Read Ngemba Ɨfaʼ 17 Bible Online

Ɨfaʼ 17 - Ngemba bible

Ɨfaʼ 17

¹Baolo bo Sailasɨ kə́ ngěn tsɛʼ ghɛnɨ ngɛn ntsa a mu Amfibolisɨ abɔʼnɨ Abolonia, ngɛn nkuʼ a Tesalonaika, adiʼ wa ndáŋwi bə Yuda tsínɨ́ ɨwu ə.

²Ndzɔ́ŋə́ a nye mbɔm ɨzhi, Baolo a ghɛ́n a ndáŋwi bə Yuda za. Atú Njwi Alaʼ Ŋwi tsi tárə́ wɛrə a kə́ ntǎŋ anu a Ŋwi bo bɨ ɨbɛn, ɨ fɨgɨ ɨnu a mu Aŋwaʼnɨ a Ŋwi

³ɨ fɨ́ʼtə́ nkə́ ndǐʼ nkənu a mu nɛrə ngə́ Wa bɨ Zɔ́ʼnɨ́ wa a tsí nɨ ndze ngɨ́ʼ, ɨ bə zhwemnɨ a mbó nɨvwo ə. Baolo a sóŋ ngə́, “Yeso wen wa ma ghamnə mbɨ́ʼ ayi a mbó bən lá, a lá Wa bɨ Zɔ́ʼnɨ́ wa.”

⁴Ɨbɛn ba bə tse zé nkənu a nye nɨgham nɨ Baolo, ntiʼ nkon a ngɔ́n bo bɨ Baolo bo Sailasɨ; ɨdɨtɨ bəngye bə ghaʼnɨ a ntáʼmbagə wa abɔʼnɨ bə Grikɨ ba bɨ kɨ́nə́ ngúʼsə́ a Ŋwi bə ghaʼnɨ kɨ́ nkón a ngɔ́n wəbɔʼ ə.

⁵Lá bə Yuda bə tse ghɨ́ʼnɨ́ anu məzen ntiʼ ngǒtɨ ngaŋ ngá ngɨ́ʼ, bo bo tiʼ ngǒtɨ a mandzɔŋ mbvugɨ ndum ə. Bo bo bvúgɨ́ ndum a mu ntáʼmbagə wu wi wa ɨtsum, ɨ shwɛ́tɨ́ ndá ŋwɔn tse wa bɨ kɨ́nə́ ntɔ́ŋə́ ngə́ Jesɨn a ndzé ngə́ bo chi tsɨrɨ a Baolo bo Sailasɨ ɨwu, ɨ chwa awa ɨ ghɛn nɨ bo a mbó ɨbɛn bɨ ntáʼmbagə wu wi wa.

⁶Lá mbáʼ bo sé tsɨ́rɨ́ awa ɨwu lá, bo chwá a Jesɨn bo bɨ ɨbɛn bə mɔʼɔ ba bɨ nɨ́ŋnɨ́ mɨntəm ɨma a nye Kristo ngɛn nɨ bo a ɨshi bɨsáʼ bɨ ɨlaʼ bɨ ntáʼmbagə wu wi wa ntiʼ ntɔnkɨ ngə́, “Ɨbɛn biŋ bvugɨ ndum ɨdiʼ ɨtsum ə! Tɨtsɔŋnɨ bo yenə nkuʼ a mu ntáʼmbagə wu wi ɨwɨgɨnə,

⁷Jesɨn a lɛn awa a mu ndá zɨə. Bo fə̌ a nyɔngɔŋ Kaisa, ɨ sóŋə́ ngə́ ɨfɔ wu mɔʼɔ a tsi ɨwu ɨkum ɨyi be Yeso ghe.”

⁸Mbáʼ bɨsáʼ bɨ ɨlaʼ bɨ ntáʼmbagə wu wi wa abɔʼnɨ ɨbɛn ba zúʼnɨ́ ɨnu tsen lá, tsɨ ghágɨ́ mɨntəm ɨma tsɛʼ nkə.

