Read Ngemba Ɨfaʼ 18 Bible Online

Ɨfaʼ 18 - Ngemba bible

Ɨfaʼ 18

¹Məzen a tsanə, Baolo a lo Atɛnsɨ ngɛn a Korɨnto ghe.

²Ɨwu wɛrə a bóm a ŋwɔn bə Yuda tse wa ɨkum ɨyi bénɨ́ Akwila wa bɨ jwínɨ́ ayi a Bontusɨ ə. Akwila bo ngwe ɨyi Brɨsɨla bvúrɨ́ ngyen tsɛʼ yenɨ ndo a Itali, mbɨ́ʼ ngə́ Ɨfɔ Klodiosɨ a sóŋ a mbó bə Yuda ngə́ á bo nyɛʼtɨ a Roma ghe. Baolo a ghɛ́n a ndzé bo,

³ntiʼ ntsi bo bo, bo bo faʼnə, mbɨ́ʼ ngə́ atú afaʼ azhi a bé ɨ nyɛtɨ bɨkfúʼə ɨ fiŋənə, tso mbáʼ a kɨ́nɨ́ nkɨ́ mbé atú afaʼ aza lá.

⁴Wɛrə a kə́ ntǎŋ anu a Ŋwi a mu ndáŋwi bə Yuda Njwi Alaʼ Ŋwi tsum, njwə́ŋtə́ a ngɨə á bə Yuda abɔʼnɨ bə Grikɨ ze nkənu a nye anu za wɛrə a kɨ́nə́ sóŋə́ ghe.

⁵Sailasɨ bo Timotyo ghɨnə ndó a Masedonia ngyen, Baolo a tiʼ ntɛgɨ atú azhi tsɛʼ a sóŋ nkən wa, ɨ sóŋə́ a za wɛrə a zhínɨ́ a mbó bə Yuda ngə́ Yeso a nɨ Wa bɨ Zɔ́ʼnɨ́ wa.

⁶Mbáʼ bo tónɨ́ awa anu za wɛrə a kɨ́nə́ sóŋə́ nkɨ soŋ ɨnu tsɨ tɔmnɨnɨ mbɨ́ʼ ayi lá, wɛrə a myígɨ́ atú azhi a nye adzaŋ za wɛrə a kfútɨ́nɨ́ abvuŋnɨ a nye ɨtsɛʼ ɨchi, ɨ sóŋə́ a mbó bo ngə́, “Be nɨ ghɨ́ mbyé, muŋ ɨfərɨ mɨ be ɨwɨŋ ə! Ma nɨ mbuʼ ə. A ndɔgɨnə tɨtsɔŋnɨ ma mɨ ghɛn aghan a mbó ba a se bə Yuda be ə.”

⁷Ma lan, wɛrə a nyɛ́ʼtɨ́ ngɛn ntíʼə nchyɛ̌ a ndá ŋwɔn wa a se ŋwɔn bə Yuda be wu tse wa ɨkum ɨyi bénɨ́ Taishɔsɨ Jusɨtusɨ, wa a kɨ́nə́ ngúʼsə́ a Ŋwi; ndá ɨzhi tsi a mbyɛn ndáŋwi bə Yuda ghe.

⁸Kɨrɨbusɨ, zɨ wa a bénɨ́ atú a ndáŋwi bə Yuda, a nɨ́ŋ ntəm ɨyi a nye Maʼmbyí ndzɔŋ nkwiʼtɨ ɨbɛn bɨtsum ba bɨ tsínɨ́ a ndá zɨə. Ɨbɛn bə ghaʼnɨ bə mɔʼɔ a Korɨnto zúʼ nkən wa, ɨ nɨŋ mɨntəm ɨma ɨwu, ntiʼ nkɨ nkwarɨ nkyi ɛ.

