Read Ngemba Yoane 5 Bible Online

Yoane 5 - Ngemba bible

Yoane 5

¹Məzen a tsanə, Yeso a lo ɨwu nkɔʼ ngɛn a Yerosalɛm a nɨdorɨ nɨ bə Yuda ghe.

²Ɨ gha a Yerosalɛm, atsum a tsí ɨ fatɨ Ntsu Abuʼ Mbyindzɨ, ntsi nɨ mɨntaŋ mə tɛʼnɨ mi mɨntə̧̂ ghe. A nye nɨgham nɨ bə Ɛbal bɨ tɔŋə a zɛrə ngə́ Bɛtɨzata[3] ghe.

³Ɨnɔ ngaŋ mɨghɔ wu wi ɨ nɔ́ŋ a mu mɨntaŋ mə tɛʼnɨ ma; bɨfɨgɨ, bɨtə́ngórə́kuʼ abɔʼnɨ bɨchɛbɨŋ ə.

⁴[4]

⁵Ŋwɔn tse a tsí ɨwu adiʼ məwa, wa a ghɔ́nə atú ɨlom mɨghúm mɨntárə́ nɨ ntsɔb nɨfə̧ ghe.

⁶Yeso a zɛ́n ayi a nɔŋ ɨwu, nji ngə́ a ghɔ́nə a nye aghagɨ zə sa; ntiʼ mbitɨ ayi ngə́, “O lǒ ɨ shwetə le?”

⁷Ŋwɔn nɨghɔ wa a chwɨ́gɨ́ ngə́, “Tə̧, ka ma tsi aghan nɨ ŋwɔn wa a mɨ nɨŋ aghan a mu atsum zen mbáʼ bɨ chiʼnɨ nkyi ɛ; ma tɨ nyuʼnə a nkúŋə́ lá, ŋwɔn adaŋ a wasɨ aghan nkon a ntsambyi ɛ.”

⁸Yeso a sóŋ wəmbo ngə́, “Lo atɨ́, mbyɛn abaʼ azo, a ntɛmə ngěn ghe.”

⁹Ŋwɔn wa a byí shwétɨ́; mbyɛn a abaʼ azhi, mbiʼnɨ ntɛ́mə́ ngěn ghe. Anu məzen a fú lá a nye Njwi Alaʼ Ŋwi,

¹⁰bɨsáʼ bɨ ɨlaʼ bɨ bə Yuda sóŋ a mbó ŋwɔn wa bɨ tsúʼnɨ́ ayi lá ngə́, “Sɨŋə nɨ Njwi Alaʼ Ŋwi ə, o fasɨ a Nyɔngɔŋ ɨwɨgɨnə a mbyɛʼ abaʼ azo ə.”

¹¹A chwɨ́gɨ́ a mbó bo ngə́, “Ŋwɔn wa a lonɨ ntsuʼ aghan, a lo soŋ a mbó me ngə́ á ma byɛn abaʼ azan ntɛ́mə́ ngěn aghə.”

¹²Bo bítɨ́ ayi ngə́, “Mba wa a lonɨ soŋ a məzen a mbó gho a lá ɨwa le?”

¹³Lá ŋwɔn wa bɨ tsúʼnɨ́ ayi lá a sé a Yeso zhi, mbɨ́ʼ ngə́ ɨbɛn a ɨnɔ tsí adiʼ wa, Yeso a kɨ ndzɔŋ nchwu ndo ayi ɛ.

¹⁴A nkfu ndzum, Yeso a zɛ́n ayi a mu Ndáŋwi zɨ Ngwi, ɨ soŋ wəmbo ngə́, “Ze azo, tɨtsɔŋnɨ o shwetɨnə ghe; o tiʼ nkyɛntɨ ɨ kwiʼ ghɨ ɨbvu muŋ zə tɨbɔŋ a mɨ bə tiʼ zɛn agho.”

¹⁵Ŋwɔn wa a tíʼ ndo ngɛn soŋ a mbó bɨsáʼ bɨ ɨlaʼ bɨ bə Yuda ngə́ ayi lá a kɨ tsuʼ Yeso ghe.

¹⁶Ma lan, bo tíʼ mbiʼnɨ a ndɨ́gɨ́ Yeso mbɨ́ʼ ngə́ a tsúʼ a ŋwɔn a Njwi Alaʼ Ŋwi ə.

¹⁷Yeso a chwɨ́gɨ́ awa ngə́, “Ta ɨghan a faʼə tsɛʼ nkfu tsum ə, ma tsi nɨ ɨ zagɨ ɨ kə́ faʼnə ghe.”

¹⁸Nɨgham mənen ghɨ́ bɨsáʼ bɨ ɨlaʼ bɨ bə Yuda tiʼə ndǒ mɨndóm a njwítɨ́ zɨ; mbɨ́ʼ ngə́ a sé tsɛʼ a nyɔngɔŋ Njwi Alaʼ Ŋwi fasɨ, a sóŋ ngə́ Ŋwi a nɨ Ta ɨyi, ndiʼ lá ngə́ wɛrə a ghɨ́ atuəmbəm azhi a be ndəŋndəŋ bo Ŋwi ə.