⁹Bɨsáʼ bɨ ɨlaʼ ba sóŋ ngə́ á Jesɨn abɔʼnɨ bə mɔʼɔ ɨbɛn tfu ndvuŋ nkáb tse bɔŋ a bɨ nyɛʼtɨ awa ghe. Bo tfú ndvuŋ nkáb məwen, bɨ tiʼ soŋ ngə́ á bo ghɛn awa ghe.

¹⁰Tsɛʼ mbáʼ ɨtfúʼ ɨ fɨ́ŋnɨ́, ɨbɛn ba bɨ nɨ́ŋnɨ́ mɨntəm ɨma a nye Kristo tságɨ́ a Baolo bo Sailasɨ a Bəria ghe. Mbáʼ bo ghɛ́nɨ́ fú ɨwu lá, bo ghɛ́n a mu ndáŋwi bə Yuda ghe.

¹¹Bə Yuda ba bɨ tsínɨ́ ɨwu kə́ nyɔ̌ŋ ɨnye ɨtsa a ɨshe a njwíʼtɨ́ anu, ntsa a ba bɨ tsínɨ́ a Tesalonaika ghe. Bo zhwíʼtɨ́ nkən wa nɨ mɨntəm ɨma mɨtsum ə. Njwi tsum bo kə́ ngyɛ̌ʼ aŋwaʼnɨ a Ŋwi a ndzé ngə́ ɨnu tsa Baolo kɨ́nə́ sóŋnə́ lánɨ́ mbe nkənu ə.

¹²Bo bə ghaʼnɨ nɨ́ŋ mɨntəm ɨma a nye Kristo; bəngye bə Grikɨ bə dɨtɨnɨ bə ghaʼnɨ a mu ntáʼmbagə wa abɔʼnɨ mbáŋnɨ́ bə Grikɨ bə ghaʼnɨ kɨ́ nɨ́ŋ mɨntəm ɨma a nye Kristo ghe.

¹³Lá mbáʼ bə Yuda bə Tesalonaika zúʼnɨ́ ngə́ Baolo a kɨ́ sóŋ anu a Ŋwi a Bəria lá, bo zɔ́ŋ ɨwu mbiʼnɨ ntótə́ nkə́ mbíʼə mɨntəm mɨ ɨnɔ ɨbɛn ə.

¹⁴Ɨbɛn ba bɨ nɨ́ŋnɨ́ mɨntəm ɨma a nye Kristo byí ntsagɨ a Baolo a ngə́rɨ́ sagɨrə wu ngwi; lá Sailasɨ bo Timotyo ghɔ́ŋ a Bəria ghe.

¹⁵Mbáŋnɨ́ tsa tsɨ kɨ́nə́ nkɨnkə a Baolo ghɛ́n nəghagɨ nəghagɨ bo bo ngɛn nkuʼ Atɛnsɨ ntiʼ mbə́n awa a Bəria ghe. Bo tɨnə tɨ bɨŋ ə, Baolo a soŋ a mbó bo ngə́ á bo soŋ a mbó Sailasɨ bo Timotyo ngə́ á bo tɛm tsɛʼ lan ngyen nkwatɨ ayi ɛ.

¹⁶Mbáʼ Baolo a tsínɨ́ Atɛnsɨ ntsiŋə a Sailasɨ bo Timotyo lá, ntɔŋ ɨyi lwí tsɛʼ nkan adzaŋ za wɛrə a zɛ́nɨ́ ngə́ ntáʼmbagə wu wi wa lón nɨ ɨbɔ bɨ abe.

¹⁷Ma lan, wɛrə a táŋ ɨnu a mu ndáŋwi bə Yuda bo bɨ bə Yuda nkwiʼtɨ a ba a se bə Yuda be ba bɨ kɨ́nə́ ngúʼsə́ a Ŋwi ə. Wɛrə a kɨ́ ngɨ ma lan a mɨtan njwi tsum bo bɨ ɨbɛn ba bɨ tsínɨ́ ɨwu a nyom məwa.

