Read Ngemba Roma 9 Bible Online

Roma 9 - Ngemba bible

Roma 9

¹Ma sóŋə́ lá tsɛʼ nkənu tso ŋwɔn wa a tsinɨ a mbúm bo Kristo ghe, ka ma nchwě aghan lá ɨnu ə. Ntəm ɨghan wa Azhwi zə Fɛmnɨ a sáʼnə́ kɨ ndzɔŋ mbe atɛmə-ndzě ɨghan ngə́ ka ma nchwě aghan lá ɨnu

²mbáʼ be ma soŋ ngə́ adzə́ŋnɨ azə a ghaʼ be tɨ́sə́n, ndzaŋə za ɨ tsinɨ a mu ntəm me keʼ kə́ miə ghe.

³A be nu nɨ nkfu ɨzan muŋ ma nyɛʼtɨ ngə́ á Ŋwi a lɔʼ aghan nkɨ sobɨ aku a nɨyen azan a ndzum Kristo mbɨ́ʼ atú a ɨbɛn ɨban məben ba a nɨ ngaŋ atsé ɨtsan lá.

⁴Bo nɨ ɨbɛn bɨ Ŋwi ə; wɛrə a tyé awa a nye ɨbɔ ɨbyi, nkyɛʼ nɨfáŋ ɨni a mbó bo; ɨ nɨŋ ɨkə ɨchi bo bo nkɨ nga a Nyɔngɔŋ a mbó bo; bo kə́ ngúʼsə́ ayi a nye ngótɨ́ ndóm wa a díʼnɨ́ a mbó bo; bo kɨnə nkɨ nkwarɨ ɨnu tsə ghaʼnɨ tsa wɛrə a káʼnɨ́ awa ɨwu;

⁵bɨta ɨba bə kɔ́ʼɔ́nguʼ bé nchikɨ ɨbɛn bə Ɛbal, Kristo, zɨ tso ŋwɔn mɨsɔŋ a ntsu a ló a mbó atsé aza bə Yuda ghe. Ŋwi, zɨ wa a sáʼnə́ azúm atsum, á bɨ bontɨ ayi nɨnkoŋ ə. A be lá.

⁶Ka ma sóŋə́ aghan lá ngə́ akaʼ a Ŋwi a se fuə; mbɨ́ʼ ngə́ ka a be ayi ɨbɔ bɨ Izrai bɨtsum ba a nɨ ɨbɔ bɨ Ŋwi ə.

⁷Kə ngə́ ɨbɔ bɨ ɨlə̌ Abraʼm bɨtsum nɨ ɨbɔ bɨ Ŋwi ə. Ŋwi a sóŋ a mbó Abraʼm ngə́, “O ghɨ tsi nɨ ɨbɛn bɨ ɨlə̌ ɨbo ba ma káʼnɨ́ agho ɨwu, ɨ tsa lá a ndzum Isak ə.”

⁸A diʼ lá ngə́, ka a be ayi ɨbɔ bɨtsum ba Abraʼm a jwínɨ́ ba a nɨ ɨbɔ bɨ Ŋwi, lá a nɨ ɨbɔ ba Abraʼm a jwínɨ́ ntsa a ndzum akaʼ za Ŋwi a ghánɨ́ wəmbo mbáʼ nɨ ngótɨ́ ɨbɔ bɨ ɨlə̌ Abraʼm ə.

⁹Mbɨ́ʼ ngə́ a mu akaʼ a Ŋwi wɛrə a sóŋ ngə́, “A nye nkfu za ɨ kuʼnɨnɨ ma mɨ bə bən ɨ yen ghɨ á Sara a jwi a mɔn mbáŋnɨ́ ə.”

¹⁰A se atsum a za be. Afi anu məzen a fú a nye Aribika wa a tɛ́mnɨ́ nɨ ɨbɔ bɨbá, ta ɨwa a bé táʼ, mbe ta ɨwɨgɨnə wu kɔ́ʼɔ́nguʼ Isak ə.

