Read Ngemba 1 Korɨnto 11 Bible Online

1 Korɨnto 11 - Ngemba bible

1 Korɨnto 11

¹A nɨ nyíʼsə́ aghan, tsɛʼ adzaŋ za ma kɨ́nə́ nkə́ nyíʼsə́ a Kristo lá.

²Ma bontə awən mbɨ́ʼ ngə́ nɨ wáʼtɨ́ ɨnu tsa ma ghɨ́nɨ́ nkɨ ndiʼ awən nɨ tsɛrə ghe.

³Lá ma lǒ ngə́ á nɨ zuʼ nkɨ nji ngə́ Kristo a nɨ atú a mbó ŋwɔn mbáŋnɨ́ tsum, ŋwɔn mbáŋnɨ́ tsum a be atú a mbó ngwe ɨyi, Ŋwi a be atú a mbó Kristo ghe.

⁴Ŋwɔn mbáŋnɨ́ tsum wa a bɔmtɨnɨ atú azhi bɔŋ ɨ tsaʼtɨ a Ŋwi kə nchwitɨ nkən Ŋwi adiʼ za bɨ ghúʼsɨ́nə́ a Ŋwi asaŋəsaŋ, a ghǎ adɨrətú a mbó Kristo ghe.

⁵Lá mangye tsum wa a tsaʼtɨnə a Ŋwi kə ɨ nchwítɨ́ nkən Ŋwi tɨ korɨ atú azhi a ghǎ adɨrətú a mbó ndóm wa a nɨ atú azhi ɛ — a tsi ndəŋndəŋ tso ngə́ bɨ kɔm atú a mangye məwiŋ ə.

⁶Be mangye a tú korɨ atú azhi, a chi kɔm a zɛrə ghe. Lá, mbáʼ a nɨ adɨrətú a mbó mangye a nkɔ́m atú azhi lá, á mangye tsum a korɨ atú azhi ɛ.

⁷Ka ŋwɔn mbáŋnɨ́ a tsi ayi nɨ nkorɨ atú azhi mbɨ́ʼ ngə́ Ŋwi a ghɨ́ a ŋwɔn mbáŋnɨ́ lá a nye afi azhi nkɨ ngɨ a tsi nɨ nɨfáŋ na nə mɔʼɔ na a nɨ nə Ŋwi lá. Lá mangye a tsi nɨ nɨfáŋ nɨ ŋwɔn mbáŋnɨ́ ə.

⁸Mbɨ́ʼ ngə́ Ŋwi a sé lɔgɨ lá a mangye nkáʼ a ŋwɔn mbáŋnɨ́ ɨwu, wɛrə a báŋnɨ́ ndɔgɨ lá a ŋwɔn mbáŋnɨ́ nkáʼ a mangye ɨwu ə.

⁹Bɨ sé káʼ a ŋwɔn mbáŋnɨ́ lá a mbó mangye, bɨ báŋnɨ́ nkáʼ a mangye lá a mbó ŋwɔn mbáŋnɨ́ ə.

¹⁰Adzaŋ məwen, mangye a tsi nɨ nchyɛ nɨ abɔmtɨ atú zɨ[3] mbɨʼ ngə́ bɨtsen bɨ ndá bɨ Ŋwi zě ayi ɛ.

¹¹Lá a ɨshi ɨmɨgɨ Maʼmbyí, ŋwɔn mbáŋnɨ́ a chi keʼ faʼ tɨ mangye, mangye a chi keʼ kɨ faʼ tɨ ŋwɔn mbáŋnɨ́ ə.

¹²Mbɨ́ʼ ngə́ tso mbáʼ bɨ lɔ́gɨ́nɨ́ a ŋwɔn mbáŋnɨ́ nkáʼ a mangye ɨwu lá, ndəŋndəŋ a jwiə mangye njwiə a ŋwɔn mbáŋnɨ́ ə. A káʼə Ŋwi nkǎʼ ɨdzúm ɨtsum ə.

¹³Bɨŋ mboŋ nɨ lentɨ ngə́ a kuʼnɨ a mbó mangye a ntsaʼtɨ Ŋwi adiʼ a ngúʼsɨ́ Ŋwi zə asaŋəsaŋ tɨ korɨ atú azhi le?

