Read Ngemba Ɨfaʼ 22 Bible Online

Ɨfaʼ 22 - Ngemba bible

Ɨfaʼ 22

¹“Ɨbɔmbɨma ɨban, bə Yuda, á nɨ zhwiʼtɨ, á ma gham nɨgham nɨ ntsuʼ atú azan a ɨshi bɨŋ ə!”

²Mbáʼ bɨ zúʼnɨ́ a gham a mbó bo nɨ nɨgham nɨ bə Ɛbal lá, bo mɛ́tɨ́ naʼ, ɨdiʼ tiʼə ngěn ngə́ shwi. Baolo a tíʼ ngɛn nɨ mbyi ngə́:

³“Ma nɨ ŋwɔn bə Yuda, bɨ jwi aghan a Tasusɨ a mu mbuʼ Silisha, lá nkwi ɨghan a Yerosalɛm tso mɔn aŋwaʼnɨ Gamaliɛ ghe. Ma yɛ́ʼ a Nyɔngɔŋ bɨta ɨbɨgɨnə bə kɔ́ʼɔ́nguʼ tsɛʼ ɨ shiʼnɨ nkɨ ntɛgɨ atú azan a nye Ŋwi tsɛʼ tso mbáʼ bən bɨtsum ɨghan ɨ sɨŋə kɨnɨ nkɨ ntɛgɨ lá.

⁴Ma kə́ ndɨ́gɨ́ ɨbɛn ba bɨ kɨ́nə́ ndzɔ̌ŋ Ndóm wen, njwítə́ awa ghe. Ma kótɨ́ mbáŋnɨ́ bo bɨ bəngye ɨ nɨŋ awa atsáŋ ə.

⁵Ntumshe wu Ngwi abɔʼnɨ Ngaŋ Sáʼ Abyɛn bɨtsum chi bémtɨ́ ngə́ ma sóŋə́ lá nkənu ə. Ma kwárɨ́ ɨŋwaʼnɨ a mbó bo tsa bɨ ŋwáʼnɨ́nɨ́ a mbó bə Yuda ba bɨ tsínɨ́ a Damaskusɨ, ma lan, ma ghɛ́n ɨwu a nkótɨ́ ɨbɛn məben ɨ yen nɨ bo a mu mɨnkɨ mɨ atɨŋə a Yerosalɛm á bɨ nɨŋ ngɨ́ʼ a nye bo ghe.”

⁶“Adzaŋ za ma kɨ́nə́ ngěn ɨ tiʼ fatɨ a Damaskusɨ lá, a bé tso ntənɨ nyom ə, nkaʼ wu tən wu tse vwúkɨ́ ndo a nɨkaŋ mbáŋ ntsa nkárɨ́sɨ́ aghə.

⁷Ma vwó a tɨshe nkɨ ntiʼ ndzuʼ nji zɨ tse ɨ soŋənə a mbó me ngə́, ‹Sɔlɨ Sɔlɨ! O dɨ́gə́ aghan lá ngə́ ke le?›

⁸Ma bítɨ́ ngə́, ‹Maʼmbyí, o lá ɨwa le?› Wɛrə a chwɨ́gɨ́ a mbó me ngə́, ‹Ma nɨ Yeso wu Nazarɛ wa o dɨ́gɨ́nə́ lá.›

⁹Mbáŋnɨ́ tsa tsɨ tsínɨ́ bɨgɨ bo zé nkaʼ wa, lá nkeʼ zuʼ nji ŋwɔn wa a kɨ́nə́ ngamə a mbó me ghe.

¹⁰Ma bítɨ́ ngə́, ‹Maʼmbyí, ma mɨ tiʼ ghɨ lá ɨ nə́ le?› Maʼmbyí a chwɨ́gɨ́ a mbó me ngə́, ‹Lo atɨ́, nkon ngɛn a mu Damaskusɨ ə. Ɨwu bɨ mɨ fɨʼtɨ anu atsum za Ŋwi a lɛnɨ ngə́ o faʼə.›

¹¹Ma fɨ́gɨ́ mbɨ́ʼ nkaʼ wu tən wa, ma lan, ngaŋ aku ɨtsə tíʼ nchwá abó azan, ntsagɨnɨ aghan ngɛn nɨ me a Damaskusɨ ə.