¹¹Tsɛʼ mbáʼ bɨ bvúrɨ́nɨ́ ɨbɔ ben tɨ jwi, kə ngə́ bɨ ghɨ́ anu zə tse zə shiʼnɨ kə zə tɨbɔŋ, a ngɨə ngə́ á afaʼ a Ŋwi zə ntyé ɨbɛn ɨbyi a ngěn nɨ mbyi, nkeʼ be be ngə́ bo fáʼ anu zə tsɛrə, lá mbaŋnɨ mbe be mbɨ́ʼ ntyé ɨzhi,

¹²Ŋwi a sóŋ a mbó Aribika ngə́, “Ntsambyi lo faʼ a mbó azɔŋəndzum azhi ɛ.”

¹³Tso mbáʼ aŋwaʼnɨ a Ŋwi a soŋnɨ ngə́, “Ma kɔ́ŋ a Yakɔb lá mban a Yisau ghe.”

¹⁴Bɨgɨnə mɨ tiʼ soŋ lá ngə́ ke le? Njingə Ŋwi a ghɨ̌ nkobɨ le? Kə́ kə́!

¹⁵Mbɨ́ʼ ngə́ Ŋwi a sóŋ a mbó Mǒse ngə́, “Ma mɨ ko a mɨlɨŋnɨ a nye ŋwɔn wa ma lɔnə, kə ɨ dzəŋnɨ a nye ŋwɔn wa ma lɔnə ghe.”

¹⁶Ma lan, ka anu atsum a ndzɔŋə ayi lá tsɛʼ adzaŋ za ŋwɔn mɨsɔŋ a ntsu a lɔnə kə ngɨə, a nɨ tsɛʼ mbɨ́ʼ akômɨlɨŋnɨ a Ŋwi ə.

¹⁷Mbɨ́ʼ ngə́ aŋwaʼnɨ a Ŋwi a soŋ a mbó Farao ɨfɔ alaʼ Gyibto ngə́, “Ma ghɨ́ agho a nye ɨfɔ lá taŋ ɨ lɔgɨ agho ɨ diʼ mɨtən ɨman ɨwu, taŋ á mɨtən ɨmə láʼ ɨkum ɨghan a mbó mbyi tsum ə.”

¹⁸Lá be ngə́ Ŋwi a kǒ a mɨlɨŋnɨ a nye ŋwɔn tsum wa zɨə lɔnɨ nkǒ, nkə́ ngɨə a ŋwɔn tsum wa zɨə lɔnə a nye ŋwɔn atɨŋətú ə.

¹⁹Lá, ŋwɔn nɨ bən a mɨ bitɨ aghan ngə́, “Be a be ngə́ nə nɨ adzaŋ zə wu, Ŋwi a bvurə ngǎ ɨfərɨ ŋwɔn wa a fanɨ anu lá ngə́ ke le? Ɨwa chi ton anu za Ŋwi a lɔnə le?”

²⁰Lá, o lá ɨwa, mbe ŋwɔn mɨsɔŋ a ntsu, ndɨʼkə bɨŋ Ŋwi le? Anto a chi bitɨ a ŋwɔn wa a bɔmnɨ ayi ngə́ o bɔm aghan adzaŋ wɛnə lá ngə́ ke le?

²¹Ŋwɔn wa a bɔ́mnɨ́ bənto a faʼə nɨ abɔm a nye ndóm wa wɛrə a lɔnə ghe. Wɛrə a lɔgə a táʼ ntsə́m abɔm mbɔ́mə́ bənto ɨwu bi bɨbá ghe; ndɛn a táʼ a mbó nyom anu, ɨ fáʼə nɨ táʼ nkfu ɨtsum ə.

²²Ndəŋndəŋ anu nɨ nkənu mbɨ́ʼ anu za Ŋwi a ghɨnə ghe. Wɛrə a kə́ ndǒ ndiʼ alwɛntɔ́ŋ azhi, ɨ kɨ ghɨ á bɨ zhi mɨtən ɨmyi ɛ. Lá wɛrə a tsí nɨ nchigə abɔʼnɨ achigəntəm a nye ɨbɛn ba ntɔŋ ɨyi kɨ́nə́ ndwɛ̌ a nye bo, bo ba bɨ tsínɨ́ ɨ ghɨ tsənkɨ awa lá.

²³Wɛrə a kɨ chyɛ nkə́ ndǒ nkyɛʼ nɨfáŋ ɨni na nɨ ghaʼnɨ be adaŋədaŋə, na bɨ chwírɨ́nɨ́ a nye bɨgɨnə ba nɨ ɨbɛn ba wɛrə a kónə́ a mɨlɨŋnɨ a nye bo lá. Bɨgɨnə lá ba wɛrə a kyaŋtɨnə a nkwárɨ́ nɨfáŋ ɨni ɛ.

