Read Ngemba 1 Korɨnto 10 Bible Online

1 Korɨnto 10 - Ngemba bible

1 Korɨnto 10

¹Ɨbɔmbɨma ɨban, ma lǒ ngə́ á nɨ waʼtɨ anu za a fúnɨ́ a nye bɨta ɨbɨgɨnə bə kɔ́ʼɔ́nguʼ ə. Mbaʼ za ɨ kɨ́ŋtɨ́ awa bɨtsum, bo bɨtsum kɨ́ ntóm a sagɨrə wu ngwi wa bɨ kɨ́nə́ ntɔ́ŋə́ ngə́ Rɛd Si lá.

²A nkfu za bo tsínɨ́ a mu mbaʼ za abɔʼnɨ nkfu za bo kɨ́nə́ ntómə́ a sagɨrə wu ngwi wa lá, bo kwárɨ́ nkyi adzaŋ za bo kɨ́nə́ ndzɔŋə a Mǒse lá.

³Bo bɨtsum kfúrɨ́ ndəŋndəŋ abán za azhwi a ghánɨ́

⁴nkɨ no ndəŋndəŋ mɨluʼ ma azhwi a ghánə́. Bo nó a za Ŋwi a ghɨ́nɨ́ ngə́ á fu a nye aláŋsə́ ngɔʼ azhwi za ɨ kɨ́nə́ ndzɔŋə awa lá. Aláŋsə́ ngɔʼ azhwi məza a bé lá Kristo zɨmboŋ ə.

⁵A báʼtɨ́ mbe adzaŋ məwiŋ ɨ benɨ lá, ntɔŋ Ŋwi lwí a nye bo bə ghaʼnə; adzaŋ məwen, ɨkfú ɨtsa tíʼ núm nɔnkɨ a mu mɨkɨghonɨ ma.

⁶Tɨtsɔŋnɨ, ɨnu tsiŋ ɨtsum be lá alisɨ a mbó bɨgɨnə, nkwántə́ awɨgɨnə ngə́ á bɨgɨnə keʼ mbɛ́bə́ a ngɨ ɨnu tsɨ tɔmnɨnɨ tso mbáʼ bo kɨ́nə́ mbɛ́bə́ lá,

⁷kə nkə́ ngúʼsɨ́ ɨbɔ bɨ abe tso mbáʼ bo bə tsɛrə kɨ́nə́ ngúʼsə́ lá. Tso mbáʼ aŋwaʼnɨ a Ŋwi soŋnɨ ngə́, “Ɨbɛn ba shíʼtɨ́ ntsí a tɨshe a ndzɨ́ə ɨ kɨ nó (a mu nɨdorɨ), ntiʼ nkon a mu afágɨ́nɨ a mɨluʼ abɔʼnɨ zə ntɔrɨ ɨlɛbɨ ə.”

⁸A bɨgɨnə keʼ númə́ ntɔrɨ ɨlɛbɨ ɨtsɨgɨnə tso mbáʼ bo bə tse kɨ́nə́ ngɨə, adzaŋ məwen bo nchwuʼ mɨghúm mɨmbá nɨ ntsɔb tárə́ kfokɨ atú táʼ njwi lá.

⁹A bɨgɨnə keʼ a Maʼmbyí zhwəŋtɨ tso mbáʼ bo bə tse zhwə́ŋtɨ́nɨ́ ayi, mɨnyo zhwitɨ awa lá.

¹⁰A bɨgɨnə keʼ nzhwúʼnə́ mbɨ́ʼ a Maʼmbyí tso mbáʼ bo bə tse zhwúʼnɨ́nɨ́ Ŋwi a tsagɨ Ntsendá Nɨvwo ɨzhi za ɨ yen njwitɨ awa lá.

¹¹Ɨnu tsiŋ ɨtsum fú a nye bo lá tso ɨlisɨ a mbó bə mɔʼɔ, bɨ kɨ ŋwaʼnɨ a tsɛrə a tɨshe lá taŋ ɨ kwantɨ awɨgɨnə mbɨ́ʼ ngə́ bɨgɨnə tsi a nye nkfu zɨ tse za mbáʼ ndwitə ɨ tiʼ tsɛʼ abó ə.

