Read Ngemba Yoane 4 Bible Online

Yoane 4 - Ngemba bible

Yoane 4

¹Bə Farisao zúʼ ngə́ Yeso a kə́ nchyɛ̌ nɨ bɨyɛʼ nkə́ ngǎ nkyi a mbó ɨbɛn ntsǎ a Yoane ghe.

²(Tsɛʼ a nkənu, Yeso zɨmboŋ a sé nkyi a mbó ŋwɔn tse gha; a bé bé bɨyɛʼ ɨbyi mbáʼ bɨ kɨ́nə́ ngǎ ghe.)

³Ma lan, mbáʼ Yeso a zúʼnɨ́ anu za bɨ kɨ́nə́ sóŋə́, wɛrə a nyɛ́ʼtɨ́ a Yudiya mbə ngɛn a Galili ə.

⁴Wɛrə a tɨnə tɨ ghěn, a ndómnji ntsa a mu Samaria ghe.

⁵A Samaria, wɛrə a yén nkón a ntáʼmbagə za bɨ kɨ́nə́ ntɔ́ŋə́ ngə́ Saika ghe. Saika wen a tsí ɨ fátɨ́ abɨŋ a ɨshe za Yakɔb a ghánɨ́ a mbó mɔn ɨyi wu mbáŋnɨ́ Yosɛb ə.

⁶Abɨ́ a nkyi a Yakɔb a tsí ɨwu ə. Mbɨ́ʼ ngə́ Yeso a kán mbɨ́ʼ nɨyen ɨni, a shíʼtɨ́ ntsí a mbyɛn abɨ́ a nkyi za. A bé tso ntənɨ nyom ə.

⁷Mangye Samaria tse a yén a ntúʼ nkyi a mu abɨ́ a nkyi za. Yeso a sóŋ a mbó mangye wa ngə́, “Gha nkyi á ma no.”

⁸(Bɨyɛʼ ɨbyi kwɛ́nə ngɛn a ntáʼmbagə a ndzúŋ mɨdzɨ ə.)

⁹Mangye wa a chwɨ́gɨ́ ngə́, “O nɨ ŋwɔn bə Yuda ma baŋnɨ mbe ŋwɔn bə Samaria ghe — a tsa lá ɨ nə́ o bitɨ nkyi wu nonɨ a mbó me le?” (Wɛrə a sóŋ a məzen lá mbɨ́ʼ ngə́ bə Yuda sé mbémnə́ bo bɨ bə Samaria ghe.)

¹⁰Yeso a chwɨ́gɨ́ ayi ngə́, “O lo bá be zhi azúm za Ŋwi a ghánə́ abɔʼnɨ ŋwɔn wa a bítɨ́nɨ́ nkyi wu nonɨ a mbó gho lá, muŋ o baŋnɨ mbitɨ ayi nɨ nkyi, a mɨ tiʼ gha nkyi a mbó gho, abə́ŋ a nkyi za a ghánɨ́ ntsi ntɨŋ ə.”

¹¹Mangye wa a sóŋ ngə́, “Tə̧, o so nɨ alonga chyɛ, abɨ́ a nkyi zen a kɨ shwiɛ. O mɨ lɔgɨ nkyi wen wa ɨ ghánɨ́ ntsi ntən lá ɨ ghé le?

¹²A lá ta ɨwɨgɨnə wu kɔ́ʼɔ́nguʼ, Yakɔb, wa a ghánɨ́ abɨ́ a nkyi zen a mbó bɨgɨnə ghe; zɨ abɔʼnɨ ɨbɔ ɨbyi nɨ mɨnyam ɨmyi bɨtsum nó nkyi wa ɨ lónɨ́ a mu abɨ́ a nkyi ziŋ ə. Ma wiʼtɨ ngə́ ka o soŋə agho lá ngə́ o tsa a Yakɔb ə, kə ndé?”

