Read Ngemba Roma 8 Bible Online

Roma 8 - Ngemba bible

Roma 8

¹Tɨtsɔŋnɨ, ka ngvo ɨsáʼ tse ɨ be ayi ɨwu a mbó ŋwɔn wa a tsínə́ a mbúm bo Kristo Yeso ghe.

²Mbɨ́ʼ ngə́ nyɔngɔŋ wa a tsinɨ a shwúrɨ́ mɨtən mɨ Azhwi wa a ghɨnə bɨgɨnə tsinə atú ntən bɨgɨnə bɨ Kristo, a kyɛtɨnə mɨnkɨ mɨ abuʼ ma nyɔngɔŋ ɨbvu abɔʼnɨ nɨvwo kórɨ́nə́ awɨgɨnə ɨwu ə.

³Mbɨ́ʼ ngə́ Ŋwi a ghɨnə anu za Nyɔngɔŋ a kɨ chínɨ́ keʼ ghɨ mbɨ́ʼ ngə́ ɨnyam ɨnye ɨ ghɔ́gɨ́: wɛrə a tságɨ́ a Mɔn ɨyi tso ɨnyam ɨnye za ɨ tsinɨ nɨ ɨbvu ngə́ á tsənkɨ ɨbvu wa ɨ tsinɨ a mu ɨnyam ɨnye.

⁴Ŋwi a ghɨ́ a məzen taŋ á ɨnu tsɨ chinɨnɨ tsa Nyɔngɔŋ a lɔnə, á bɨgɨnə ghɨ a tsɛrə ɨtsum ngɛn mɛtɨ; bɨgɨnə ba ntsi mbyi ɨzɨgɨnə ɨ tsi be a mu Azhwi, nkeʼ be be adzaŋ za mbəmnye lɔnə lá.

⁵Mbɨ́ʼ ngə́ a mbó ɨbɛn ba ntsi mbyi ɨza zɔŋnə tsɛʼ ɨdzúm tsa mbəmnye lɔnə, bɨ tɛ́gə́ ɨtú ɨtsa tsɛʼ a nye ɨdzúm ɨnyam ɨnye, lá ɨbɛn ba ntsi mbyi ɨza zɔŋnɨ ɨnu tsa Azhwi a lɔnə, bɨ tɛ́gɨ́ ɨtú ɨtsa tsɛʼ a nye ɨdzúm tsa Azhwi a lɔnə ghe.

⁶A ntɛ́gɨ́ atú azo a nye ɨdzúm mbəmnye a nɨ ndǒ nɨvwo, lá a ntɛ́gɨ́ atú azo a nye ɨnu tsa Azhwi a lɔnə, yiŋə nɨ ntsi ntən nkə́ ngǎ mbɔnɨ ə.

⁷Ma lan, ɨbɛn ba bɨ tɛ́gɨ́nɨ́ ɨtú ɨtsa a nye ɨdzúm ɨnyam ɨnye, bɨ bán a Ŋwi ə; bo chi keʼ zuʼnɨ anu za nyɔngɔŋ Ŋwi a sóŋnə́ ghe, tsɛʼ a nkənu a chi keʼ adzaŋ məwa fuə;

⁸ɨbɛn ba bɨ tɛ́gɨ́nɨ́ ɨtú ɨtsa a nye ɨdzúm ɨnyam ɨnye chi keʼ ghɨ á ɨnye Ŋwi bɔŋə.

⁹Tsɛʼ a nkənu be Azhwi a Ŋwi a tsi a mu ɨnye bən muŋ nɨ mɨ chyɛnə be a mu Azhwi, nkeʼ be be a nye ntɛgɨ ɨtú ɨtsən a nye ɨdzúm mbəmnye. Ŋwɔn tsum wa a se nɨ Azhwi a Kristo tsi, a se tsi a mbúm bo zɨə.

¹⁰Mbəmnye ɨtsɨŋ ghɨ baʼtɨ kfó ɨ kfónɨ́ mbɨ́ʼ ɨbvu lá, be nɨ tsi nɨ Kristo, Azhwi a mɨ gha ntsi ntən a mbó bən mbɨ́ʼ ngə́ Kristo a ghɨnə nɨ chinɨ a ɨshi ɨmɨgɨ Ŋwi ə.