⁹Táʼ ɨtfúʼ tse Baolo a lyé ndzɛm nəzhwɨgɨnɨ za wə mu, Maʼmbyí a sóŋ a mbó zɨ ngə́, “Koʼ a mbɔ́gə́ ghe, lá a nkə́ ngamə tsɛʼ ghamnɨ, nkoʼ kyɛntɨ,

¹⁰mbɨ́ʼ ngə́ ma tsi bɔgə ghe. Ŋwɔn tse a chi keʼ anu a ɨnye gho ghɨ, mbɨ́ʼ ngə́ bə ghaʼnɨ a mu ntáʼmbagə wu wi wen a nɨ ɨbɛn ɨbə.”

¹¹Ma lan, Baolo a tsí ɨwu atú táʼ alom nɨ abɛ́ʼ, ndǐʼ ɨbɛn nɨ nɨgham nɨ Ŋwi ə.

¹²Bɨ ghɨnə ngɨ́ a Galio a nye gobɨna bə Roma wu Akaiya, bə Yuda ba bɨ tsínɨ́ ɨwu ghótɨ́ njíʼ mbó a nye Baolo ngɛn nɨ zɨ a ngɔʼ abyɛn ə.

¹³Bo sóŋ ngə́, “Ŋwɔn wen a zhwə́ŋtɨ́ ndɛgɨ ɨbɛn a ngúʼsɨ́ Ŋwi a nye ndóm wa ka nyɔngɔŋ a bem ayi ɛ!”

¹⁴Baolo a kə́ ndǒ ngamə mbáʼ Galio a sóŋnɨ́ a mbó bə Yuda ba ngə́, “A lo be be ngə́ anu zen a lá anu mbɨ́ʼ anu zə tɔmnɨnɨ zə tse za bɨ buʼnɨ kə ɨbvu tse wa bɨ ghɨnɨ, muŋ a bɔŋ á ma bɔrɨsɨ ɨnye ɨzan bɨgɨ bɨŋ bə Yuda ghe.

¹⁵Lá mbáʼ a nɨ ashwuŋnɨ mbɨ́ʼ ɨkumtɨ mɨgham abɔʼnɨ mɨkum abɔʼnɨ nyɔngɔŋ ɨwən lá, nɨ mɨ zagɨ tɛgɨnɨ anu məzen tsɛʼ bɨŋ mboŋ ə. A mɨ keʼ me be a sáʼ ɨbə́ŋ ɨnu tso mətsa!”

¹⁶Wɛrə a ghɨ́ bɨ kɨŋ awa ntsagɨ abyɛn ndá za bɨ kɨ́nə́ sáʼə ɨsáʼ wa ɨwu ə.

¹⁷Bo bɨtsum shíʼ mbó a nye Sotɛnishɨ, atú a ndáŋwi bə Yuda, ɨ shwom ayi a ɨshi ngɔʼ abyɛn za. Lá məzen a sé a Galio chiʼtə.

¹⁸Baolo a bə́ ntsi bo bɨ ɨbɛn ba bɨ nɨ́ŋnɨ́ mɨntəm ɨma a nye Kristo a Korɨnto atú mɨtfúʼ mɨ njwi mə ghaʼnɨ, ntiʼ ndo bo bɨ Akwila nɨ Brɨsɨla ngyiŋ nɨyen a mu nkyi ngɛn a Sirɨya ghe. Bɔŋ á wɛrə a tɨ lo a Sɛnkre ɨ yiŋ nɨyen a mu nkyi, wɛrə a kɔ́m atú azhi mbɨ́ʼ akan za wɛrə a kwɛ́nə ndɔgə.

¹⁹Bo yén fu a Ɛfɛso, adiʼ wa wɛrə a nyɛ́ʼtɨ́nɨ́ a Brɨsɨla bo Akwila ghe. Wɛrə a ghɛ́n a mu ndáŋwi bə Yuda, ntáŋ ɨnu bo bɨ bə Yuda ghe.

²⁰Ɨbɛn ba sóŋ ngə́ á wɛrə a kwiʼ ntsi bo bo a nye abaŋ zə sa lá wɛrə a ton ayi ɛ.

