Read Ngemba Ɨfaʼ 14 Bible Online

Ɨfaʼ 14 - Ngemba bible

Ɨfaʼ 14

¹Ndəŋndəŋ anu fú Aikonium ə: Baolo bo Banabasɨ ghɛ́n nkón a mu ndáŋwi bə Yuda ngam a nye ndóm wa bə Yuda a ɨnɔ abɔʼnɨ ba a se bə Yuda be a ɨnɔ bə́ŋnɨ́ mɨntəm ɨma ɨ nɨŋ a nye Kristo ghe.

²Lá bə Yuda ba bɨ sé nɨ́ŋ mɨntəm ɨma a nye Kristo tótɨ́ a ba a se bə Yuda be, ngɨ mɨntɔŋ ɨma tiʼə ndwínə́ a nye ɨbɛn ba bɨ nɨ́ŋnɨ́ mɨntəm ɨma a nye Kristo lá.

³Ntóm Yeso tsa tsí adiʼ məwen a nye nkfu zɨ sa, ngámə́ tɨ nɨbɔgɨ mbɨ́ʼ a Maʼmbyí ɛ. Maʼmbyí a díʼ ngə́ nkən ɨwa mbɨ́ʼ abɔŋəntəm azhi bé nkənu lá a nye adzaŋ za wɛrə a ghánɨ́ mɨtən a mbó bo a ngɨ ɨnu tsɨ yerɨnɨ-yerɨnɨ abɔʼnɨ tsə tsanɨnɨ ə.

⁴Ɨbɛn bɨ ntáʼmbagə wu wi wa yɛ́btɨ́ bɨbagɨ bɨbá ghe: bə tse tɛ́m a ndzum bə Yuda, bə mɔʼɔ tɛm a ndzum ntóm Yeso ghe.

⁵Ɨbɛn ba a se bə Yuda be bə tse nkwiʼtɨ bə Yuda abɔʼnɨ bɨsáʼ bɨ alaʼ tsɔ́ʼ a mu mɨntəm ɨma a ndiʼ ngɨ́ʼ a mbó ntóm Yeso ɨ kɨ tumtɨ awa nɨ mɨngɔʼ ə.

⁶Ntóm Yeso tsa zúʼ mbɨ́ʼ a məzen, nkɨə ngɛn a Listra abɔʼnɨ Dərɨbe, ntáʼmbagə tsa tsɨ tsínɨ́ a Laikonia, nkɨ ndzɔŋ ngɛn a nye mbuʼ za ɨ tsínɨ́ a kárɨ́kɨ́ məwa.

⁷Ɨwu, bo sóŋ Nkən wu Shiʼnɨ ə.

⁸A Listra, ŋwɔn tse a tsí ɨwu wa a bénɨ́ tə́ngórə́kuʼ nchwúʼnɨ́ mbáʼ bɨ jwínɨ́ ayi ɛ. A láʼnə nkeʼ tɛmə.

⁹A shíʼtɨ́ ntsí ɨwu njwíʼtə́ anu za Baolo a kɨ́nə́ sóŋə́ ghe. Baolo a zɛ́n ngə́ wɛrə a tsi nɨ abeməntəm, bɨ chi kɨ tsuʼ ayi ɛ. Ma lan, Baolo a kyérɨ́ ayi

¹⁰ntiʼ soŋ nɨ nji zɨ ntən ngə́, “Lo atɨ́ ntɛm mbiʼ agho nɨ mɨku ɨmo!” Ŋwɔn wa a kánɨ́ ntɛm atɨ́ ntíʼə númə́ ngántə́ ayi ɛ.

¹¹Mbáʼ ɨnɔ ɨbɛn wa zɛ́nɨ́ anu za Baolo a ghɨ́nɨ́ lá, bo bíʼnɨ́ ntɔ́nkə́ nɨ nɨgham nɨ bə Laikonia ɨna ngə́, “Bɨŋwi bəŋ awa a nye ɨbɛn bɨ mɨsɔŋ a ntsu ɨ shiʼ ngyen a mbó bɨgɨnə ghe!”

¹²Bo ghá ɨkum Banabasɨ, ɨ be Zeyusɨ, wu Baolo be Ɛməsɨ, mbɨ́ʼ ngə́ a bé zɨ mbé tamatsorə ghe.

¹³Ŋwɔn wa a kɨ́nə́ faʼə tso ntumshe ŋwi Zeyusɨ mbáʼ nɨshwim nɨ Zeyusɨ tɛ́mnɨ́ tsɛʼ mbáʼ o byinɨ fu ntáʼmbagə wa, a yén nɨ mbɔŋ abɔʼnɨ bɨbaŋbaŋ a ntsu abuʼ wa, mbɨ́ʼ ngə́ zɨ abɔʼnɨ ɨnɔ ɨbɛn wa kə́ ndǒ ngǎ mɨtsuʼnɨ mɨ atú a mbó Banabasɨ bo Baolo ghe.

¹⁴Mbáʼ Banabasɨ bo Baolo zúʼnɨ́ anu za bo kɨ́nə́ ndǒ ngɨə lá, bo sátɨ́ ɨtsɛʼ ɨtsa, nkɨənɨ nkon a tɨtərɨ ɨnɔ ɨbɛn wa, ntɔ́nkə́ ngə́,

¹⁵“Nɨ ghɨə a məzen lá mbɨ́ʼ ake le? Bɨgɨ mboŋ kɨ mbe lá tsɛʼ ɨbɛn bɨ mɨsɔŋ a ntsu tso bɨŋ ə! Bɨgɨ tsi ɨghan lá a sóŋ Nkən wu Shiʼnɨ a mbó bən, ɨ bəŋ awən á nɨ keʼ ɨnu adaŋədaŋə tsen a bɨŋə ngɨə, ɨ tiʼ tsi a mbó Ŋwi, zɨ wa a tsinɨ ntən, nkɨ mbe zɨ wa a káʼnɨ́ fɔməbvurə, atuəshe, sagɨrə wu ngwi abɔʼnɨ ɨdzúm ɨtsum tsa tsɨ tsinɨ a mu tsɛrə ghe.

