Read Ngemba Roma 10 Bible Online

Roma 10 - Ngemba bible

Roma 10

¹Ɨbɔmbɨma ɨban, ma lǒ nɨ ntəm ɨghə ɨtsum, nkə́ ntsáʼtə́ a Ŋwi ngə́ ɨbɛn ɨban bə Izrai chi ghɨ dzɨ ɨloŋ ə!

²Ma chi soŋ a mbó bən tsɛʼ a nkənu ngə́ bo ghɨə atsum a ngɨ anu za Ŋwi a lɔnə, lá ndóm wa bo ghɨnə atsum a ngɨ anu za Ŋwi a lɔnə se zɛʼtɨ ayi lá a nye ngótɨ́ azhyɛ ghe.

³Ka bo zhinə awa ndóm wa Ŋwi a ghɨnə ɨbɛn tɛmnɨnə a ɨshi ɨmɨgɨ zɨ, lá bo mbaŋnə ndɔ́btə́ a ngɨ ɨwa ndóm; ma lan, nkeʼ shíʼtə́ nɨ ɨtumbəm ɨtsa a ɨshe a nye ndóm Ŋwi wa ɨ chísɨ́nə́ ɨbɛn ngə́ á bɨ tɛmnɨ a ɨshi ɨmɨgɨ zɨə.

⁴Mbɨ́ʼ ngə́ Kristo a lwɨgɨnɨnə a Nyɔngɔŋ taŋ á ŋwɔn tsum wa a nɨŋnɨ ntəm ɨyi a nye Ŋwi á tiʼ ntɛmnɨ a ɨshi ɨmɨgɨ Ŋwi ə.

⁵Mǒse a ŋwáʼnɨ́ mbɨ́ʼ ntɛ́mnə́ a ɨshi ɨmɨgɨ Ŋwi a ntsǎ a ndzum ndzuʼnɨ Nyɔngɔŋ ngə́, “Ŋwɔn tsum wa a zúʼnɨ́nɨ́ ntɨgə Nyɔngɔŋ a mɨ tsi atú ntɨŋ ə.”

⁶Lá anu za aŋwaʼnɨ a Ŋwi a soŋnɨ mbɨ́ʼ ntɛmnə a ɨshi ɨmɨgɨ Ŋwi a ntsǎ a ndzum abeməntəm a zɛnə: “O so tsi nɨ mbitɨ atuəmbəm azo ngə́, Ɨwa mɨ kɔʼ ghɛn a fɔməbvurə le?” (lá be ngə́, ɨ ghɛn lɔgɨ a Kristo ɨ shiʼ yen nɨ zɨ a mbó bɨgɨnə ghe)

⁷“Kə ɨ bitɨ ngə́, Ɨwa mɨ shiʼ ghɛn a mu alaʼ a nɨvwo le?” (lá be ngə́, ɨ ghɛn fɨgɨ a Yeso a tɨtərɨ ba bɨ kfonə ghe).

⁸Anu za a soŋnɨ a zɛnə “Nɨgham nɨ Ŋwi tsi a mbyɛn gho, a nye ɨwəŋ ntsu ɨtso, nkɨ ntsi a mu ntəm gho ghe” (lá be ngə́, nkən abeməntəm wa bɨgɨ chwítɨ́nə́ lá).

⁹Mbɨ́ʼ ngə́ be o soŋ nɨ ntsu ɨgho ngə́ Yeso nɨ Maʼmbyí, ɨ nɨŋ a mu ntəm gho ngə́ Ŋwi a zhwémnɨ́ a wɛrə a mbó nɨvwo, o mɨ dzɨ ɨloŋ ə.

¹⁰Mbɨ́ʼ ngə́ a nɨ a ntsǎ a ndzum abeməntəm mbáʼ Ŋwi a bémnə́ ngə́ bɨgɨnə tɛmnɨ a ɨshi ɨmɨgɨ zɨ; bɨ kə́ ndóŋə́ awɨgɨnə ntsǎ lá a ndzum ɨ soŋə nɨ ntsu ngə́ bɨgɨnə ghɨ mɨbvu ə.

¹¹Aŋwaʼnɨ a Ŋwi soŋ ngə́, “Ka ŋwɔn tsɛrə a tsi ayi ɨwu wa a nɨŋnɨ ntəm ɨyi a nye Ŋwi, bɨ nɨŋ adɨrətú wə ɨnye.”

