Read Ngemba Ɨfaʼ 27 Bible Online

Ɨfaʼ 27 - Ngemba bible

Ɨfaʼ 27

¹Bɨ ghɨnə ntɛ́gɨ́nɨ́ ngə́ á bɨgɨ yiŋ nɨyen a mu nkyi ngɛ́n a Itali, ɨ nɨŋ a Baolo abɔʼnɨ ngaŋ atsáŋ tsə mɔʼɔ a mu mbó Jurɨyɔsɨ ə. Wɛrə a bé tantso bɨgwe nkɨ wu fɨgɨnɨ a mu achwirɨ a bɨgwe bɨ bə Roma za bɨ kɨ́nə́ ntɔ́ŋə́ ngə́, “Achwirɨ a Bɨgwe zə Kaisa ghe”.

²Bɨgɨ kɔ́ʼ nkón a mu abáŋ a nkyi za a lónɨ́ Adramityum, ntiʼ ntsi nɨ ngen nɨ mɨtɛmnɨ mɨ ɨbáŋ nkyi ma mɨ tsínɨ́ a ngə́rɨ́ sagɨrə wu ngwi wa a tsínɨ́ a mbuʼ Esha lá, ntiʼ ngyiŋ nɨyen a mu nkyi ɛ. Aristakusɨ, ŋwɔn bə Masedonia wa a lónɨ́ a Tesalonaika a tsí bɨgɨ bo ghe.

³Njwi zɨ mɔʼɔ lanə, bɨgɨ yen nkon a Saidɔn ə. Jurɨyɔsɨ a tsí nɨ ntəm ngɨ ɨbɔŋ a ɨnye Baolo, ɨ nyɛʼtɨ ayi ngə́ á ghɛn ndzɛn bɨson ɨbyi, á bɨ gha ayi nɨ azúm za a kɨ́nə́ ndǒ ghe.

⁴Bɨgɨ ló ɨwu, ngɛn nɨ mbyi nɨ nɨyen ɨnɨgɨ ə. Mbɨ́ʼ ngə́ kɨfɛrɨ a kə́ njintə awɨgɨ, bɨgɨ tsá nɨ ndóm adiʼ za nkyi karɨsɨnɨ bɨ tɔŋə nɨ Saibrusɨ lá, a bagɨ wa kɨfɛrɨ a bɔ́nɨ́nɨ́ ɨwu ə.

⁵Bɨgɨ dáŋ a sagɨrə wu ngwi wa a tsínɨ́ a kɨʼ Silisha bo Bamfilya lá, ngyen fu a Maira a mu Laisia ghe.

⁶Ɨwu, tantso bɨgwe nkɨ wu fɨgɨnɨ wa a zɛ́n abáŋ a nkyi za a lónɨ́ Alɛgɨsandɨrɨya, ntsi nɨ ngen a Itali, ma lan, wɛrə a tíʼ ntsagɨ awɨgɨ wə mu ə.

⁷Bɨgɨ yíŋ nɨyen a mu nkyi tsɛʼ abɔbɔ atú njwi tsɨ ghaʼtɨnɨ a mu ngɨ́ʼ zɨ ngwi ə. A ndwɨgɨnə, bɨgɨ yén fú a kɨʼ ntáʼmbagə Nidusɨ, mbáʼ kɨfɛrɨ wa a kɨ́nə́ njintə awɨgɨ tsɛʼ jintɨnɨ, nchi keʼ nyɛʼtɨ á bɨgɨ zɔŋ ndóm məwa lá, ma lan, bɨgɨ tíʼ ngwámtɨ́ shíʼ ntsa nɨ bagɨ wa kɨfɛrɨ a bɔ́nɨ́nɨ́ ɨwu a Kritɨ, adiʼ za nkyi karɨsɨnɨ, mbaʼtɨ adiʼ za a shwɔŋnɨnɨ nkon ngɛn a mu nkyi bɨ tɔŋə nɨ Sarɨmɔnɨ lá.

⁸Bɨgɨ kə́ ntánə́ tsɛʼ aghɔ́ŋəghɔ́ŋ nɨ ngɨ́ʼ zɨ ngwi ngyen fu a nye adiʼ zə tse za bɨ kɨ́nə́ ntɔ́ŋə́ ngə́ Sef Abɔsɨ, abaŋ a keʼ bə sagɨ ɨ ghɛn kon a Lesi ə.