¹⁴Ndzɔ̌ŋ adzaŋ za Ŋwi a káʼnɨ́ ɨdzúm ɨtsum, a se diʼ a mbó gho ngə́ be ŋwɔn mbáŋnɨ́ a lɛn ɨnyɔŋ atú tsɨ sa, tsɨ yiŋənə nɨ adɨrətú wə ɨnye,

¹⁵lá be mangye a baŋnɨ nden ɨnyɔŋ atú tsɨ sa, tsɨ yiŋənə nɨ nɨbɔŋ wəmbo le? Mbɨ́ʼ ngə́ bɨ káʼ ɨnyɔŋ atú mangye lá a mbɔmtɨ atú azhi ɛ.

¹⁶Lá be ŋwɔn tse a ndǒ ndɨʼə, bɨgɨ chwa ɨ shiʼnɨ ngə́ ka mbɔm adaŋ ɨ tsi ayi ɨwu ntsa ɨ lə, ndáŋwi tsa a nɨ tsə Ŋwi ɨtsum kɨ nji tsɛʼ mə lə.

¹⁷A nye tsiŋ ɨtɨgɨtɨ tsa ma mɨ gha a mbó bən lá, ma mɨ kaʼ awən bontɨ mbɨ́ʼ ngə́ a baŋnə fǔ ɨnu tɨbɔŋ ɨ fuə a nkfu za nɨ ghǒtɨnɨ a ngúʼsɨ́ Ŋwi ntsa ɨnu tsɨ shiʼnɨ ə.

¹⁸A mbiʼnə, bɨ soŋ a mbó me ngə́ nɨ ghɨ ngótɨ́ lá, nɨ yɛbtɨ awən ntiʼə ndzɔŋnə ghe. Ma nɨŋ ntəm ɨghan ɨwu ngə́ məzen a chi be nkənu a nye ndóm tse ghe.

¹⁹Ka amə́ŋnɨ a be ayi ɨwu ə; ayɛbtɨ zen abɔʼnɨ azɔŋ a tsi nɨ nchyɛ a tɨtərɨ bən taŋ á bɨ zɛn ɨbɛn ba bɨ ghɨnɨ ɨnu tsɨ kuʼnɨnɨ asaŋəsaŋ ə.

²⁰Nɨ ghɨ mbomnkɨ tso ngǒtə lá, azúm za nɨ dzɨ́nə́ ntɔ́ŋə́ nɨ ntárɨ́ Maʼmbyí lá ka a be ayi zɛrə ghe,

²¹mbɨ́ʼ ngə́ nɨ ghɨ ndzɨ́ ntárɨ́ Maʼmbyí lá, ŋwɔn tsum a tiʼ ngɛn nɨ mbyi a ndzɨ́ ɨmyi mɨdzɨ ma a lonɨ ngyen nɨ mɛrə ghe. Adzaŋ məwen, ɨbɛn bə mɔʼɔ tiʼ ntsi nɨ nji, bə mɔʼɔ no mɨluʼ mbanə.

²²Ngə́ ke le! Nɨ se tsi nɨ mɨndá ɨmən ma be nɨ dzɨ nkɨ no ɨwu le? Kə nɨ mɨ wagɨnɨ ndáŋwi za a nɨ zɨ Ŋwi ɨ kɨ nɨŋ adɨrətú a nye ɨbɛn ba bɨ se tsi nɨ azúm zə dzɨnɨ le? Nɨ lǒ ngə́ á ma soŋ lá ngə́ ke mbɨ́ʼ ɨdzaŋ ɨnu tso mətsen le? Njingə be ma bontɨ awən le? Tsɛʼ a nkənu, ma chi kaʼ ma lan ghɨə!

²³Mbɨ́ʼ ngə́ ma díʼ awən lá nɨ ɨnu tsa Maʼmbyí a ghánɨ́ a mbó me ngə́: a nkwɛfɔ wa bɨ dzɨ́nɨ́ a mɨnaŋ atú Maʼmbyí Yeso lá, wɛrə a lɔ́gɨ́ a táʼ mbɛʼ abán,

²⁴a ghɨnə ngá a mɨya a mbó Ŋwi, mbatɨ a zɛrə ntiʼ soŋ ngə́, “Nə nɨ ɨnyam ɨnye ɨzə zen za ɨ tsinɨ a mbó bɨŋ ə. Nkfu tsum za nɨ ghɨnə a məzen nɨ waʼtɨnə aghə.”

