Read Ngemba 1 Korɨnto 12 Bible Online

1 Korɨnto 12 - Ngemba bible

1 Korɨnto 12

¹Tɨtsɔŋnɨ, ma lǒ ngamə mbɨ́ʼ ɨnu tsa nɨ bítɨ́nɨ́ aghan mbɨ́ʼ ɨdzúm tsɨ ghanɨ tsa tsɨ lonə a mbó Azhwi zə Fɛmnɨ lá. Ɨbɔmbɨma ɨban, ma lǒ ngə́ á nɨ zhi nkənu za ɨ tsinɨ a nye tsɛrə ghe.

²Nɨ zhi ngə́ a nkfu za nɨ bvúrɨ́nɨ́ mbé bɨtɨbeməŋwi lá, bɨ tíntɨ́ awən a nye mɨndóm mə ghaʼnɨ ntsagɨ a mu ɨfənu a ngúʼsɨ́ ɨbɔ bɨ abe, ɨdzúm tsa ka tsɨ ngamə awa ghe.

³Ma lan, ma lǒ ngə́ á nɨ zhi ngə́ ka ŋwɔn tse a tsi ayi ɨwu wa Azhwi a Ŋwi a tsɨŋnɨnə ayi wa a chinɨ soŋ ngə́, “A bɨ lɔʼ a Yeso ghe!” Ŋwɔn tse a keʼ kɨ ntsi ɨwu wa a sóŋnə́ nɨ ntsu ɨyi ngə́, “Yeso a nɨ Maʼmbyí” tɨgha a tsɨŋnɨ Azhwi zə Fɛmnɨ ntsɨŋnɨ ayi ɛ.

⁴Ɨdzúm tsɨ ghanɨ tsɨ azhwi tsi a mbúŋə́ mbúŋə́, lá a tsɛrə ɨtsum a ghǎ táʼ Azhwi ə.

⁵Mɨndómɨnji tsi tsɛʼ mə ghaʼnɨ a faʼə ghe, lá bɨgɨnə bɨtsum faʼə lá tsɛʼ a mbó táʼ Maʼmbyí ɛ.

⁶Mɨndómɨnji tsi ɨwu tsɛʼ mə ghaʼnɨ a faʼ afaʼ, lá a nɨ tsɛʼ táʼ Ŋwi wa a ghɨnə ŋwɔn a chi faʼ mbúŋ afaʼ wa a nɨ ɨyi ɛ.

⁷Ŋwi a ghǎ Azhwi azhi a mbó ŋwɔn tsum taŋ á chi lɔgɨ Azhwi məzen ɨ faʼ nɨ zɛrə a nkwátɨ́ ŋwɔn tsum ə.

⁸Azhwi a Ŋwi a ghɨə táʼ ŋwɔn a ghamnɨ nɨgham na nɨ lonɨ nɨ zóŋ, lá ndəŋndəŋ Azhwi ghɨənə wu mɔʼɔ ŋwɔn a ghamnɨ nɨgham na nɨ lonɨ nɨ azhyɛ ghe.

⁹Táʼ Azhwi məwen a chi ghɨ á táʼ ŋwɔn a tsi nɨ abeməntəm, lá ɨ baŋnɨ ghɨ á wu mɔʼɔ ŋwɔn a tsi nɨ mɨtən a ntsúʼ mɨghɔ ə.

¹⁰Tsɛʼ táʼ Azhwi məwen a chi ghɨ á táʼ ŋwɔn a tsi nɨ mɨtən a ngɨ ɨnu tsɨ yerɨnɨ-yerɨnɨ ə; a mbó wu mɔʼɔ ŋwɔn á wɛrə a gha mɨtən wəmbo a fɨʼtɨ mɨnkən ma mɨ lonɨ a mbó Ŋwi; a mbó wu tse ŋwɔn á wɛrə a gha adaʼ a njí ɨdzúm tsɨ ghanɨ tsa tsɨ lonɨ a mbó Azhwi a Ŋwi kə ngáŋ ə. A mbó wu mɔʼɔ ŋwɔn wɛrə a gha mɨtən a ngam mɨgham mɨ ɨtóm ɨtóm, a mbó wu tse wɛrə gha adaʼ a fɨʼtɨ anu za mɨgham məmiŋ sóŋnə́ ghe.

