Read Ngemba Roma 15 Bible Online

Roma 15 - Ngemba bible

Roma 15

¹Bɨgɨnə ba abeməntəm azɨgɨnə a tənɨ, bɨgɨnə tsi nɨ ntwɛmtɨ ɨbɔmbɨma ɨbɨgɨnə ba bɨ ghɔgɨnə. Bɨgɨnə keʼ ghɨ á ɨnye ɨtsɨgɨnə mbɔ́ŋə́ ghe.

²Bɨgɨnə baŋnɨ ngɨ á ɨnye ɨbɔmbɨma ɨbɨgɨnə mbɔ́ŋə́ taŋ ɨ kwatɨ ɨ ghɨ á abeməntəm aza a ntɨ́ŋə́ ghe.

³Mbɨ́ʼ ngə́ Kristo a sé ngɨə lá ɨnu tsa tsɨ kɨ́nə́ mbɔŋə atuəmbəm azhi ɛ; tso mbáʼ aŋwaʼnɨ a Ŋwi a baŋnɨ soŋ ngə́, “Ndzɔm tsa ɨbɛn zɔmnə awən ɨwu, tsɨ shiʼə atú me ghe.”

⁴Mbɨ́ʼ ngə́ ɨnu ɨtsum tsa bɨ ŋwáʼnɨ́nɨ́ a mu aŋwaʼnɨ a Ŋwi nchwuʼnɨ a tete, tsɨ tsi lá a ndiʼ bɨgɨnə, taŋ a ntsǎ a ndzum achigəntəm abɔʼnɨ ngwɔŋtə za ɨ funɨ a mu aŋwaʼnɨ a Ŋwi, bɨgɨnə chi tiʼə tsiŋnə nɨ mɨntəm ɨmɨgɨnə mɨtsum ə.

⁵A Ŋwi, zɨ wa a ghánə́ achigəntəm abɔʼnɨ ngwɔŋtə a kwatɨ awən a ntsi ntsu mɔ́ʼɔ́ ndzɔŋə alisɨ a Kristo Yeso ghe.

⁶Taŋ á bən bɨtsum a mbúm chi bontɨ a Ŋwi, zɨ wa a nɨ Ta bɨ Maʼmbyí Yeso Kristo ɨwɨgɨnə nɨ táʼ nji ɛ.

⁷Adzaŋ za Kristo a kwárɨ́nɨ́ awən lá, á nkwarɨnə awən bən nɨ bən, məzen a ngá nɨfáŋ nɨ Ŋwi ə.

⁸Mbɨ́ʼ ngə́ ma sóŋə́ awən ngə́ a mu ntsi mbyi Kristo, wɛrə a kə́ faʼə a mbó bə Yuda, a ndiʼə ngə́ ka Ŋwi a nchwě ayi ɨnu ə. Məzen a tsi lá a ngɨə ngə́ ɨnu tsa zɨə káʼnɨ́ a mbó bɨta ɨba bə kɔ́ʼɔ́nguʼ á tsɨ fu a nye nkənu,

⁹ɨ kɨ ghɨ ngə́ á ba a se bə Yuda be gha nɨfáŋ nɨ Ŋwi mbɨ́ʼ a mɨlɨŋnɨ ɨyi ɛ. Adzaŋ za aŋwaʼnɨ a Ŋwi a soŋnɨ ngə́, “Ma lan, ma mɨ bontɨ agho a tɨtərɨ ba a se bə Yuda be ə; ma mɨ zɔbɨ nkyi ɨ bontɨ ɨkum ɨgho.”

¹⁰Nɨ kwiʼ mbə soŋ ngə́, “ba a se bə Yuda be, á nɨ dorɨkɨ bɨŋ bɨ ɨbɛn bɨ Ŋwi ə!”

¹¹Nkwiʼ soŋ ngə́, “ba a se bə Yuda be bɨtsum, á nɨ bontɨ a Maʼmbyí ɛ; á ŋwɔn tsum a bontɨ ayi ɛ!”

