Read Ngemba Ɨfaʼ 21 Bible Online

Ɨfaʼ 21 - Ngemba bible

Ɨfaʼ 21

¹Bɨgɨ ghá fɨlye ɨfa ntiʼ nyɛʼtɨ awa ghe. Bɨgɨ byí ngyiŋ nɨyen a mu nkyi ngɛn fu a Kɔsɨ tɨ fakɨ a ndómnji ɛ; njwi zɨ mɔʼɔ bənə ndán, bɨgɨ yen fu a Rodɨ, ntiʼ ndo ɨwu ngɛn a Batara ghe.

²Ɨwu, bɨgɨ zɛ́n abáŋ a nkyi za a kɨ́nə́ ngěn a Fonisha, ntiʼ nkɔ́ʼ nkon wə mu mbiʼnɨ nɨyen a mu nkyi ɛ.

³Bɨgɨ yén fú adiʼ wa bɨgɨ kɨ chinɨ zɛ́n a Saibrusɨ, ntiʼ ngyiŋ nɨyen a mu nkyi ɨ shiʼ nɨ ntɨ́ŋ Saibrusɨ, ngɛn fu a Sirɨya ghe. Bɨgɨ ghɛ́n fú a ngə́rɨ́ nkyi a Taya, adiʼ wa abáŋ a nkyi za a tsínɨ́ nɨ ɨ fɨgɨ abyɛʼ azhi ɨwu ə.

⁴Ɨwu, bɨgɨ tsɔ́ʼ aku a ɨbɛn ba bɨ nɨ́ŋnɨ́ mɨntəm ɨma a nye Kristo ndzɛn awa, ntiʼ ntsi bɨgɨ bo atú táʼ ngabɨ ə. A ntsǎ a ndzum mɨtən mɨ Azhwi, bo sóŋ a mbó Baolo ngə́ á wɛrə a keʼ a Yerosalɛm ghen.

⁵Lá nkfu ghɨnə nkúʼ a mbó bɨgɨ a nyɛʼtɨ bo, bɨgɨ nyɛʼtɨ awa, ngɛn nɨ mbyi nɨ nɨyen ɨnɨgɨ ə. Bo bɨtsum, nkwiʼtɨ bəngye ɨba abɔʼnɨ ɨbɔ ɨba zɔ́ŋ awɨgɨ, bɨgɨ bo fu a mu ntáʼmbagə wu wi ɨwa ngɛn a ngə́rɨ́ nkyi, adiʼ wa bɨgɨ bɨtsum kwémnɨ́ mɨkwiʼtɨ ɨmɨgɨ bo ntsaʼtɨ a Ŋwi ə.

⁶Bɨgɨ ghá fɨlye fɨ ŋwɔn nɨ ŋwɔn, bɨgɨ tiʼ nkɔʼ nkon a mu abáŋ a nkyi za, bo tiʼ nkɨ mbə ngɛn nɨ mɨnjwuʼ ɨma ghe.

⁷Bɨgɨ ghɛ́n nɨ mbyi nɨ nɨyen ɨnɨgɨ, ndo a Taya ngyiŋ nɨyen a mu nkyi ngɛn a Tɔlɛmaisɨ, adiʼ wa bɨgɨ tɔ́ŋtɨ́nɨ́ ɨbɛn ba bɨ nɨ́ŋnɨ́ mɨntəm ɨma a nye Kristo ntiʼ ntsi bɨgɨ bo atú táʼ njwi ɛ.

⁸Njwi zɨ mɔʼɔ bənə ndán, bɨgɨ lo ngɛn a Seseria ghe. Ɨwu, bɨgɨ kə́ nchyɛ̌ a ndá Firɨbɔ wa a bénɨ́ fangɨrɨshi ɛ. Wɛrə a bé táʼ ŋwɔn a tɨtərɨ ɨbɛn ba bi samba ba bɨ tsɔ́ʼnɨ́ a nye bɨnkwatɨ a Yerosalɛm lá.

⁹Wɛrə a tsí nɨ ɨbɔ bəngye bi nɨkwa ba bɨ sé zɔ́ʼ ba bɨ kɨ́nə́ nchwítɨ́ nkən Ŋwi ə.

¹⁰Bɨgɨ tsínə ɨwu atú njwi tsɨ tse mbáʼ ntom Ŋwi zɨ tse za ɨkum ɨyi bénɨ́ Agabusɨ ɨ lónɨ́ a Yudiya ɨ shiʼ ngyiŋə.