¹¹A nɨ tsɛʼ táʼ, nkɨ mbe ndəŋndəŋ Azhwi za a ghɨnɨ mɨnu men mɨtsum ə; a nkɔŋ wɛrə, azúm zə ghanɨ atsum za wɛrə a ghánə́ a mbó ŋwɔn tsum a tsi tsɛʼ atú zɨə.

¹²Kristo a tsi lá tso táʼ mbəmnye za ɨ tsinɨ nɨ ɨlam ɨnye tsə ghaʼnə; bɨ baʼtɨ nkumnkɨ mbəmnye məzen nɨ ɨlam ɨnye atú atú lá, a kɨ mbvurɨ mbe tsɛʼ táʼ mbəmnye.

¹³Ndəŋndəŋ, bɨgɨnə bɨtsum, kə nɨ be be bə Yuda kə nɨ be be ba a se bə Yuda be, kə nɨ be be ɨbuʼ kə ɨbɛn nɨ ɨtú ɨtsa muŋ, ndəŋndəŋ Azhwi məzen a nɨŋnə nkyi atú bɨgɨnə bɨtsum a mu táʼ mbəmnye za, bɨgɨnə bɨtsum kɨnə nkɨ no ndəŋndəŋ Azhwi məza.[4]

¹⁴Mbəmnye se kɨ nkwaŋ ntsi lá tsɛʼ nɨ táʼ alam a ɨnye, ɨ tsi nɨ ɨlam ɨnye tsə ghaʼnɨ ə.

¹⁵Be a be ngə́ aku a chi soŋ ngə́, “Mbɨ́ʼ ngə́ ma sa abó be, ka ma be aghan alam a ɨnye a mbəmnye,” məzen a chi keʼ ghɨ á aku a keʼ bə mbe táʼ alam a ɨnye a mbəmnye ə.

¹⁶Be a be ngə́ atoŋnɨ a chi kɨ soŋ ngə́, “Mbɨ́ʼ ngə́ ma sa nɨdɨgɨ be, ka ma be aghan alam a ɨnye a mbəmnye,” məzen a chi keʼ ghɨ á atoŋnɨ a keʼ táʼ alam a ɨnye a mbəmnye bə mbe ə.

¹⁷A lo be be ngə́ mbəmnye tsum lá tsɛʼ nɨdɨgɨ nɛrə nɛrə, muŋ mbəmnye chi tiʼ zuʼ ɨnu ɨ nə́ le? Ɨ lo be be lá tsɛʼ atoŋnɨ zɛrə zɛrə, muŋ ɨ chi tiʼ ŋwiʼtɨ ɨdzúm ɨ nə́ le?

¹⁸Lá adzaŋ za a tsinɨ, Ŋwi a káʼ ɨlam ɨnye ɨtsum ɨ mɔ́ʼɔ́ mɔ́ʼɔ́ a mu mbəmnye lá tsɛʼ adzaŋ za wɛrə a kɨ́nə́ ndǒ ngə́ á tsɨ chyɛ.

¹⁹A lo be be ngə́ ɨlam ɨnye ɨtsum ɨtsum be lá tsɛʼ táʼ alam a ɨnye muŋ ka mbəmnye be ayi ɛ!

²⁰Adzaŋ za a tsinɨ lá, a tsi tsɛʼ táʼ mbəmnye lá ɨlam ɨchi baŋnɨ nghaʼə.

²¹Ma lan, nɨdɨgɨ chi keʼ soŋ a mbó abó ngə́, “Ka ma tsi aghan nɨ anu bɔgə ghe!” Atú a chi keʼ kɨ soŋ a mbó mɨku ngə́, “Ka ma tsi aghan nɨ anu bɔgə ghe!”