¹²A nkwiʼtə Asaya a soŋ ngə́, “Ŋwɔn ɨlə̌ Yesi a ghɨ fú a ɨshe, a ghɨ yen a sáʼ ba a se bə Yuda be á bo tiʼ nɨŋ ntsiŋə ɨza nɨ mɨntəm ɨma mɨtsum wə ɨnye.”

¹³A Ŋwi, zɨ wa a ghánə́ ntsiŋə nɨ ntəm ɨtsum, a lwɨgɨ awən nɨ nɨdorɨ abɔʼnɨ mbɔnɨ, ntsa a ndzum abeməntəm azən a nye zɨ taŋ á ntsiŋə ɨzən nɨ mɨntəm ɨmən mɨtsum ngěn nɨ mbyi nkwiə a tsǎ a ndzum mɨtən mɨ Azhwi zə Fɛmnɨ ə.

¹⁴Ɨbɔmbɨma ɨban, me mboŋ ma zhi ɨ shiʼnɨ ngə́ ɨbɔŋ ɨ tsi a nye bən tsɛʼ nkan, nɨ zhi ɨnu tsɨ ghaʼnɨ, nchi kɨ diʼ awən ŋwɔn nɨ ŋwɔn ə.

¹⁵Lá a mu aŋwaʼnɨ zen, ma gham ntəm ɨghan mbɨ́ʼ ɨnu tsɨ tse, tsa ma wáʼtɨ́nə́ awən mbɨ́ʼ a tsɛrə ghe. Ma gham ntəm ɨghan lá mbɨ́ʼ abɔŋəntəm za Ŋwi a ghanə a mbó me

¹⁶a mbé ngaŋ afaʼ Kristo Yeso za ɨ faʼnə a mbó ba a se bə Yuda be tso ntumshe a sóŋ Nkən wu Shiʼnɨ wa ɨ lonɨ a mbó Ŋwi, taŋ á ba a se bə Yuda be tiʼ mbe tso akáŋ a Ŋwi za Ŋwi a bemnə. Azhwi zə Fɛmnɨ a ghɨə akáŋ a Ŋwi məzen a fɛmə.

¹⁷A nchyɛ̌ a mbúm bɨgɨ Kristo Yeso, ma chi ŋuʼ ɨnye ɨzan mbɨ́ʼ afaʼ za ma faʼnə a mbó Ŋwi ə.

¹⁸Ma mɨ tsi tɨ nɨbɔgɨ ɨ kɨ gham tsɛʼ mbɨ́ʼ anu za Kristo a ghɨnɨ ntsa a ndzum me a ntsagɨnɨ ba a se bə Yuda be a ndzúʼnɨ́ Ŋwi, a ntsǎ a ndzum mɨgham ɨman abɔʼnɨ ngɨnɨ mɨnu ɨman,

¹⁹ɨ kɨ tsa a ndzum mɨtən mɨ ɨnu tsɨ yerɨnɨ-yerɨnɨ, ɨnu tsɨ tsanɨnɨ abɔʼnɨ mɨtən mɨ Azhwi zə Fɛmnɨ ə. Ma lan, a mbiʼnə a Yerosalɛm ɨ karɨ ghɛn kuʼ a Mbuʼ Ilirikum ma chwitɨnə Nkən wu Shiʼnɨ mbɨ́ʼ a Kristo a mu ɨdiʼ mətsiŋ ɨtsum ə.

²⁰Ma tɛgɨ ntəm ɨghan a nchwítɨ́ Nkən wu Shiʼnɨ wa adiʼ wa bɨ bvurɨ tɨ zuʼ mbɨ́ʼ a Kristo ɨwu mbɨ́ʼ ma vwunɨ ndá atú atsé za a tumnɨ ŋwɔn adaŋ ə.

²¹Tso mbáʼ bɨ ŋwaʼnɨnɨ a mu aŋwaʼnɨ a Ŋwi ngə́: “Bo mɨ zɛn a ŋwɔn wa bɨ bvúrɨ́ tɨ gham mbɨ́ʼ ayi a mbó bo, bo ba bɨ bvúrɨ́ tɨ zuʼ mbɨ́ʼ ayi, bo mɨ zuʼ mbɨ́ʼ ayi ɛ.”