¹³Yeso a chwɨ́gɨ́ ngə́, “Ŋwɔn tsum wa a nónɨ́ nkyi wen, nji nkyi mɨ kwiʼ zaŋ ayi ɛ,

¹⁴lá ŋwɔn tsum wa a mɨ no nkyi wa ma mɨ gha, a láʼ keʼ nji nkyi bə ndzáŋə́. Nkyi wa ma mɨ gha a mbó bo mɨ tiʼ bəŋ ɨ be tso náŋə́bə́rə a mu ɨnye bo wa ɨ mɨ gha nkyi wa ɨ ghánɨ́ ntsi ntən abɔʼnɨ ntsi ntən nɨnkoŋ a mbó bo ghe.”

¹⁵Mangye wa a sóŋ ngə́, “Tə̧, gha nkyi wa a mbó me ghe! Ma lan, ma mɨ kaʼ nji nkyi bə nkwiʼ ndzaŋ, ɨ kaʼ bə nkwiʼ ntsi nɨ ɨ yen tuʼ nkyi ɨghə.”

¹⁶Yeso a sóŋ wəmbo ngə́, “Ghɛn ntɔŋ a ndóm ɨgho á bɨŋ zɨ yiŋə.”

¹⁷Wɛrə a chwɨ́gɨ́ ngə́, “Ka ma tsi aghan nɨ ndóm ə.” Yeso a chwɨ́gɨ́ ngə́, “O soŋ ɨ shiʼnɨ ngə́ ka o tsi agho nɨ ndóm ə.

¹⁸O zɔʼnə bɨlóm bi bɨtə̧̂ ghe. Ŋwɔn wa bɨŋ zɨ tsínə́ tɨtsɔŋnɨ lá ka a lanɨ mbe ayi ndóm ɨgho ghe. O soŋ nkənu a mbó me ghe.”

¹⁹Mangye wa a sóŋ ngə́, “Tə̧, ma zɛn ngə́ o nɨ ntom Ŋwi ə.

²⁰Bɨta ɨban bə kɔ́ʼɔ́nguʼ bə Samaria bɨ ghúʼsɨ́ a Ŋwi atú mbám ziŋ ə, lá bɨŋ bə Yuda soŋ ngə́ adiʼ a ngúʼsɨ́ Ŋwi a nɨ be Yerosalɛm ə.”

²¹Yeso a sóŋ wəmbo ngə́, “Mangye, nɨŋ ntəm ɨgho a nye me ghe. Nkfu ghɨ yen za ɨbɛn ghɨ keʼ a Tarɨ bə ngúʼsɨ́ atú mbám zen kə a Yerosalɛm ə.

²²Bɨŋ bə Samaria ka nɨ lanɨ nji awɨŋ a ŋwɔn wa nɨ ghúʼsɨ́nə́ ghe; lá bɨgɨ bə Yuda zhi a ŋwɔn wa bɨgɨ ghúʼsɨ́nə́ mbɨ́ʼ ngə́ ɨloŋ ɨ lǒ lá a mbó bə Yuda ghe.

²³Lá nkfu ɨ yiŋə, ɨ kɨnə nkuʼə, mbáʼ a ntsǎ a ndzum mɨtən mɨ Azhwi a Ŋwi, ɨbɛn mɨ ghuʼsɨ a Tarɨ adzaŋ za wɛrə a lanɨnɨ mbe, ngǎ ngótɨ́ aghuʼsɨ wəmbo adzaŋ za a lɔnə ghe.

²⁴Ŋwi a nɨ Azhwi ə. A mɨ be tsɛʼ a ntsǎ a ndzum mɨtən mɨ Azhwi azhi mbáʼ ɨbɛn mɨ ghuʼsɨ ayi adzaŋ za a lanɨnɨ mbe.”

²⁵Mangye wa a sóŋ wəmbo ngə́, “Ma zhi ngə́ Wa bɨ Zɔ́ʼnɨ́ wa a ghɨ yiŋə. A nkfu za a yenɨ, wɛrə a mɨ soŋ ɨnu ɨtsum a mbó bɨgɨ ə.”

²⁶Yeso a chwɨ́gɨ́ ngə́, “Ma lá wɛrə ghe, me wa ma ghamnə bɔgə lá.”

²⁷A nyom məwa bɨyɛʼ bɨ Yeso bɨ́ŋə; anu zə wu a kɨ́ʼnɨ́ awa ngə́ bo zɛ́n ayi a ghamnɨnə bo mangye ə. Lá ŋwɔn nɨbo a sé bitɨ a mbó Yeso ngə́, “O lǒ ake?” kə ngə́, “O ghamə bɨŋ zɨ ngə́ ke le?”

