Read Ngemba Roma 6 Bible Online

Roma 6 - Ngemba bible

Roma 6

¹Bɨgɨnə mɨ tiʼ soŋ lá ngə́ ke le? Bɨgɨnə mɨ ghɛn nɨ mbyi a ngɨ ɨbvu taŋ á abɔŋəntəm a Ŋwi a bə ghaʼtɨ ɨ ghaʼtɨnɨ le?

²Kə́ kə́! Ka ɨbvu tsi ayi nɨ mɨtən mə tsɛrə atú bɨgɨnə ghe — bɨgɨnə chi kwiʼə tsínə a mu ɨbvu lá ɨ nə́ le?

³Nɨ se zhi ngə́ bɨgɨnə bɨtsum ba bɨ kwárɨ́nɨ́ nkyi a mbúm bɨgɨnə bɨ Yeso Kristo, kɨ ntsi a mbúm bɨgɨnə bɨ wɛrə a nye nɨvwo ɨni le?

⁴Ma lan, a tsi lá tso ngə́ bɨ twə́ŋ awɨgɨnə bɨgɨnə bɨ wɛrə, ntiʼ nkɨ nkfo tso wɛrə ntsa lá a ndzum nkyi wa bɨgɨnə kwárɨ́nɨ́, taŋ á be ngə́ adzaŋ za bɨ zhwémnɨ́nɨ́ a Kristo a mbó nɨvwo ntsa a ndzum nɨfáŋ nɨ Tarɨ lá, ma lan, bɨgɨnə chi kɨ tiʼ tsi nɨ ntsi ntən zɨ fi ə.

⁵Mbɨ́ʼ ngə́, be a be ngə́ bɨgɨnə bɨ wɛrə tsí a mbúm a nye nɨvwo ɨni, ndəŋndəŋ bɨgɨnə bɨ wɛrə ghɨ tsi a mbúm a nye nzhwemnə ɨzhi ɛ.

⁶Bɨgɨnə zhi ngə́ a tsi lá tso ngə́ bɨ kwémtɨ́ mbɔm tsɨ lvuŋ tsa bɨgɨnə tsínɨ́ nɨ tsɛrə bɨgɨnə bɨ Yeso atɨ abaŋnɨ-baŋnɨ lá taŋ ɨ chi tsənkɨ mbəmnye ɨtsɨgɨnə tsen tsa a nɨ tsə ngɨ̌ ɨbvu ɨ kɨ ghɨ ngə́ á bɨgɨnə keʼ ɨbuʼ a mbó ɨbvu bə nkwiʼ mbe.

⁷Mbɨ́ʼ ngə́ ŋwɔn tsum wa a kfonə, ɨbvu se bə nkwiʼ ntsi nɨ mɨtən mə tsɛrə wu atú ə.

⁸Lá, a tsi lá tso ngə́, be a be ngə́ bɨgɨnə kfokɨ bɨgɨnə bɨ Kristo, bɨgɨnə nɨŋ mɨntəm ɨmɨgɨnə ngə́ bɨgɨnə bɨ Kristo ghɨ kɨ tsi atú ntɨŋ ə.

⁹Mbɨ́ʼ ngə́ bɨgɨnə zhi ngə́ adzaŋ za bɨ zhwémnɨ́nɨ́ a Kristo a mbó nɨvwo lá, wɛrə a ghɨ láʼ keʼ bə nkfo; nɨvwo se nɨ mɨtən mə tse atú Kristo bə nchyɛ.

¹⁰Ma lan, mbɨ́ʼ ngə́ wɛrə a kfó, ɨbvu se bə nkwiʼ ntsi nɨ mɨtən mə tsɛrə atú wɛrə ghe. Məzen a nɨ nkənu nɨnkoŋ ə. Adzaŋ za ntsi ntən ɨzhi ɨ tsinɨ tɨtsɔŋnɨ lá, ɨ tiʼ ntsi be a ngɨə á ɨnye Ŋwi mbɔ́ŋə́ ghe.

¹¹Ndəŋndəŋ, a tsi lá tso ngə́ nɨ kfokɨ mbáʼ be a be anu mbɨ́ʼ ɨbvu[2], lá ntsi ntən bɨŋ bɨ Ŋwi a ntsǎ a ndzum Yeso Kristo ghe.

¹²A nɨ keʼ nyɛʼtɨ á ɨbvu ɨ tsi nɨ mɨtən atú mbəmnye ɨtsən tsa tsɨ kfónə́ lá taŋ á nɨ tiʼə ndzúʼnə́ tsɛʼ ɨnu tsa mbəmnye lɔnə lá.