¹¹Be Azhwi a Ŋwi, zɨ wa a zhwémnɨ́nɨ́ a Yeso a mbó nɨvwo a tsi a mu ɨnye ɨtsən, zɨ wa a zhwémnɨ́nɨ́ a Kristo Yeso a mbó nɨvwo a mɨ gha ntsi ntən a mbó mbəmnye ɨtsən tsa tsɨ kfókɨ́nə́, ɨ tsa a ndzum Azhwi azhi za a tsinɨ a mu ɨnye ɨtsɨŋ ə.

¹²Ma lan nə ɨbɔmbɨma ɨban, bɨgɨnə tsi nɨ nɨká na bɨgɨnə mɨ zagɨ tfuə, lá ɨ keʼ tfu be a mbó ɨnyam ɨnye, lá be ngə́ ɨ keʼ nchyɛ̌ adzaŋ za ɨnyam ɨnye lɔnə ghe.

¹³Mbɨ́ʼ ngə́ be nɨ nchyɛ̌ ndzɔ̌ŋ ɨdzúm tsa ɨnyam ɨnye lɔnə, nɨ mɨ kfokə; lá nɨ mɨ tsi ntən mbáʼ be nɨ lɔgɨ Azhwi njwitɨ ngɨnɨ mɨnu ɨnyam ɨnye ɨwu ə.

¹⁴Ɨbɛn ba Azhwi a Ŋwi a tsagɨnɨnə awa a nɨ ɨbɔ bɨ Ŋwi ə.

¹⁵Mbɨ́ʼ ngə́ Azhwi za Ŋwi a ghanɨ a mbó bən ka a ghɨ ayi awən a nye ɨbuʼ, nkeʼ kə́ ngɨə ngə́ á nɨ tsi nɨ nɨbɔgɨ ə; Azhwi məzen a baŋnə ngɨə awən a nye ɨbɔ bɨ Ŋwi, a mu mɨtən mɨ Azhwi məzen, bɨgɨnə chi tiʼ bugɨ ɨ tɔŋ a Ŋwi ngə́, “Tarɨ! Ta ɨghan!”

¹⁶Azhwi a Ŋwi a bosə bo azhwi azɨgɨnə a sóŋə́ ngə́ bɨgɨnə nɨ ɨbɔ bɨ Ŋwi ə.

¹⁷Mbáʼ bɨgɨnə nɨ ɨbɔ ɨbyi lá, bɨgɨnə mɨ tsi nɨ ɨfɔgə wa a lɛnə a mbó ɨbɛn ɨbyi ɛ. Bɨgɨnə mɨ kɨ tsi nɨ azúm za Ŋwi a lɛnɨ a mbó Kristo; mbɨ́ʼ ngə́ be bɨgɨnə ze ngɨ́ʼ bɨgɨnə bɨ Kristo, bɨgɨnə ghɨ kɨ tsi a mu nɨfáŋ ɨni ɛ.

¹⁸Ma zhi ɨ shiʼnɨ ngə́ ngɨ́ʼ za bɨgɨnə zɛ́nə́ tɨtsɔŋnɨ bɨ chi keʼ fɨʼnɨ a zɛrə bo nɨfáŋ na Ŋwi a ghɨnɨ kyɛʼ a mbó bɨgɨnə ghe.

¹⁹Atsum za Ŋwi a káʼnɨ́ a zhwíʼtə́ nɨ ntəm ɨyi ɨtsum ngə́ á Ŋwi a kyɛʼ ɨbɔ ɨbyi a mbó bo ghe.

²⁰Mbɨ́ʼ ngə́ Ŋwi a ghɨ́ ngə́ á atsum za zɨə káʼnɨ́ á tsɨ be ɨdzúm adaŋədaŋə, nkeʼ be be adzaŋ za tsɨ lɔnə lá mbe be adzaŋ za zɨ wa a káʼnɨ́ a tsɛrə a lɔnə ghe. Lá ntsiŋə nɨ ntəm tsum tsí ɨwu,

²¹mbɨ́ʼ ngə́ ɨtfúʼ njwi tsi ɨwu wa Ŋwi a ghɨ kyɛtɨ mɨnkɨ mɨ abuʼ a nye atsum za zɨə káʼnɨ́ taŋ á tsɨ keʼ bye, ɨ kɨ tsi nɨ nɨfáŋ na nɨ tsinɨ a mu nchyɛ nɨ atú aza tso ɨbɔ bɨ Ŋwi ə.

