Read Ngemba Ɨfaʼ 28 Bible Online

Ɨfaʼ 28 - Ngemba bible

Ɨfaʼ 28

¹Mbáʼ bɨgɨ ghɛ́nɨ́ nkón a ngə́rɨ́ nkyi ɨ shiʼnɨ lá, ndzuʼ ngə́ adiʼ za nkyi kárɨ́sɨ́nɨ́ məzen bɨ kə́ ntɔ́ŋə́ ngə́ Mɔlta ghe.

²Ngaŋ alaʼ tsa kɔ́ŋ awɨgɨ tsɛʼ a nkə. Mbəŋ bíʼnɨ́ ndǒ, ɨfɛgɨ kə́ nkǒ ghe. Ma lan, bo nyɛ́tɨ́ ɨmugɨ a mbó bɨgɨ nkɨ nkwarɨ awɨgɨ ɨ shiʼnɨ ə.

³Baolo a kə́ ngǒtɨ́ ɨtúm ɨtɨ ntǒ a ɨmugɨ wa mbáʼ ɨnyo tse fúnɨ́ mbɨ́ʼ ɨdiʼ tsɨ lomnɨ tsa ndóm abó azhi ntɨŋnɨ ɨwu ə.

⁴Ngaŋ alaʼ tsa zé adzaŋ za ɨnyo za tɨ́ŋnɨ́nɨ́ a nye abó a Baolo ɨ soŋ a mbó ŋwɔn nɨ ŋwɔn ngə́, “Ŋwɔn wen a mɨ zagɨ be ngwarɨ ŋwɔn ə. Nɨvwo báʼtɨ́ nku ayi ɨ kunɨ nto a mu sagɨrə wu ngwi lá, ŋwi Fetɨ a mɨ keʼ nyɛʼtɨ á tsi ntɨŋ ə.”

⁵Lá Baolo a myígɨ́ ɨnyo za ɨ vwo a ɨmugɨ tɨgha ɨnyo za ɨ lóm ayi ɛ.

⁶Bɨ kə́ ntsiŋə ngə́ a mɨ fugɨ ɨ kɔʼ kə ɨ vwukɨ vwo ɨ kfoə. Lá bo ghɨnə ntsén a nye abaŋ zə sa, nkeʼ anu a tɨbɔŋ zə tse zɛn á fu wə ɨnye, nkwebtɨ akwaʼtɨ aza ntíʼə sóŋə́ be ngə́, “A nɨ ŋwi wu tse ghe!”

⁷Abɨŋ a ɨshe zə tse a tsí a kárɨ́kɨ́ adiʼ wa mbe ɨshe Bubliyosɨ, wa a bénɨ́ talaʼ adiʼ za nkyi kárɨ́sɨ́nɨ́ lá. Wɛrə a kwárɨ́ awɨgɨ tsɛʼ ɨ shiʼnɨ, bɨgɨ tiʼ nkɨ ntsi a ndá zɨ atú njwi tsi tárə́ ghe.

⁸Ta bɨ Bubliyosɨ a nɔ́ŋ a ɨkon ngǒ nɨ ɨfɛgɨ abɔʼnɨ nɨságɨ́ nɨ nkaʼə. Baolo a ghɛ́n a mu kwasɨ ndá ɨyi, ntsaʼtɨ a Ŋwi, ɨ nyɔŋ mbó ɨmyi wətú, ntsuʼ ayi ɛ.

⁹Mbáʼ məziŋ anu a fúnɨ́ lá, ngaŋ nɨghɔ ɨtsum a mu adiʼ za nkyi kárɨ́sɨ́nɨ́ lá yén bɨ tsuʼ awa ghe.

¹⁰Bo ghá ɨdzúm tsɨ ghanɨ tsə ghaʼnɨ a mbó bɨgɨ ə. Bɨgɨ ghɨnə tɨ kón a mu abáŋ a nkyi ɨ ghɛn awɨgɨ, bo nɨŋ azúm atsum za bɨgɨ kɨ́nə́ ndǒ a mu nɨyen na a mu abáŋ azɨgɨ ə.

¹¹Bɨgɨ ghɨnə ntsí ɨwu atú bɨsaŋ bɨtárə́, ntiʼ nkon a mu abáŋ a nkyi zə tse za a lónɨ́ Alɛgɨsandɨrɨya bɨ tɔ́ŋə́ ngə́, “Bɨŋwi Ba Bɨ Nɨ Mɨfágɨ ə” ntiʼ ngɛn awɨgɨ ə. Abáŋ a nkyi məzen a tɛ́m a nye adiʼ za nkyi kárɨ́sɨ́nɨ́ lá a nkfu ɨfɛgɨ wu tən wa.