¹¹Wɛrə a yén fú a nye bɨgɨ, ndɔgɨ ɨkɔbɨ Baolo nkorɨ mɨku mɨ zɨ Agabusɨ abɔʼnɨ mbó mɨ zɨ Agabusɨ ɨwu, ntiʼ soŋ ngə́, “Azhwi zə Fɛmnɨ a soŋ ngə́: bə Yuda ba bɨ tsinɨ a Yerosalɛm mɨ korɨ a ŋwɔn wa a tsinɨ nɨ ɨkɔbɨ wɛnə adzaŋ wɛnə, ɨ tiʼ gha ayi a mbó ba a se bə Yuda be ə.”

¹²Mbáʼ bɨgɨ zúʼnɨ́ a məzen lá, bɨgɨ, nkwiʼtɨ ɨbɛn ba bɨ tsínɨ́ ɨwu, búʼ mbó a mbó Baolo ngə́ á wɛrə a keʼ ghɛn a Yerosalɛm ə.

¹³Lá wɛrə a chwɨ́gɨ́ ngə́, “Nɨ ghɨə lá ake adzaŋ wiŋ ə, mbúgə́ a nye ndóm wen ɨsɔ́bɨ́ ntəm ɨghan le? Ma kyaŋtɨ ɨnye ɨzan ngə́ á bɨ keʼ aghan tsɛʼ korɨnɨ korɨ a Yerosalɛm, lá be a be be nkfǒ ɨwu mbɨ́ʼ atú a Maʼmbyí Yeso, ma tsi ɨwu ə.”

¹⁴Bɨgɨ kɨ chi keʼ ghɨ á wɛrə a bem azɨgɨ anu, ma lan, bɨgɨ kyɛ́ntɨ́ awɨgɨ ntiʼ soŋ ngə́, “A za Maʼmbyí a lɔnə a fuə.”

¹⁵Bɨgɨ ghɨnə ntsítɨ́ ɨwu atú nkfu zɨ tse, ntiʼ nkyaŋtɨ ɨnye ɨtsɨgɨ ndo ngɛn a Yerosalɛm ə.

¹⁶Bɨyɛʼ bə tse ba bɨ lónɨ́ a Seseria yén bɨgɨ bo ghen. Bo lɔ́gɨ́ awɨgɨ ngɛn nɨ bɨgɨ a ndá ŋwɔn tse wa bɨgɨ tsínɨ́ nɨ nchyɛ ɨwu — ɨkum ŋwɔn wiŋ bé Nasɨn, wa a lónɨ́ a Saibrusɨ, mbe ŋwɔn wa a nɨ́ŋnɨ́ ntəm ɨyi a nye Kristo ɨ lɔgɨnɨ a mbyi ɛ.

¹⁷Bɨgɨ ghɨnə ngyén fú a Yerosalɛm, ɨbɛn ba bɨ nɨ́ŋnɨ́ mɨntəm ɨma a nye Kristo kwarɨ awɨgɨ tsɛʼ ɨ shiʼnɨ ə.

¹⁸Njwi zɨ mɔʼɔ bənə ndán, bɨgɨ bɨ Baolo ghɛn a ndzé Jemsɨ; ɨtú ndáŋwi ɨtsum tsi ɨwu ə.

¹⁹Baolo a tɔ́ŋtɨ́ awa ntiʼ mbyɛ́ntɨ́ ɨnu ɨtsum tsa Ŋwi a ghɨ́nɨ́ a nye ba a se bə Yuda be ntsa a ndzum afaʼ za wɛrə a fúnɨ́ abyɛn mbɨ́ʼ a zɛrə ghe.

²⁰Mbáʼ bo zúʼnɨ́ a mətsen lá, bo bóntɨ́ a Ŋwi ə. Bo tíʼ sóŋ ngə́, “Mɨma ɨwɨgɨ Baolo, ze azo ndvuŋ bə Yuda a nye nchwuʼ ɨchi ba bɨ bəŋnə mɨntəm ɨma ɨ nɨŋ a nye Kristo abɔʼnɨ adzaŋ za bo bɨtsum tɛgɨnɨ ɨtú ɨtsa a nye Nyɔngɔŋ Mǒse ghe.

²¹Bɨ soŋnə a mbó bo ngə́ o númə́ nkárə́ ndǐʼ bə Yuda bɨtsum ba bɨ tsínə́ a mu ɨlaʼ ba a se bə Yuda be ngə́ á bo nyɛʼ a Nyɔngɔŋ Mǒse, nkə́ sóŋə́ a mbó bo ngə́ á bo keʼ ɨlagɨ ɨbɔ ɨba tsəŋ kə ndzɔ̌ŋ mbɔm alaʼ bə Yuda ghe.