¹²Bo wa bɨ kwaʼtɨnɨ ngə́ bo tɛm ɨ shiʼnɨ tsi nɨ ndə̌tú mbɨ́ʼ bo vwoə.

¹³Ka njwəŋtə zɨ tse ɨ tsi ayi ɨwu za ɨ zhwə́ŋtɨ́nə́ agho za ka ɨ be ayi njwəŋtə za ɨ zhwə́ŋtɨ́nə́ a ŋwɔn mɨsɔŋ a ntsu ə. Ŋwi a sóŋə́ tsɛʼ nkənu ə. Wɛrə a mɨ keʼ nyɛʼtɨ á bɨ zhwəŋtɨ agho a nye ndóm wa o chinɨ koʼ chigɨ a zɛrə ghe; a nkfu za bɨ zhwə́ŋtɨ́nə́ agho, wɛrə a mɨ gha adaʼ za o mɨ chigɨ njwəŋtə məzen ɨwu, ɨ kɨ gha ndóm wa o mɨ baʼtɨ a zɛrə ɨwu ə.

¹⁴Ma lan nə bɨson ɨban, á nɨ nyɛʼtɨ ngúʼsɨ́ ɨbɔ bɨ abe ə.

¹⁵Ma ghamə a mbó bən lá tso ma ghamə a mbó ngaŋ nji ɨnu ə; tsɛʼ bɨŋ mboŋ, á nɨ bəgɨrɨ anu za ma sóŋnə́ ghe.

¹⁶Nkfu tsum za bɨgɨnə nónɨ́ mɨluʼ a mu ndɔ́ŋ za bɨ ghánə́ a mɨya a mbó Ŋwi nɨ zɛrə a nkfu ntárɨ́ Maʼmbyí lá, bɨgɨnə bɨtsum kə́ nǒ lá alɛm a Kristo ghe. Nkfu tsum za bɨgɨnə batɨnɨ abán za nkfurɨ lá, bɨgɨnə bɨtsum kə́ nkfúrə́ lá ɨnyam ɨnye Kristo ghe.

¹⁷Mbɨ́ʼ ngə́ a nɨ táʼ mbɛʼ abán, bɨgɨnə bɨtsum baʼtɨ nghaʼ ɨ ghaʼnɨ lá, mbe táʼ ɨnyam ɨnye mbɨ́ʼ ngə́ bɨgɨnə yɛbtə lá ndəŋndəŋ mbɛʼ abán nkfúrə́ ghe.

¹⁸A nɨ wiʼtɨ anu mbɨ́ʼ bə Izrai ghe. Bə Izrai ba bɨ kfurɨnɨ ɨnyam za bɨ ghanɨ tso mɨtsuʼnɨ mɨ atú a mbó Ŋwi lá, kə́ faʼə atú a mɨkuʼ a mbó Ŋwi ə.

¹⁹Ma tiʼə soŋə lá ngə́ ke le? Ngə́ mɔn abe kə mɨdzɨ ma bɨ ghanɨ a mbó mɔn abe nɨ anu zə tse za a dɨtɨnɨ le?

²⁰Kə́ kə́! Anu za ma sóŋnə́ lá a nɨ ngə́, ɨnyam tsum za bɨ kyemnɨ atú a mɨkuʼ bɨtɨbeməŋwi, bɨ gha a zɛrə lá a mbó bɨdzɨŋ nkeʼ a mbó Ŋwi be. Ma kaʼ nkə́ ndǒ ngə́ á nɨ ndzɨ́nə́ bɨŋ bɨ bɨdzɨŋ ə.

²¹O chi koʼ no a mu ndɔ́ŋ Maʼmbyí nkɨ ndzɔŋ no zɨ bɨdzɨŋ táʼ nkfu ə; o chi koʼ dzɨ mɨdzɨ ma bɨ tɛgɨnɨ atú atɛkɨ a Maʼmbyí nkɨ ndzɔŋ ndzɨ a ma bɨ tɛgɨnɨ atú atɛkɨ a bɨdzɨŋ táʼ nkfu ə.