¹²Bɨgɨ yén fú a mu ntáʼmbagə wu wi Sairakusɨ, ntsi ɨwu atú njwi tsi tárə́ ghe.

¹³A ndǒ ɨwu, bɨgɨ yíŋ nɨyen a mu nkyi ngyen fu a mu ntáʼmbagə wu wi Rɛgium ə. Njwi zɨ mɔʼɔ lanə, kɨfɛrɨ wu tse a mbiʼnɨ ntsǎ ndo nɨ bagɨ ntɨ́ŋ, njwi tsi bá ghanə ngə́ tsɨ tsǎ, bɨgɨ yen fu a ntáʼmbagə Butioli ə.

¹⁴Bɨgɨ zé ɨbɛn bə tse ba bɨ nɨ́ŋnɨ́ mɨntəm ɨma a nye Kristo ɨwu ba bɨ sóŋnɨ́ ngə́ á bɨgɨ tsi bɨgɨ bo atú táʼ ngabɨ ə. Nə nɨ adzaŋ za bɨgɨ tsánɨ́ bɔŋ ɨ yen fu a Roma ghe.

¹⁵Ɨbɛn ba bɨ nɨ́ŋnɨ́ mɨntəm ɨma a nye Kristo a Roma zúʼ ngə́ bɨgɨ tsí ɨwu, ntiʼ ndo a nye ɨdiʼ tsa aghagɨ a ságɨ́nɨ́ ɨ ghɛn kuʼ a ntáʼmbagə tsa bɨ kɨ́nə́ ntɔ́ŋə́ ngə́ Mɨtan Abyusɨ abɔʼnɨ Tiri Ins, ngyen nkwatɨ awɨgɨ ə. Mbáʼ Baolo a zɛ́nɨ́ awa lá, wɛrə a ghá a mɨya a mbó Ŋwi, məzen a kɨ ngwɔŋtɨ ayi tsɛʼ nkə.

¹⁶Mbáʼ bɨgɨ yénɨ́ nkón a Roma lá, bɨ nyɛ́ʼtɨ́ a Baolo ngə́ á nchyɛ̌ zɨzɨ, á gwe a ntsíŋə́ ayi ɛ.

¹⁷Njwi tsi tárə́ tsanə, Baolo a tɔŋ ɨtú bə Yuda tsa tsɨ tsínɨ́ adiʼ wa a ngǒtə ghe. Bo ghɨnə ngótɨ́, wɛrə a soŋ a mbó bo ngə́, “Ɨbɔmbɨma ɨban bə Izrai, ma báʼtɨ́ nkaʼ ghɨ anu zə tse ɨ ghɨnɨ a nye ɨbɛn ɨbɨgɨnə kə a nye mbɔm alaʼ za bɨgɨnə kwárɨ́nɨ́ a mbó bɨta ɨbɨgɨnə bə kɔ́ʼɔ́nguʼ lá, bɨ nɨ́ŋ aghan atsáŋ a Yerosalɛm ntiʼ nkɨ ntintɨ aghan nga a mbó bə Roma ghe.

¹⁸Bɨ ghɨnə mbítɨ́ aghan nɨ ɨbítɨ, bə Roma tíʼə ndǒ ɨ fɨgɨ me ɨ nyɛʼtɨ, mbɨ́ʼ ngə́ bo zɛ́n ngə́ ma sá ghɨ anu zə tse za a kɨ́nə́ ndǒ ngə́ á bɨ zhwitɨ aghə.

¹⁹Lá mbáʼ bə Yuda tónɨ́ awa a məzen lá, ma zágɨ́ ntsí nɨ ɨ soŋə ngə́ á bɨ tsagɨ ɨsáʼ ɨghan a mbó Kaisa — ma báʼtɨ́ nkaʼ tsi nɨ anu zə tsɛrə a nkaŋ ɨbɛn ɨbɨgɨnə tsínɨ́ lá, ma ghɨ́ a məziŋ ə.

²⁰Nə nɨ anu za ma lonə ndǒ ndze bən, á bɨgɨnə ghamnə. Tsɛʼ a nkənu, ma tsi a mɨnkɨ mɨ atɨŋə ɨ lánə́ lá, mbɨ́ʼ a ŋwɔn wa bə Izrai tsinɨ nɨ ntsiŋə nɨ ntəm tsum wə ɨnye ə.”