¹⁹Yeso a chwɨ́gɨ́ a mbó bo ngə́, “Ma soŋ nkənu a mbó bɨŋ ə; Mɔn Mbáŋnɨ́ a chi keʼ anu zə tse nɨ atú azhi ghɨə; a ghɨə tsɛʼ anu za a zɛ́nə́ Ta ɨyi a ghɨnə ghe. Anu za Tarɨ a ghɨnə, Mɔn Mbáŋnɨ́ a kə́ ngɨə ghe.

²⁰Mbɨ́ʼ ngə́ Tarɨ a kɔŋ a Mɔn Mbáŋnɨ́ ɨyi, ndiʼə anu atsum za zɨə ghɨnə wəmbo ə. A mɨ kwiʼ diʼ wəmbo ɨnu a ngɨə tsa tsɨ ghɛnɨ nɨ mbyi ntsa a zen, á kɨʼnɨ awɨŋ ə.

²¹Tso mbáʼ Tarɨ a zhwémnɨ́nə́ ɨbɛn ba bɨ kfokɨnɨ, ngǎ ntsi ntən a mbó bo lá, ndəŋndəŋ Mɔn Mbáŋnɨ́ a ghǎ ntsi ntən a mbó ɨbɛn ba zɨə lɔnɨ ngǎ a mbó bo ghe.

²²Ka Tarɨ a sáʼə ayi a ŋwɔn tsɛrə ghe, lá a ghanə mɨtən mɨtsum a mbó Mɔn Mbáŋnɨ́ ɨyi a sáʼə,

²³taŋ á ŋwɔn tsum a ghɨ́ nkɔ́ʼsɨ́ a Mɔn Mbáŋnɨ́ atɨ́ a nye ndəŋndəŋ ndóm wa bɨ kɔ́ʼsɨ́nə́ a Tarɨ atɨ́ ə. Ŋwɔn wa a se a Mɔn Mbáŋnɨ́ atɨ́ kɔʼsɨ, ka a kɨ nkɔʼsɨ ayi atɨ́ a Tarɨ, zɨ wa a tsagɨnɨ ayi ɛ.

²⁴Tsɛʼ a nkənu, tsɛʼ a nkənu, ma soŋ a mbó bɨŋ ə, ŋwɔn wa a zúʼnə́ nɨgham ɨnan, ntiʼ nkɨ nɨŋ ntəm ɨyi a nye zɨ wa a tságɨ́nɨ́ aghan a tsi nɨ ntsi ntən nɨnkoŋ ə; bɨ mɨ keʼ ayi bə sáʼə; a binə ntsa a ntsu nɨvwo, nkon a mu ntsi ntɨŋ ə.

²⁵Tsɛʼ a nkənu, tsɛʼ a nkənu, ma soŋə a mbó bɨŋ ə, nkfu ghɨ kuʼ, a kɨ mbe zɛrə tɨtsɔŋnɨ, mbáʼ ɨkfú ɨbɛn ghɨnɨ zuʼ nji Mɔn Ŋwi wu Mbáŋnɨ́, á ba bɨ zuʼnɨ bə ntsi ntɨŋ ə.

²⁶Tsɛʼ tso mbáʼ ntsi ntən ɨ lonə a mbó Tarɨ lá, ndəŋndəŋ a kɨ ngɨ ngə́ á ntsi ntən ndǒ a mbó Mɔn Mbáŋnɨ́ ɨyi ɛ.

²⁷Wɛrə a kɨnə nga mɨtən a mbó Mɔn Mbáŋnɨ́ ngə́ á sáʼ, mbɨ́ʼ ngə́ wɛrə a nɨ Mɔn Ŋwɔn ə.

²⁸A keʼ awən kɨʼnə; nkfu yiŋə mbáʼ bɨkfú bɨtsum ghɨnɨ zuʼ nji ɨzhi

²⁹ɨ fu a mu mɨshe ɨma: ɨbɛn ba bɨ ghɨnɨ ɨbɔŋ, bɨ ghɨ zhwémnɨ́ awa á bo tsi ntən, á ba bɨ ghɨnɨ ɨbvu á bɨ zhwemnɨ, á bɨ chɛrɨ ɨsáʼ ɨwa ngə́ bo vwo ɨsáʼ ə.”

³⁰“Ma chi kaʼ ghɨ anu zə tse be nɨ mɨtən ɨmə; ma sáʼə tsɛʼ adzaŋ za Ŋwi a soŋnɨ a mbó me, ma lan, nɨsáʼ ɨnan nɨ tɛmnɨ, mbɨ́ʼ ngə́ ka ma njwə́ŋtə́ aghan be a ngɨ za ma lɔnə, lá ma ghɨə tsɛʼ za zɨ wa a tságɨ́nɨ́ aghan a lɔnə ghe.