⁹Bɨgɨ tsí ɨwu a nye abaŋ zə sa, ɨ kɔʼ kuʼ a nye nkfu za abyɛn a sé bə mbɔŋ a ngen nɨ mbyi nɨ nɨyen ɨnɨgɨ ə. Mbɨ́ʼ ngə́ Njwi Nchigɨ Nji tsə Ntsaʼtɨ Ŋwi ɨ tsánə, Baolo a tíʼ ntɨ́gɨ́tɨ́ ngə́:

¹⁰“Bɨtə̧, ma zɛn ngə́ nɨyen ɨnɨgɨnə ɨ lɔgɨnɨ ɨghan nɨ mɨ keʼ bɔŋə; byé wu ngwi a mɨ fu a nye abyɛʼ abɔʼnɨ abáŋ a nkyi zen, á ɨbɛn kɨ nkfokə.”

¹¹Lá tantso bɨgwe nkɨ wu fɨgɨnɨ wa a báŋnɨ́ ndzúʼ be anu za mboŋ abáŋ a nkyi za bo ntyǐŋ abáŋ za sóŋnɨ́, ɨ nyɛʼ a zə Baolo ghe.

¹²Nɨtɛmnɨ nə abáŋ a nkyi na sé bɔŋ a nchyɛ́ ɨwu a nkfu ɨfɛgɨ wu tən wa; ma lan, nɨghaʼ ɨbɛn a bémtɨ́ ngə́ á bɨ ghɛn nɨ mbyi njwə́ŋtə́ a ndzé ngə́ be bo ghɛn nkuʼ a Finigɨsɨ taŋ ɨ tiʼ tsi ɨwu a nkfu ɨfɛgɨ wu tən wa. Finigɨsɨ a nɨ nɨtɛmnɨ nə abáŋ a nkyi a mu Kritɨ na nɨ lenɨ mbuʼ ntɨ́ŋ mbyɛn nɨbɨŋə bo mbuʼ atú mbyɛn nɨbɨŋə ghe.

¹³Kɨfɛrɨ wu mbɔnɨnɨ a ló nɨ bagɨ ntɨ́ŋ mbiʼnɨ ntsǎ, ɨbɛn ba kwáʼtɨ́ ngə́ bo kɨ chi ghɨ anu za bo kyáŋtɨ́nɨ́, ma lan, bo shwúŋ a təkɨŋ atɨŋə wa a chwánɨ́ abáŋ a nkyi za nkɔ́ʼsɨ́, ntiʼ ngyiŋ nɨyen a mu nkyi, nghɔ́btə́ tsɛʼ ghɔbtɨnɨ ngə́rɨ́ sagɨrə wu ngwi wa a tsinɨ a Kritɨ ə.

¹⁴Lá tsɛʼ mɨmboŋnɨ, kɨfɛrɨ wu ntən, wa bɨ kɨ́nə́ ntɔ́ŋə́ ngə́, “Nɔtɨ-ista”, a ló a mu adiʼ za nkyi kárɨ́sɨ́nɨ́ lá, ndzɔrɨsɨ ɨ shiʼ a mu sagɨrə wu ngwi wa.

¹⁵A túm abáŋ a nkyi za. Mbáʼ bɨgɨ kɨ chi keʼ a kɨfɛrɨ wu ntən wa jintɨ lá, bɨgɨ sé bə njwəŋtɨ a ngɨ anu zə tsɛrə ghe. Bɨgɨ nyɛ́ʼtɨ́ kɨfɛrɨ wa a tyiŋ abáŋ a nkyi za ngɛn nɨ zɛrə a ndóm wa a kɨ́nə́ ngěn ɨwu ə.

¹⁶Bɨgɨ tsí nɨ mbɔnɨ zɨ tse a nkfu za bɨgɨ tsánɨ́ ntíʼə ngyíŋə́ a bagɨ ntɨ́ŋ mɨnya mɨ adiʼ za nkyi kárɨ́sɨ́nɨ́ bɨ tɔŋə ngə́ Kɔda lá. Ɨwu, bɨgɨ tíʼ ntyikɨ tsɛʼ nɨ ngɨ́ʼ zɨ ngwi a ndé akanuʼ zə wi za abáŋ a nkyi za a kɨ́nə́ shwuŋə á keʼ nchíʼnə́ ghe.

