Read Ngemba Ɨfaʼ 15 Bible Online

Ɨfaʼ 15 - Ngemba bible

Ɨfaʼ 15

¹Ɨbɛn bə tse ló a Yudiya ɨ shiʼ ngɛn Antyokɨ mbiʼnɨ ndǐʼ ɨbɛn ba bɨ nɨ́ŋnɨ́ mɨntəm ɨma a nye Kristo lá ngə́, “Bɨ chi keʼ awən loŋ tɨgha bɨ tsəŋ ɨlagɨ ɨtsən adzaŋ za Nyɔngɔŋ Mǒse a lɔnə lá.”

²Akwənkɨ zə tən a lánɨ́ a tɨtərɨ ɨbɛn məben abɔʼnɨ Baolo nɨ Banabasɨ ə. Ma lan, bɨ tíʼ ntsɔ́ʼ a Baolo nɨ Banabasɨ abɔʼnɨ ɨbɛn bə mɔʼɔ ba bɨ tsínɨ́ Antyokɨ ngə́ á bo ghɛn a Yerosalɛm mbitɨ ntóm Yeso abɔʼnɨ ɨtú ndáŋwi mbɨ́ʼ a məziŋ ə.

³Ma lan, ndáŋwi ntyígɨ́ awa ghe; adzaŋ za bo kɨ́nə́ ngěn ntsa a mu mbuʼ Fonisha abɔʼnɨ zɨ Samaria lá, bo fɨ́ʼtɨ́ adzaŋ za ba a se bə Yuda be bə́ŋnə mɨntəm ɨma ntiʼ ntsi a bagɨ Ŋwi; nkən məwiŋ yén nɨ nɨdorɨ nə wi a mbó ɨbɛn ba bɨ nɨ́ŋnɨ́ mɨntəm ɨma a nye Kristo ghe.

⁴Bo ghɨnə ngyén fu a Yerosalɛm, ndáŋwi, ntóm Yeso abɔʼnɨ ɨtú ndáŋwi tsa tsɨ tsínɨ́ ɨwu kwarɨ awa tsɛʼ ɨ shiʼnɨ ə. Bo tíʼ fɨʼtɨ ɨnu ɨtsum tsa Ŋwi a tsánɨ́ a ndzum bo ngɨ a mbó ɨbɛn ben a Yerosalɛm ə.

⁵Lá ɨbɛn bə mɔʼɔ ba bɨ nɨ́ŋnɨ́ mɨntəm ɨma a nye Kristo ba bɨ tsínɨ́ a mu mandzɔŋ bə Farisao ló ntɛ́m atɨ́ ɨ soŋ ngə́, “Bɨ tsi nɨ ɨ zagɨ tsəŋ ɨlagɨ ba a se bə Yuda be ɨ kɨ soŋ a mbó bo ngə́ á bo ndzúʼnə́ a Nyɔngɔŋ Mǒse ghe.”

⁶Ntóm Yeso abɔʼnɨ ɨtú ndáŋwi bómnkɨ́ adiʼ ziə mɔ́ʼɔ́ a ndéntɨ́ anu məziŋ ə.

⁷Bo ghɨnə nkwə́nkɨ́ a nye abaŋ zə sa, Bita a lo atɨ́ ntɛm ɨ soŋ ngə́, “Ɨbɔmbɨma ɨban, nɨ zhi ngə́ Ŋwi a tsɔ́ʼ aghan a tɨtərɨ bən a ngúʼə ngúʼə ngə́ á ma soŋ Nkən wu Shiʼnɨ a mbó ba a se bə Yuda be, taŋ á bo chi zuʼ ɨ kɨ nɨŋ mɨntəm ɨma a nye wɛrə ghe.

⁸Ŋwi, zɨ wa a zhinɨ ɨkwaʼtɨ ŋwɔn tsum, a díʼ ngə́ ba a se bə Yuda be chi kɨ be ɨbɛn ba bɨ nɨŋnɨ mɨntəm ɨma a nye Ŋwi a ngá Azhwi zə Fɛmnɨ a mbó bo, tsɛʼ adzaŋ za wɛrə a kɨ́nɨ́ nkɨ́ ngá a mbó bɨgɨnə lá.