¹⁶A bé a mbyi lá, wɛrə a nyɛʼtɨ ɨbɛn bɨtsum ghɨnɨ ɨnu ɨtsum tsa bo kɔ́ŋnə́.

¹⁷Lá wɛrə a sé nyɛʼtɨ ɨbɛn tɨ ɨlɨgɨ tsa tsɨ díʼnɨ́ ngə́ wɛrə a tsí ɨwu nkə́ ngɨ̌ ɨbɔŋ a mbo bo ghe. Wɛrə a ghǎ mbəŋ a mbó bən za ɨ lonɨ a fɔməbvurə, nkə́ ngǎ ɨdzúm tsa tsɨ kwínə́ ngǎ mɨdzɨ a mbó bən a nye nkfu zɨ shiʼnɨ; wɛrə a ghǎ mɨdzɨ a mbó bən nkə́ ndwɨ́gɨ́ mɨntəm ɨmən nɨ nɨdorɨ ə.”

¹⁸Bo ghám ɨnu tsiŋ ɨ ghamnɨ lá nchi keʼ tsuʼnɨ ɨnɔ ɨbɛn wa a ngá mɨtsuʼnɨ mɨ atú a mbó bo ghe.

¹⁹Bə Yuda bə tse ló Antyokɨ abɔʼnɨ Aikonium ngyiŋə; bo lɛ́tɨ́ mɨntəm mɨ ɨnɔ ɨbɛn wa, bo tiʼ ntsi a bagɨ bo ghe. Bo túmtɨ́ a Baolo nɨ mɨngɔʼ, ɨ shwuŋ ayi ntsa nɨ wɛrə a mu ntáʼmbagə za ngwíʼtə́ ngə́ a kfóə.

²⁰Lá, a nkfu za ɨbɛn ba bɨ nɨ́ŋnɨ́ mɨntəm ɨma a nye Kristo kárɨ́sɨ́nɨ́ ayi, wɛrə a ló atɨ́ mbə nkon ngɛn a mu ntáʼmbagə wa. Njwi zɨ mɔʼɔ bənə ndán, bo Banabasɨ ghɛn a Dərɨbe ghe.

²¹Baolo bo Banabasɨ sóŋ Nkən wu Shiʼnɨ a Dərɨbe, mbəŋ mɨntəm mɨ bə ghaʼnɨ bo tiʼ mbe bɨyɛʼ ə. Bo tíʼ mbə mbən a Listra, ntsa ɨwu nkon Aikonium, ntsa ɨwu nkon Antyokɨ wa a tsínɨ́ a mu mbuʼ Bisidya lá.

²²Bo nɨ́ŋ mɨntəm mɨ ɨbɛn ba bɨ nɨ́ŋnɨ́ mɨntəm ɨma a nye Kristo nkɨ ngwɔŋtɨ awa ngə́ á bo keʼ chiʼnɨ a mu abeməntəm aza ghe. Bo díʼ awa ngə́, “Bɨgɨnə mɨ zagɨ ze ngɨ́ʼ zɨ ngwi bɔŋ ɨ kon a mu Nɨfɔ nɨ Ŋwi ə.”

²³A mu ndáŋwi ɨtsum tsa bo ghɛ́nɨ́ ɨwu, bo tsɔ́ʼ ɨtú ndáŋwi ntiʼ nɨŋ awa nɨ ɨtsaʼtɨ Ŋwi abɔʼnɨ nchigɨ nji tsə ntsaʼtɨ Ŋwi a mu mbó Maʼmbyí, zɨ wa bo nɨ́ŋnɨ́ mɨntəm ɨma wə ɨnye lá.

²⁴Bo tíʼ ntósɨ́ ntsa a Bisidya ngyen fu a Bamfilya ghe.

²⁵Ɨwu, bo sóŋ nkən wa a Bəga ntiʼ ngɛn Atalia,

²⁶ntiʼ ndo ɨwu ngyiŋ nɨyen a mu nkyi mbə́ mbən Antyokɨ adiʼ wa bɨ tsáʼtɨ́nɨ́ a Ŋwi, ɨ nɨŋ awa a mu mbó abɔŋəntəm a Ŋwi mbɨ́ʼ ɨfaʼ wa bo mɛ́tɨ́nə lá.

²⁷Bo ghɨnə ngyén fu Antyokɨ, ngǒtɨ ndáŋwi táʼ adiʼ ntiʼ fɨʼtɨ a mbó bo ɨnu ɨtsum tsa Ŋwi a ghɨ́nɨ́ ntsa a ndzum bo ghe. Bo kɨ́ fɨʼtɨ adzaŋ za Ŋwi a ŋáʼnɨ́ ndóm a mbó ba a se bə Yuda be a nɨ́ŋ mɨntəm ɨma a nye Kristo ghe.

²⁸Bo tsí ɨwu bo bɨ ɨbɛn ba bɨ nɨ́ŋnɨ́ mɨntəm ɨma a nye Kristo lá a nye abaŋ zə sa ghe.