¹⁸Bɨdiʼ bɨ aŋwaʼnɨ ba bɨ kɨ́nə́ ntɔ́ŋə́ awa ngə bə Ebikurianɨ abɔʼnɨ Stɔikɨ kɨ́ ndɨʼkɨ bo bo ghe. Bo bə tse bítɨ́ ngə́, “Ajwɔngam wen a lɔ́btə́ lá ɨ soŋ anu ake le?” Bə mɔʼɔ chwɨ́gɨ́ ngə́, “A be tso a ghamə mbɨ́ʼ bɨŋwi bɨ atom ə.” Bo sóŋ ma lan lá mbɨ́ʼ ngə́ a kə́ ngamə mbɨ́ʼ a Yeso abɔʼnɨ nzhwemnə a mbó nɨvwo ə.

¹⁹Ma lan, bo lɔ́gɨ́ a Baolo ngɛn nɨ zɨ adiʼ wa bɨ kɨ́nə́ sǎʼ mɨsáʼ ɨwu, za bɨ kɨ́nə́ ntɔ́ŋə́ ngə́ Ariobagusɨ, ntiʼ soŋ wəmbo ngə́, “Bɨgɨ mɨ kɔŋ a ndzúʼ anu zə fi zen za o ghamnə mbɨ́ʼ a zɛrə lá.

²⁰Ɨnu tsɨ mɔʼɔ tsa bɨgɨ zuʼnɨ o soŋənə, tsɨ nɨ ɨnu tsa bɨgɨ láʼnə mbvurɨ tɨ zuʼ, bɨgɨ mɨ kɔŋ nji anu za tsɨ diʼnə.”

²¹Bə Atɛnsɨ abɔʼnɨ bɨngyen-yenɨ ba bɨ kɨ́nə́ nchyɛ̌ ɨwu kɔ́ŋ ɨ zhwɨgɨ ɨ chyɛnə tsɛʼ a mɨə, ɨ kɨ zhwiʼtɨ nkfu ɨtsum anu zə fi za a byínɨ́ fú tsɛʼ funə.

²²Baolo a tɛ́m a ɨshi Ariobagusɨ wa ɨ soŋ ngə́, “Ma zɛn ngə́ a nye mɨndóm mɨtsum bɨŋ ɨbɛn bɨ Atɛnsɨ, nɨ ghúʼsə́ bɨŋwi ɨbən nɨ mɨntəm ɨmən mɨtsum ə.

²³Mbɨ́ʼ ngə́ adzaŋ za ma kɨ chinə ntsǎ a mu ntáʼmbagə wu wi ɨwən, ma kɨ liŋ ɨdiʼ tsa nɨ ghúʼsɨ́nɨ́ bɨŋwi ɨbən, ma kɨ zɛn bɨ ŋwaʼnɨ atú atú a mɨkuʼ zə mɔʼɔ ngə́, ‹A mbó ŋwi wa ka bɨ zhi ayi ayi ɛ›. Wa nɨ ghúʼsɨ́nə́ tɨ zhi lá, a nɨ wɛrə wa ma tiʼnə nchwítə́ anu azhi a mbó bən tɨtsɔŋnɨ ə.

²⁴Ŋwi, zɨ wa a káʼnɨ́ atuəshe abɔʼnɨ ɨdzúm ɨtsum tsa tsɨ tsinɨ wə mu, a nɨ zɨ wa a nɨ Maʼmbyí fɔməbvurə abɔʼnɨ atuəshe, ka a nchyɛ̌ ayi lá a mu mɨshwim ma bɨ nyɛtɨnɨ nɨ mbó ə.

²⁵Ka wɛrə a kə́ ndǒ ayi azúm zə tse za be bɨgɨnə gha wəmbo a ntsǎ a ndzum ɨ faʼə wəmbo, mbáʼ a ghánə́ wɛrə zɨmboŋ ngǎ azhwi a ntsi ntən nɨ ɨdzúm tsə mɔʼɔ ɨtsum a mbó ŋwɔn tsum lá.