¹²A mu ntáʼmbagə wu wi wa, Ŋwɔn tse a tsí ɨwu wa ɨkum ɨyi bénɨ́ Anania ghe. Wɛrə a bé ŋwɔn wa a kɨ́nə́ ngúʼsə́ a Ŋwi nɨ ntəm ɨyi ɨtsum, ndzúʼnə́ a Nyɔngɔŋ ɨwɨgɨnə, bə Yuda bɨtsum ba bɨ kɨ́nə́ nchyɛ̌ ɨwu kə́ ndǐʼ mbɔm zɨ shiʼnɨ a mbó zɨ tsɛʼ nkə.

¹³Wɛrə a yén nkwátɨ́ aghan, ntɛm a mbyɛn me, ɨ soŋ ngə́, ‹Mɨma ɨghan Sɔlɨ, bə ndzɛn ɨdiʼ wədiʼ ə!› Tsɛʼ a nyom məwa, ma bə́ ndzɛ́n ɨdiʼ wədiʼ, ntiʼ ndzɛn ayi ɛ.

¹⁴Wɛrə a sóŋ ngə́, ‹Ŋwi wu bɨta ɨbɨgɨnə bə kɔ́ʼɔ́nguʼ a tsɔʼ agho ngə́ o zhi anu za wɛrə a lɔnə, ngə́ o ze ngaŋ afaʼ ɨzhi za ɨ chinɨnɨ, nkɨ ndzuʼ á wɛrə a ngámə́ nɨ ɨzhi nji ɛ.

¹⁵Mbɨ́ʼ ngə́ o ghɨ́ bé atɛmə-ndzě wɛrə a sóŋə́ a mbó ŋwɔn tsum anu za o zɛnɨ nkɨ ndzuʼə.

¹⁶Tɨtsɔŋnɨ, o bvurə nkwiʼə ntsíŋə́ lá ake le? Lo atɨ́ nkwarɨ nkyi, á bɨ kɨ ndɨgɨnɨ mɨbvu ɨmo a ntsǎ a ndzum atsaʼtɨ a Ŋwi azo wəmbo ə.›”

¹⁷“Ma bə́ mbən ngɛn a Yerosalɛm ə. Mbáʼ ma kɨ́nə́ ntsaʼtə a Ŋwi a mu Ndáŋwi zɨ Ngwi, ma lyé ndzɛm nəzhwɨgɨnɨ,

¹⁸za wə mu, ma zɛ́n a Maʼmbyí, wɛrə a soŋ a mbó me ngə́, ‹Kɨənɨ fu a Yerosalɛm tsɛʼ nɨ ngyaŋ ɨnye, mbɨ́ʼ ngə́ ɨbɛn ba bɨ tsinɨ ɨghan mɨ keʼ bem anu za o mɨ soŋ mbɨ́ʼ aghə.›

¹⁹Ma chwɨ́gɨ́ ngə́, ‹Maʼmbyí, bo zhi tsɛʼ ɨ shiʼnɨ ngə́ ma kə́ ngěn a mu ndáŋwi bə Yuda nkótə́ nkə́ shwómə́ a ba bɨ nɨŋnɨ mɨntəm ɨma a nye gho ghe.