²²Bɨgɨnə lǒ lá ngɨə á Maʼmbyí a tsi nɨ aghɨʼnɨ le? Bɨgɨnə wiʼtɨ ngə́ bɨgɨnə tən ntsa ayi le?

²³Ɨbɛn bə mɔʼɔ sóŋə́ ngə́, “Bɨgɨnə chi ghɨ anu atsum za bɨgɨnə kɔŋnə.” A nɨ nkənu ə, lá ka a bɔŋ ayi anu atsum a ngɨə ghe. “Bɨgɨnə chi ghɨ anu atsum ə” lá ka anu atsum a nkwátə́ ayi ɛ.

²⁴A ŋwɔn tse a keʼ tsi a tɨtərɨ bən wa a lɔnə ngə́ á bɔŋ tsɛʼ azhi ɛ, á mbáŋnə́ ndǒ ngə́ á bɔŋ a mbó bə mɔʼɔ ghe.

²⁵O chi kfurɨ abə́ŋ a ɨnyam atsum za bɨ fenə a mɨtan tɨ bitɨ abítɨ mbɨ́ʼ ntəm wa ɨ sáʼnə́ agho ə.

²⁶Aŋwaʼnɨ a Ŋwi soŋ ngə́, “Atuəshe abɔʼnɨ ɨdzúm ɨtsum tsa tsɨ tsinɨ ɨwu, tsɨ lá tsə Maʼmbyí ɛ.”

²⁷Be ŋwɔn wa a se ntəm ɨyi a nye Kristo nɨŋ a ghon agho a mɨdzɨ, o kɨ mbemtɨ ngə́ o mɨ ghɛn dzɨ bɨŋ zɨ, dzɨ azúm atsum za bɨ tɛgɨnɨ a ɨshi gho tɨ bitɨ abítɨ mbɨ́ʼ ntəm wa ɨ sáʼnə́ agho ə.

²⁸Lá be ŋwɔn wu tse a soŋ a mbó gho ngə́, “Bɨ gha mɨdzɨ mɛnə a mbó ɨbɔ bɨ abe,” koʼ a mɛrə dzɨ mbɨ́ʼ atú a ŋwɔn wa a soŋnɨ anu məzen a mbó gho lá abɔʼnɨ ntəm wa ɨ sáʼnə́ a ŋwɔn,

²⁹ma sóŋə́ lá ntəm wa ɨ sáʼnə́ a ŋwɔn wa, nkeʼ ɨgho be. Ma lan, ŋwɔn tse mɨ bitɨ ngə́, “Ntəm wa ɨ sáʼnə́ a ŋwɔn adaŋ mɨ chwa aghan á ma ka’ ghɨ anu za ma kɔŋnɨ ngɨə lá ɨ nə́ le?

³⁰Be ma tsaʼtɨ a Ŋwi atú mɨdzɨ ɨman ndzɨ a mɛrə, ŋwɔn tse a bə soŋ ɨnu tɨbɔŋ mbɨ́ʼ mɨdzɨ ma ma lonɨ ntsaʼtɨ a Ŋwi wu atú lá ngə́ ke le?”

³¹Ma lan, kə o dzɨ mɨdzɨ kə ɨ no mɨluʼ, ghɨ anu atsum a ngá nɨfáŋ a mbó Ŋwi ə.

³²A ntsi mbyi ɨzo ɨ tsi a nye ndóm wa ka ɨ ngǎ ayi ngɨ́ʼ a mbó bə Yuda kə ba a se bə Yuda be kə a mbó ndáŋwi za a nɨ zɨ Ŋwi ə.

³³A nɨ nyámə́ ngɨ̌ ɨnu tsɛʼ adzaŋ za ma ghɨnə ghe; ma zhwə́ŋtɨ́ ngɨ ɨnu ɨtsə ɨtsum a nye ndóm wa tsɨ mɨ bɔŋ a ŋwɔn tsum, nkeʼ tsɛʼ aghan bɔŋ lá ɨ bɔŋ a ŋwɔn tsum taŋ á Ŋwi a chi loŋ awa ghe.