²²A baŋnɨ mbe be ɨlam ɨnye tsa tsɨ tsinɨ tso tsɨ bɔrɨkɨ lá mbáʼ bɨgɨnə chi keʼ tsi tɨ tsɛrə ghe;

²³ɨlam ɨnye tsa bɨgɨnə kwaʼtɨnɨ ngə́ tsɨ se lanɨ ntsi nɨ ɨlɨŋ lá, ɨ lá tsa bɨgɨnə lánə́ atú nɨ tsɛrə tsɛʼ a nkə; ɨlam ɨnye tsa bɨgɨnə se tsi nɨ ndě tsɛrə á ɨbɛn ndzě lá, bɨgɨnə kɨŋtə a tsɛrə nɨ ɨlɨŋ tsɛʼ a nkə,

²⁴lá mbáʼ ɨlam ɨnye tsɨ mɔʼɔ sě ndǒ adzaŋ akɨŋtɨ məziŋ ə. Ŋwi zɨmboŋ a káʼ mbəmnye lá a nye ndóm wa wɛrə a ghɨ́nɨ́ ngə́ á ɨlam ɨnye tsa tsɨ tsinɨ tso tsɨ se nɨ ɨlɨŋ tsi lá, á tsɨ baŋnɨ ntsi nɨ aŋɔntɨ ə.

²⁵Ma lan, ka ayɛbtɨ a tsi ayi ɨwu a mu mbəmnye, lá ɨlam ɨnye mbəmnye ɨtsum ɨ mɔ́ʼɔ́ mɔ́ʼɔ́ lə̌ atú a nye ɨtumbəm ɨtsa bo nɨbo ghe.

²⁶Be táʼ alam a ɨnye a mbəmnye a ndzǔʼ ndzaŋə muŋ ɨlam ɨnye ɨtsum mɨ kɨ zuʼnɨ ndzaŋə ghe; be bɨ kɔʼsɨ a táʼ alam a ɨnye atɨ́ muŋ ɨlam ɨnye tsɨ mɔʼɔ ɨtsum mɨ dorɨkɨ tso za bɨ kɔʼsɨnɨ atɨ́ lá.

²⁷Bən bɨtsum lá mbəmnye Kristo, táʼ ŋwɔn nɨ bən a be alam a ɨnye a zɛrə ghe.

²⁸A mu ndáŋwi, Ŋwi a tsɔʼ ɨbə́ŋ ɨbɛn bɨtsum a fɨʼ a fɨʼ ɨ nanə ghe: wɛrə a tsa mbyi ntsɔʼ ntóm Yeso, ndzɔŋtɨ ntsɔʼ ntóm Ŋwi, ntiʼ nkwiʼ ndzɔŋtɨ ntsɔʼ bɨdiʼ bɨ aŋwaʼnɨ, mbə ngɛn ɨwu ɨbɛn ba bɨ ghɨnɨ ɨnu tsɨ yerɨnɨ-yerɨnɨ, ngaŋ ntsuʼ ɨbɛn, ngaŋ ngǎ akwatɨ, ngaŋ ntsɨŋnɨ ɨbɛn abɔʼnɨ ɨbɛn ba bɨ ghamnɨ mɨgham mɨ ɨtóm ɨtóm ə.

²⁹Ka bo bɨtsum be awa ntóm Yeso kə ntóm Ŋwi kə bɨdiʼ bɨ aŋwaʼnɨ ə. Ka ŋwɔn tsum a tsi ayi nɨ mɨtən mɨ ngɨ ɨnu tsɨ yerɨnɨ-yerɨnɨ,

³⁰kə a ntsúʼ mɨghɔ kə a ngam mɨgham mɨ ɨtóm ɨtóm kə a fɨʼtɨ ɨnu tsa mɨgham miŋ sóŋnə́ ghe.

³¹Tíʼ lá ntɛgɨnɨ mɨntəm ɨmən a nye ɨdzúm tsɨ ghanɨ tsa tsɨ dɨtɨnə. Za a tsanɨ ɨtsum a nɨ ndómnji wa ma mɨ zɔŋtɨ diʼ a mbó bɨŋ ə.