²²Mbɨ́ʼ ngə́ bɨgɨnə zhi ngə́ ɨ kɔʼ kuʼ tɨtsɔŋnɨ, atsum za Ŋwi a káʼnɨ́ a dumə a mu ndzaŋə tso mangye a chiʼə.

²³Lá ka a be ayi tsɛʼ ɨdzúm tsa Ŋwi a káʼnɨ́ tsa tsɨ dumnə a mu ndzaŋə; bɨgɨnə ba bɨ tsinɨ nɨ Azhwi tso ntsambyi azúm zə ghanɨ zə Ŋwi, kə́ ndúmə́ nɨ ndzaŋə ɨmu ɨmu, njwiʼtɨ njwi za a ghɨ ghɨ awɨgɨnə a nye ɨbɔ ɨbyi, ɨ tiʼ kɨ ghɨ awɨgɨnə á bɨgɨnə keʼ a mu atsáŋ zə tse bə ntsi a nye mɨndóm mɨtsum ə.

²⁴Mbɨ́ʼ ngə́ bɨ lóŋ awɨgɨnə lá mbɨ́ʼ ntsiŋə nɨ ntəm ɨtsum ə; lá be bɨgɨnə ndzě azúm za bɨgɨnə tsenə nɨ ntəm ɨtsum, a keʼ ntsiŋə nɨ ntəm ɨtsum bə mbe. A tsi ɨwa a tɨtərɨ bɨgɨnə wa be a zɛn azúm mbɨŋə ntsiŋə a zɛrə nɨ ntəm ɨtsum le?

²⁵Lá be bɨgɨnə ntsiŋə azúm za bɨgɨnə se ndzě nɨ ntəm ɨwɨgɨnə ɨtsum, bɨgɨnə tsiŋənə nɨ nchigə ghe.

²⁶Ndəŋndəŋ, bɨgɨnə baʼtɨ nghɔgɨ lá Azhwi a kwatɨnə awɨgɨnə mbɨ́ʼ ngə́ ka bɨgɨnə zhi awɨgɨnə a ntsaʼtɨ Ŋwi adzaŋ za bɨgɨnə benɨ tsaʼtɨnə ghe; lá Azhwi məzen zɨmboŋ a bítɨ́ ɨdzúm a mbó Ŋwi a nye mbúŋ ndumə wa be nɨgham nɨ ntsu keʼ soŋə.

²⁷Ŋwi, zɨ wa a zɛ́nə́ a mu mɨntəm ɨmɨgɨnə, a zhi anu za Azhwi a kwaʼtɨnə; mbɨ́ʼ ngə́ Azhwi a búʼtɨ́ mbó a mbó Ŋwi a nkfu ɨbɛn ɨbyi, ngɨə mə lan lá adzaŋ za Ŋwi a lɔnə ghe.

²⁸Bɨgɨnə zhi ngə́ anu atsum za a fúnə́ a nye bɨgɨnə, Ŋwi a kyáŋtə́ ngə́ á fu mbe zə shiʼnɨ a mbó bɨgɨnə ba bɨ kɔŋnɨ ayi, bɨgɨnə ba Ŋwi a tsɔʼnɨ taŋ ɨ ghɨ á anu za wɛrə a lɔnə á fuə.

²⁹Ɨbɛn ba Ŋwi a kwɛ́nə ntsɔʼ lá, wɛrə a kɨ́ ntíntɨ́ awa ntɛgɨ táʼ bagɨ ngə́ á bo be tso Mɔn ɨyi, taŋ á Mɔn ɨyi məwen a tiʼ ntsi a mbó bo tso asándóm a mu ngwəgɨ zɨ ngwi ə.