²²A nɨ nɨyen mənen na nɨ chwánə́ aghan nkfu tsə ghaʼnɨ ɨ yen ghantɨ awɨŋ ə.

²³Lá tɨtsɔŋnɨ wa ma sa nɨ afaʼ a mu mbuʼ mətsen bə ntsi, mbáʼ ma kwɛnə nkɨ nkaʼ atú ɨlom tsə ghaʼnɨ ɨ yen ghantɨ awən lá,

²⁴ma tsiŋə nɨ ntəm ɨghə ɨtsum a ngɨə mə lá tɨtsɔŋnɨ ə. Ma mɨ tsa ɨ zhwiʼnɨ bɨgɨnə a nye nkfu zɨ tsɛrə bɔŋ ɨ ghɛn Alaʼ Sɨben, taŋ á nɨ gha akwatɨ á ma ghɛn ɨwu ə.

²⁵Lá tɨtsɔŋnɨ ma mɨ ghɛn a Yerosalɛm a ngá akwatɨ a mbó ɨbɛn bɨ Ŋwi ɨwu ə.

²⁶Mbɨ́ʼ ngə́ ndáŋwi tsa tsɨ tsinɨ a Mbuʼ Masedonia abɔʼnɨ Mbuʼ Akaiya bɨ ghǒtɨ akwatɨ nɨ nɨdorɨ a ngá a mbó ngaŋ afúm tsa tsɨ tsinɨ a tɨtərɨ ɨbɛn bɨ Ŋwi a Yerosalɛm ə.

²⁷A kɨ tsɔʼ bo ntsɔʼ a mu mɨntəm ɨma a ngɨə mə lá; lá tsɛʼ a nkənu, a nɨ adiʼ aza ngə́ bo mɨ zagɨ ɨ kwatɨ awa ghe. Tso mbáʼ bə Yuda yɛ́btɨ́nɨ́ ɨfɔgɨ azhwi wa bo bɨ ba a se bə Yuda be lá, ba a se bə Yuda be kɨ ntsi nɨ ndɔgɨ afuʼ aza ɨ kwatɨ bə Yuda nɨ zɛrə ghe.

²⁸Ma ghɨ mɛtɨ afaʼ məzen nkɨ nɨŋ nkáb məzen a mu mbó bo, ma mɨ tsa zhwiʼnɨ bɨgɨnə, ɨ bɔŋ tiʼ ghɛn a nɨghán a Sɨben ə.

²⁹A nkfu za ma mɨ yen a ngántɨ́ bən lá, ma zhi ngə́ ɨfɔgə Kristo wa ma mɨ yen nɨ wɛrə ɨ mɨ kɔʼ luŋə.

³⁰Ma tiʼə nyiʼtə awɨŋ ɨbɔmbɨma ɨban ngə́ a ntsǎ a ndzum Maʼmbyí Yeso Kristo ɨwɨgɨnə abɔʼnɨ akɔŋnɨ za Azhwi a ghánə́, á nɨ twɛmtɨ aghan á bɨgɨnə tsaʼtɨ a Ŋwi nɨ mɨntəm ɨmɨgɨnə mɨtsum mbɨ́ʼ atú azə.

³¹A nɨ tsaʼtɨ a Ŋwi ngə́ ɨbɛn bɨ Yudiya ba bɨ bvurɨnɨ tɨ nɨŋ mɨntəm ɨma a nye Kristo á bɨ keʼ aghan lɛm, ngə́ ɨbɛn bɨ Ŋwi ba bɨ tsinɨ a Yerosalɛm chi bem akwatɨ za bɨ tsagɨnɨ a mbó bo ghe.

³²Ma lan, ma mɨ yen a mbó bən nɨ nɨdorɨ na nɨ kɔʼnɨ ndon, ɨ kfugɨ azhwi azan bɨgɨnə, mbáʼ be a be anu za Ŋwi a lɔnə ghe.

³³A Ŋwi, zɨ wa a ghánɨ́ mbɔnɨ a tsi a mbó bən bɨtsum ə. A be lá.