¹²Məzen a kɔmtɨ a ŋwɔn tsum mbɨ́ʼ ngə́ ka líʼ a tsi ayi a tɨtərɨ bə Yuda abɔʼnɨ ba a se bə Yuda be ə; Ŋwi a nɨ tsɛʼ táʼ Maʼmbyí a mbó ŋwɔn tsum ə. Wɛrə a fɔ́gə́ a ŋwɔn tsum wa a yenɨ a mbó zɨə.

¹³A be adzaŋ məwen tsɛʼ adzaŋ za aŋwaʼnɨ a Ŋwi soŋnɨ ngə́, “Ŋwɔn tsum wa a bitɨnɨ akwatɨ a mbó Maʼmbyí, wɛrə a mɨ loŋ ayi ɛ.”

¹⁴Lá bo mɨ bitɨ akwatɨ a mbó wɛrə lá ɨ nə́ mbáʼ bo se mɨntəm ɨma wə ɨnye Ŋwi nɨŋ lá le? Bo mɨ kɨ nɨŋ mɨntəm ɨma wə ɨnye lá ɨ nə́ mbáʼ bo bvurɨnɨ tɨ zuʼ mbɨ́ʼ ayi lá le? Bo mɨ kɨ tiʼ zuʼ lá ɨ nə́ mbáʼ bɨ bvurɨ tɨ chwitɨ nkən wu wu a mbó bo lá le?

¹⁵Bɨ mɨ kɨ chwitɨ nkən wu wu lá ɨ nə́ mbáʼ bɨ se ntóm tyigɨ lá le? Tso mbáʼ aŋwaʼnɨ a Ŋwi a soŋnɨ ngə́, “Ngyiŋ ntóm tsa tsɨ tiʼtɨnɨ nkən wu shiʼnɨ, ɨ yiŋə nɨ nɨdorɨ na nɨ ghaʼnɨ ntsa mbó ə!”

¹⁶Lá ŋwɔn tsum a bvurɨ tɨ bem Nkən wu Shiʼnɨ wa. Asaya zɨmboŋ a bítɨ́ ngə́, “Maʼmbyí, a nɨ ɨwa wa a nɨ́ŋnɨ́ ntəm ɨyi a nye nkən ɨwɨgɨ le?”

¹⁷Ma lan, abeməntəm a lǒ lá a mbó nkən wa ɨbɛn zúʼnə́, bɨ zuʼənɨ nkən məwen ntsǎ lá a ndzum ɨ soŋ anu mbɨ́ʼ a Kristo ghe.

¹⁸Lá ma bitɨ ngə́: a nɨ nkənu ngə́ bo sé zúʼ nkən wa le? Tsɛʼ a nkənu bo zúʼə — mbɨ́ʼ ngə́ aŋwaʼnɨ a Ŋwi a soŋ ngə́: “Atuəshe atsum a zúʼ nji ntsu ɨza; mɨgham ɨma ghɛ́n nkuʼ a nye mɨbú mɨ atuəshe mɨtsum ə.”

¹⁹Ma kwiʼ mbitɨ ngə́: bə Izrai sé zúʼ nkɨ njí le? Mǒse zɨmboŋ a nɨ ntsambyi ŋwɔn a nchwɨ́gə́ ngə́ Ŋwi a sóŋ ngə́: “Ma mɨ ghɨ ngə́ á nɨ ghɨʼnɨ ɨbɛn ba bɨ chínɨ́ keʼ tɔŋ nɨ alaʼ ə; ma mɨ ghɨ á mɨntɔŋ mɨ ɨbɛn ɨbə lwinɨ mbɨ́ʼ alaʼ za a lonɨ nɨ ɨbərɨ ə.”

²⁰Ntom Ŋwi Asaya ɨ soŋ a təntɨ ngɛn nɨ mbyi anu za Ŋwi a sóŋnɨ́ ngə́, “Ɨbɛn ba bɨ kɨ sé aghə a ndǒ bɨ zɛnə aghə; ma díʼ atuəmbəm azan a mbó ɨbɛn ba bɨ kɨ sé ntsɔ́ʼə aku azə.”

²¹Lá Asaya a soŋ mbɨ́ʼ bə Izrai ngə́ Ŋwi a soŋ ngə́, “A ndɔgɨnə a tənjwi ɨ kɔʼ gha a nkwɛfɔ, ma ŋáʼ mbó ɨman a nkwárɨ́ ɨbɛn ba bɨ se ndzúʼnə́ abɔʼnɨ ngaŋ atɨŋətú, lá bo keʼ yiŋə.”