³⁰Ma lan, a tiʼ ndiʼ ngə́ ɨbɛn ba Ŋwi a tíntɨ́nɨ́ ntɛgɨ táʼ bagɨ lá ɨbɛn ba wɛrə a tsɔ́ʼnə́; ɨbɛn ba wɛrə a tsɔ́ʼnɨ́ lá, wɛrə a ghɨ́ bɨ tɛmnɨ a ɨshi ɨmɨgɨ zɨ, a kɨ ntiʼ nga nɨfáŋ ɨni a mbó bo ghe.

³¹Bɨgɨnə mɨ tiʼ soŋ lá ngə́ ke mbɨ́ʼ ɨnu tsiŋ ɨtsum le? Be Ŋwi a tɛm a bagɨ bɨgɨnə, ɨwa daŋ a chi kwənkɨ bɨgɨnə bo le?

³²Tsɛʼ a nkənu a mɨ keʼ Ŋwi be. Zɨ wa a sé ghɨʼtɨ a Mɔn ɨyi, lá ɨ nyɛʼtɨ bɨ zhwitɨ ayi mbɨ́ʼ atú azɨgɨnə bɨtsum, njingə a mɨ keʼ ɨdzúm ɨtsum a mbó bɨgɨnə gha adaŋədaŋə le?

³³Ɨwa mɨ kaŋ ɨbɛn bɨ Ŋwi ba wɛrə a tsɔʼnɨ le? Ŋwi zɨmboŋ a soŋ ngə́ ka bo vwo a wa ɨsáʼ wu tsɛrə ghe!

³⁴Ɨwa mɨ soŋ ngə́ bo vwo ɨsáʼ wu tsɛrə le? Nkeʼ Kristo Yeso be, zɨ wa a kfónɨ́, wa bɨ zhwémnɨ́nɨ́ a mbó nɨvwo, wa a tɛmnɨ a bagɨ abó Ŋwi zə maʼə mbúʼtɨ́ mbó a mbó Ŋwi a nkfu bɨgɨnə lá!

³⁵Ɨwa chi tiʼ santɨ, ɨ fɨgɨ awɨgɨnə a mu akɔŋnɨ a Kristo le? A nə́ ngɨ́ʼ chi ghɨ, kə ntwɛʼ mɨlwi ɨ shwen kə nghagə za bɨ ghágɨ́nə́ awɨgɨnə kə nji kə afúm kə nɨbɔgɨ ngə́ anu a tɨbɔŋ a mɨ fu kə nɨvwo le?

³⁶Tso mbáʼ aŋwaʼnɨ a Ŋwi soŋnɨ ngə́, “Mbɨ́ʼ atú azo, bɨgɨ tsi a ntsu nɨvwo nkfu tsum; bɨ liŋə awɨgɨ tso mbyindzɨ tsa bɨ ghɛnə a nkyémtə́ ghe.”

³⁷Kə́ kə́, a nye ɨnu tsiŋ ɨtsum, bɨgɨnə tsi nɨ ayanguʼ ngɛn mɛtɨ a ntsǎ a ndzum zɨ wa a kɔ́ŋnɨ́ awɨgɨnə ghe.

³⁸Mbɨ́ʼ ngə́ ma zhi tsɛʼ ɨ shiʼnɨ ngə́ anu zə tsɛrə a chi keʼ santɨ awɨgɨnə ɨ fɨgɨ a mu akɔŋnɨ azhi ɛ: nɨvwo kə ntsi ntən, ɨtsenda Ŋwi kə bɨta bɨ ɨlaʼ bə fɔməbvurə kə bɨsáʼ bɨ ɨlaʼ ba bɨ tsinɨ a fɔməbvurə, za a tsinɨ tɨtsɔŋnɨ kə za a ghɨnɨ yen,

³⁹kə mbyi za ɨ tsinɨ atɨ́, kə mbyi za ɨ tsinɨ a mbyishe — ka azúm zə tsɛrə za bɨ káʼnɨ́ a tsi ayi ɨwu za a chinɨ santɨ ɨ fɨgɨ awɨgɨnə a mu akɔŋnɨ a Ŋwi ə; akɔŋnɨ za a nɨ azɨgɨnə ntsa a ndzum Kristo Yeso Maʼmbyí ɨwɨgɨnə lá.