²⁸Mangye wa a tíʼ nyɛʼtɨ a sotɨ nkyi ɨyi, mbə́ mbən a ntáʼmbagə wa, ɨ soŋ a mbó ɨbɛn ɨwu ngə́,

²⁹“Nɨ yen ndzɛn a ŋwɔn wa a soŋnɨ a mbó me ɨnu ɨtsum tsa ma láʼnə ngɨə. A nə a chi be Wa bɨ Zɔ́ʼnɨ́ wa le?”

³⁰Bo tíʼ nyɛʼtɨ ntáʼmbagə wa ngɛn a mbó Yeso ghe.

³¹A kə́ mbé lá bɨyɛʼ bɨ Yeso lɛgɨnə ayi ɨ sóŋə́ ngə́, “Ndiʼ Aŋwaʼnɨ dzɨ a məzum ə!”

³²Lá wɛrə a chwɨ́gɨ́ ngə́, “Ma tsi nɨ mɨdzɨ a ndzɨə ma ka nɨ zhi awɨŋ anu mbɨ́ʼ a mɛrə ghe.”

³³Ma lan, bɨyɛʼ ɨbyi tíʼə mbítə́ a tɨtərɨ bo nɨbo ngə́, “Lá be ngə́ ŋwɔn tse a yen nɨ mɨdzɨ wəmbo le?”

³⁴Yeso a sóŋ a mbó bo ngə́, “Mɨdzɨ ɨman a nɨ ngɨ anu za ŋwɔn wa a tságɨ́nɨ́ aghan a lɔnə abɔʼnɨ ɨ mɛtɨ afaʼ za a ghánɨ́ ngə́ á ma faʼə.

³⁵Nɨ tsi nɨ nɨgham na nɨ sóŋnə́ ngə́, ‹A bvurɨ bɨsaŋ bi nɨkwa á bɨ fuʼ mɨdzɨ ə.› Lá ma sóŋə́ a mbó bɨŋ ə, nɨ liŋ mɨshwom ɨ shiʼnɨ ə; ɨdzúm tsa tsɨ kwínə́ ngǎ mɨdzɨ tənə ntiʼ adiʼ a fuʼə ghe!

³⁶Ŋwɔn wa a fuʼnə mɨdzɨ men bɨ tfúə ayi, a ghǒtɨnə mɨntam mɨ ntsi ntən nɨnkoŋ; taŋ á mbimɨdzɨ bo ɨfuʼmɨdzɨ á bo zɨ ghɨ ndórɨ́kɨ́ bo bɨtsum ə.

³⁷Nɨgham nen a nɨ nkənu ngə́, ‹Táʼ ŋwɔn a bi, wu mɔʼɔ a fuʼə.›

³⁸Ma tsagɨ awən ngə́ á nɨ ghɛn ɨ fuʼ mɨdzɨ a mu ɨshwom wa nɨ sé líʼə. A líʼ ɨbɛn bə daŋ, nɨ tiʼ ndzɨ abi afaʼ aza ghe.”

³⁹Bə Samaria bə ghaʼnɨ a mu ntáʼmbagə wa nɨ́ŋ mɨntəm ɨma a nye Yeso mbɨ́ʼ ngə́ mangye wa a sóŋ ngə́, “A sóŋ a mbó me ɨnu ɨtsum tsa ma kwɛ́nə ngɨə.”

⁴⁰Ma lan, bə Samaria ghɨnə ngyén wəmbo lá, mbuʼ mbó ngə́ á tsi bo bo ghe. Yeso a tíʼ ntsí ɨwu atú njwi tsi bá ghe.

⁴¹Bə ghaʼnɨ kwíʼ nɨ́ŋ mɨntəm ɨma a nye Yeso mbɨ́ʼ nkən ɨyi,

⁴²ntiʼ soŋ a mbó mangye wa ngə́, “Ka bɨgɨ nɨŋ awɨgɨ mɨntəm ɨmɨgɨ a nye Yeso tɨtsɔŋnɨ lá mbɨ́ʼ anu za o sóŋnɨ́ lá, a nɨ mbɨ́ʼ ngə́ bɨgɨ mboŋ bɨgɨ zuʼ wə ntsu nkɨ ntiʼ nji ngə́, tsɛʼ a nkənu, a lanɨ mbe ŋwɔn wa a loŋnə atuəshe.”

