Read Ngemba Roma 2 Bible Online

Roma 2 - Ngemba bible

Roma 2

¹Ma lan, gho wa mbáʼ o sáʼnə́ ɨbɛn bə mɔʼɔ, ka o tsi agho nɨ ɨshwúrɨ́ a ngɨə ma lan tsɛʼ mɨnyiə, kə o be be ɨwa kə mbe ɨwa. Mbɨ́ʼ ngə́ be o sáʼə ɨbɛn bə mɔʼɔ, lá nkə́ ngɨ̌ ndəŋndəŋ ɨnu tsa bo ghɨnə, o chɛrə lá ɨsáʼ ɨgho ngə́ o vwo ɨsáʼ ə.

²Bɨgɨnə zhi ngə́ a kuʼnɨ a mbó Ŋwi a sáʼ ɨbɛn ba bɨ ghɨnɨ ɨbə́ŋ ɨnu tso mətsiŋ ə.

³Lá gho nə ɨson ɨghan, o ghɨ̌ ndəŋndəŋ ɨnu tsa o sáʼnɨ́ ɨbɛn bə mɔʼɔ mbɨ́ʼ a tsɛrə ghe! O wiʼtɨ ngə́ o ghɨ lɛʼ nɨsáʼ nɨ Ŋwi le?

⁴Kə aghagɨ a tsɛrə o wágɨ́nɨ́ ɨbɔŋ wu wi wa Ŋwi a ghɨnə, achigəntəm azhi abɔʼnɨ nchigə ɨzhi ɛ. Tsɛʼ a nkənu, o zhi ngə́ ntəm Ŋwi a nɨ wa ɨ ghɨnə tsɛʼ ɨbɔŋ ə, mbɨ́ʼ ngə́ wɛrə a ghɨ̌ ɨnu ɨtsum a ndzé ngə́ o bəŋ ntəm ɨgho a nye mɨbvu ɨmo.

⁵Lá o fɨŋ ntəm ɨgho nkɨ nton a mbəŋ wɛrə a nye mɨbvu ɨmo, ma lan, o ghɨə ngɨ́ʼ za o lonɨ zɛ́n ɨ gháʼtə ngěn be nɨ mbyi ɛ. Məzen a ghɨ fú lá a Njwi mɨlwi Ŋwi mbáʼ nɨsáʼ ɨni na nɨ tɛmnɨnɨ ghɨ fú asaŋəsaŋ ə.

⁶Ŋwi a ghɨ kyáŋ a ŋwɔn tsum ndzɔ́ŋə́ a nye afaʼ za a faʼnə ghe.

⁷Ɨbɛn ba bɨ sě nkə̌ a ngɨ ɨnu tsɨ shiʼnɨ, ɨ faʼə ndǒ nɨghaʼ, nkɔʼsə atɨ́ abɔʼnɨ ntsi ntən za bo láʼnɨ́ keʼ kfo; Ŋwi a ghɨ gha ntsi ntən nɨnkoŋ a mbó bo ghe.

⁸Lá a mbó ɨbɛn ba bɨ lɔnə ngə́ á bi tsɛʼ aza, nton awa a ndzúʼnɨ́ nkənu, taŋ ɨ tsi tsɛʼ a ngɨ ɨnu tsa ka tsɨ tɛmnɨ ayi; Ŋwi a ghɨ diʼ a mɨlwintɔŋ wu ntən wa a fuʼnə tso anto a nye bo ghe.

⁹Ŋwi a ghɨ ghɨ á ɨbɛn bɨtsum ba bɨ ghɨnɨ mɨbvu á bɨ ze ngɨ́ʼ nkɨ ndzúʼ ndzáŋə́, ɨ biʼnɨ a nye bə Yuda bɔŋ tiʼ kon a nye ba a se bə Yuda be ə.

¹⁰Lá wɛrə a mɨ gha nɨghaʼ, nkɔʼsə atɨ́ abɔʼnɨ mbɔnɨ a mbó ɨbɛn bɨtsum ba bɨ ghɨnɨ ɨnu tsɨ shiʼnɨ, ɨ biʼnɨ a nye bə Yuda bɔŋ tiʼ kon a nye ba a se bə Yuda be ə.

¹¹Mbɨ́ʼ ngə́ ka Ŋwi a ndyiŋə ayi mɨshi ɛ.

¹²Ɨbɛn bɨtsum ba bɨ ghɨnə mɨbvu ba ka bɨ tsi awa nɨ Nyɔngɔŋ ghɨ kfo ɨ byékɨ́, lá mbáʼ ka bɨ sáʼ ayi awa ndzɔŋə a Nyɔngɔŋ ə. Ɨbɛn bɨtsum ba bɨ ghɨnə mɨbvu ba bɨ tsinɨ nɨ Nyɔngɔŋ, bɨ ghɨ sáʼ awa ɨ zɔŋnə a Nyɔngɔŋ ə.

¹³Mbɨ́ʼ ngə́ ka ɨbɛn nchínə́ awa a ɨshi ɨmɨgɨ Ŋwi lá tsɛʼ mbɨ́ʼ ngə́ bo zuʼ adzaŋ za bɨ tɔŋnɨ a Nyɔngɔŋ wa, a baŋnɨ mbe be ngə́ bo ghɨ ɨnu tsa Nyɔngɔŋ wa a sóŋnə́ ghe.

¹⁴Ba a se bə Yuda be sé kwárɨ́ a Nyɔngɔŋ wa a mbó Mǒse ghe; lá nkfu tsum za mɨntəm ɨma soŋnɨ bo ghɨ anu za Nyɔngɔŋ wa a soŋnɨ, bo diʼ lá ngə́ bo zhi anu za a kuʼnɨnɨ a ngɨə kə za bo se tsi nɨ ngɨə, lá mbáʼ bo báʼtɨ́ nkeʼ nɨ Nyɔngɔŋ wa kɨ ntsi ɨ tsinə.