²²Bo mɨ zagɨ zuʼ ngə́ o yiŋə. Bɨgɨnə mɨ tiʼ ghɨ lá ɨ nə́ le?

²³Anu za bɨgɨ lɔnə ngə́ o ghɨ a zɛnə ghe. Ɨbɛn bi nɨkwa tsi ɨghan ba bɨ lɔ́gɨ́nɨ́ akan ə.

²⁴Lɔgɨ ɨbɛn benə á bɨŋ bo ghɛn sugɨ awən ɨ fɛm a mu mbɔm, o tfu ndvuŋ wa bo tsinɨ nɨ ntfuə, taŋ á bo chi kɔm ɨtú ɨtsa ghe. A nye ndóm məwen, ŋwɔn tsum a mɨ zhi ngə́ ka nkənu tse tsi ayi ɨwu a nye anu za zə tse za bɨ soŋnə a mbó bo məben bi nɨkwa mbɨ́ʼ agho, lá á baŋnɨ mbe be ngə́ gho mboŋ o zúʼnə́ a Nyɔngɔŋ Mǒse ghe.

²⁵Lá, mbɨ́ʼ a ba a se bə Yuda be ba bɨ bəŋnə awa ntiʼ ɨbɛn ba bɨ nɨŋnɨ mɨntəm ɨma a nye Kristo lá, bɨgɨ ŋwaʼnɨnə aŋwaʼnɨ ntsagɨ a mbó bo ɨ sóŋə́ a mbó bo ngə́ bɨgɨ tsɔʼnə a mu mɨntəm ɨmɨgɨ ngə́ bo mɨ zagɨ keʼ dzɨ azúm zə tse za bɨ ghanɨ a mbó ɨbɔ bɨ abe, kə ɨ no alɛm, kə ɨ kfurɨ ɨnyam za bɨ se kyem, ɨ kɨ zɔŋ tsɔʼ mɨntəm ɨma a nye ɨnu ntɔrɨ ɨlɛbɨ ə.”

²⁶Ma lan, Baolo a lɔ́gɨ́ mbáŋnɨ́ tsa bo bo ghɛn, njwi zɨ mɔʼɔ lanə, bo bo sugɨ ɨnye ɨtsa ɨ fɛm a mu mbɔm ə. Wɛrə a tíʼ ngɛn a mu Ndáŋwi zɨ Ngwi, ɨ fɨʼtɨ ndvuŋ njwi tsa tsɨ mɨ tsa zaʼnɨ bɔŋ nkfu ɨ sugɨ ɨnye ɨ fɛm a mu mbɔm məza ɨ lwɨgɨnɨ, á bɨ tiʼ nkɨ nga mɨtsuʼnɨ mɨ atú a nkfu ŋwɔn nɨ bo tsum ə.

²⁷Lá tsɛʼ mbáʼ njwi tsa tsi samba tíʼnɨ́ tsɛʼ abó ɨ yen mi, bə Yuda bə tse ba bɨ lónɨ́ a mu mbuʼ Esha zɛ́n a Baolo a mu Ndáŋwi zɨ Ngwi ə. Bo ghɨ́ mɨntɔŋ mɨ ɨnɔ wa ɨtsum lwinɨ, bɨ tiʼ nko a Baolo ghe.

²⁸Bo tɔ́nkɨ́ ngə́, “Mbáŋnɨ́ bə Izrai, á nɨ gha akwatɨ ə! Zɛnə a ŋwɔn wa a ghɛnɨ ɨdiʼ ɨtsum ndǐʼ ɨbɛn bɨtsum ngə́ á bo furɨ ndzum a nye ɨbɛn bə Izrai, Nyɔngɔŋ Mǒse abɔʼnɨ Ndáŋwi zɨ Ngwi ə. Tɨtsɔŋnɨ, za a bɨ́gɨ́nɨ́ ngɛn nɨ mbyi a nɨ ngə́ wɛrə a lɔgɨ a ba a se bə Yuda be ngyen nɨ bɛrə a mu Ndáŋwi zɨ Ngwi zen, ɨ shwiʼ adiʼ zə fɛmnɨ ziŋ ə!”

²⁹(Bo sóŋ a məzen lá mbɨ́ʼ ngə́ bo zɛ́n a Trɔfimɔsɨ wa a lónɨ́ a Ɛfɛso bo Baolo a mu ntáʼmbagə wu wi wa, ntiʼ nkwaʼtɨ ngə́ Baolo a lɔ́gɨ́ ayi ngɛ́n nɨ zɨ a mu Ndáŋwi zɨ Ngwi ə.)