¹⁷Bɨ shwúŋ nkón nɨ zɛrə a mu abáŋ a nkyi za ntiʼ sɨtɨ a zɛrə nɨ mɨnkɨ ntsa nkárɨ́sɨ́ abáŋ a nkyi za. Bo kə́ mbɔ́gə́ ngə́ bo chi ghɛn ɨniʼnɨ a nye aláŋsə́ awaŋə za a tsínɨ́ a ngə́rɨ́ sagɨrə wu ngwi wa a tsínɨ́ a Libya lá, ma lan, bo shíʼsɨ́ atsɛʼ za kɨfɛrɨ a kɨ́nə́ ntɔʼə abáŋ a nkyi za ɨwu a ghěnə lá, ntiʼ nyɛʼtɨ kɨfɛrɨ wa a tyiŋ abáŋ a nkyi za ngɛn nɨ zɛrə a ndóm wa a kɨ́nə́ ngěn ghe.

¹⁸Kɨfɛrɨ wu ntən wa a kə́ ntsǎ tsɛʼ tsanə, ma lan, njwi zɨ mɔʼɔ lanə, bo biʼnɨ ngwáŋnɨ́ abyɛʼ zə mɔʼɔ za abáŋ a nkyi za a byɛ́ʼnɨ́ a mu nkyi ɛ.

¹⁹Njwi zɨ mɔʼɔ lanə, bo wáŋnɨ́ ɨdzúm afaʼ abáŋ a nkyi za tsə mɔʼɔ a mu nkyi ɛ.

²⁰Atú njwi tsə ghaʼnɨ, bɨgɨ kɨ chi keʼ ze ntsu nɨnyom kə mɨndzɔŋ ə. Kɨfɛrɨ wu ntən wa a kə́ ntsǎ tsɛʼ tsanə. Ntsiŋə nɨ ntəm tsum ngə́ bɨ chi loŋ awɨgɨ ɨ miə.

²¹Bo ba bɨ tsínɨ́ a mu abáŋ a nkyi za ghɨnə ntsí a nye abaŋ zə sa tɨ dzɨ, Baolo a tɛm atɨ́ ɨ soŋ a mbó bo ngə́, “Ɨbɔmbɨma, nɨ kɨ ba be zhwiʼtɨ anu za ma kɨ soŋnɨ, ɨ keʼ biʼnɨ a Kritɨ a ngyiŋ nɨyen nen a mu nkyi muŋ, ka bɨgɨnə tsənkɨ awɨgɨnə ɨdzúm adzaŋ wen, nkeʼ kɨ ntsi nɨ ndvuŋ byé wiŋ ə.

²²Lá ma buʼ mbó a mbó bɨŋ ə, á nɨ chwatɨ mɨntəm ɨmɨŋ ə! Táʼ ŋwɔn nɨ bən wu tse a mɨ keʼ kfoə; bɨ mɨ byɛgɨ tsɛʼ abáŋ a nkyi ziŋ ə.

²³Mbɨ́ʼ ngə́ a lo mbe nɨ ɨtfúʼ sɨŋə, ntsendá za a nɨ zɨ Ŋwi, zɨ wa ma tsinɨ wə bagɨ nkə́ ngúʼsə́ ayi, ɨ yen a mbó me

²⁴ɨ soŋ ngə́, ‹Baolo koʼ bɔgə! O mɨ zagɨ tɛm a ɨshi Kaisa ghe. Ŋwi a tsa a ndzum ɨbɔŋ wa wɛrə a tsinɨ nɨ wɛrə a nye gho ntsuʼ atú a ŋwɔn tsum wa a yenɨ nɨyen nen a mu nkyi bɨŋ bo ghe.›

²⁵Ma lan, nə ɨbɔmbɨma, á nɨ chwatɨ mɨntəm ɨmɨŋ ə! Mbɨ́ʼ ngə́ ma nɨŋ ntəm ɨghan a nye Ŋwi ngə́ a mɨ be tsɛʼ adzaŋ za bɨ kɨ fɨʼtɨnɨ a mbó me lá.