⁹Wɛrə a sé nɨ́ŋ a líʼ a tɨtərɨ bɨgɨnə abɔʼnɨ bo ghe; wɛrə a lɨ́gɨ́nɨ́ mɨbvu ɨma mbɨ́ʼ ngə́ bo tsí nɨ abeməntəm ə.

¹⁰Ma lan, nɨ lǒ nzhwəŋtɨ Ŋwi tɨtsɔŋnɨ a nye adzaŋ za nɨ tɛ́gɨ́nɨ́ ɨbyɛʼ a ɨtú ɨbɛn ba bɨ nɨŋnɨ mɨntəm ɨma a nye Kristo lá ngə́ ke le? Ɨbyɛʼ mətsen bɨta ɨbɨgɨnə bə kɔ́ʼɔ́nguʼ kə bɨgɨnə kɨ chí keʼ a tsɛrə byɛʼə.

¹¹Bɨgɨnə baŋnɨ nɨŋ mɨntəm ɨmɨgɨnə ɨwu ngə́ bɨ loŋə awɨgɨnə ntsǎ a ndzum abɔŋəntəm a Maʼmbyí Yeso lá tsɛʼ tso mbáʼ bɨ loŋə awa ghe.”

¹²Ngǒtə za tsum zúʼ ɨnu ngə́ shwi adzaŋ za bo zúʼnɨ́ adzaŋ za Banabasɨ bo Baolo fɨ́ʼtɨ́nɨ́ ɨnu tsɨ yerɨnɨ-yerɨnɨ abɔʼnɨ tsə tsanɨnɨ tsa Ŋwi a ghɨ́nɨ́ a mbó ba a se bə Yuda be ntsa a ndzum bo ghe.

¹³Bo ghɨnə mɛ́tɨ́ ngamə, Jemsɨ a chwɨgɨ ngə́, “Ɨbɔmbɨma ɨban, á nɨ zuʼə!

¹⁴Samɔn a fɨʼtɨnə tsɛʼ tɨtsɔŋnɨ adzaŋ za Ŋwi a tsánɨ́ mbyi ndə̌tú a nye ba a se bə Yuda be a ndɔgɨ bə tse a tɨtərɨ bo ngə́ á bɨ be ɨbɛn ɨbyi ɛ.

¹⁵Mɨgham mɨ ntóm Ŋwi kɨ mbemtɨ a məzen ngɛn mɛtɨ adzaŋ za aŋwaʼnɨ a Ŋwi a soŋnɨ ngə́:

¹⁶‹Maʼmbyí a soŋ ngə́, məzen a ghɨ ntsá, ma mɨ bə bən, ɨ bə vwu nɨfɔ nɨ Devidɨ wədiʼ ə. Ma mɨ bə kúmkɨ́ ɨdiʼ tsa tsɨ bɛʼkɨnə, ɨ ghɨ á tsɨ bə ntɨŋə.

¹⁷Ma lan, ŋwɔn mɨsɔŋ a ntsu tsum a mɨ yen a mbó me, ba a se bə Yuda be bɨtsum ba ma tsɔ́ʼnɨ́ ngə́ á bɨ be ɨbɛn ɨbə.

¹⁸Nə nɨ anu za me Maʼmbyí a soŋnɨ, me wa ma ghɨ́nɨ́ bɨ zhi a məzen nchwuʼnɨ a ngúʼə ngúʼə lá.›”

¹⁹Jemsɨ a ghɛ́n nɨ mbyi ɨ soŋ ngə́, “A mu azə akwaʼtɨ, á bɨgɨnə keʼ ngɨ́ʼ a ngǎ a mbó ba a se bə Yuda be ba bɨ bəŋnə mɨntəm ɨma ɨ nɨ́ŋə́ a nye Ŋwi ə.

²⁰Bɨgɨnə baŋnɨ ŋwaʼnɨ aŋwaʼnɨ a mbó bo ɨ sóŋə́ a mbó bo ngə́ á bo keʼ mɨdzɨ mə tse ma mɨ se fɛm a mu mbɔm dzɨ mbɨ́ʼ ngə́ bɨ gha a mɛrə a mbó ɨbɔ bɨ abe; ngə́ á bo keʼ ɨnu ntɔrɨ ɨlɛbɨ a ngɨə; nkeʼ kɨ nkfurɨ ɨnyam za bɨ se kyem; nkeʼ kɨ no alɛm ə.