³⁰Ndum bvúgɨ́nɨ́ a mu ntáʼmbagə wu wi wa ɨtsum, ɨbɛn kɨənɨ ngǒtɨ táʼ adiʼ, nko a Baolo, ɨ shwuŋ ayi ɨ fu nɨ zɨ a mu Ndáŋwi zɨ Ngwi ə. Tsɛʼ a nyom məwa, bɨ byí nkúbɨ́nɨ́ mɨntsu mɨndá mɨ Ndáŋwi zɨ Ngwi ə.

³¹Bo kə́ njwə́ŋtɨ́ njwitɨ Baolo, mbáʼ bɨ tságɨ́nɨ́ nkən, ɨ kɔʼ ngɛn a mbó tantso bɨgwe bɨ bə Roma ngə́ Yerosalɛm tsum a tsí a mu ndum ə.

³²Tsɛʼ a nyom məwa tantso wa a lɔ́gɨ́ bɨgwe ba bə tse abɔʼnɨ bɨtantso bɨgwe nkɨ wu fɨgɨnɨ bo bo kɨənɨ ɨ shiʼ ngɛn nkwatɨ ɨnɔ ɨbɛn wa. Ɨbɛn ba ghɨnə ndzé bɨgwe ba ntiʼ nkyɛntɨ a shwóm Baolo ghe.

³³Tantso wa a tsá ngɛn nkwatɨ a Baolo, ɨ shiʼ mbó wə ɨnye, ɨ soŋ bɨ korɨ ayi nɨ mɨnkɨ mɨ atɨŋə mi mɨmbá ghe. Wɛrə a tíʼ mbítɨ́ ngə́, “Ŋwɔn wen a lá ɨwa, a kɨ fan lá anu ake le?”

³⁴Ɨbɛn bə tse a mu ɨnɔ wa tɔ́nkɨ́ a táʼ anu, bə mɔʼɔ kɨ ntɔnkɨ aza ghe. Ɨdiʼ kə́ nzhwúə adzaŋ za tantso wa kɨ chi keʼ zhi anu za a lánɨ́ fúə. Ma lan, wɛrə a sóŋ bɨ lɔgɨ a Baolo nkɔʼ ngɛn nɨ wɛrə a mu bálɨ́gɨ́ wa.

³⁵Bo ghɨnə ngɛ́n fu a nye mɨkyebɨnɨ mɨ nkɔʼ adiʼ, ntiʼ mbyɛʼ ayi ɨ byɛʼnɨ mbɨ́ʼ ngə́ nángyérə́ wa kə́ mbubtə be tɨsɨŋə.

³⁶Bo bɨtsum kə́ ndzɔŋə wə ndzum mbúgə́ ngə́, “Lwɛʼtɨ ayi ɛ!”

³⁷Adzaŋ za bɨgwe ba kɨ́nə́ ntíʼə ndǒ ndɔgɨ Baolo ɨ kon ghɛn nɨ zɨ a mu bálɨ́gɨ́ wa lá, a sóŋ a mbó tantso wa ngə́: “A ma soŋ anu zə tse a mbó gho ghe.” Tantso wa a bítɨ́ ngə́, “O ghǎm nɨgham nɨ bə Grikɨ ə, kə ndé?

³⁸Lá be ngə́ ka o be agho ŋwɔn bə Gyibto wa a bvúgɨ́nɨ́ ndum mbənkɨ ɨdiʼ a nkfu tse wa, wa a tsɨ́ŋnɨ́nɨ́ bɨkyemntɔŋ nchwuʼ tsi nɨkwa ngɛn nɨ bo a mu mɨkɨghonɨ lá le?”

³⁹Baolo a chwɨ́gɨ́ ngə́, “Ma nɨ ŋwɔn bə Yuda, bɨ jwi aghan a Tasusɨ a mu mbuʼ Silisha, ŋwɔn ntáʼmbagə wu wi wu dɨtɨnə. Ma buʼ mbó, nyɛʼtɨ á ma gham a mbó ɨbɛn biŋ ə.”

⁴⁰Tantso wa a ghá abárɨ́ a mbó wɛrə, adzaŋ məwen, Baolo a tɛ́m atú mɨkyebɨnɨ mɨ nkɔʼ adiʼ ma nchitɨ ɨbɛn ba ngə́ á bo laŋə. Bo ghɨnə nkyɛ́ntɨ́, Baolo a tiʼ ngam a mbó bo nɨ nɨgham nɨ bə Ɛbal ə: