Read Ngemba Yoane 9 Bible Online

Yoane 9 - Ngemba bible

Yoane 9

¹Mbáʼ Yeso a kɨ́nə́ ntɛ́mə́ ngěn, wɛrə a zɛ́n a ŋwɔn wa bɨ jwínɨ́ a nye ɨfɨgɨ ə.

²Bɨyɛʼ ɨbyi bítɨ́ ayi ngə́, “Ndiʼ Aŋwaʼnɨ, a nɨ ɨbvu ɨwa wa ɨ ghɨnɨ bɨ jwi a ŋwɔn wen a be ɨfɨgɨ ə, ɨbvu ŋwɔn wen kə wu ta ɨyi bo nɨmi ɨyi le?”

³Yeso a chwɨ́gɨ́ ngə́, “A sé bé ngə́ ŋwɔn wen a ghɨ́ ɨbvu, kə ta ɨyi bo nɨmi ɨyi ɛ. A fɨgɨ lá taŋ á bɨ ze adzaŋ za mɨtən mɨ Ŋwi faʼnə wə ɨnye ə.

⁴Mbáʼ bɨgɨnə bvurɨnɨ ntsi nəzhwɨgɨnɨ lá, bɨgɨnə tsi nɨ ɨ zagɨ faʼnə afaʼ a ŋwɔn wa a tságɨ́nɨ́ aghə; ɨtfúʼ ɨ fɨ́ŋə́ ngyíŋə́ mbáʼ ŋwɔn a chinɨ keʼ bə faʼə.

⁵Adzaŋ za ma bvurɨnɨ ntsi atuəshe lá, ma nɨ nkaʼ a mbó atuəshe.”

⁶Mbáʼ a sóŋnɨ́ a məzen lá, ntfugɨ mɨtwe a tɨshe, ntɔbtɨ atətsáʼnɨ́ ɨwu, ndɔgɨ atətsáʼnɨ́ za ndzɔʼ ɨmɨgɨ mɨ ŋwɔn wa ɨwu,

⁷ɨ soŋ wəmbo ngə́, “Ghɛn sugɨ ɨshi ɨgho a mu atsum a Silom ə.” (Ɨ diʼ lá ngə́ “Tyigə”). Ma lan, ŋwɔn wa a ghɛ́n sugɨ ɨshi ɨyi ɨwu ntɨ bɨŋ ə, ngyiŋə ndzě ɨdiʼ ə.

⁸Ngaŋ nɨbarə abɔʼnɨ ɨbɛn ba bɨ kwɛ́nə ndzɛ́n ayi tso ŋwɔn wa a lɔ́ntɨ́nɨ́ ɨdzúm, tíʼ mbítɨ́ ngə́, “A se ŋwɔn wa a kɨ chinə shíʼtə́ nchyɛ̌ ndɔ́ntɨ́ ɨdzúm lá a wen be le?”

⁹Bə tse chwɨ́gɨ́ ngə́, “A nɨ zɨə,” lá bə mɔʼɔ chwɨ́gɨ́ ngə́, “Ngáŋ a se zɨ be; a fi ayi ɨ finə.” Ma lan, ŋwɔn wa zɨmboŋ a sóŋ ngə́, “Ma lá wɛrə ghe.”

¹⁰Bo bítɨ́ ayi ngə́, “A ghɨ ake o chi bə ze ɨdiʼ tɨtsɔŋnɨ le?”

¹¹Ŋwɔn wa a chwɨ́gɨ́ ngə́, “Ŋwɔn wa bɨ tɔ́ŋnə́ ngə́ Yeso lá a lo ntɔbtɨ atətsáʼnɨ́ ndzɔʼ ɨmɨgɨ ɨman ɨwu, ɨ soŋ a mbó me ngə́ á ma ghɛn atsum Silom ɨ sugɨ ɨshi ɨghan ɨwu ə. Ma lan, ma lo ngen. Tsɛʼ mbáʼ ma lonɨ sugɨ ɨshi ɨghan lá, ɨmɨgɨ ɨmə ŋaʼnə.”

¹²Bo bítɨ́ ayi ngə́, “A me?” A chwɨ́gɨ́ ngə́, “Ka ma zhi aghə adiʼ za a tsinə.”

¹³Bɨ tíʼ ndɔgɨ a ŋwɔn wa a fómnɨ́ mbé ɨfɨgɨ lá ngɛn nɨ wɛrə a mbó bə Farisao ghe.

¹⁴Ze azo, njwi za Yeso a tɔ́btɨ́nɨ́ atətsáʼnɨ́ za ɨ ŋaʼ ɨmɨgɨ mɨ ŋwɔn wa ɨwu lá, ɨ bé Njwi Alaʼ Ŋwi ə.

¹⁵Bə Farisao tíʼ bə nkwiʼ mbitɨ adzaŋ za ɨmɨgɨ ɨmyi tsánɨ́ ɨ ŋaʼnə. Ŋwɔn wa a sóŋ a mbó bo ngə́, “A lo ndzɔʼ atətsáʼnɨ́ a ɨmɨgɨ me, ma tiʼ ngɛn ɨ sugɨ ɨshi ɨghan, ntiʼ ndze ɨdiʼ ə.”

¹⁶Bə Farisao ba bə tse sóŋ ngə́, “Ŋwɔn wa a lonɨ ngɨ a məzen a chi keʼ a mbó Ŋwi lo, mbɨ́ʼ ngə́ ka a ndzúʼnə́ ayi a nyɔngɔŋ Njwi Alaʼ Ŋwi ə.” Lá bə mɔʼɔ bítɨ́ ngə́, “Be ngaŋ ngɨ mɨbvu, a ghɨ ɨbə́ŋ ɨnu tsə yerɨnɨ-yerɨnɨ tsen lá ɨ nə́ le?” Ayɛbtɨ a tíʼ ntsí a tɨtərɨ bo ghe.

¹⁷Ma lan, bə Farisao tíʼ nkwiʼ mbə mbitɨ a ŋwɔn wa ngə́, “Mbáʼ o soŋnɨ ngə́ a ghɨ o ze ɨdiʼ lá, o soŋ ngə́ ke mbɨ́ʼ ayi le?” Ŋwɔn wa a chwɨ́gɨ́ ngə́, “A nɨ ntom Ŋwi ə.”

¹⁸A tsánɨ́ a mbó bɨsáʼ bɨ ɨlaʼ bɨ bə Yuda a nɨ́ŋ mɨntəm ɨma ɨwu ngə́ a kwɛ́nə fɨ́gɨ́, ɨmɨgɨ ɨmyi tiʼ mbə ŋaʼnɨ, ma lan, bo tɔ́ŋ a tarɨ bo má ŋwɔn wa ɨmɨgɨ ɨmyi ŋáʼnɨ́nɨ́ lá,

¹⁹ntiʼ mbitɨ awa ngə́, “A nɨ mɔn ɨwən wu mbáŋnɨ́ a wen le? Nɨ soŋ ngə́ nɨ jwí ayi a be ɨfɨgɨ; a tiʼ ntsa lá ɨ nə́ a tiʼə ndzě ɨdiʼ tɨtsɔŋnɨ lá le?”

²⁰Ta ɨyi bo nɨmɨ ɨyi chwɨ́gɨ́ ngə́, “Bɨgɨ zhi ngə́ a nɨ mɔn ɨwɨgɨ wu mbáŋnɨ́ a wiŋ ə, nkɨ mbe ngə́ bɨ jwí ayi a be ɨfɨgɨ ə.

²¹Lá adzaŋ za a tsanɨ ntiʼə ndzě ɨdiʼ tɨtsɔŋnɨ bɨgɨ se zhi, nkeʼ kɨ nji a ŋwɔn wa a ghɨnɨ ɨmɨgɨ ɨmyi ŋaʼnə. Bitɨnə ayi ɛ; a kwinə ghe, a chi kɨ chwɨgɨ a mbó atuəmbəm azhi ɛ!”

²²Ta ɨyi bo nɨmi ɨyi sóŋ adzaŋ məwen lá mbɨ́ʼ ngə́ bo kə́ mbɔ́gɨ́ ɨmɨgɨ mɨ bɨsáʼ bɨ ɨlaʼ bɨ bə Yuda, ba bɨ kwɛ́nə mbemnɨ ngə́ be ŋwɔn tse a nɨŋ ntəm ɨyi ɨwu ngə́ Yeso a nɨ Wa bɨ Zɔ́ʼnɨ́, bɨ fɨgɨ ayi ɨ kwiʼ bə kon a ndáŋwi bə Yuda ghe.

²³Nə nɨ anu za a ghɨ́nɨ́ ta ɨyi bo nɨmi ɨyi tiʼ soŋ ngə́, “A kwinə ghe, bitɨnə ayi ɛ!”

²⁴A nye nkfu tsa tsɨ kuʼnɨ tsi bá, bo tɔ́ŋ a ŋwɔn wa bɨ jwínɨ́ a nye ɨfɨgɨ lá a bə ngyen a mbó bo, bo soŋ wəmbo ngə́, “Kaʼ a ɨshi Ŋwi ngə́ o mɨ soŋ nkənu ə! Bɨgɨ zhi ngə́ ŋwɔn wen wa a tsuʼnɨ agho lá a nɨ ngaŋ ngɨ mɨbvu ə.”

²⁵Ŋwɔn wa a chwɨ́gɨ́ ngə́, “Kə a be ngaŋ ngɨ mɨbvu kə ngáŋ muŋ, ka ma zhi aghə; táʼ anu wa ma zhinɨ a nɨ ngə́, ma fɨ́gə, tɨtsɔŋnɨ ma chi ze ɨdiʼ ə.”