⁴³Yeso a ghɨnə ntsí bo bo atú njwi tsa tsi bá, ndo ngɛn a Galili ə.

⁴⁴Mbɨ́ʼ ngə́ wɛrə zɨmboŋ a kwɛ́nə soŋ ngə́, “Ka bɨ ndiʼə ayi mbɔm zɨ shiʼnɨ a mbó ntom Ŋwi alaʼ bo ghe.”

⁴⁵Mbáʼ a yénɨ́ nkón a Galili, ɨbɛn ɨwu kwárɨ́ a wɛrə mbɨ́ʼ ngə́ bo ghɛ́nə a Nɨdorɨ nɨ Tsa-yɛʼnɨ a Yerosalɛm ndzɛn ɨnu ɨtsum tsa a ghɨ́nɨ́ ɨwu a nkfu nɨdorɨ na.

⁴⁶Ma lan, Yeso a bə́ ngɛn a Kana a mu Galili adiʼ wa a bə́ŋnɨ́ nkyi a nye mɨluʼ lá. Ŋwɔn afaʼ wu ngwi wu gobɨna a tsí ɨwu wa mɔn ɨyi wu mbáŋnɨ́ a kɨ́nə́ ngǒ a Kabɛrɨnaum ə.

⁴⁷A ghɨnə ndzúʼ ngə́ Yeso a ló a Yudiya ngyen a Galili, a ghɛ́n mbuʼ mbó wəmbo ngə́ á wɛrə a ghɛn a Kabɛrɨnaum ntsuʼ a mɔn ɨyi, wa a tíʼnɨ́ a ntsu nɨvwo ə.

⁴⁸Yeso a sóŋ wəmbo ngə́, “Ka ŋwɔn nɨbən wu tse a láʼ nɨŋ ayi ntəm ɨyi a nye me tɨkə a zɛn ɨnu tsɨ yerɨnɨ-yerɨnɨ abɔʼnɨ tsɨ tsanɨnɨ ə.”

⁴⁹Ŋwɔn wu ngwi wa a chwɨ́gɨ́ ngə́, “Tə̧, yen á tɨ ghɛn bɔŋ á mɔn ɨghan a kfoə.”

⁵⁰Yeso a sóŋ wəmbo ngə́, “Ghen, mɔn ɨgho a mɨ tsi ntɨŋə!” Ŋwɔn wa a nɨ́ŋ ntəm ɨyi a nye nɨgham na Yeso a ghámnɨ́, ntiʼ ngen.

⁵¹A tɨnə tɨ kwě, ngaŋ afaʼ ɨchi bom ayi a ndómnji nɨ nkən ngə́, “Mɔn ɨgho wu mbáŋnɨ́ a mɨ tsi ntɨŋə!”

⁵²A bítɨ́ awa nkfu za mɔn wa a bíʼnɨ́nɨ́ ɨ shwétə́ ghe. Bo chwɨ́gɨ́ ngə́, “A kɨ be nyom wi mɔ́ʼɔ́ ɨzo mbáʼ atú zə buʼnɨ za a kɨ nyɛʼtɨnɨ ayi ɛ.”

⁵³Ta bɨ mɔn wa a tíʼ ngwáʼtɨ́ ngə́ a kɨ be nyom wa Yeso a kɨ soŋnɨ a mbó zɨ ngə́, “Mɔn ɨgho wu mbáŋnɨ́ a mɨ tsi ntɨŋə.” Ma lan, wɛrə bo ngwəgɨ ɨzhi tsum tíʼ nɨ́ŋ mɨntəm ɨma a nye Yeso ghe.

⁵⁴Nə bé anu zə yerɨnɨ-yerɨnɨ za a kúʼnɨ́ ɨdiʼ tsi bá mbáʼ Yeso a lonə a Yudiya ngɛn a Galili ngɨə.