Read Ngemba Ɨfaʼ 25 Bible Online

Ɨfaʼ 25 - Ngemba bible

Ɨfaʼ 25

¹Njwi tsi tárə́ tsanə, Fɛsɨto a yen a mu mbuʼ za. Wɛrə a ló a Seseria ngɛ́n a Yerosalɛm,

²adiʼ wa bɨntumshe bə wi abɔʼnɨ bɨntsagɨnɨ bɨ bə Yuda ghɨ́nɨ́ ɨsáʼ ɨwa a ɨnye Baolo ɨwu ə. Bo búʼ mbó a mbó Fɛsɨto

³ngə́ á ghɨ a mɨ ɨbɔŋ tse a nye bo, ndɔgɨ a Baolo ngyen nɨ wɛrə a Yerosalɛm, mbɨ́ʼ ngə́ bo kórɨ́nə a mɨnaŋ a njwítɨ́ wɛrə a ndómnji ɛ.

⁴Fɛsɨto a chwɨ́gɨ́ ngə́, “Bɨ lɛn a Baolo a Seseria tso ngaŋ atsáŋ ə. A nye məkum a nkfu, me mboŋ ma mɨ bə ghɛn ɨwu ə.

⁵A bɨntsagɨnɨ bɨŋ ghɛn a Seseria bɨgɨ bo nkaŋ ayi mbáʼ be a ghɨ anu zə tse za ka a kuʼnɨ ayi ɛ.”

⁶Fɛsɨto a bə́ nkwiʼ ntsi bo bo atú njwi tsi nɨfə̧ kə nɨghúm, ntiʼ ndo ngɛn a Seseria ghe. Njwi zɨ mɔʼɔ bənə ndán, wɛrə a shiʼtɨ ntsi a ngɔʼ abyɛn, ntiʼ soŋ ngə́ á bɨ lɔgɨ a Baolo ngyen nɨ zɨə.

⁷Baolo a yenə, bə Yuda ba bɨ lónɨ́ a Yerosalɛm ngyen lá lo ntɛm nkárɨ́sɨ́ ayi ntiʼ mbiʼnɨ nkáŋə́ ayi mbɨ́ʼ ɨnu tsɨ tən tsa bo kɨ chinɨ keʼ diʼ ngə́ tsɨ nɨ nkənu ə.

⁸Lá Baolo a ghám nɨgham nɨ ntsuʼ atú azhi ngə́: “Ka ma fə aghan anu zə tse a nye Nyɔngɔŋ bə Yuda kə a nye Ndáŋwi zɨ Ngwi, kə a nye Ɨfɔ bə Roma ghe.”

⁹Lá Fɛsɨto a kə́ ndǒ nkwarɨ ɨkum wu shiʼnɨ a mbó bə Yuda ghe. Ma lan, wɛrə a bítɨ́ a Baolo ngə́, “O mɨ kɔŋtɨ a ngen a Yerosalɛm á bɨ saʼ ɨsáʼ ɨgho ɨwu mbɨ́ʼ ɨnu tsen tsa bɨ kaŋnɨ agho mbɨ́ʼ a tsɛrə a ɨshi me lá le?”

¹⁰Baolo a chwɨ́gɨ́ ngə́, “Ma tɛm ɨghan lá a ngɔʼ abyɛn Kaisa, adiʼ wa bɨ tsinɨ nɨ ɨ sáʼ ɨsáʼ ɨghə. Ka ma fə aghə anu zə tse a nye bə Yuda, tsɛʼ adzaŋ za bɨŋ mboŋ nɨ kɨnɨ nkɨ nji ɨ shiʼnɨ lá.

¹¹Be a be ngə́ ma fə anu zə tse a mu nyɔngɔŋ, nkɨ ngɨ anu zə tse za a kuʼnɨnɨ ngə́ á bɨ zhwitɨ aghan, ka ma ndǒ aghan a ndɛ́ʼ nɨvwo məniŋ ə. Lá be a be ngə́ ka nkənu tse tsi ayi a nye ɨnu tsa bo kaŋnɨ aghan mbɨ́ʼ a tsɛrə muŋ ŋwɔn tsɛrə a chi keʼ aghan a mbó bo ghaə. Ma bitɨ ngə́ á bɨ tsagɨ ɨsáʼ ɨghan a mbó Ɨfɔ bə Roma ghe.”

¹²Fɛsɨto a tsúmnɨ́ bo bɨ ɨbɛn ba bɨ tɨ́gɨ́tɨ́nə́ ayi ntiʼ nchwɨgɨ ngə́, “O bitɨ ngə́ á Ɨfɔ bə Roma a zuʼ ɨsáʼ ɨgho, ma lan, o mɨ ghɛn wəmbo ə.”

¹³Abaŋ a ghɨnə mbé ɨwu, Ɨfɔ Agɨrɨba bo Bɛrɨnisɨ yen a Seseria a ngántɨ́ Fɛsɨto ɨ ghɨ a yiŋ ɨ shiʼnɨ wəmbo ə.

¹⁴Bo ghɨnə ntsí ɨwu atú njwi tsɨ tse, Fɛsɨto a fɨʼtɨ anu mbɨ́ʼ a Baolo a mbó Ɨfɔ wa ɨ soŋ ngə́: “Ŋwɔn tse a tsi ɨghan wa Fɛligɨsɨ a kɨ nɨŋnɨ ayi atsáŋ ɨ nyɛʼtɨ ɨwu ə;

¹⁵mbáʼ ma kɨ ghɛnɨ a Yerosalɛm lá, bɨntumshe bə wi bɨ bə Yuda abɔʼnɨ bɨkum bɨ alaʼ ɨba kɨ kaŋ ayi, ɨ soŋ a mbó me ngə́ á ma soŋ ngə́ wɛrə a vwo ɨsáʼ ə.