²¹Wɛrə a báŋnɨ́ soŋ a mbó bo, mbáʼ a kɨ́nə́ nyɛʼtə awa ngə́, “Be Ŋwi a bemtɨ muŋ ma mɨ bə yiŋə.” Ma lan, wɛrə a yíŋ nɨyen a mu nkyi ndo a Ɛfɛso ghe.

²²A ghɨnə ngyén fú a Seseria, ngɛ́n a Yerosalɛm ntɔŋtɨ ndáŋwi, ntiʼ ntsa ngɛn Antyokɨ ə.

²³A tsinə ɨwu a nye nkfu zɨ tse, ndo ɨ númə́ ngyíŋə́ nɨ ɨdiʼ nɨ ɨdiʼ ntsa a mu mbuʼ Galesha abɔʼnɨ Frigya, ɨ nɨŋə adaʼ a mɨto ɨbɛn ba bɨ nɨ́ŋnɨ́ mɨntəm ɨma a Kristo ghe.

²⁴A nkfu məwa, ŋwɔn bə Yuda tse wa ɨkum ɨyi bénɨ́ Abolo, wa bɨ jwínɨ́ ayi Alɛgɨsandɨrɨya, a yén a Ɛfɛso ghe. Wɛrə a bé ŋwɔn wa ntsu ɨyi tsánɨ́ a ngamə tsɛʼ nkan, nkɨ nji anu a Ŋwi ɨ shiʼnɨ ə.

²⁵Bɨ díʼ ayi nɨ anu mbɨ́ʼ Ndómnji Maʼmbyí ɛ. Nɨ ntəm ɨyi ɨtsum, wɛrə kə́ nchwítə́ nkə́ ndǐʼ ɨnu tsa tsɨ tsínɨ́ mbɨ́ʼ a Yeso tsɛʼ ɨ shiʼnɨ ə. Le buŋ wɛrə a zhí anu tsɛʼ mbɨ́ʼ nkyi wa Yoane a ghánə́.

²⁶Wɛrə a bíʼnɨ́ ngamə tɨ nɨbɔgɨ a mu ndáŋwi bə Yuda ghe. Mbáʼ Brɨsɨla bo Akwila zúʼnɨ́ ɨnu tsa tsɨ fúnɨ́ wə ntsu, bo lɔ́gɨ́ ayi bo bo kwɛn ngɛn a ntsu ndá bo, ntiʼ fɨʼtɨ Ndómnji Ŋwi wəmbo a nye ndómnji wa ɨ kuʼnɨnɨ ɨ shiʼnɨ ə.

²⁷Abolo a tíʼ ntsɔ́ʼ a mu ntəm zɨ a ngén Akaiya ghe. Ma lan, ɨbɛn ba bɨ nɨ́ŋnɨ́ mɨntəm ɨma a nye Kristo a Ɛfɛso kwátɨ́ ayi adzaŋ za bo ŋwáʼnɨ́nɨ́ aŋwaʼnɨ a mbó ɨbɛn ba bɨ nɨ́ŋnɨ́ mɨntəm ɨma a nye Kristo Akaiya, ɨ nyíʼtə́ awa ngə́ á bo kwarɨ ayi ɨ shiʼnɨ ə. Mbáʼ a ghɛ́nɨ́ nkón ɨwu lá, wɛrə a bé akwatɨ zə wi a mbó ɨbɛn ba mbáʼ, a ntsǎ a ndzum abɔŋəntəm a Ŋwi bo bénə ɨbɛn ba bɨ nɨ́ŋnə mɨntəm ɨma a nye Kristo lá.

²⁸Mbɨ́ʼ ngə́ nɨ mɨgham mɨ kɨlɨʼ mə tən, wɛrə a gháʼ bə Yuda a mu kɨlɨʼ asaŋəsaŋ, adzaŋ za wɛrə a kɨ́nə́ fɨ́gɨ́ mɨnu a mu Aŋwaʼnɨ a Ŋwi ndíʼə a mbó bo ngə́ Yeso nɨ Wa bɨ Zɔ́ʼnɨ́ wa.