¹³Nɨ keʼ bə ndɔgɨ ɨlam ɨnye ɨtsən a nye ɨdzúm afaʼ a ngɨ ɨbvu, lá nɨ baŋnɨ ngyen nɨ ɨtumbəm ɨtsən a mbó Ŋwi tso ɨbɛn ba Ŋwi a kwarɨnɨ awa a mbó nɨvwo ngɨ bɨ tsi ntən, ntiʼ ndɔgɨ ɨtumbəm ɨtsən tsə fɨgɨnɨ ngɛn nɨ tsɛrə a mbó Ŋwi tso ɨdzúm afaʼ tsə ngɨ̌ ɨnu tsɨ chinɨnɨ ə.

¹⁴A nɨ keʼ nyɛʼtɨ á ɨtumbəm ɨtsɨŋ be ɨbuʼ a mbó ɨbvu mbɨ́ʼ ngə́ ka a be ayi nyɔngɔŋ wa a tsinɨ nɨ mɨtən atú bən, a baŋnɨ ntsi abɔŋəntəm a Ŋwi ntsi nɨ mɨtən atú bɨŋ ə.

¹⁵A tiʼ mbe lá ngə́ ke le? Bɨgɨnə mɨ ghɨ ɨbvu mbɨ́ʼ ngə́ ka a be ayi nyɔngɔŋ wa a tsinɨ nɨ mɨtən atú bɨgɨnə lá a baŋnɨ ntsi abɔŋəntəm a Ŋwi ntsi nɨ mɨtən atú bɨgɨnə le? Kə́ kə́!

¹⁶Nɨ se zhi ngə́ be nɨ nyɛʼtɨ ɨtumbəm ɨtsən a mbó ŋwɔn tse tso ɨbuʼ tsa tsɨ zúʼnɨ́nə́, nɨ tiʼ mbe ɨbuʼ ŋwɔn wa nɨ zúʼnɨ́nə́ ayi lá le? Be nɨ ghɨ ɨbvu, nɨ mɨ lwɨgɨnɨ a mbó nɨvwo, be nɨ zuʼnɨ a Ŋwi, nɨ mɨ lwɨgɨnɨ a mbó nchinə ghe?

¹⁷Lá mɨya a mbó Ŋwi, ngə́ a yén mbe a nkfu tse lá nɨ be ɨbuʼ tsə ngɨ ɨbvu, lá tɨtsɔŋnɨ nɨ zuʼnɨnə nɨ mɨntəm ɨmən mɨtsum nkənu tsum za ɨ tsinɨ a mu anu za bɨ diʼnə awən ɨwu lá.

¹⁸Mbáʼ bɨ kwárɨ́nɨ́ awən a mbó ɨbvu lá, nɨ tiʼ mbe ɨbuʼ ɨnu tsɨ chinɨnɨ ə.

¹⁹Ma lisɨ ɨnu ɨtsan lá a nye ngɨnɨ mɨnu ma bɨgɨnə zɛ́nə́ nɨ njwi nɨ njwi mbɨ́ʼ ngə́ tso ŋwɔn mɨsɔŋ a ntsu, nɨ ghɔgɨ a ndzúʼə ɨ kɨ zhyɛ́. Tsɛʼ tso mbáʼ nɨ nyɛ́ʼtɨ́nɨ́ ɨlam ɨnye ɨtsən tso ɨbuʼ a ngɨ ɨnyaʼnɨ ɨnu ntiʼə nkə́ ngɨ̌ ɨbvu wa ɨ ghaʼnɨ ntsa mbó lá, tɨtsɔŋnɨ nɨ kɨ nyɛʼtɨ ɨtumbəm ɨtsən ɨtsum ɨtsum á tsɨ tiʼ ɨbuʼ ɨnu tsɨ chinɨnɨ taŋ á nɨ ngɨ̌ ɨnu tsɨ fɛmnɨ ə.

²⁰A nkfu za nɨ bénɨ́ ɨbuʼ a mbó ɨbvu lá, nɨ bé ɨbɛn nɨ atú azən, nchinə keʼ anu zə tse a mbó bən be.

²¹Ma lan, abi za nɨ tsínɨ́ nɨ zɛrə a ngɨ ɨnu tsa tsɨ tiʼnɨ tsə adɨrətú tɨtsɔŋnɨ, a be ake le? Ndwɨgɨnɨ ɨnu tsiŋ ɨtsum a nɨ nɨvwo ə.

²²Lá tɨtsɔŋnɨ wa bɨ kyɛtɨnɨ mɨnkɨ mɨ ɨbvu a nye bən, ntiʼ mbəŋ awən a nye ɨbuʼ Ŋwi lá, abi azhi a nɨ ngə́ bɨ ghɨ nɨ fɛm, ndwitɨ ɨzhi be ntsi ntən nɨnkoŋ ə.

²³Mbɨ́ʼ ngə́ mɨtsɔʼnɨ mɨ afaʼ mɨ ɨbvu a nɨ nɨvwo, lá azúm zə ghanɨ zə Ŋwi za a ghánə́ adaŋədaŋə a be ntsi ntən nɨnkoŋ ntsa a ndzum Kristo Yeso Maʼmbyí ɨwɨgɨnə ghe.