Read Ngemba Roma 14 Bible Online

Roma 14 - Ngemba bible

Roma 14

¹A nɨ nkwárə́ ɨbɛn ba abeməntəm aza a se tɨŋə. A nɨ nkeʼ ndɨʼkə bɨŋ zɨ mbɨ́ʼ anu za a kwaʼtɨnɨ ngə́ zɨə tsi nɨ ngɨə kə ɨ keʼ kɨ ngɨə.

²Abeməntəm a ɨbɛn bə tse a nyɛʼtə awa ngə́ á bo dzɨ ɨbə́ŋ mɨdzɨ ɨtsum, lá ŋwɔn wa abeməntəm azhi a se tən a kfúrə́ tsɛʼ ndza ə.

³A ŋwɔn wa a dzɨ́nɨ́ ɨbə́ŋ mɨdzɨ ɨtsum a keʼ nyáŋə́ ɨbɛn ba bɨ se ɨbə́ŋ mɨdzɨ ɨtsum a ndzɨə ghe, á ŋwɔn wa a se ɨbə́ŋ mɨdzɨ ɨtsum a ndzɨə a keʼ sáʼə a ŋwɔn wa a dzɨ́nɨ́ ɨbə́ŋ mɨdzɨ ɨtsum; mbɨ́ʼ ngə́ Ŋwi a kwarɨ awa bɨtsum ə.

⁴O nɨ ɨwa a sáʼ ŋwɔn afaʼ ŋwɔn adaŋ le? A nɨ tsɛʼ Tafaʼ ɨyi wa a mɨ soŋ ngə́ a ghɨ anu zə shiʼnɨ kə zə tɨbɔŋ ə. Wɛrə mɨ ghɨ anu zə shiʼnɨ mbɨ́ʼ ngə́ Maʼmbyí a chi ghɨ a wɛrə á ghɨ anu zə shiʼnɨ ə.

⁵Ɨbɛn bə tsɛrə kwaʼtɨ ngə́ njwi zɨ tse ɨ tsa a tsə mɔʼɔ ghe, mbáʼ ɨbɛn bə mɔʼɔ kwaʼtɨnɨ ngə́ njwi ɨtsum kuʼnɨ ə. A ŋwɔn tsum a zhi ɨ shiʼnɨ a mu atú zɨ ngə́ anu za zɨə kwaʼtɨnə lá a kuʼnɨ ə.

⁶Zɨ wa a lɛnɨ njwi zɨ tsɛrə ngə́ ɨ tsa a tsə mɔʼɔ, a lěn a zɛrə lá a nkɔ́ʼsɨ́ Maʼmbyí atɨ́ ə. Zɨ wa a dzɨ́nɨ́ ɨbə́ŋ mɨdzɨ ɨtsum, a dzɨ́ə tsɛrə lá a nkɔ́ʼsɨ́ Maʼmbyí atɨ́ mbɨ́ʼ ngə́ wɛrə a ghǎ a mɨya a mbó Ŋwi mbɨ́ʼ mɨdzɨ ma; ŋwɔn wa a se ɨbə́ŋ mɨdzɨ ɨtsum a ndzɨ́ə, a ghɨə mə lan lá a nkɔ́ʼsɨ́ Maʼmbyí atɨ́ nkə́ ngǎ a mɨya a mbó Ŋwi ə.

⁷Ka ŋwɔn nɨ bɨgɨnə wu tse a nchyɛ̌ ayi lá tsɛʼ mbɨ́ʼ atuəmbəm azhi ɛ, ŋwɔn nɨ bɨgɨnə wu tse a keʼ nkə́ nkfǒ tsɛʼ mbɨ́ʼ atuəmbəm azhi ɛ.

⁸Be a be ngə́ bɨgɨnə tsi atú ntən, bɨgɨnə chyɛ̌ lá a nkɔ́ʼsɨ́ Maʼmbyí atɨ́ ə, be a be ngə́ bɨgɨnə kfo, bɨgɨnə kfo lá a nkɔ́ʼsɨ́ Maʼmbyí atɨ́ ə; ma lan, kə bɨgɨnə tsi atú ntən kə bɨgɨnə kfo muŋ bɨgɨnə bɨtsum tsi lá a mbó Maʼmbyí ɛ.

⁹Mbɨ́ʼ ngə́ Kristo a kfó, mbə nzhwemnɨ a mbó nɨvwo, ntsi ntən lá taŋ ɨ be Maʼmbyí a mbó ba bɨ kfokɨnə abɔʼnɨ ɨbɛn ba bɨ tsinɨ ntɨŋ ə.

¹⁰O sáʼə a mɨma ɨgho lá ngə́ ke le? Kə o nyáŋə́ a mɨma ɨgho lá ngə́ ke le? Mbɨ́ʼ ngə́ bɨgɨnə bɨtsum ghɨ tɛm a ngɔʼ abyɛn Ŋwi á wɛrə a sáʼ awɨgɨnə ghe.

