo, á ŋwɔn adaŋ a wəgɨ atsɛʼ azo ntiʼ ndɔgɨ agho ngɛn nɨ gho adiʼ wa ka o kɔŋ agho ngěn ghe.”

¹⁹(Yeso a kə́ soŋə a məzen lá, ndiʼə lá ndóm wa Bita a ghɨnɨ kfo ɨwu, ɨ tiʼ yen nɨ nɨfáŋ a mbó Ŋwi ə.) Yeso a tíʼ sóŋ wəmbo ngə́, “Zɔŋ aghə!”

²⁰Bita a bə́nkɨ́ ayi ndzɛn a ngyɛʼ wu mɔʼɔ wa a ndzum zɨ, wa Yeso a kɔ́ŋnɨ́ — wa a zə́ŋtɨ́nɨ́ ayi ɨ fátɨ́ a nye Yeso adiʼ a mɨdzɨ, mbitɨ ngə́, “Maʼmbyí, a mɨnaŋ atú ɨgho lá a ghɨ korɨ ɨwa le?”

²¹Mbáʼ Bita a zɛ́nɨ́ ayi lá, mbitɨ a Yeso ngə́, “Maʼmbyí, ake ghɨ fu nye a ŋwɔn wen le?”

²²Yeso a chwɨ́gɨ́ wəmbo ngə́, “Be ma ndǒ ngə́ á tsi nkuʼnɨ nkfu za ma ghɨnɨ yen, azo ɨwu a be ake le? Zɔŋ aghə!”

²³Nkərɨ tíʼ nkárɨ́ a tɨtərɨ ɨbɛn ba bɨ kɨ́nə́ ndzɔŋə a Yeso ngə́ ngyɛʼ məwen a ghɨ keʼ kfoə. Lá Yeso a sé sóŋ ngə́ a ghɨ keʼ kfoə; a sóŋ ngə́, “Be ma ndǒ ngə́ á tsi nkuʼnɨ nkfu za ma ghɨnɨ yen, azo ɨwu a be ake le?”

²⁴Wɛrə nɨ ngyɛʼ wa a sóŋnɨ́ ɨnu tsiŋ ə, zɨ wa a kɨ́nɨ́ nkɨ́ ŋwáʼnɨ́ ɨnu tsiŋ ə; bɨgɨnə kɨ nji ngə́ za a sóŋnɨ́ a nɨ nkənu ə.

²⁵Ɨnu tsɨ ghaʼnɨ tsɨ mɔʼɔ tsi ɨwu tsa Yeso a ghɨ́nə́. A kwɛ be be ngə́ bɨ ŋwáʼnɨ́ a tsɛrə ɨtsum ɨ mɔ́ʼɔ́ mɔ́ʼɔ́, muŋ ma wiʼtɨ ngə́ mbyi tsum chi keʼ nɨ adiʼ a ndě ɨŋwaʼnɨ tsa bɨ ŋwaʼnɨnɨ a tsɛrə wə mu ə.