²⁶Wɛrə a tsá mbyi nkaʼ a táʼ ŋwɔn ə. A ntsǎ a ndzum táʼ ŋwɔn məwen, wɛrə a tíʼ nkáʼ ngwəgɨ ŋwɔn mɨsɔŋ tsum atuəshe, nkɨ ngɨ bo chyɛnə a mu atuəshe atsum ə. Bɔŋ á wɛrə a nkáʼə awa, wɛrə zɨmboŋ a kwɛ́nə ntsɔ́ʼ a mu ntəm zɨ ndvuŋ nkfu abɔʼnɨ bɨtəndenə bɨ ɨdiʼ tsa bo mɨ chyɛnə ɨwu ə.

²⁷Wɛrə a ghɨ́ ma lan lá, taŋ á bo ntsɔ́ʼnə́ aku azhi, aghagɨ a tsɛrə ɨ zɛn ayi adzaŋ za bo númnə́ shwítə́ ayi ɛ. Lá, ka aghagɨ a Ŋwi a sagɨ ayi a nye ŋwɔn nɨ bɨgɨnə wu tse;

²⁸adzaŋ za ŋwɔn tse a soŋnɨ ngə́, ‹A ntsǎ a ndzum mɨtən ɨmyi, bɨgɨnə chyɛ̌ nkə́ númə́ nkárə́ nkɨ ntsi nɨ ntsi ntɨŋ ə.› A tsi lá tsɛʼ tso mbáʼ ngaŋ ŋwaʼnɨ ɨŋwaʼnɨ ɨtsən tsə mɔʼɔ soŋnə ngə́, ‹Bɨgɨnə kɨ mbe lá ɨbɔ ɨbyi ɛ.›

²⁹Mbáʼ bɨgɨnə nɨ ɨbɔ bɨ Ŋwi lá, á bɨgɨnə keʼ kwaʼtɨ ngə́ mbě ɨzhi tsi tso azúm zə tsɛrə tso ŋwaʼŋwaʼ kə tsə́ŋtsə́ŋ kə ngɔʼ, za ŋwɔn mɨsɔŋ a ntsu a kwaʼtɨnɨ ɨ nyɛtɨ nɨ mbó ɨmyi ɛ.

³⁰Ŋwi a sé nɨ́ŋ ngɨ́ʼ a nye ɨbɛn a nkfu za bo sé ayi zhi, lá tɨtsɔŋnɨ wɛrə a sóŋə́ a mbó bo ɨdiʼ ɨtsum ngə́ á bo bəŋ mɨntəm ɨma a nye ɨnu tsə tɔmnɨnɨ tsa bo ghɨnə ghe.

³¹Mbɨ́ʼ ngə́ wɛrə a len njwi za wɛrə a ghɨnɨ sáʼ mbyi tsum tɨ nkyerɨ ɨ tsa a ndzum ŋwɔn tse wa wɛrə a tsɔʼnə ghe. Wɛrə a diʼnə a mbó ŋwɔn tsum ngə́ a ghɨ bé adzaŋ məwen lá a ntsǎ a ndzum nzhwemnɨ ŋwɔn məwa a mbó nɨvwo ə!”

³²Mbáʼ bo zúʼnɨ́ Baolo a gham mbɨ́ʼ nzhwemnə a mbó nɨvwo lá, bo bə tse wérɨ́ ayi, lá bə mɔʼɔ sóŋ ngə́, “Bɨgɨ lǒ ndzuʼə o kwiʼ nkwatɨ a məziŋ ə.”

³³Adiʼ məwen, Baolo a nyɛ́ʼtɨ́ awa ghe.

³⁴Mbáŋnɨ́ tsɨ tse ló ndzɔŋ ayi ntiʼ ntsi a bagɨ zɨ nkɨ nɨŋ mɨntəm ɨma a nye Kristo ghe. A tɨtərɨ məbiŋ ɨbɛn Dionishɔsɨ, táʼ ŋwɔn Ariobagusɨ a tsí ɨwu abɔʼnɨ mangye tse wa ɨkum ɨyi bénɨ́ Damarisɨ abɔʼnɨ ɨbɛn bə mɔʼɔ ghe.