¹¹Mbɨ́ʼ ngə́ aŋwaʼnɨ a Ŋwi a soŋ ngə́, “Maʼmbyí a soŋ ngə́ tso mbáʼ ma tsinɨ ntən lá, ŋwɔn tsum a mɨ kwem mɨkwiʼtɨ ɨmyi a tɨshe a ɨshi me ɨ kɨ ŋaʼtɨ ntsu ɨyi ɨ soŋ ngə́ ma nɨ Ŋwi ə.”

¹²Ma lan, ŋwɔn tsum a ghɨ twiʼtɨ ɨ fɨʼtɨ ɨnu ɨtsum tsa zɨə ghɨ́nɨ́ a mbó Ŋwi ə.

¹³Ma lan, ŋwɔn nɨ bɨgɨnə á keʼ a wu mɔʼɔ bə sáʼə. Bɨgɨnə baŋnɨ ntsɔʼ a mu mɨntəm ɨmɨgɨnə be ngə́ bɨgɨnə mɨ keʼ anu zə tse ghɨ á mɨma ɨwɨgɨnə a kɔmnkɨ ɨwu kə ngɨ ɨbvu ə.

¹⁴Nchyɛ a mbúm bɨgɨ Maʼmbyí Yeso, ɨ lanɨ ngɨ ngə́ á ma zhi ngə́ ka abə́ŋ a mɨdzɨ zə tsɛrə a tsi ayi ɨwu za a se fɛm a ɨshi ɨmɨgɨ Ŋwi ə. Lá be ŋwɔn tse a nɨŋ ntəm ɨyi ngə́ abə́ŋ a mɨdzɨ zə tsɛrə a se fɛm a mu mbɔm, lá be ngə́ ma ma mɨdzɨ se fɛm a mu mbɔm a mbó zɨ a ndzɨ́ə ghe.

¹⁵Be a be ngə́ o ghɨ mɨma a zuʼ ndzaŋə mbɨ́ʼ azúm za o dzɨ́nə́, lá be ngə́ ka o kɔŋ agho ayi ɛ. Koʼ nyɛʼtɨ á mɨdzɨ ma o dzɨ́nə́ tsənkɨ a ŋwɔn wa Kristo a kfónɨ́ mbɨ́ʼ atú azhi ɛ!

¹⁶Koʼ nyɛʼtɨ anu za o zhinɨ ngə́ a nɨ zə shiʼnɨ a bem ɨkum tɨbɔŋ ə.

¹⁷Mbɨ́ʼ ngə́ nɨfɔ nɨ Ŋwi se be lá anu mbɨ́ʼ mɨdzɨ kə mɨluʼ ə. Nɨ be lá anu mbɨ́ʼ nchinə, mbɔnɨ abɔʼnɨ nɨdorɨ na Azhwi zə Fɛmnɨ a ghánə́ ghe.

¹⁸Ɨbɛn ba bɨ faʼnə a mbó Kristo a nye ndóm məwen, ɨnu mətsiŋ ghɨə ɨnye Ŋwi bɔŋənə, ɨbɛn kə́ mbémtə́ awa ghe.

¹⁹Ma lan, bɨgɨnə mɨ zagɨ ghɛn nɨ mbyi a ngɨ ɨnu tsa tsɨ yenə nɨ mbɔnɨ abɔʼnɨ tsa tsɨ kwátɨ́nə́ a shintɨ ŋwɔn nɨ ŋwɔn ə.

²⁰Mbɨ́ʼ mɨdzɨ koʼ tsənkɨ anu za Ŋwi a ghɨnə. O chi dzɨ ɨbə́ŋ mɨdzɨ ɨtsum, lá ka a bɔŋ ayi a ndzɨ́ azúm za a mɨ ghɨ á ŋwɔn wu mɔʼɔ a ghɨ ɨbvu ə.

²¹Anu za a kuʼnɨnɨ a ngɨə a nɨ ngə́ tsi tɨ kfurɨ ɨnyam, tɨ no mɨluʼ, kə tɨ ghɨ anu zə tsɛrə za a mɨ ghɨ á mɨma ɨgho a ghɔgə.

²²Len abeməntəm za o tsinɨ nɨ zɛrə mbɨ́ʼ anu zɛnə tsɛʼ a tɨtərɨ bɨŋ Ŋwi ə. Nɨdorɨ tsi a mbó ɨbɛn ba ka mɨntəm ɨma sáʼə ayi awa mbáʼ be bo ghɨ anu za bo kwaʼtɨnɨ ngə́ a kuʼnɨ ə!

²³Lá ŋwɔn wa a məŋnɨnɨ azúm za a dzɨ́nə́ Ŋwi a mɨ soŋ ngə́ a vwo ɨsáʼ, mbáʼ be a dzɨ a zɛrə, mbɨ́ʼ ngə́ ka a ghɨ ayi lá anu za a nɨŋnɨ ntəm ɨyi ɨwu ə. Anu za o ghɨnɨ tɨkə a lo a mu abeməntəm azo, a nɨ ngɨ ɨbvu ə.