²⁵Ndəŋndəŋ, bo ghɨnə mɛ́tɨ́ ndzɨ́ə, a lɔgɨ ndɔ́ŋ za mɨluʼ tsínɨ́ wə mu ntiʼ nkɨ soŋ ngə́, “Ndɔ́ŋ zɛnə nɨ akan zə fi za nɨ konɨ bɨŋ bɨ Ŋwi, alɛm azə a be alɨgɨ azhi ɛ. Nkfu tsum za nɨ nonɨ a zɛrə, á nɨ ghɨ mə lá a ngwáʼtɨ́ me ghe.”

²⁶Məzen a diʼ lá ngə́ nkfu tsum za nɨ kfurɨnɨ mbɛʼ abán zen nkɨ no ndɔ́ŋ zen, nɨ sóŋə́ lá anu mbɨ́ʼ nɨvwo nɨ Maʼmbyí ɨ kɔʼ kuʼ njwi za wɛrə lo bə yiŋə.

²⁷Ma lan, ŋwɔn tsum wa a kfurɨnɨ abán a Maʼmbyí kə ɨ no ndɔ́ŋ ɨzhi a nye ndóm wa ɨ shwɨgɨnə a wɛrə, ɨbvu ɨyi mɨ be ngə́ a tságə́ ɨnyam ɨnye Maʼmbyí abɔʼnɨ alɛm a wɛrə ghe.

²⁸Ma lan, nɨ tsi nɨ ndentɨ ɨtumbəm ɨtsən tsɛʼ a nkan ɨ zaʼnɨ bɔŋ ɨ kfurɨ abán a Maʼmbyí ɨ kɨ no ndɔ́ŋ ɨzhi ɛ.

²⁹Mbɨ́ʼ ngə́ be ɨbɛn tú zhi ɨlɨŋ ɨnyam ɨnye Maʼmbyí a nkfu za bo kfúrɨ́nə́ abán za nkə́ nǒ ndɔ́ŋ za muŋ bo byɛʼə lá ndɔn a nye ɨtumbəm ɨtsa tsɛʼ a nyom məwa.

³⁰Nə nɨ anu za a ghɨnɨ ɨbɛn bə ghaʼnɨ a tɨtərɨ bɨŋ ghɔgɨ nkɨ ntsi nɨ mɨghɔ, bə ghaʼnɨ kɨnə nkɨ nkfokɨ lá.

³¹Be a be ngə́ bɨgɨnə kwɛ ndentɨ ɨtumbəm ɨtsɨgɨnə ɨ shiʼnɨ ɨ zaʼnɨ muŋ Ŋwi a se awɨgɨnə sáʼə ghe.

³²Lá Maʼmbyí a sáʼə nkə́ nɨ̌ŋ ngɨ́ʼ lá taŋ á bɨ ghɨ nkeʼ awɨgɨnə chintɨ abɔʼnɨ ɨbɛn bɨ atuəshe ntsənkɨ bɨtsum ə.

³³Ma lan nə ɨbɔmbɨma ɨban, nkfu tsum za nɨ ghǒtɨnɨ a ndzɨ́ Ntárɨ́ Maʼmbyí, nɨ tsi nɨ njwiʼtə á ŋwɔn tsum a tsi a tɨshe zaʼnɨ ə.

³⁴Be ŋwɔn tse a zhi ngə́ nji ghɨ záŋ ayi adiʼ za nɨ ghótɨ́nə́, á dzɨ a ndá zɨ bɔŋ ɨ yiŋə. Adzaŋ məwen, a mɨ ghɨ ngə́ á Ŋwi a ghɨ́ nkeʼ awən sáʼ a nkfu za nɨ ghotɨnə. Ma mɨ chwɨgɨ ɨnu tsɨ mɔʼɔ tsa nɨ ŋwáʼnɨ́nɨ́ mbítɨ́ aghan nɨ tsɛrə lá a nkfu za ma yenɨ nkwatɨ awɨŋ ə.