¹⁵Mbɔm məzen ɨ diʼ ngə́ anu za Nyɔngɔŋ wa a sóŋnə́ a tsi a mu alɛm aza ghe. Mɨntəm ɨma kə́ ntíʼə ndiʼə ngə́ məzen a nɨ nkənu, mbáʼ nkfu tsɨ mɔʼɔ mɨntəm ɨma ghɨnə ngə́ á bo zhi ngə́ bo ghɨ ɨbvu ə; nkfu tsɨ mɔʼɔ mɨntəm ɨma diʼ a mbó bo ngə́ ɨnu tsa bo ghɨnɨ tsɨ kuʼnɨ ə.

¹⁶Ma lan, ndzɔŋə adzaŋ za mbáʼ Nkən wu Shiʼnɨ wa ma sóŋnə́ ɨ sóŋnɨ́, nə nɨ adzaŋ za a ghɨnɨ be a Njwi Nɨsáʼ ngə́ Ŋwi a ghɨ tsa a ndzum Kristo Yeso ɨ sáʼ ɨkwaʼtɨ ɨbɛn tsə nkubə ghe.

¹⁷A mbó gho wa o soŋnɨ ngə́ o nɨ ŋwɔn bə Yuda, o zɛʼtɨ a nye Nyɔngɔŋ nkə́ ntɛ́rə́ ngə́ o nɨ táʼ a tɨtərɨ ɨbɛn bɨ Ŋwi;

¹⁸o zhi ɨnu tsa Ŋwi a lɔnə ngə́ o ngɨə, o kɨnə nkɨ ngyɛʼ a mbó Nyɔngɔŋ, nji ntsɔ́ʼ za a kuʼnɨnɨ;

¹⁹o zhi ɨ shiʼnɨ a mu ntəm ɨgho ngə́ o tsagɨnɨ bɨfɨgɨ, mbe nkaʼ a mbó ɨbɛn ba bɨ tsinɨ a ndzumnɨ,

²⁰mbe ŋwɔn wa a chísɨ́nɨ́ ɨdzɨŋtɨ nkɨ mbe ndiʼ aŋwaʼnɨ a mbó ɨbɔ, mbɨ́ʼ ngə́ Nyɔngɔŋ a ghanə azhyɛ atsum abɔʼnɨ nkənu tsum a mbó gho ghe.

²¹O dǐʼ ɨbɛn bə mɔʼɔ ghe — nchi keʼ atuəmbəm azo diʼ ngə́ ke le? O sóŋə́ anu a Ŋwi ngə́ á ŋwɔn a keʼ ze lá, o zě le?

²²Gho wa o sóŋnə́ ngə́ á bɨ keʼ nchwúrə́, o nchwurə le? Gho wa o lanɨ mban ɨbɔ bɨ abe tsɛʼ nkan, o bɛ́ʼə mɨshim ma bɨ lɛnɨ ɨbɔ bɨ abe ɨwu le?

²³O tɛrə ngə́ o tsi nɨ Nyɔngɔŋ ə, o so nɨ́ŋə́ adɨrətú a nye Ŋwi a nye adzaŋ za o so a Nyɔngɔŋ a ndě le?

²⁴A tsi a mu aŋwaʼnɨ a Ŋwi ngə́, “Ba a se bə Yuda be ghǎm ɨnu tɨbɔŋ mbɨ́ʼ a Ŋwi mbɨ́ʼ awən wa nɨ benɨ bə Yuda ghe.”

²⁵Be o ndě a Nyɔngɔŋ muŋ ntsəŋ alagɨ[1] zən ɨ tsi nɨ ɨlɨŋ ə; lá be o tú a Nyɔngɔŋ lenə muŋ a mɨ be tso bɨ sé tsəŋ alagɨ azo ə.

²⁶Be wa a se ŋwɔn bə Yuda be, zɨ wa bɨ se alagɨ azhi tsəŋ a ndě ɨnu tsa Nyɔngɔŋ a diʼnə, Ŋwi a mɨ keʼ ayi lɔgɨ tso ŋwɔn wa bɨ tsəŋnɨ alagɨ azhi le?

²⁷Ma lan, ba a se bə Yuda be lo sáʼ awɨŋ bə Yuda mbɨ́ʼ ngə́ ka nɨ ndě awɨŋ a Nyɔngɔŋ, lá mbáʼ bɨ ŋwaʼnɨnɨ a wɛrə nga a mbó bən nkɨ ntsəŋ ɨlagɨ ɨtsən; lá bo baŋnə ndě a Nyɔngɔŋ mbáʼ bɨ baŋnɨnɨ nkeʼ ɨlagɨ ɨtsa tsəŋə.

²⁸A mbé ŋwɔn bə Yuda ka a tsi ayi lá abyɛn abyɛn, ngótɨ́ anu a ntsəŋ alagɨ a keʼ kɨ mbe anu abyɛn abyɛn abɔʼnɨ anu a ɨnyam ɨnye ə.

²⁹Mbe ngótɨ́ ŋwɔn bə Yuda tsi lá a mu ntəm ə, ngótɨ́ ntsəŋ alagɨ a be anu za a fúnə́ be a mu ntəm ə, məzen a be lá afaʼ Azhwi a Ŋwi, nkeʼ afaʼ a Nyɔngɔŋ wu ŋwaʼnɨnɨ be. Ŋwɔn tso məwa a kwárə́ abontɨ azhi be a mbó Ŋwi, nkeʼ a mbó ɨbɛn be.