²⁰A nkfu za bɨ zhwítɨ́nɨ́ atɛmə-ndzě ɨgho Sɨtifa lá, me mboŋ ma tsí ɨwu, mbémtə́ ngə́ á bɨ zhwitɨ ayi nkə́ ndə̌tú nɨ ɨtsɛʼ ɨbɛn ba bɨ zhwítɨ́nɨ́ ayi ɛ.›

²¹Maʼmbyí a sóŋ a mbó me ngə́, ‹Ghen, mbɨ́ʼ ngə́ ma mɨ tsagɨ agho aghagɨ zə sa, a mbó ba a se bə Yuda be ə.› ”

²²Ɨbɛn ba kə́ njwíʼtə́ anu za Baolo a kɨ́nə́ sóŋə́ tsɛʼ zhwiʼtɨnɨ ɨ kɔʼ kuʼ nkfu za wɛrə a sóŋnɨ́ a məziŋ ə; bo tíʼ mbiʼnɨ ntɔ́nkə́ nɨ nji tsɨ tən ngə́, “Lwɛʼtɨ ayi ɛ! Zhwitɨ ayi ɛ! Ka a kuʼnɨ ayi a nchyɛ́ atú ntɨŋə!”

²³Bo kə́ ntɔ́nkə́, nghágɨ́ ɨtsɛʼ ɨtsa a mu ɨfɛgɨ, nkə́ máʼə abvuŋnɨ a mu ɨfɛgɨ ə.

²⁴Tantso bə Roma wa a sóŋ a mbó bɨgwe ɨbyi ngə́ á bo lɔgɨ a Baolo nkon ngɛn nɨ zɨ a mu bálɨ́gɨ́ wa, ntíʼ nkɨ shwom ayi taŋ ɨ tsɔʼ aku anu za a ghɨ́nɨ́ bə Yuda tɔ́nkɨ́nə́ wətú a nye nji məziŋ ə.

²⁵Lá bɨ ghɨnə nkórɨ́ ayi taŋ ɨ shwom, Baolo a bitɨ a tantso bɨgwe nkɨ wu fɨgɨnɨ wa a tɛ́mnɨ́ ɨwu lá ngə́, “A kuʼnɨ a mu nyɔngɔŋ a ndəŋ ŋwɔn bə Roma wa bɨ bvurɨ tɨ soŋ ngə́ a vwo ɨsáʼ mbɨ́ʼ afənu zə tse le?”

²⁶Mbáʼ tantso bɨgwe nkɨ wu fɨgɨnɨ wa a zúʼnɨ́ a məzen lá, ngɛn a mbó tantso wa mbitɨ ayi ngə́, “O búə lá ɨ nə́ le? Ŋwɔn wa a nɨ ŋwɔn bə Roma ghe!”

²⁷Ma lan, tantso wa a ghɛ́n nkwatɨ a Baolo mbitɨ ayi ngə́, “Soŋ aghə, o lá ŋwɔn bə Roma le?” Baolo a chwɨ́gɨ́ ngə́, “E”

²⁸Tantso wa a sóŋ ngə́, “Ma tfú ndvuŋ nkáb wu wi bɔŋ ɨ be ŋwɔn bə Roma ghe.” Baolo a chwɨ́gɨ́ ngə́, “Lá, bɨ jwi aghə ɨ jwinɨ a nye ŋwɔn bə Roma ghe.”

²⁹Tsɛʼ a nyom məwa, ɨbɛn ba bɨ tsínɨ́ nɨ mbitɨ Baolo nɨ ɨnu lá, bɨ shwítɨ́ awa wə ɨnye; ngvurɨ tíʼ ntsí a nye tantso wa mbáʼ a zhínɨ́ ngə́ Baolo a bé ŋwɔn bə Roma abɔʼnɨ adzaŋ za a ghɨ́nɨ́ bɨ korɨ ayi nɨ mɨnkɨ mɨ atɨŋə lá.

³⁰Tantso wa a kə́ ndǒ nji ɨ shiʼnɨ anu za bə Yuda kɨ́nə́ nkaŋə a Baolo ɨwu; ma lan, njwi zɨ mɔʼɔ lanə, wɛrə a ghɨ bɨ kyɛgɨ mɨnkɨ mɨ atɨŋə ma a nye Baolo, ntiʼ soŋ ngə́ á bɨntumshe bə wi abɔʼnɨ Ngaŋ Sáʼ Abyɛn bɨtsum bomnkə. Wɛrə a tíʼ ngyen nɨ Baolo ntɛgɨ ayi a ɨshi bo ghe.