²¹Mbɨ́ʼ ngə́ bɨ tɔŋnə a Nyɔngɔŋ Mǒse a Njwi Alaʼ Ŋwi tsum a mu ndáŋwi bə Yuda a nye abaŋ zə sa, nkə́ sǒŋ mɨgham ɨmyi a mu ntáʼmbagə ɨtsum ə.”

²²Ntóm Yeso, ɨtú ndáŋwi tsa tsɨ tsínɨ́ ɨwu abɔʼnɨ ndáŋwi tsum tíʼ ndzɛ́n ngə́ a bɔŋ ngə́ á bo tsɔʼ ɨbɛn bə tse a mu ngǒtə za, ntsagɨ awa bo bɨ Baolo nɨ Banabasɨ Antyokɨ ə. Bo tsɔ́ʼ ɨbɛn bi bɨbá ba ɨbɛn ba bɨ nɨ́ŋnɨ́ mɨntəm ɨma a nye Kristo kɨ́nə́ ndǐʼ mbɔm zɨ shiʼnɨ a mbó bo tsɛʼ nkə. Bo bé Yudasɨ wa bɨ kɨ́nə́ ntɔ́ŋə́ ngə́ Basabasɨ abɔʼnɨ Sailasɨ ə.

²³Bo tyígɨ́ awa nɨ aŋwaʼnɨ zɛnə ngə́: “Bɨgɨ ntóm Yeso abɔʼnɨ ɨtú ndáŋwi tsa tsɨ tsinɨ ɨghan, mbe ɨbɔmbɨma ɨbən, bɨgɨ tsagə atɔ́ŋtɨ a mbó ɨbɔmbɨma ɨbɨgɨ bɨtsum a jwínɨ́ ba a se bə Yuda be ba bɨ tsínə́ Antyokɨ, Sirɨya abɔʼnɨ Silisha ghe.

²⁴Bɨgɨ zuʼ ngə́ bə tse ba bɨ lónɨ́ a mbó ngǒtə ɨzɨgɨ ɨghan yén ngá ngɨ́ʼ a mbó bən nkɨ ntɔbɨ mɨntəm ɨmən nɨ ɨnu tsa bo sóŋnɨ́; lá bo sé kwárɨ́ atɨgɨtɨ zə tse a mbó bɨgɨ ə.

²⁵Ma lan, bɨgɨ ghótɨ́ táʼ adiʼ ntíʼ mbémnɨ́ a ntsɔ́ʼ ntóm tsɨ tse ɨ tyigɨ awa a mbó bɨŋ ə. Bo mɨ yen bo bɨ bɨson ɨbɨgɨ ba bɨgɨ kɔŋnɨ tsɛʼ nkan, Baolo bo Banabasɨ,

²⁶bo ba bɨ lɛnɨ ntsi mbyi ɨtsa a ntsu nɨvwo a mu ɨfaʼ ɨwa a mbó Maʼmbyí Yeso Kristo ɨwɨgɨnə lá.

²⁷Bɨgɨ tsagɨ a Yudasɨ bo Sailasɨ, ba bo mɨ fɨʼtɨ bo mboŋ ndəŋndəŋ ɨnu tsen tsa bɨgɨ ŋwaʼnɨnə lá.

²⁸Azhwi zə Fɛmnɨ a tsɨŋnɨnə awɨgɨ bɨgɨ tiʼ mbemnɨ ngə́ bɨgɨ mɨ keʼ bə nɨŋ ngɨ́ʼ zɨ mɔʼɔ a ntɔŋ bən ntsatɨ ngə́ á nɨ ndě ɨtɨgɨtɨ tsenə ngə́:

²⁹á nɨ keʼ dzɨ mɨdzɨ mə tse ma bɨ ghanɨ a mbó ɨbɔ bɨ abe; á nɨ keʼ alɛm no; á nɨ keʼ ɨnyam za bɨ se kyem kfurɨ; nkɨ mbátɨ́ ɨtumbəm ɨtsən a ngɨ ɨnu ntɔrɨ ɨlɛbɨ ə. Nɨ mɨ tsi ɨ shiʼnɨ mbáʼ be nɨ lə ɨtú ɨtsən nkeʼ ɨbə́ŋ ɨnu mətsen a ngɨə ghe. A nɨ tsi ɨ shiʼnɨ ə.”

³⁰Bo tíʼ ntyígɨ́ ntóm tsa, bo ghɛn Antyokɨ, adiʼ wa bo ghótɨ́nɨ́ ngǒtə ɨbɛn ba bɨ nɨ́ŋnɨ́ mɨntəm ɨma a nye Kristo, ntiʼ nga aŋwaʼnɨ za a mbó bo ghe.

³¹Mbáʼ ɨbɛn ba tɔ́ŋnɨ́ aŋwaʼnɨ za lá, nɨdorɨ lón a mu mɨntəm ɨma mbɨ́ʼ nkən wa ɨ kɨ́nə́ ngwɔŋtə awa lá.

³²Yudasɨ bo Sailasɨ, bo ba bɨ kɨ́nɨ́ nkɨ́ mbé ntóm Ŋwi, táŋ ngam bo bo a nye abaŋ zə sa, ɨ nɨ́ŋtɨ́ mɨntəm ɨma nkə́ nɨŋə adaʼ a mɨto bo ghe.

³³Bo ghɨnə ntsítɨ́ bo bo a nye nkfu zɨ tse, ɨbɛn ba bɨ nɨ́ŋnɨ́ mɨntəm ɨma a nye Kristo bən ntsagɨnɨ awa nɨ mbɔnɨ, bo bə mbən a mbó ɨbɛn ba bɨ tyígɨ́nɨ́ awa ghe.

³⁴[12]

³⁵Baolo bo Banabasɨ tsítɨ́ a nye nkfu zɨ tse Antyokɨ, bo nkwiʼtɨ a bə mɔʼɔ bə ghaʼnɨ díʼ nkɨ́ sóŋ nɨgham nɨ Maʼmbyí ɛ.

³⁶Abaŋ a ghɨnə mbé ɨwu Baolo a soŋ a mbó Banabasɨ ngə́, “A tɨ bə ngɛn ngantɨ ɨbɔmbɨma ɨbɔgə a nye ntáʼmbagə tsum za tɨ sóŋnɨ́ nɨgham nɨ Maʼmbyí ɨwu, nkɨ ndentɨ adzaŋ za ɨnu ɨ ghɛnə ghe.”

³⁷Banabasɨ a kə́ ndǒ ndɔgɨ Yoane Marɨkusɨ á bo bo ghɛn,

³⁸lá Baolo a sé kwaʼtɨ ngə́ a kúʼnɨ́ a ndɔgɨ zɨ, mbɨ́ʼ ngə́ wɛrə a nyɛ́ʼtɨ́ awa a ndómnji mbə mbən ayi mbáʼ bo bo kɨ́nə́ númə́ nkárə́ ɨ faʼə ghe. Wɛrə a bə́ mbən ayi, ɨ nyɛʼtɨ awa a Bamfilya ghe.

³⁹Akwənkɨ zə tən a lánɨ́ a tɨtərɨ Baolo bo Banabasɨ, bo tiʼ shwɛkə: Banabasɨ a lɔ́gɨ́ a Marɨkusɨ bo zɨ yiŋ nɨyen a mu nkyi ngɛn a Saibrusɨ,

⁴⁰Baolo a baŋnɨ ndɔgɨ a Sailasɨ bo zɨ ghen. Ɨbɛn ba bɨ nɨ́ŋnɨ́ mɨntəm ɨma a nye Kristo nɨ́ŋ awa a mu mbó abɔŋəntəm a Maʼmbyí ngə́ á ndə̌tú nɨ bo ghe.

⁴¹Wɛrə a tsá a mu Sirɨya abɔʼnɨ Silisha ɨ nɨ́ŋə́ adaʼ a mɨto ɨbɛn ba bɨ nɨ́ŋnɨ́ mɨntəm ɨma a nye Kristo ɨwu ə.