²⁶Bo bítɨ́ ayi ngə́, “A kɨ ghɨ lá ake a ɨnye gho ghe? A kɨ tsa lá ɨ nə́ ntsuʼ ɨfɨgɨ ɨzo ghe?”

²⁷A chwɨ́gɨ́ a mbó bo ngə́, “Ma kwɛnə soŋ a mbó bɨŋ ə, nɨ ton awən a njwíʼtə́ ghe. Nɨ lǒ ntiʼ kwiʼ bə zuʼ anu zə wu lá ngə́ ke le? Nɨ lǒ kɨ be bɨyɛʼ ɨbyi le?”

²⁸Bo zɔ́m ayi ɨ soŋ ngə́, “O nɨ ngyɛʼ mba yirɨ ə, lá bɨgɨ be bɨyɛʼ bɨ Mǒse ghe.

²⁹Bɨgɨ zhi ngə́ Ŋwi a ghám a mbó Mǒse ghe; lá mbɨ́ʼ a wiŋ ŋwɔn, ka bɨgɨ bi nji awɨgɨ adiʼ za a lonɨ ɨwu ə!”

³⁰Ŋwɔn wa a chwɨ́gɨ́ ngə́, “Məzen a nɨ anu zə kɨʼnɨnɨ be tɨsɨŋə! Ka nɨ zhi awɨŋ adiʼ za a lonɨ ɨwu ə, lá a tsúʼ ɨfɨgɨ ɨzə!

³¹Bɨgɨ zhi ngə́ ka Ŋwi a njwíʼtə́ ayi a mbó ngaŋ ngɨ mɨbvu ə; wɛrə a zhwíʼtə́ a mbó ɨbɛn ba bɨ diʼnɨ mbɔm zɨ shiʼnɨ a mbó zɨ nkə́ ngɨə a za wɛrə lɔnə ghe.

³²Nchwuʼnɨ mbáʼ mbyi ɨ bíʼnɨ́nɨ́, bɨ láʼnə nkeʼ zúʼ ngə́ ŋwɔn tsɛrə a ŋáʼnə ɨmɨgɨ mɨ ŋwɔn tse wa bɨ jwínɨ́ ayi a nye ɨfɨgɨ ə.

³³Ŋwɔn wen a be tú lá a mbó Ŋwi lo, muŋ a chi keʼ anu zə tse ghɨə.”

³⁴Bo chwɨ́gɨ́ wəmbo ngə́, “Bɨ jwí agho nkɨ nkugɨ a mu ɨbvu ə, o chi diʼ awɨgɨ le?” Bo tíʼ ntyiŋ ayi ntsagɨ abyɛn ndáŋwi bə Yuda ghe.

³⁵Mbáʼ Yeso a zúʼnɨ́ anu za a fúnɨ́ lá, wɛrə a tsɔ́ʼ aku a ŋwɔn wa ndzɛn ayi, ntiʼ mbitɨ ayi ngə́, “O nɨŋ ntəm ɨgho a nye Mɔn Ŋwɔn le?”

³⁶Ŋwɔn wa a chwɨ́gɨ́ ngə́, “Tə̧, Mɔn Ŋwɔn wen a lá ɨwa, taŋ á ma chi nɨŋ ntəm ɨghan wə nye le?”

³⁷Yeso a sóŋ wəmbo ngə́, “O kɨ zɛnə ayi ɛ, a kə́ ngámə́ wɛrə a mbó gho tɨtsɔŋnɨ ə.”

³⁸A tíʼ soŋ a mbó Yeso ngə́, “Maʼmbyí, ma nɨŋ ntəm ɨghan wə ɨnye.” Ntiʼ nkwem mɨkwiʼtɨ ɨmyi a ɨshi Yeso ghe.

³⁹Yeso a sóŋ ngə́, “Ma yén a mu mbyi wen a sáʼə, taŋ á bɨfɨgɨ chi zɛn ɨdiʼ, á ba bɨ zɛ́nɨ́ ɨdiʼ bəŋ bɨfɨgɨ ə.”

⁴⁰Bə Farisao bə tse ba bɨ tsínɨ́ ɨwu zúʼ a məzen, ntiʼ mbitɨ ayi ngə́, “Bɨgɨ kwaʼtɨ ngə́ o so sóŋə́ lá ngə́ bɨgɨ kɨ mbe bɨfɨgɨ ə, kə ndé?”

⁴¹Yeso a chwɨ́gɨ́ ngə́, “Nɨ be be bɨfɨgɨ muŋ ka nɨ vwo awɨŋ ɨsáʼ mbɨ́ʼ ngə́ nɨ ghɨ ɨbvu ə; lá mbáʼ nɨ kaŋnə ngə́ nɨ zě ɨdiʼ lá, nɨ bvurɨ nkɨ ngvo ɨsáʼ tsɛʼ vwonə.”