²⁶Lá bɨ mɨ tyiŋ awɨgɨnə ɨ ghɛn nyɛʼtɨ a nye adiʼ za nkyi karɨsɨnɨ zə tse ghe.”

²⁷A kɔ́ʼnə nkuʼ njwi nɨghúm ntsɔb nɨkwa nɨ ɨtfúʼ, kɨfɛrɨ wu ntən wa a mbvurə ntyiŋə awɨgɨ tsɛʼ tyiŋnɨ nkárɨ́sə́ a mu sagɨrə wu ngwi Mediterenia ghe. A ghɨnə mbé tso ntɨŋ ɨtfúʼ, ɨbɛn ba bɨ kɨ́nə́ ntyíŋə́ abáŋ a nkyi za kwaʼtɨ ngə́ bɨgɨ kɨ chínə́ ntíʼə fátɨ́ ngə́rɨ́ nkyi ɛ.

²⁸Ma lan, bo shíʼsɨ́ nkɨ wa bɨ kórɨ́nɨ́ azúm zə dɨrɨnɨ wə ndwitə ndzɛn ngə́ adiʼ məzen a shwí ɨ shiʼ ngɛn a nye bɨmita 40; abaŋ a bənə mbé ɨwu, bo kwiʼ nkwatɨ ɨ fɨʼ ndzɛn ngə́ a nɨ bɨmita 30 ghe.

²⁹Bo kə́ mbɔ́gə́ ngə́ kɨfɛrɨ a mɨ tyiŋ abáŋ a nkyi za ɨ ghɛn nyɛʼtɨ atú mɨngɔʼ ə. Ma lan, bo shíʼsɨ́ bɨtəkɨŋ bɨ ɨtɨŋə bi nɨkwa a ndzum abáŋ a nkyi za, ntiʼə ntsáʼtə́ a Ŋwi ngə́ á njwi yaŋnɨ ndə̌.

³⁰Ɨbɛn ba bɨ kɨ́nə́ ntyíŋə́ abáŋ a nkyi za tíʼ njwə́ŋtɨ́ a fúə a mu abáŋ a nkyi za ɨ kɨə awa ghe. Adzaŋ məwen, bo tíʼ ngɨ abáŋ a nkyi za a kontɨ ngɛn a mu nkyi, ntiʼ ngɨ ɨtsi ngə́ bo kə́ ndǒ ɨ shiʼsɨ bɨtəkɨŋ bɨ ɨtɨŋə bə tse a ɨshi abáŋ a nkyi za.

³¹Baolo a sóŋ a mbó tantso bɨgwe nkɨ wu fɨgɨnɨ wa abɔʼnɨ bɨgwe ba ngə́, “Be bɨntyǐŋ bɨ abáŋ biŋ tú ghɔŋ a mu abáŋ a nkyi zen muŋ bɨgɨnə se bə mbvurɨ ntsi nɨ ntsiŋə nɨ ntəm tsum tse ngə́ bɨ mɨ loŋ awɨgɨnə ghe.”

³²Ma lan, bɨgwe ba tíʼ tə́ntɨ́ mɨnkɨ ma mɨ chwánɨ́ akanuʼ zə wi za ntiʼ nyɛʼtɨ a zɛrə ghe.

³³Bɔŋ á njwi ndə̌, Baolo a búʼ mbó a mbó bo ngə́ á bo dzɨ mɨdzɨ adzaŋ za wɛrə a sóŋnɨ́ ngə́: “A nɨ njwi nɨghúm ntsɔb nɨkwa ɨ yen kuʼ tɨtsɔŋnɨ mbáʼ nɨ tsinɨ adzaŋ wen tɨ zhi a za a mɨ yiŋə. Atú nkfu ziŋ tsum nɨ se azúm zə tse dzɨə.

³⁴Ma buʼ mbó a mbó bɨŋ ə, á nɨ dzɨ mɨdzɨ ə; nɨ lǒ a mɛrə taŋ ɨ tsi ntɨŋ ə. Kə́ tsɛʼ táʼ ɨnyɔŋ atú a mɨ keʼ atú ŋwɔn nɨ bən wu tse tsɔʼnə.”

³⁵Baolo a ghɨnə mɛ́tɨ́ a sóŋ məzen, ndɔgɨ abán, nga a mɨya a mbó Ŋwi a ɨshi bo bɨtsum, mbatɨ a zɛrə, ntiʼ mbiʼnɨ nkfúrə́ ghe.

³⁶Bo chwátɨ́ mɨntəm ɨma, ŋwɔn tsum a tɨtərɨ bo a dzɨ a məzum ə.

³⁷Bɨgɨ bɨtsum ba bɨ tsínɨ́ a mu abáŋ a nkyi za be 276 ghe.

³⁸Ŋwɔn tsum a ghɨnə ndzɨ́ nzhwurɨ, bo waŋnɨ nchwi mɨsaŋ tsum za ɨ tsínɨ́ a mu abáŋ a nkyi za a mu sagɨrə wu ngwi wa taŋ ɨ ghɨ á abáŋ a nkyi za a yaŋtə.

³⁹Njwi ghɨnə ndán, ɨbɛn ba bɨ kɨ́nə́ ntyíŋə́ abáŋ a nkyi za keʼ ngə́rɨ́ nkyi wa bo tsínɨ́ ɨwu zhi, lá mbaŋnɨ ndzɛn ngə́rɨ́ nkyi ngwɔ́ŋ tse wa ɨ tsínɨ́ nɨ ɨsamnɨ awaŋə ghe. Bo tíʼ ntsɔ́ʼ a mu mɨntəm ɨma ngə́ be a be ngə́ a chi fu, bo mɨ nyɛʼtɨ á abáŋ a nkyi za a ghɛn ntɛm atú ɨshe ɨwu ə.

⁴⁰Ma lan, bo shíʼsɨ́ bɨtəkɨŋ bɨ ɨtɨŋə ba bɨ chwánə́ abáŋ a nkyi za, ɨ nyɛʼtɨ tsɨ shiʼ ngɛn nɔŋ a mbyi sagɨrə wu ngwi wa. Tsɛʼ a nyom məwa, bo kyɛ́gɨ́ mɨnkɨ ma mɨ chwánɨ́ ntɛ́ʼ ntyiŋ abáŋ a nkyi za. Bo tíʼ nkɔ́ʼsɨ́ ɨtsɛʼ ntyiŋ abáŋ a nkyi za taŋ á kɨfɛrɨ a tyiŋ a zɛrə ngɛn nɨ zɛrə nɨ mbyi ɛ. Bɨgɨ tíʼə ngěn nɨ ngə́rɨ́ nkyi ɛ.

⁴¹Lá abáŋ a nkyi za a túm a kɨkfobuŋ awaŋə wu tse, bɨgɨ niʼnɨ ɨwu ə; ɨshi abáŋ a nkyi wa jigɨnɨ nchi keʼ chiʼnɨ le buŋ nkyi yiŋənɛmə wu tən kə́ mbatɨ ndzum abáŋ a nkyi za a ɨbagɨ ɨbagɨ ə.

⁴²Bɨgwe ba ghɨ́ akyaŋtɨ a njwítɨ́ ngaŋ atsáŋ tsa ɨtsum, taŋ á bo keʼ zɔʼ nkyi ngɛn a ngə́rɨ́ nkyi nkɨəkɨ awa ghe.

⁴³Lá tantso bɨgwe nkɨ wu fɨgɨnɨ wa a kə́ ndǒ ndoŋ Baolo, ma lan, wɛrə a tsúʼnɨ́ awa a ngɨ məziŋ ə. Wɛrə a báŋnɨ́ sóŋ ngə́ ɨbɛn ba bɨ chínɨ́ zɔʼ nkyi fom nkanɨ ndzɔʼ nkyi ngɛn a ngə́rɨ́,

⁴⁴abvuʼ a tiʼ ndzɔŋ, nchwǎ ɨbabtɨ ɨtɨ kə ɨbagɨ ɨtɨ tsa tsɨ fúnɨ́ a nye abáŋ a nkyi za. Nə tíʼ mbé adzaŋ za bɨgɨ bɨtsum ghɛ́nɨ́ nkón a ngə́rɨ́ nkyi ɨ shiʼnɨ ə.