³¹Be ma be atɛmə-ndzě a mbó atuəmbəm azan, muŋ za ma sóŋnə́ a se nkənu be.

³²Lá ŋwɔn adaŋ a tsi ɨwu wa a nɨ atɛmə-ndzě a nkfu me ghe, ma lan, ma zhi ngə́ anu za a sóŋnə́ mbɨ́ʼ aghan lá a nɨ nkənu ə.

³³Nɨ tságɨ́ ntóm ɨtsən lá a mbó Yoane ghe, wɛrə a kɨ́ ngam lá a ɨkum nkənu ə.

³⁴Ka a be ayi be ngə́ ma tsi nɨ ɨ zagɨ tsi nɨ atɛmə-ndzě wa a nɨ ŋwɔn mɨsɔŋ a ntsu ə; ma soŋə a zen lá taŋ á nɨ chi kwarɨ ɨloŋ ə.

³⁵Yoane a bé lá tso nkaʼ, nkɨ́ə nkə́ mbáŋə́ ghe. A nye məkum a nkfu, nɨ kə́ ndǒ ndorɨkə a mu nkaʼ ɨyi ɛ.

³⁶Lá ma tsi nɨ atɛmə-ndzě a nkfu me wa a ghɛnɨ nɨ mbyi ntsa nkənu za Yoane a zhínɨ́ ɨ soŋə: ɨnu tsa ma ghɨnə, ɨ kɨ ghɨ a tsɛrə ɨ ghɛn mɛtɨ, lá be ngə́, ɨnu tsa Ta ɨghan a ghánɨ́ a mbó me a ngɨə, mətsen tsɨ ghamə a nkfu me, ndiʼə ngə́ Tarɨ a tságɨ́ aghə.

³⁷Tarɨ, zɨ wa a tságɨ́nɨ́ aghan, a nɨ atɛmə-ndzě a nkfu me ghe. Nɨ láʼnə mbvurɨ nji ɨzhi tɨ zuʼ kə ndzɛn ɨshi ɨyi,

³⁸nɨ se nkən ɨyi a mu mɨntəm ɨmən lɛn, mbɨ́ʼ ngə́ ka nɨ nɨŋ awən mɨntəm ɨmən a nye zɨ wa wɛrə a tságɨ́nə́.

³⁹Nɨ yɛ̌ʼ Aŋwaʼnɨ a Ŋwi, mbɨ́ʼ ngə́ nɨ wiʼtɨ ngə́ ɨ wə mu nɨ mɨ zɛn ntsi ntən nɨnkoŋ ə. Aŋwaʼnɨ a Ŋwi məzen, a ghamə mbɨ́ʼ aghə!

⁴⁰Lá ka nɨ kɔŋ awən a ngyiŋə a mbó me, taŋ ɨ yen kwarɨ ntsi ntɨŋ ə.

⁴¹Ka ma ndǒ aghə mbontə za ɨ lonɨ a mbó ŋwɔn mɨsɔŋ ə.

⁴²Lá ma zhi ɨbə́ŋ ɨbɛn tsa nɨ nɨ bɛrə, nkɨ nji ngə́ ka nɨ tsi awən nɨ akɔŋnɨ a nye Ŋwi a mu mɨntəm ɨmɨŋ ə.

⁴³Ma yen nɨ mɨtən mɨ Ta ɨghə, lá nɨ keʼ aghan kwarə; lá ŋwɔn tse a be yen nɨ ɨmyi mɨtən muŋ nɨ mɨ kwarɨ ayi ɛ.

⁴⁴Nɨ kɔŋ mbontɨ ɨtumbəm ɨtsən nɨ bən nɨ bɨŋ ə, lá nɨ se kɔŋ ngɨə ngə́ á ŋwɔn wa a nunɨ zɨzɨ, mbe Ŋwi a bontɨ awɨŋ ə; nɨ chi tiʼ nɨŋ mɨntəm ɨmən a nye me lá ɨ nə́ le?

⁴⁵Lá, á nɨ keʼ wiʼtɨ ngə́ a lá me wa ma ghɨnɨ kaŋ awən a ɨshi Ta ɨghə. Mǒse, zɨ wa nɨ nɨŋnɨ ntsiŋə nɨ ntəm tsum ɨzən wə ɨnye, a nɨ tsɛʼ zɨ wa a ghɨnɨ kaŋ awɨŋ ə.

⁴⁶Nɨ bé lánɨ́ nɨ́ŋ mɨntəm ɨmən a nye Mǒse muŋ nɨ nɨŋ mɨntəm ɨmən a nye me, mbɨ́ʼ ngə́ Mǒse a ŋwáʼnɨ́ mbɨ́ʼ aghə.

⁴⁷Lá, tso mbáʼ ka nɨ nɨŋ awən mɨntəm ɨmən a nye ɨnu tsa wɛrə a ŋwáʼnɨ́nɨ́ lá, nɨ chi tiʼ nɨŋ mɨntəm ɨmən a nye ɨnu tsa ma sóŋnə́ lá ɨ nə́ le?”