²⁴Mbɨ́ʼ ngə́ bɨgɨnə lá ɨbɛn ba wɛrə a tsɔ́ʼnɨ́, ba bɨ se fu tsɛʼ a mbó bə Yuda, lá nkɨ ndzɔŋ fu a tɨtərɨ ba a se bə Yuda be lá.

²⁵A mu aŋwaʼnɨ a Osha Ŋwi a soŋ ngə́, “Ɨbɛn ba a sé ɨbɛn ɨban be ma mɨ tɔŋnə awa a ngə́ ‹Ɨbɛn ɨbə›. Alaʼ za ma sá kɔŋ, ma mɨ lɔgɨ a zɛrə a nye ‹Mbɔŋ azúm azə›.

²⁶A nkwiʼtə, tsɛʼ a nye adiʼ za mbáʼ bɨ sóŋnɨ́ a mbó bo ngə́, ‹Ka nɨ be awən ɨbɛn ɨban lá,› tsɛʼ adiʼ məwa, bɨ mɨ tɔŋ awa nɨ ɨbɔ bɨ Ŋwi, zɨ wa a tsinɨ atú ntɨŋ ə.”

²⁷Asaya a sóŋ nɨ nji zɨ ntən mbɨ́ʼ bə Izrai ngə́: “Ɨbɛn bɨ Izrai baʼtɨ ngháʼ tso awaŋə a ngə́rɨ́ sagɨrə wu ngwi ɨ ghaʼnɨ lá, a nɨ tsɛʼ bo a nɨsháŋnɨ́ mbáʼ bɨ ghɨnɨ loŋ,

²⁸mbɨ́ʼ ngə́ Maʼmbyí a ghɨ chɛrɨ ɨsáʼ ɨbɛn bɨ atuəshe ɨ ghɛn mɛtɨ nɨ ngyaŋ ɨnye ə.”

²⁹Asaya a kwɛ́ sóŋ ngə́, “Maʼmbyí Tamɨtən Mɨtsum a kwɛ́ bé tú nyɛʼtɨ ɨbɛn bɨ ɨlə̌ ɨwɨgɨnə bə tse, muŋ bɨgɨnə bé tso Sodom, muŋ bɨgɨnə bé tso Gomora ghe.”

³⁰Ma lan, bɨgɨnə mɨ tiʼ soŋ lá ngə́ ke le? Ngə́ ba a se bə Yuda be ba bɨ sě njwə́ŋtə́ a ntɛ́mnə́ a ɨshi ɨmɨgɨ Ŋwi bɨ ghɨ́ bo tɛmnɨ a ɨshi ɨmɨgɨ Ŋwi ntsa a ndzum abeməntəm;

³¹lá bə Izrai ba bɨ nyúʼnɨ́nɨ́ a ntɛ́mnə́ a ɨshi ɨmɨgɨ Ŋwi a ntsǎ a ndzum nyɔngɔŋ, bɨ sé a nyɔngɔŋ wa lɛn ɨ kɔʼ kuʼ a ndwitə ghe.

³²Lá, mbɨ́ʼ ake le? Mbɨ́ʼ ngə́ bo sé tsa a ndzum abeməntəm ndzɔŋ a zɛrə ghe; bo báŋnɨ́ ntɔ́ŋ ngə́ ngɨnɨ mɨnu ɨma mɨ kwatɨ awa ghe. Bo tíʼ ntakɨ atú “ngɔʼ za ɨ ghɨnə ɨbɛn takɨnə”,

³³za mbáʼ aŋwaʼnɨ a Ŋwi a ghamnɨ mbɨ́ʼ a zɛrə ngə́, “Zɛnə, ma nyɔŋ ngɔʼ a Zayɔn, za ɨ ghɨnɨ ghɨ á ɨbɛn ntákə́ ɨwu, aláŋsə́ ngɔʼ za a mɨ ghɨ á bo vwo. Lá ŋwɔn tsum wa a nɨŋnɨ ntəm ɨyi wə ɨnye a mɨ keʼ adɨrətú kwarə.”