²¹Bə Yuda ba sóŋ a mbó wɛrə ngə́, “Bɨgɨ bvurɨ tɨ kwarɨ aŋwaʼnɨ zə tse za a lonɨ a Yudiya mbɨ́ʼ agho kə ŋwɔn ɨwɨgɨ wu tse a bvurɨ tɨ lo ɨwu ngyen ɨghan nɨ nkən tse kə nɨ anu a tɨbɔŋ zə tse mbɨ́ʼ agho ə.

²²Lá bɨgɨ mɨ kɔŋ ndzuʼ ɨkwaʼtɨ ɨtso, mbɨ́ʼ ngə́ bɨgɨ zhi ngə́ ɨdiʼ ɨtsum, ɨbɛn ghǎm ɨnu tɨbɔŋ mbɨ́ʼ a mandzɔŋ wen wa o tsinɨ wə mu lá.”

²³Ma lan, bo kyáŋtɨ́ njwi bo bɨ Baolo ghe. Njwi za ghɨnə nkúʼ, bo bə ghaʼnɨ yen adiʼ wa Baolo a kɨ́nə́ nchyɛ̌ lá. Ɨ biʼnɨ a tənjwi ɨ kɔʼ kuʼ nɨ ɨtfúʼ, wɛrə a fɨ́ʼtɨ́ nkən ɨyi mbɨ́ʼ Anu a Nɨfɔ nɨ Ŋwi a mbó bo ghe. Wɛrə a kɨ́ njwə́ŋtɨ́ a ngɨə á bo ze nkənu za ɨ tsínɨ́ ɨwu mbɨ́ʼ a Yeso, a nye mɨndóm ma wɛrə a kɨ́nə́ fɨ́gɨ́ ɨnu a mu Nyɔngɔŋ Mǒse abɔʼnɨ ɨnu tsa ntóm Ŋwi ŋwáʼnɨ́nɨ́ ɨ fɨ́ʼtə́ a mbó bo ghe.

²⁴Mɨgham ɨmyi ghɨ́ bo bə tse ze nkənu za ɨ tsínɨ́ ɨwu, lá bə mɔʼɔ tuŋ awa a nɨ́ŋ mɨntəm ɨma ɨwu ə.

²⁵Ma lan, bo tíʼ ndo awa, tɨ abemnɨ a tɨtərɨ bo mbáʼ Baolo a sóŋnɨ́ a táʼ anu wen ngə́: “Azhwi zə Fɛmnɨ a sóŋ tsɛʼ a zə shiʼnɨ mbáʼ a sóŋnɨ́ a mbó bɨta ɨbɨgɨnə bə kɔ́ʼɔ́nguʼ ntsa ndzum ntom Ŋwi Asaya ghe!

²⁶Mbɨ́ʼ ngə́ wɛrə a sóŋ ngə́, ‹Ghɛn ɨ soŋ a mbó ɨbɛn benə ngə́: Nɨ mɨ zhwiʼtɨ ɨ zhwiʼtɨ, lá ɨ keʼ zuʼ nkɨ nji ɛ; nɨ mɨ len ɨ len, lá ɨ keʼ ze,

²⁷mbɨ́ʼ ngə́ mɨntəm mɨ ɨbɛn biŋ chigɨrɨ, bo kɨnə nkɨ fɨŋ ɨtoŋnɨ ɨtsa nkɨ nchwubtɨ ɨmɨgɨ ɨma ghe. A tú mə lá be muŋ, ɨmɨgɨ ɨma zě ɨdiʼ, ɨtoŋnɨ ɨtsa zuʼnɨ ɨnu, ɨtú ɨtsa zuʼnə nkə́ njíɛ, ɨ tíʼ kɨ́ bəŋ awa a mbó me, á ma tsuʼ awa ghe. Nə nɨ za Ŋwi a soŋnə.› ”

²⁸Baolo a tíʼ ndwɨgɨnɨ soŋ a mbó bo ngə́: “A nɨ tiʼ nji ngə́ bɨ ghanə nkən Ŋwi wu ɨloŋ a mbó ba a se bə Yuda be ə. Bo mɨ kwarɨ a wɛrə ghe!”

³⁰Atú ɨlom tsi bá, Baolo a kə́ nchyɛ̌ a mu adiʼ zə tse za wɛrə a lɔ́ntɨ́nɨ́ nɨ bɨkaba, ɨwu wɛrə a kə́ nkwárɨ́ ɨbɛn ba bɨ kɨ́nə́ ngyiŋə a ndzé zɨə.

³¹Wɛrə a kə́ nchwítɨ́ nkən Nɨfɔ nɨ Ŋwi nkə́ ndíʼə mbɨ́ʼ a Maʼmbyí Yeso Kristo, tɨ nɨbɔgɨ, ŋwɔn tse a keʼ ayi a nkɨ́ŋə́ ghe.