¹⁶Lá ma kɨ soŋ a mbó bo ngə́ bɨgɨnə bə Roma se tsi nɨ mbɔm ɨ fom tintɨ a ŋwɔn wa bɨ kaŋnɨ ayi mbɨ́ʼ afənu zə tse ɨ gha a mbó ɨbɛn ba bɨ kaŋnɨ ayi tɨgha bo bo bomnkɨ a ngɔʼ abyɛn, á wɛrə a gham nɨgham nɨ ntsuʼ atú azhi mbɨ́ʼ ɨnu tsa bɨ kaŋnɨ ayi nɨ tsɛrə ghe.

¹⁷Bo ghɨnə ngyén ɨghan, ma kaʼ nkfu tse tsənkə. Njwi zɨ mɔʼɔ byí ndán, ma shiʼtɨ ntsi a ngɔʼ abyɛn, ɨ soŋ bɨ tɔŋ a ŋwɔn wa a kon ngyiŋə.

¹⁸Ɨbɛn ba bɨ káŋnɨ́ ayi ghɨnə ntɛ́m atɨ́ nkaŋ ayi, ma kaʼ zuʼ ɨnu tsɨ tɔmnɨnɨ tsa ma kwáʼtɨ́nɨ́ ngə́ bo mɨ kaŋ ayi mbɨ́ʼ a tsɛrə ghe.

¹⁹Atsum za bo kɨ́nə́ nkwənkə mbɨ́ʼ a zɛrə a bé mbɨ́ʼ mɨndóm ɨma ma bo zhinɨ a Ŋwi, nkɨ mbe mbɨ́ʼ a ŋwɔn tse wa ɨkum ɨyi bénɨ́ Yeso, mbáʼ a kwɛ́nə nkfo; lá Baolo a kaŋnə ngə́ ŋwɔn məwen a bvurɨ ntsi atú ntɨŋ ə.

²⁰Atú azan a bvúrɨ́ adzaŋ za ma chinɨ tsɔʼnɨ aku ɨnu tsen ɨ zhi ɨ shiʼnɨ, ma lan, ma bítɨ́ a Baolo ngə́ a mɨ kɔŋ a ngen a Yerosalɛm á bɨ sáʼ ɨsáʼ ɨyi ɨwu le.

²¹Lá Baolo a sóŋ ngə́ á bɨ tsagɨ ɨsáʼ ɨyi a mbyi ɛ. Wɛrə a sóŋ ngə́ á bɨ lɛn ayi atsáŋ, ɨ kuʼ nkfu za Kaisa a mɨ tɛgɨnɨ ɨsáʼ ɨyi ɛ. Ma lan, ma tíʼ sóŋ ngə́ á bɨ ndyɛ́mə́ ayi ɨ kɔʼ kuʼ nkfu za ma ghɨ tsagɨ ayi a mbó Kaisa ghe.”

²²Agɨrɨba a sóŋ a mbó Fɛsɨto ngə́, “Ma mɨ kɔŋ a ndzúʼ anu za ŋwɔn wen a mɨ soŋ me mboŋ ə.” Fɛsɨto a chwɨ́gɨ́ ngə́, “O mɨ zuʼ wəmbo ɨzo ghe.”

²³Njwi zɨ mɔʼɔ lanə, Agɨrɨba bo Bɛrɨnisɨ yen, tɨ yiŋə ngyíŋə́ tsɛʼ nɨfɔ nɨfɔ a mu ntáʼmbagə wu wi wa. Wɛrə a kón a mu tsa wa bo bɨ bɨtantso nkwiʼtɨ mbáŋnɨ́ tsə dɨtɨnɨ a mu ntáʼmbagə wu wi wa. Fɛsɨto a tíʼ sóŋ bɨ yen nɨ Baolo ghe.

²⁴Fɛsɨto a sóŋ ngə́, “Ɨfɔ Agɨrɨba abɔʼnɨ ŋwɔn tsum wa a tsinɨ ɨghan bɨgɨnə bo: Nɨ zɛn a ŋwɔn wa bə Yuda bɨtsum ɨghan nkwiʼtɨ a bə Yerosalɛm ŋwaʼnɨnɨ mbɨ́ʼ ɨnu tsa a fanɨ a nye bo a mbó me lá. Bo tɔ́nkə́ ngə́ á keʼ bə mbvurɨ ntsi atú ntɨŋ ə.

²⁵Lá ma kɨ sa zɛn ngə́ wɛrə a ghɨ anu zə tsɛrə za be bɨ zhwitɨ ayi ɛ. Lá, mbáʼ wɛrə a kɨ bitɨnɨ ngə́ á bɨ lɔgɨ ɨsáʼ ɨyi ngɛn nɨ wɛrə a ɨshi Kaisa lá, ma tsɔʼnə a mu ntəm me a ntsagɨ zɨ ɨwu ə.

²⁶Lá ka ma tsi aghan nɨ ngótɨ́ anu za ma mɨ ŋwaʼnɨ mbɨ́ʼ ayi a mbó Kaisa ghe. Ma lan, ma yen nɨ zɨ a ɨshi bən — tɨ́sə́n tɨ́sə́n, a ɨshi gho Ɨfɔ Agɨrɨba! — taŋ ma mɛtɨ a ntsɔ́ʼnɨ́ aku anu məzen, ma chi tiʼ tsi nɨ anu zə tse a ŋwaʼnə ghe.

²⁷Mbɨ́ʼ ngə́ a mbó me ka a wɛm ayi nkyi a ntsagɨ ŋwɔn a mbó Kaisa tɨ ŋwaʼnɨ ɨ shiʼnɨ anu za bɨ kaŋnɨ ayi mbɨ́ʼ a zɛrə ghe.”